1-2. (a) On ten wi e moo pakisei wan sama fu u di dede? (b) San Yesesi taigi den bakaman fi en a neti fosi a dede?

 WINSI on langa wan sama fu u dede, toku noiti wi e feegete en. Ma gaanse leisi wi e moo denki en te a dei di a be dede e koosube. Te a dei de doo, a omen sani fi en wi e pakisei.

² Ala yali, miliyunmiliyun sama e kon makandaa fu membee a dede fu Yesesi Kelestesi (1 Peit. 1:8). Te u kon makandaa wi e pakisei a dede di Yesesi dede gi u fu u sa fende paadon fu sondu. Na a sani ya o yeepi u fu fende teego libi aini a ten di e kon (Mat. 20:28). Yesesi be taigi den bakaman fi en taki ala yali den be mu membee a dede fi en. A neti fosi a dede, a kai den kon makandaa neen a taigi den taki: ‘U mu e du a sani ya fu membee mi.’​—Luk. 22:19.

3. San wi o luku aini a artikel ya?

³ Wantu fu den sama di e membee a dede fu Yesesi ala yali, abi a howpu fu go a hemel. Ma gaanse fu den sama di e go na a Membeefesa, a goontapu ya den o tan aini wan paladeisi. Aini a artikel ya, wi o luku saide den tu kulu sama ya e angii fu go na a Membeefesa ala yali, anga sowtu wini yu o fende te i go na a Membeefesa.  Aini den paragraaf di e kon, wi o luku fosi saide den sama di o go a hemel e go na a Membeefesa.

4. Saide den salufu Kelesten e nyan a beele efuso diingi a win na a Membeefesa?

⁴ Ala yali den salufu Kelesten di e go na a Membeefesa, e nyan a beele da den e diingi a win. Saide den e du a sani ya? Fu man fusutan a toli ya moo bun, luku san be pasa a lasiti neti fosi sama kii Yesesi. Baka a Paskafesa, Yesesi soi den bakaman fi en fa den mu membee a dede fi en. A gi den elufu apostel fi en beele fu nyan anga win fu diingi. Na a neti ya Yesesi taigi den fu a nyun kuudei anga a Kownukondee kuudei * (Luk. 22:19, 20, 28-30). Den kuudei ya be o opo pasi gi den apostel anga wantu taa sama fu toon kownu anga pilisite aini hemel (Openb. 5:10; 14:1). A den salufu Kelesten di de a goontapu ete e nyan a beele efuso diingi a win na a Membeefesa.

5. Fa den salufu Kelesten e si a howpu di Yehofa gi den?

⁵ San a wan taa sani di meke den salufu Kelesten e angii fu go na a Membeefesa ala yali? A Membeefesa e gi den a okasi fu pakisei a howpu di den abi. A wan gaan sani Yehofa paamisi den 144.000 sama ya, bika den abi a gaandi fu tii makandaa anga Yesesi. Den ná o poi dede noiti moo. Boiti dati, den o de koosube fu Yehofa Gadu (1 Kor. 15:51-53; 1 Yoh. 3:2). Den salufu Kelesten e fusutan taki a wan gaandi Yehofa gi den fu go tii makandaa anga en Manpikin a hemel. Ma efu den wani fende a gaandi ya, den abi fu holidoo te enke den dede (2 Tim. 4:7, 8). Te den de na a Membeefesa, den e pakisei a howpu di den abi. A sani ya e meke den piisii (Tit. 2:13). Ma fa a de anga den taa sikapu? (Yoh. 10:16) Saide den e go na a Membeefesa ala yali?

6. Saide den taa sikapu e go na a Membeefesa ala yali?

⁶ Den taa sikapu nai go na a Membeefesa fu nyan a beele efuso diingi a win, ma den e go fu holibaka gi den salufu baala anga sisa fu den. A fosi leisi di den salufu Kelesten kai den taa sikapu fu kon na a Membeefesa, na a yali 1938. Aini A Wakititolen fu 1 maart 1938 den taki: ‘A o de wan moin sani fu den taa sikapu de na a Membeefesa fu luku fa sani e waka, bika a dei ya a wan piisii dei gi den tu.’ Leti enke fa den sama di e holibaka gi wan toowpaa na a fesa fu den e piisii, a so den taa sikapu e piisii fu holibaka gi den salufu Kelesten na a Membeefesa, winsi fa den ná o nyan a beele efuso diingi a win.

