1. San be miti David?

 DAVID be mu lowe, bika Kownu Saul be e suku fu kii en. Di David be abi nyanyan fanowdu, a go na a foto Nob neen a akisi a pilisite 5 beele (1 Sam. 21:1, 3). Bakaten en anga den man fi en go kibii aini wan mongo-olo (1 Sam. 22:1). Saide David be mu lowe?

2. Saide u sa taki Saul be e suku sani gi enseefi? (1 Samuweli 23:16, 17)

² Saul be e dyalusu anga David. Saide? Bika sama be lobi David moo Saul. Boiti dati, David be e wini feti moo en. Saul be sabi taki a di a á be e du sani enke fa Yehofa wani moo, meke Yehofa á be wani en enke kownu moo. A be sabi tu taki a Yehofa seefi be teke David fu tii enke kownu bakaten. (Leisi 1 Samuweli 23:16, 17.) Ma Saul be abi wan gaan kulu suudati, bika en a be kownu fu Islayeli ete. Neen meke David be abi fu lowe efu a be wani tan a libi. San Saul be e denki seefi? A be si enke a be o poi feti anga a sama di Yehofa seefi salufu fu toon kownu? (Yes. 55:11) Beibel nai taigi u san Saul be e denki. Ma u sabi taki Saul be e suku sani gi enseefi, bika noiti  sani e waka bun gi den sama di e feti anga Gadu.

3. Fa David be e fii winsi fa a libi á be makiliki gi en?

³ David á be abi heimembee. A á be e suku balinen tu. A neen seefi be akisi fu toon kownu, a Yehofa be gi en a gaandi de (1 Sam. 16:1, 12, 13). Saul be bigin si David enke en feyanti, neen meke a be wani kii en. Winsi fa den sani ya be e miti David, toku en ati á be boon a Yehofa. A á be kuutu taki a ná abi nyanyan sai, efuso taki aini mongo-olo a be mu tan. Ma a gei enke a di David be e kibii aini a mongo-olo ya, a sikiifi a singi di sikiifi aini Psalm 34:10. Wan pisi fu a singi ya e taki: ‘Den sama di e suku yeepi a Yehofa ná o mankei nawan sani.’

4. Sowtu akisi wi o luku? Saide a pelensipali fu poti pakisei a den akisi ya?

⁴ Ai taanga gi omen fu den sama di e dini Yehofa aini a ten ya fu fende nyanyan, efuso taa sani di den abi fanowdu. * A sani ya kon moo ogii di a corona siki paati a hii goontapu. Ma u sabi taki di a gaan banowtu o doo, sani o moo ogii (Mat. 24:21). Fu di a libi e taanga dei fu dei, meke wi o poti pakisei a fo akisi: Saide David be taki a nai mankei nawan sani? Saide u mu e tifeedi anga san wi abi? Saide u sa biibi taki Yehofa o solugu u? Fa u sa seeka nownow gi a ten di e kon?

5-6. Enke fa Psalm 23:1-6 e soi, da saide David be taki a ‘nai mankei nawan sani’?

⁵ San David be wani taki di a taki den sama di e dini Yehofa ná o mankei nawan sani? Psalm 23 e yeepi u fu fusutan a sani ya moo bun. (Leisi Psalm 23:1-6.) Aini vers wan fu a Psalm ya David taki: ‘Yehofa a mi sikapuman, mi ná o mankei nawan sani’. Aini den taa vers fu  a Psalm ya, David e soi sowtu wini a be e fende fu di Yehofa a be en sikapuman. David taki Yehofa be e yeepi en ‘fu du sani a wan letifasi’. A be e holibaka gi en ala yuu tu. David be sabi taki a ná fu di ai dini Yehofa, da sani á be o miti en. Son yuu sani be e moo en te, da a be e booko-saka. A omen feyanti a be abi tu. Ma David be sabi taki winsi san e miti en, toku noiti Yehofa be o gwe fika en.

⁶ Saide David be taki a ‘nai mankei nawan sani’? U si taki winsi David be e mankei nyanyan efuso taa sani di a be abi fanowdu son yuu, toku noiti en anga Yehofa be e poli. Neen meke a be taki a ‘nai mankei nawan sani’. A ná nyanyan anga koosi be e meke David piisii. David be e piisii anga san Yehofa be e gi en. San be moo pelensipali gi en, na a sabi di a be sabi taki Yehofa fende en bun.

