1-3. Sowtu sani sa meke den sama di e dini Yehofa kee?

 ON TEN na a lasiti leisi di i kee? Son leisi sani e switi gi u te, da wataa e lon a wi ain. Ma gaanse leisi wi e kee fu di buduufu de a wi ati. Kande wi e kee fu di wan sama di u lobi dede. Lorilei, wan sisa di e tan na Ameekankondee taki: ‘Son leisi te mi denki a meisyo fu mi di dede, a sani ya e du mi ogii te, da mi e akisi miseefi fa mi boo e du naki ete anga a pen di mi e fii ya.’ *

² Ma kande a taa sani e meke i kee. Hiromi, wan pionili di e tan a Yapan taki: ‘Son leisi den sama aini a peleikiwooko nai wani aliki a bosikopu di wi e paati. A sani ya e meke mi fii booko-saka. Son leisi ai du mi ogii te, da mi e begi Yehofa anga ala wataa-ain fu a yeepi mi fu mi fende wan sama di wani sabi a tuu.’

³ Kande wan fu den sani di kai aini den paragraaf ya e miti i (1 Peit. 5:9). Ala u wani ‘dini Yehofa anga piisii’. Ma son yuu anga wataa na ain wi e dini en. Saide? Bika son yuu wi e de anga buduufu na ati. Son leisi tesi e miti u di e meke a taanga gi u fu dini Yehofa (Ps. 6:6; 100:2). San o yeepi u te wi e fii enke wi á poi moo?

4. San wi o luku aini a artikel ya?

 ⁴ A omen sani u sa leli fu Yesesi. Son leisi sani be e moo en te, da ‘a be e kee’ (Yoh. 11:35; Luk. 19:41; 22:44; Heb. 5:7). Meke u luku wantu fu den leisi di Yesesi be kee, anga san u sa leli fu den toli ya. Wi o si tu san u sa du, te sani e miti u di e meke u kee.

5. San a toli di sikiifi a Yohanisi 11:32-36 e leli u fu Yesesi?

⁵ Aini a yali 32, wan bun mati fu Yesesi den e kai Lasalesi be siki te neen a dede (Yoh. 11:3, 14). A man ya be abi tu sisa, Maliya anga Maata. Ná pikin hati a dede fu den baala be hati den. Yesesi be lobi a osufamii ya, en anga den a be bun mati. Neen meke baka di Lasalesi dede, Yesesi teke pasi go a Betaniya, a pe den be e tan. Di Maata yee taki Yesesi de a pasi e kon, a lon go miti en. Pakisei fa Maata be e fii di a taki: ‘Masaa, efi i be de ya mi baala á be o dede’ (Yoh. 11:21). Baka di Yesesi si fa Maata anga den taawan e kee, enseefi ‘bigin kee.’​—Leisi Yohanisi 11:32-36.

6. Saide Yesesi kee di Lasalesi dede?

⁶ Saide Yesesi kee? Wan buku e taki: ‘A dede fu Lasalesi, anga a tyali di den sisa fu Lasalesi be e tyali du Yesesi ogii, neen meke enseefi bigin kee.’ * Kande a be pakisei a pen di Lasalesi be e fii a pisiten di a be siki. Kande a be e pakisei fa Lasalesi fii tu di a fusutan taki a o dede dyonson. Di Yesesi si fa a dede fu Lasalesi du Maata anga Maliya ogii, a sani ya meke a kee. Efu wan sama di i lobi dede, da i sabi fa Yesesi be e fii. Meke u luku dii sani di u sa leli fu a toli ya.

7. San a kee di Yesesi kee gi Lasalesi e leli u fu Yehofa?

⁷ Yehofa e fusutan fa yu e fii. Yesesi abi ‘denseefi manii’ fi en Dda (Heb. 1: 3). Di Yesesi kee, a be soi fa en Dda be e fii (Yoh. 14:9). Efu wan sama di i lobi dede, i sa biibi taki Yehofa e si a buduufu di de a yu ati. A sabi fa yu e fii, ai booko en ede anga i. A wani yeepi i fu piisii baka.​—Ps. 34:18; 147:3.

8. Saide i sa biibi taki Yesesi o weki den sama fi i di dede baka?

⁸ Yesesi e angii fu weki den sama fi i di dede baka. Fosi Yesesi kee, a taigi Maata taki: ‘I baala o weki baka.’ Maata be e biibi Yesesi (Yoh. 11:23-27). Maata a wan sama di be e dini Yehofa anga en hii ati. Neen meke a be musu yee fa polofeiti Eliya anga Elisa be weki dedesama (1 Kow. 17:17-24; 2 Kow. 4:32-37). A be musu yee fu den taa sama di Yesesi be weki tu (Luk. 7:11-15; 8:41, 42, 49-56). Iseefi sa biibi taki ala den sama fi i di dede o weki baka. A kee di Yesesi kee di en mati dede, e soi taki ai du en ogii te wan sama di u lobi dede, ai angii fu weki den baka.