7. Saide den taa sikapu e piisii fu go na a Membeefesa?

⁷ Den taa sikapu seefi e pakisei a howpu fu den te den de na a Membeefesa. A lezing di e holi a neti de, e taki san Kelestesi anga den 144.000 sama di o tii makandaa anga en, o du gi libisama aini a Dunsu Yali Tii. Na a pisiten de, Yesesi  anga ala den salufu Kelesten di de a hemel o seeka a goontapu te enke a toon wan paladeisi. Den o yeepi libisama tu fu den ná abi sondu moo. A soso sama di e aliki Gadu o de a goontapu a ten de. Te den taa sikapu de na a Membeefesa, den e fende ten fu pakisei fa ala den sani ya o pasa dyonson. Wantu fu den sani di Gadu paamisi u sikiifi a Yesaya 35:5, 6; 65:21-23, anga Openbaring 21:3, 4. Te den taa sikapu e teke ten pakisei ala den sani di Yehofa paamisi wi aini a ten di e kon, a biibi fu den e moo taanga. A sani ya o yeepi den fu den á gwe fika Yehofa.​—Mat. 24:13; Gal. 6:9.

8. San a wan taa sani di meke den taa sikapu e go na a Membeefesa?

⁸ Den taa sikapu e go na a Membeefesa tu fu holibaka gi den salufu baala anga sisa fu den. Den e du a sani ya fu di den lobi den. A Wowtu fu Gadu be taki den salufu Kelesten anga den taa sikapu be o go e wooko makandaa. Fa den e du a sani ya? Meke u luku wantu fasi fa den e wooko makandaa.

9. San a polofeititoli di sikiifi a Sakaliya 8:23 e leli u?

⁹ Leisi Sakaliya 8:23. A polofeititoli ya e soi fa den taa sikapu be o libi anga den salufu baala anga sisa fu den. A Dyu aini a polofeititoli ya a den salufu baala anga sisa di de a goontapu ete (Rom. 2:28, 29). Den ‘tin man fu ala sowtu nasi’, a den taa sikapu. A tekisi taki ‘den tin man o kisi a Dyu holi neen koosi’. Dati wani taki den taa sikapu anga den salufu Kelesten be o dini Gadu makandaa. Neen meke ala yali, den anga den salufu Kelesten e kon makandaa fu membee a dede fu Yesesi. A so den e soi taki den e holibaka gi den.

10. Fa Yehofa meke a polofeititoli di sikiifi a Eseikiyeli 37:15-19, 24, 25 kon tuu?

¹⁰ Leisi Eseikiyeli 37:15-19, 24, 25. Fa Yehofa meke a polofeititoli ya kon tuu? Aini a ten ya, den salufu Kelesten anga den taa sikapu e wooko makandaa. A polofeititoli e taki fu tu tiki. Den baala anga sisa di abi a howpu fu go a hemel, na a tiki fu Yuda pe den kownu fu Islayeli be komoto. Den baala anga sisa di abi a howpu fu tan a goontapu ya, na a tiki fu Efrayim. * Yehofa be taki a o tyai den tu kulu ya kon a wan, da den be o toon wan tiki. Dati wani taki ala den tu kulu be o abi a wan Kownu. A Kownu ya a Yesesi Kelestesi. Ala yali den salufu Kelesten anga den taa sikapu e kon makandaa fu membee a dede fu Yesesi, bika ‘na a wan sikapuman’ den abi.​—Yoh. 10:16.

11. San na a moo pelensipali fasi fa den ‘sikapu’ di kai a Mateyesi 25:31-36, 40 e holibaka gi den baala fu Kelestesi?

¹¹ Leisi Mateyesi 25:31-36, 40. Den sikapu di a tekisi ya e taki fi en, a den sama fu a ten ya di abi a howpu fu libi aini wan paladeisi a goontapu. Den e holibaka gi den baala fu Kelestesi di de a goontapu ya ete. Den e yeepi den fu paati a bun nyunsu a hii goontapu.​—Mat. 24:14; 28:19, 20.

12-13. Sowtu taa fasi den taa sikapu e holibaka gi den baala fu Kelestesi?

¹² Wantu wiki fosi a Membeefesa, den taa sikapu e du ala san den poi fu kai sama kon membee a dede fu Yesesi makandaa  anga den. A sani ya a wan fasi fa den e holibaka gi den baala fu Kelestesi. (Luku a faki di den e kai ‘ Yu e seeka a fesi gi a Membeefesa?’) Ma a ná kai namo den e kai sama, den e seeka sani tu fu ala kemeente a hii goontapu sa membee a dede fu Yesesi, winsi nawan sama á de aini a kemeente di o nyan a beele efuso diingi a win. Den e piisii fu holibaka gi den baala fu Kelestesi. Den taa sikapu sabi taki Yesesi e si ala san den e du gi den baala fi en a goontapu ya, enke neen seefi den e du en gi.​—Mat. 25:37-40.

¹³ Saide ala Kelesten e go na a Membeefesa winsi den o go a hemel efuso tan a goontapu ya?

