1. San son sama e akisi denseefi leti enke Kownu David?

ALA sama wani den libi waka bun. Nawan sama á wani abi polobelema, ma toku wi e abi booko-ede son yuu. Son leisi son sama di e dini Yehofa e akisi denseefi aseefi sani di Kownu David be akisi Yehofa. A be taki: ‘On langa mi o tan teke a tyotyo ya. Na ala dei mi e kusumi.’​—Ps. 13:2.

2. San wi o luku aini a artikel ya?

² Winsi fa wi abi polobelema, toku sani de di u sa du fu wi á booko wi ede tumisi. Aini a artikel ya wi o luku wantu sani di e gi u booko-ede. Baka dati wi o luku sigisi sani di o yeepi u fu wi á booko wi ede tumisi.

3. San a wantu sani di e gi u booko-ede di wi á poi kengi?

³ A omen sani e gi u booko-ede. Wi á poi kengi son wan fu den sani ya. Ala yali sani enke nyanyan, koosi, anga peesi fu tan e kon moo dii. Te wi e go a wooko efuso sikoo, na ala yuu sama e gi u taanga-sikin fu du sani di Yehofa á lobi. Toku wi abi fu go a sikoo, wi abi fu go a wooko tu. Wi á poi tapu den ogii di e pasa na a pisi pe wi e tan, bika gaanse sama nai wooko anga san Beibel e taki. Saatan sabi taki son sama be o poti  pakisei a ‘den booko-ede fu a goontapu ya’ te da den gwe fika Yehofa (Mat. 13:22; 1 Yoh. 5:19). A di a sabi a sani ya meke ai du sani fu polobelema lai na a goontapu ya.

4. San sa pasa te wi abi tyaipi booko-ede?

⁴ Den polobelema fu u sa meke wi e booko wi ede pasa peesi. Kande wi e booko wi ede taki u ná o abi moni sai fu bai den sani di wi abi fanowdu. Kande wi e booko wi ede taki efu u siki neen wi á go a wooko, den o puu wi a wooko. Efuso kande wi e booko wi ede taki efu son tesi miti u, wi o gwe fika Yehofa. U sabi taki dyonson Saatan o meke sama kon feti anga a foluku fu Gadu. Kande wi e feele te wi e pakisei a sani ya. Kande yu e akisi iseefi taki: ‘A fowtu efu mi e booko mi ede anga den sani de?

5. San Yesesi be wani taki di a taki wi á mu ‘booko wi ede anga a libi fu u moo’?

⁵ Yesesi be taigi den bakaman fi en taki: ‘Wi á booko wi ede anga a libi fu u moo’ (Mat. 6:25). Yesesi á be wani taki wi á mu booko wi ede seefiseefi. Aini a ten di pasa, son sama di be e dini Yehofa be e booko den ede anga son sani, ma toku Yehofa be lobi den ete * (1 Kow. 19:4; Ps. 6:3). A taanga-sikin Yesesi be e gi u fu wi á booko wi ede pasa peesi anga den polobelema fu a libi, bika a sani ya be sa meke wi á dini Yehofa anga piisii moo. San u mu du te wi abi booko-ede?​—Luku a faki ‘ Fa i sa du a sani ya?’

6. Enke fa Filipisama 4:6, 7 e soi, da san o yeepi u te wi abi booko-ede?

⁶ (1) Begi naamo. Te sani e moo i, i sa begi Yehofa fu a yeepi i (1 Peit. 5:7). A o gi yu ‘a freide fi en di libisama á poi fusutan’. (Leisi Filipisama 4:6, 7.) Te i begi Yehofa, a o gi yu a santa yeye fi en. A sani ya o yeepi i fi yu á booko yu ede tumisi.​—Gal. 5:22.

7. San u mu holi a pakisei te wi e begi Yehofa?

⁷ Te yu e begi Yehofa, taigi en pilisisi san e moo yu. Taigi en san na a polobelema fi i, anga fa yu e fii. Efu wan fasi de fa i sa losi a polobelema, begi en fu a yeepi i fu du sani anga koni. Begi en tu fu a gi yu a kaakiti fu du san i mu du fu losi a polobelema. Efi i si taki a ná wan polobelema di i poi losi, begi Yehofa fu a yeepi i fi yu á booko yu ede tumisi. Efu wi e taigi Yehofa pilisisi fa u wani a yeepi u, a sani ya o yeepi u fu si fa ai piki den begi fu u. Efu Yehofa á piki a begi fi i na a yuu di i be denki, yu á mu gi abaa. Yehofa á wani i taigi en namo fa i wani a yeepi i, ma a wani i begi naamo tu.​—Luk. 11:8-10.

