WAN peesi de a Yelusalem pe den e poti sani fu fositen di den fende. Den be fende wan pisi siton aini wan mongo-olo pe den be e beli sama koosube fu Hebron. Koniman e biibi taki sama be sikiifi sani na a siton ya a pisiten fu a yali 700 anga 600 Fosi Kelestesi. San sikiifi na a siton ya? Ai taki: ‘Yahweh Sebayot mu fuuku Hagaf, a manpikin fu Hagav.’ Fa a sani di sikiifi na a siton ya e holibaka gi Beibel? Ai soi taki sama be gwenti kai a nen fu Gadu, Yehofa, efuso YHWH, enke fa den be e sikiifi en aini Hebrewtongo aini Beibel ten. Te sama be go aini den sowtu mongo-olo ya den be lobi sikiifi Gadu nen ape. Den be e sikiifi sama nen tu di be mokisa anga Gadu nen.

Wan ondoosukuman den e kai Rachel Nabulsi fu a Universiteit fu Georgia taki: ‘Sama be gwenti kai a nen YHWH. A sani ya e soi taki a nen ya be pelensipali gi den Islayelisama.’ A sani ya e meke u fusutan saide a nen fu Gadu di sikiifi aini Hebrew tongo de omen dunsu toon aini Beibel. Den be e mokisa a nen fu Gadu anga den nen di den be e gi sama tu.

Den wowtu ‘Yahweh Sabayot’ di sikiifi na a siton wani taki: ‘Yehofa di e tii den engel’. A sani ya e soi taki den sama aini Beibel ten be lobi kai Yehofa ‘a Sama di e tii den engel tu’. Neen meke a nai foondoo u taki a moo enke 283 leisi den wowtu ‘Yehofa di e tii den engel’ sikiifi aini den Hebrew buku fu Beibel. A moo sikiifi aini den buku Yesaya, Yelemiya, anga Sakaliya.