14. Fa Yehofa anga Yesesi soi taki den lobi u?

¹⁴ Wi e teke a sani di Yehofa anga Yesesi du gi u fu bigi. A omen fasi Yehofa soi taki a lobi u, ma a moo gaan fasi fa a du a sani ya, a di a sende en wan kodo Manpikin kon dede gi u (Yoh. 3:16). Yesesi seefi soi taki a lobi u bika a be de kabakaba fu kon dede gi u (Yoh. 15:13). U ná o poi pai Yehofa anga Yesesi fu a gaan bun di den du gi u ya, ma a fasi fa wi e libi o soi efu wi e teke san den du gi u fu bigi (Kol. 3:15). Te wi e go na a Membeefesa ala yali, a sani ya e yeepi u fu pakisei san Yehofa anga en Manpikin du gi u.

15. Saide den salufu Kelesten anga den taa sikapu e teke a sani di Yehofa anga Yesesi du gi u fu bigi?

¹⁵ Ai bigi gi u taki Yehofa sende en Manpikin kon dede gi u (Mat. 20:28). Den salufu Kelesten e teke a sani di Yehofa anga Yesesi du gi den fu bigi, bika na a sani ya meke den fende a gaandi fu go a hemel. Fu di den e biibi taki den sa fende wini fu a dede fu Yesesi, meke Yehofa e si den enke sama di e libi a wan letifasi. A teke den enke en pikin fu go tan a hemel makandaa anga en anga en Manpikin (Rom. 5:1; 8:15-17, 23). Den taa sikapu e teke a sani di Yehofa anga en Manpikin du gi den fu bigi tu. Na a biibi di den e biibi taki Yesesi dede gi den, meke denseefi abi a howpu fu pasa a ‘gaan banowtu’ libilibi. Na a sani ya meke Gadu e si den enke sama di ati kiin (Openb. 7:13-15). Wan fasi fa den salufu Kelesten anga den taa sikapu e soi taki den e teke a sani di Yehofa anga Yesesi du gi den fu bigi, a te den e go na a Membeefesa ala yali.

16. San a wan taa sani di meke wi e go na a Membeefesa ala yali?

¹⁶ Wan taa sani saide meke wi e go na a Membeefesa, a fu soi taki wi e aliki Yesesi. Winsi yu abi a howpu fu go a hemel efuso fu libi a goontapu ya, tokuso i mu du a sani di Yesesi be taki a lasiti neti fosi a dede. A be taki: ‘U mu e du a sani ya fu membee mi.’​—1 Kor. 11:23, 24.

17. Fa a Membeefesa e yeepi u fu kon moo koosube a Yehofa?

¹⁷ Wi anga Yehofa e toon moo bun mati (Yak. 4:8). Enke fa u be luku kaba, da te u de na a Membeefesa wi e pakisei a gaan sani di Yehofa du gi u, anga den sani di a o du gi wi aini a ten di e kon (Yel. 29:11; 1 Yoh. 4:8-10). Te wi e teke ten pakisei ala den fasi fa Yehofa soi taki  a lobi u, wi o moo lobi en. A sani ya e meke wi anga en toon moo bun mati.​—Rom. 8:38, 39.

18. Sowtu wini wi e fende te wi e teke ten pakisei fa Yesesi du sani di a be de a goontapu ya?

¹⁸ Te u go na a Membeefesa, wi e fende taanga-sikin fu waka a Yesesi baka (1 Peit. 2:21). Te a Membeefesa koosube, den pisi di wi e leisi aini Beibel e taki fu a lasiti wiki di Yesesi be de a goontapu, a dede fi en, anga san pasa baka di Gadu weki en. A lezing di e holi na a Membeefesa e yeepi u fu pakisei ala den fasi fa Yesesi soi taki a lobi u (Efe. 5:2; 1 Yoh. 3:16). Efu wi e teke ten pakisei ala den sani di Yesesi du gi u, wi o fende taanga-sikin ‘fu du sani enke fa a be e du sani’.​—1 Yoh. 2:6.

19. San o yeepi u fu wi á gwe fika Yehofa?

¹⁹ A Membeefesa e yeepi u fu wi á gwe fika Yehofa (Yud. 20, 21). Efu wi á wani gwe fika Yehofa, u mu e du san a taki ala yuu. A so wi o meke en ati piisii (Odo 27:11; Mat. 6:9; 1 Yoh. 5:3). Te u go na a Membeefesa wi e moo fende taanga-sikin fu libi enke fa Yehofa wani. A o de leti enke wi e taigi Yehofa taki: ‘Yehofa mi wani dini i fu teego!’

20. Saide u mu e go na a Membeefesa ala yali?

²⁰ Winsi wi abi a howpu fu go a hemel efuso fu libi a goontapu ya, tokuso ala u mu go na a Membeefesa. Te wi e go na a Membeefesa wi e membee a dede fu wan sama di ala u lobi, Yesesi Kelestesi. Wi e abi a okasi fu poti pakisei na a gaan sani di Yehofa anga en Manpikin du gi u. A yali ya, a Membeefesa o holi a feeda 15 april 2022. U lobi Yehofa anga en Manpikin, neen meke a dei di Yesesi dede gi u mu de a moo pelensipali dei aini a yali. Nawan sani á mu tapu u fu go na a Membeefesa.