7. Enke fa Lukasi 21:20-24 e soi, da san be miti den Kelesten fu Yudeya?

⁷ A sani di David taki ya e yeepi u fu si taki u mu si den gudu fu a goontapu ya enke fa Yehofa e si den. Efu wan sama abi gudu, a sa piisii anga den, ma noiti a mu si gudu enke a moo pelensipali sani aini en libi. Na a sani ya den Kelesten fu Yudeya be kon fusutan. (Leisi Lukasi 21:20-24.) Yesesi be taigi den taki wan ten be o kon pe ‘feyanti be o lontu Yelusalem’. A be taigi den taki te a sani ya o pasa, den mu ‘lowe go a den mongo’. Na a lowe di den be o lowe be o meke den tan a libi. Ma den be o abi fu fika den sani fu den a baka. Wan Wakititolen fu wantu yali pasa be taki: ‘Di den lowe den be fika den goon, den osu anga ala den taa sani di den be abi. Den be e biibi taki Yehofa be o solugu den, neen meke den be poti a dini di den be e dini Yehofa a fesi.’

8. San wi e leli fu a sani di be miti den Kelesten fu Yudeya?

⁸ San wi e leli fu a sani di be miti den Kelesten fu Yudeya? Aseefi Wakititolen di u be taki fi en aini paragraaf 7 e taki: ‘Aini den ten di e kon wi o abi fu soi san moo pelensipali gi u, a dini di wi e dini Gadu, efuso den gudu di wi abi. Di a gaan banowtu o bigin, kande wi o abi fu lowe gwe fika omen sani a baka enke den Kelesten fu Yudeya. Ma leti enke den Kelesten ya, u mu de seekaseeka fu dini Yehofa winsi san e pasa.’

9. Sowtu taanga-sikin wi e fende te u luku a sani di Pawlesi be taigi den Dyu?

⁹ Ná pikin taanga a libi be musu taanga gi den Kelesten fu Yudeya. Den be abi fu fika ala san den be abi, fu bigin wan nyun libi a wan taa kondee. Efu den á be e fitoow Yehofa, den á be o poi du a sani ya. Ma Yehofa be seeka den Kelesten ya a fesi. Feifi yali fosi den suudati fu Rome be lontu Yelusalem, apostel Pawlesi be taigi den Kelesten ya taki: ‘A fasi fa wi e libi mu soi taki wi á lobi moni. Ma u mu tifeedi anga san wi abi nownow, bika Gadu taki: “Mi ná o gwe fika i. Noiti mi o fika i wawan.” Neen meke u sa taki anga ala deki-ati taki: ‘A Yehofa a mi yeepiman. Mi ná o feele. San libisama o poi du anga mi?’ (Heb. 13:5, 6) A be o moo makiliki gi den Dyu di be e wooko anga a sani di Pawlesi taki ya fu gwenti a nyun libi fu den. A sani di Pawlesi be taigi den be e yeepi den fu biibi taki Yehofa o solugu den winsi pe den de. Aini a ten ya, useefi sa biibi taki Yehofa o solugu u winsi san e pasa.

10. San Pawlesi be taigi u?

¹⁰ Pawlesi be taigi Timotiyesi wan sani di be o yeepi en fu piisii winsi a á be abi tyaipi sani. U sa wooko anga a sani di Pawlesi be taigi Timotiyesi tu. A be taki: ‘Neen meke, efu wi abi nyanyan, koosi, anga wan peesi fu tan, da u mu tifeedi anga den sani de’ (1 Tim. 6:8). A sani ya wani taki wi á poi nyan switi nyanyan, abi wan bun peesi fu tan, efuso bai moin koosi fu wei? Nono, a ná dati Pawlesi be wani leli u. A be taki u mu tifeedi anga san wi abi (Filip. 4:12). Na a sani ya be e meke Pawlesi piisii. A moo pelensipali sani di wi abi na a dini di u poi dini Yehofa, a ná den gudu fu u.​—Hab. 3:17, 18.

11. San wi e leli fu a sani di Mosesi be taigi den Islayelisama?

¹¹ Son leisi wi e si enke wi abi son sani fanowdu, ma Yehofa e si taki u ná abi den fanowdu tuutuu. Luku san Mosesi be taigi den Islayelisama baka di den waka lontu 40 yali aini a sabana. A taigi den taki: ‘U Gadu Yehofa belesi ala san u du. A be e poti pakisei a u den 40 yali di u de aini a sabana. Noiti Yehofa gwe fika u, neen meke wi á be e mankei nawan sani’ (Deit. 2:7). Aini den 40 yali di den Islayelisama be de aini a sabana, Yehofa gi den mana fu nyan. Den koosi di den be wei komoto a Egepte á be e booko (Deit. 8:3, 4). Toku son wan fu den be e fii enke den be  e pina. Ma Mosesi soi den Islayelisama taki den be abi ala san den be abi fanowdu. Neen meke den be mu tifeedi anga den sani di Yehofa be e gi den. Yehofa o piisii te ai si taki yu e tifeedi anga den sani di yu abi. A o piisii te ai si taki yu e teke ala den sani di ai du gi i fu bigi, winsi a wan pikin sani.