8. San wi á mu feegete fu du te wi e begi?

⁸ Te yu e begi Yehofa fu a yeepi i, yu á mu e feegete fu gi en daa. Winsi yu abi tyaipi booko-ede, toku i mu meke moiti fu si fa Yehofa e yeepi i. Son leisi sani e moo u te da u nai sabi san u mu taki te wi e begi. Ma holi a pakisei taki winsi yu á sabi san i mu taki, Yehofa o fusutan i winsi a taigi i taigi en taki:  ‘Yehofa yeepi mi baa.’​—2 Kolon. 18:31; Rom. 8:26.

9. San u mu du te wi e feele?

⁹ (2) Fitoow Yehofa, ná fitoow iseefi. Aini a ten fu polofeiti Yesaya, den sama fu Yuda be e feele taki den Asiriyasama be o go feti anga den. Fu di den á be wani den Asiriyasama wini den, meke den go akisi Egepte fu yeepi den (Yes. 30:1, 2). Yehofa be taigi den taki sani be o miti den fu di den be fitoow Egepte (Yes. 30:7, 12, 13). Yehofa meke Yesaya taigi a foluku pe den be sa fende yeepi. A taigi den taki: ‘Efu u wani taanga, u mu de pii, da u fitoow Yehofa.’​—Yes. 30:15b.

10. On ten u mu soi taki wi e fitoow Yehofa?

¹⁰ Fa u sa soi taki wi e fitoow Yehofa? Meke u taki i fende wan wooko pe yu o meke moo moni. Ma efi i teke a wooko ya, i ná o poi dini Yehofa moo enke fa i be e dini en fosi. Efuso kande wan sama a wooko e poolo gi i, ma a sama a ná wan Kotoigi. Efuso san i be o du efu wan famii fi i di i lobi taigi i taki efi yu e dini Yehofa go doo a ná o paa anga i moo? Nawan fu den sani ya á makiliki, ma i sa biibi taki Yehofa o yeepi i fu du sani anga koni (Mat. 6:33; 10:37; 1 Kor. 7:39). Yu o meke Yehofa yeepi i fu du sani anga koni?

11. Sowtu toli aini Beibel sa yeepi u fu fitoow Yehofa te tesi e miti u?

¹¹ (3) Leli wan sani fu sama di be e libi enke fa Yehofa wani, anga sama di á be e libi enke fa Yehofa wani. A omen toli de aini Beibel di e soi taki u mu e fitoow Yehofa te sani e miti u. Luku san be yeepi wantu sama di be e dini Yehofa fu den á buuya te tesi be e miti den. Di a moo hei kuutu osu fu den Dyu be taigi den apostel taki den á mu peleiki moo, den á be e feele. Den apostel taigi den taki: ‘U mu aliki Gadu moo libisama, bika neen na u tiiman’ (Toli 5:29). Winsi fa den be fon den apostel seefi, toku den á be e feele. Saide? Bika den be sabi taki Yehofa be de a den se, neen meke den tan paati a bun nyunsu (Toli 5:40-42). Di den be de fu kii Sitefanesi a á be e feele tu. Beibel taki en fesi be de enke ‘du fu wan engel’ (Toli 6:12-15). Saide a á be e feele? A fu di a be sabi taki a be du sani enke fa Yehofa wani.

12. Enke fa 1 Peitilisi 3:14 anga 4:14 e soi, da saide u sa piisii winsi tesi e miti u?

¹² Den apostel be man si kiin taki Yehofa be de anga den, bika a be gi den a kaakiti fu du wonduu (Toli 5:12-16; 6:8). Winsi wi á poi du wonduu aini a ten ya, toku Yehofa e soi wi aini Beibel taki a o holibaka gi u te tesi e miti u. Ai gi wi a santa yeye fi en di e yeepi u fu holidoo. (Leisi 1 Peitilisi 3:14; 4:14.) Neen meke pe fu wi e booko wi ede taki u ná o poi holidoo te tesi o miti u, a moo bun fu meke moiti taanga a biibi fu u. A sani ya o yeepi u fu fitoow Yehofa te tesi e miti. Leti enke den Kelesten fu fositen, useefi mu e biibi a sani di Yesesi be taki. A be taki: ‘Mi o meke u sabi san u mu taki. Den feyanti fu u ná o poi wini u, den ná o poi piki u tu.’ A paamisi u taki ‘efu u holidoo wi o fende libi’(Luk. 21:12-19). Holi a pakisei taki Yehofa e membee ala sani fu den sama  di holidoo te enke den dede. Di a yuu o doo a o weki den baka.