9. Fa u sa toosutu den sama di e tyali leti enke Yesesi? Gi wan ondoofenitoli.

⁹ Toosutu den sama di e tyali. A ná kee namo Yesesi be kee anga Maata anga Maliya, ma a be e aliki den te den be e puu koko a den ati. A be e gi den taanga-sikin tu. U sa du aseefi sani aini a ten ya. Dan, wan owluman di e tan a Australiya taki: ‘Baka di a uman fu mi dede, mi be abi toosutu fanowdu. A omen toowpaa be e meke ten dei anga neti fu aliki mi. Den á be e fii wan fasi te mi be e kee. Boiti dati, den be e yeepi mi anga sani di mi be abi fanowdu. Son wan be e yeepi mi wasi mi wagi, taawan be e go bai sani gi mi, efuso boli gi mi. Den be lobi begi anga mi tu.’ Den baala anga sisa ya soi taki den a tuutuu ‘mati di meke fu yeepi i te i fuka’.​—Odo 17:17.

10. San pasa aini Lukasi 19:36-40?

¹⁰ Di Yesesi go a Yelusalem na a 9 Nisan fu a yali 33, wan gaan kulu sama kon miti en. Di a doo koosube fu a foto, den sama baala den koosi fu den a doti fu bali wadaa gi en enke den Kownu. A sani ya a be wan piisii sani. (Leisi Lukasi 19:36-40.) Ma Beibel taki: ‘Di a kon moo koosube, a luku a foto neen a bali kee.’ Anga ala wataa na a ain a taki san be o miti den sama fu Yelusalem.​—Luk. 19:41-44.

11. Saide Yesesi kee gi den sama fu Yelusalem?

¹¹ Tyali fu den sama aini Yelusalem be e kisi Yesesi. Bika a be sabi taki winsi fa den be bali wadaa gi en enke kownu, toku gaanse fu den á be o wani aliki a Kownukondee bosikopu. Na a sani ya meke Yelusalem be o booko. Sama be o tyai den Dyu di be o tan a libi go a taa kondee enke katiboman (Luk. 21:20-24). Sani pasa leti enke fa Yesesi be taki. Gaanse fu den Dyu ná aliki a bosikopu di a be e paati. Den sama na a pisi pe yu e peleiki, e aliki a bosikopu di wi e paati? San i sa leli fu Yesesi efu gaanse fu den nai aliki? Meke u luku ete dii sani.

12. San a kee di Yesesi kee gi Yelusalem e leli u fu Yehofa?

¹² Yehofa e booko en ede anga sama. A kee di Yesesi kee, e soi taki Yehofa e booko en ede anga u. Beibel taki: ‘Yehofa á wani nawan sama dede. Ma a wani ala sama fende a okasi fu tapu  anga den sondu fu den’ (2 Peit. 3:9). Fu di useefi lobi sama leti enke Yehofa, meke wi e du ala san u poi fu peleiki gi den.​—Mat. 22:39.

13-14. Fa Yesesi soi taki a be e booko en ede anga sama? Fa u sa waka neen baka?

¹³ Yesesi be e wooko taanga aini a peleikiwooko. Fu di Yesesi be lobi sama, meke a be e teke ala okasi fu peleiki gi den (Luk. 19:47, 48). Saide a be e du a sani ya? Beibel taki tyali fu den sama be e kisi en. Son leisi den sama di be e wani aliki Yesesi be e ipi te, da en anga den disipel fi en ‘á be e abi ten fu nyan seefi’ (Malik. 3:20). Yesesi á be abi fasiti yuu di a be e peleiki gi sama. Efu a neti be moo bun gi wan sama, na a yuu de a be e meke moiti fu taki anga en (Yoh. 3:1, 2). Winsi fa gaanse fu den sama di aliki Yesesi á toon en bakaman, toku a du ala san a be poi fu yeepi den. Aini a ten ya, useefi mu du ala san u poi fu yeepi sama fu yee a bun nyunsu (Toli 10:42). Efu u wani peleiki gi ala sama, kande wi o abi fu kengi a fasi fa wi e du a peleikiwooko.

¹⁴ I mu de kabakaba fu kengi a fasi fa i gwenti du sani. Efu na aseefi yuu wi e du a peleikiwooko ala yuu, a omen sama u ná o miti. Wan pionili sisa den e kai Matilda taki: ‘Mi anga a man fu mi e meke moiti fu miti ala sowtu sama. Mamanten wi e peleiki a den bisnis peesi, mindii dei wi e wooko anga a pikin wagi, bakadina wi e peleiki osu fu osu.’ A tuu taki a moo makiliki fu go a peleikiwooko na a yuu di bun gi u. Ma efi i wani peleiki gi ala sama, kande yu o abi fu luku wan yuu di moo bun gi den sama. Te yu e du ala san i poi fu peleiki gi ala sama, da a ná abi misi, Yehofa o belesi a moiti di yu e meke.