12. San e soi taki David be e fitoow Yehofa winsi fa en a be wan bun fetiman?

¹² David be sabi taki noiti Yehofa o gwe fika den sama di lobi en. Winsi fa sama be e suku fu kii David a pisiten di a sikiifi Psalm 34, toku a be e fitoow Yehofa. A be de leti enke ‘a be e si den engel fu Yehofa taampu lontu en’ (Ps. 34:7). Kande David be e maiki a engel fu Yehofa anga wan suudati di e taampu luku efu feyanti e kon. Yehofa be paamisi David taki a be o toon kownu. Ma winsi fa David a be wan suudati di be wini omen feti, toku a á be e fitoow enseefi (1 Sam. 16:13; 24:12). A be e fitoow en Gadu, bika a be sabi taki a engel fu Yehofa ‘e fii den sama di e feele Gadu’. Kande Yehofa ná o du wan wonduu fu fii wi aini a ten ya, ma u sabi taki noiti a o fika den sama di e dini en fu pina naamo.

13. Saide a o gei enke wi o lasi a feti di Gok fu Magok o kon feti anga u? Saide u ná abi fu feele? (Luku a fowtow a fesise fu A Wakititolen.)

¹³ Dyonson sani o miti u pe wi o abi fu soi taki wi e fitoow Yehofa tuutuu. Di Gok fu Magok o kon feti anga a foluku fu Gadu, a o gei enke wi o lasi a feti ya. Wi o abi fu biibi taki Yehofa o feti gi u. Kande den foluku di o kon feti anga u, o si wi enke sikapu di ná abi sama fu kibii den (Eseik. 38:10-12). Wi a ná suudati, u ná abi fetisani tu. Den foluku di o kon makandaa fu feti anga u, o si wi enke sama di den sa kii makiliki. Den ná o si den somen engel fu Yehofa di de kabakaba fu feti gi u. Ná pikin dyombo den o dyombo di Yesesi anga den engel fi en o bigin feti anga den!​—Openb. 19:11, 14, 15.

14. San u mu du nownow fu seeka gi a ten di e kon?

¹⁴ San u mu du fu de seekaseeka gi a ten di e kon? A fosi sani, a taki wi á mu e si gudu enke a moo pelensipali sani aini u libi. U mu holi a pakisei taki dyonson wi o abi fu fika ala den sani di wi abi nownow. U mu e tifeedi anga san wi abi tu. A sani di mu moo pelensipali gi u, na a dini di wi e dini Yehofa. O moo yu o kon sabi Yehofa, o moo yu o biibi taki a o poi kibii u te Gok fu Magok o kon feti anga u.

15. Saide David be e biibi taki Yehofa be o yeepi en winsi san e miti en?

¹⁵ Luku wan taa sani di be yeepi David fu pasa den tesi di be e miti en. David be taki: ‘Tesi, da yu o si taki Yehofa bun. A sama di e go kibii neen o de koloku’ (Ps. 34:8). A sani di David taki ya e soi saide a be e biibi taki Yehofa o yeepi en. Ala yuu David be e fitoow Yehofa. Noiti Yehofa gwe fika en. Di David be yonkuu, a be feti anga a gadyaa Filisteyaman di den e kai Goliyat. A taigi a man ya taki: ‘Tide Yehofa o meke mi wini i’ (1 Sam. 17:46). Bakaten di David be e wooko gi Kownu Saul, a omen leisi a  kownu ya puubei fu kii en. Ma ‘Yehofa be de anga en’ ala yuu (1 Sam. 18:12). Fu di David be si omen leisi kaba fa Yehofa yeepi en, meke a be e biibi taki a be o yeepi en aini a ten di e kon tu.

16. San a wantu fasi fa u sa tesi fu si taki Yehofa bun?

¹⁶ Te wi e fitoow Yehofa nownow kaba, a o moo makiliki fu biibi taki a o yeepi u den dei di e kon. Efi i nai fitoow Yehofa, i ná o poi akisi i basi den dei di yu abi fanowdu fu go a konkelesi, efuso fu komoto fuuku a wooko fu go a komakandaa. Kande i teke deki-ati go taki anga i basi, neen a puu yu a wooko. Yu e biibi taki Yehofa poi solugu i? (Heb. 13:5) Omen baala anga sisa di e du a fuuten diniwooko si omen leisi fa Yehofa solugu den, di den be abi en taanga fanowdu. Noiti Yehofa e gwe fika den sama di e fitoow en.

17. San na a tekisi fu 2022? Saide na a tekisi ya den baala teke fu a yali ya?

¹⁷ Efu Yehofa de a u se, u ná abi fu feele den sani di o miti wi aini a ten di e kon. Noiti u Gadu o gwe fika u, solanga wi e soi taki a dini di wi e dini en na a moo pelensipali sani gi u. Den baala di e tii a wooko a hii goontapu, wani yeepi u fu si taki a pelensipali fu de seekaseeka gi den sani di o miti wi aini a ten di e kon. Neen meke den teke Psalm 34:10 enke a tekisi fu a yali 2022. Ai taki: ‘Den sama di e suku yeepi a Yehofa ná o mankei nawan sani.’