13. Sowtu wini wi e fende te wi e luku a libi fu den sama di á be e fitoow Yehofa?

¹³ U sa leli wan sani tu fu den sama di á be e fitoow Yehofa. Efu u teke ten pakisei a libi fu den sama ya u ná o meke denseefi fowtu di den be meke. Wan fu den sama ya a Kownu Asa fu Yuda. Di a be bigin tii, a be e fitoow Yehofa, bika di wan gaan kulu suudati be kon feti anga en, a be begi Yehofa neen Yehofa yeepi en (2 Kolon. 14:9-12). Ma bakaten di Kownu Baasa fu Islayeli be kon feti anga en, a pai Siriya fu yeepi en feti anga a kownu ya, winsi fa den suudati fu Baasa á be ipi. A á be e fitoow Yehofa moo (2 Kolon. 16:1-3). Di Asa siki seefi, a á begi Yehofa fu a yeepi en.​—2 Kolon. 16:12.

14. San a fowtu di Asa meke e leli u?

¹⁴ Biginbigin te polobelema be e miti Asa, a be e begi Yehofa fu a yeepi en. Ma bakaten a á be e go a Yehofa anga den polobelema fi en moo. Enseefi be e suku fu losi den. Di Asa be akisi Siriya fu yeepi en, a be gei enke sani be o go bun, ma bakaten na aseefi kondee ya daai kon feti anga Yuda. Yehofa be meke wan polofeiti taigi Asa taki: ‘I ná o wini den suudati fu a kownu fu Siriya, bika na a Kownu fu Siriya i fitoow, yu á fitoow Yehofa’ (2 Kolon. 16:7). Te wi abi polobelema, wi á mu e fitoow useefi te da u nai begi Yehofa fu a yeepi u. U mu e ondoosuku a Wowtu fi en fu sabi fa u mu losi den polobelema fu u. Winsi a wan polobelema di u mu losi gawgaw, wi á mu feti du sani, ma u mu begi Yehofa da a o yeepi u fu du sani anga koni.

15. San u sa du te wi e leisi Beibel?

¹⁵ (4) Meke moiti fu holi tekisi a ede. Efi yu e leisi Beibel neen i doo wan tekisi di e soi saide u mu fitoow Yehofa, meke moiti fu holi en a ede. Kande i sa sikiifi en a wan pampila, da yu e leisi en te enke i sabi en a ede. Yehofa be taigi Yowsuwa taki a be mu e leisi a Weiti ala yuu. A sani ya be o yeepi en fu du sani anga koni. A sani ya be o yeepi en tu fu abi deki-ati te a be e tii a foluku fu Gadu (Yow. 1:8, 9). A omen tekisi de aini Beibel di sa yeepi i fi yu á buuya te son sani miti i.​—Ps. 27:1-3; Odo 3:25, 26.

16. Fa Yehofa e meke a kemeente yeepi u te wi abi booko-ede?

¹⁶ (5) Paa anga a foluku fu Gadu. Yehofa e meke den baala anga sisa yeepi u fu wi á buuya te tesi e miti u. Te u de a komakandaa, wi e fende taanga-sikin te wi e yee den lezing di den baala e holi, anga den piki di den baala anga sisa e gi. Wi e fende taanga-sikin tu te wi e taki anga u baala anga sisa fosi komakandaa bigin, anga baka komakandaa (Heb. 10:24, 25). Wan taa sani di e yeepi u, a den mati fu wi aini a kemeente. Te wi e taigi den fa wi e fii den e gi u taanga-sikin, den e taki switi anga u. A sani ya e yeepi u fu kisi useefi baka.​—Odo 12:25.

17. Enke fa Hebrewsama 6:19 e soi, da fa den sani di Gadu paamisi wi e yeepi u fu wi á buuya te polobelema e miti u?

¹⁷ (6) Tan pakisei den sani di Yehofa paamisi u. A Kownukondee howpu de enke ‘wan ankaa gi u libi’. A howpu ya  e yeepi u fu wi á buuya te polobelema e miti u. (Leisi Hebrewsama 6:19.) Pakisei fa a libi o de te Yehofa o du ala den sani di a paamisi u. A ten de u ná o abi nawan booko-ede moo (Yes. 65:17). Aini a nyun goontapu, nawan fu den ogii di e pasa aini a ten ya o de moo (Mika 4:4). Wan taa sani di e taanga a biibi fu u, a te wi e taigi taawan den sani di Yehofa paamisi u. Neen meke i mu du ala san i man fu yeepi sama fu toon Yesesi bakaman. ‘A sani ya o yeepi i fu biibi anga i hii ati taki Gadu o du san a paamisi u.’​—Heb. 6:11.

18. San a den sani di sa miti wi aini a ten di e kon? San o yeepi u fu pasa den polobelema ya?

¹⁸ Moo a kaba e koosube, moo sani o go e pasa di o gi u booko-ede. A tekisi fu yali 2021 o yeepi u fu fitoow Yehofa te polobelema e miti u. A tekisi ya o yeepi u fu wi á buuya. Neen meke winsi san o miti wi aini a ten di e kon, wi á mu feegete san Yehofa taigi u. A taki: ‘Efu u wani taanga, u mu de pii, da u fitoow mi.’​—Yes. 30:15.