15. Enke fa Lukasi 22:39-44 e soi, da san pasa a lasiti neti fosi Yesesi dede?

¹⁵ Na a neti fu 14 Nisan aini a yali 33, Yesesi go na a dyali Getsemanei. Di a doo ape, a begi Yehofa. A taigi en ala san  be de neen ati. (Leisi Lukasi 22:39-44.) Beibel taki sani be moo Yesesi a neti de, neen meke ‘a begi anga en hii ati. A bali kee seefi’ (Heb. 5:7). San Yesesi begi en Dda a neti fosi a dede? A begi en Dda fu gi en a kaakiti di a abi fanowdu fu tan du sani enke fa a wani. Di Yehofa si taki sani be e moo Yesesi tuutuu, a sende wan engel kon gi en taanga-sikin.

16. Saide Yesesi kee aini a dyali Getsemanei?

¹⁶ Saide Yesesi kee aini a dyali Getsemanei? A be kee bika a be e hati en taki sama be o si en enke wan sama di kosi Gadu. A be sabi taki a wan gaan faantiwowtu a be abi tu, bika na a holi di a be o holidoo, be o santa a nen fi en Dda. Efu wan sani e miti i nownow di e meke a taanga gi i fu tan dini Yehofa, da san a kee di Yesesi be kee e leli i? Meke u luku dii sani di u sa leli fu a sani ya.

17. Saide Yehofa be aliki a begi fu Yesesi? San a sani ya e leli u?

¹⁷ Yehofa e aliki te yu e begi en. Yehofa be aliki a begi fu Yesesi. Saide? Yesesi be akisi en Dda fu a yeepi en fu du sani enke fa a wani. A moo pelensipali sani gi Yesesi, na a santa di a be wani santa Yehofa nen. Efi yu e begi Yehofa fu a yeepi i fu tan dini en, efuso fu du sani di o santa a nen fi en, da Yehofa o aliki a begi fi i tu.​—Ps. 145:18, 19.

18. Saide u sa taki Yesesi de enke wan mati di e fusutan u?

¹⁸ Yesesi e booko en ede anga i. Te sani e moo u, wi e fii bun te wan mati e soi taki ai booko en ede anga u. Moomoo efu a wan mati di be miti aseefi sani di e miti u. Yesesi a u mati, a sabi fa wi e fii te sani e moo u. Bika den sani di e miti u, be miti en tu. Neen meke a o yeepi wi anga san wi abi fanowdu fu kisi useefi baka (Heb. 4:15, 16). Leti enke fa wan engel be yeepi Yesesi aini a dyali Getsemanei, a so u mu de kabakaba fu teke a yeepi di Yehofa e gi u. Son leisi a wan buku, wan felon, wan lezing, efuso wan mati di abi ondoofeni ai koboloiki fu gi u taanga-sikin.

19. San o yeepi i fu kisi iseefi baka te sani e moo i? Gi wan ondoofenitoli.

 ¹⁹ Yu o fende ‘a freide fu Gadu’. Fa Yehofa o taanga u? Te u begi Yehofa, a o gi wi ‘a freide fi en, di bigi moo san libisama poi fusutan’ (Filip. 4:6, 7). A freide fu Yehofa e yeepi u fu wi á buuya. Luku fa a sani ya be yeepi wan sisa den e kai Luz. A taki: ‘Son leisi mi e fii enke a mi wawan de. Son leisi den fii ya e moo mi te, da mi e si enke Yehofa á lobi mi. Ma te mi e fii so, mi e begi Yehofa da mi taigi en fa mi e fii. Begi e yeepi mi fu kisi miseefi baka.’ Enke fa a toli fu a sisa ya e soi, da begi o yeepi u, te sani e moo u.

20. San u leli fu a kee di Yesesi be e kee?

²⁰ A omen sani wi e leli fu a kee di Yesesi be e kee. U leli taki u mu e toosutu den mati fu u te den e tyali. U si tu taki Yehofa anga Yesesi o holibaka gi u te wan sama di u lobi dede. U leli tu taki u mu e peleiki gi ala sama, bika Yehofa anga Yesesi á wani nawan fu den sama ya dede. Wi e fii bun te u pakisei taki Yehofa anga en Manpikin sabi fa wi e fii. Neen meke gaantangi, tan du ala den sani di u leli tide te enke Yehofa ‘dee den wataa-ain fu wi’ enke fa a paamisi u.​—Openb. 21:4.