A wowtu ‘asiwagi’ di kai aini a Nyun Goontapu vertaling e soi go a omen sowtu asiwagi (Toli 8:28, 29, 38). A gei enke a asiwagi fu a Etiyopiyaman be bigi moo den asiwagi di sama be e koboloiki te be e go a feti. A gei enke a be bigi moo den wan di den be e siteelon tu. Luku wantu sani di e soi saide u sa taki a sani ya.

A heiheiman fu Etiyopiya be komoto a wan faawe peesi. ‘A man ya be e wooko gi Kandase, a umankownu fu den Etiyopiyasama. Neen be e luku ala den gudu fu a umankownu ya’ (Toli 8:27). A pisi kondee fu Etiyopiya be e bigin fanafu Sudan te anga den moo faawe pisi fu a zuid se fu Egepte. A ná aseefi asiwagi a man ya be lei a hii pisiten di a be de a pasi. A be musu abi lai tu, anga taa sani di a be o abi fanowdu di a be o de a pasi. Son wan fu den asiwagi fu a ten de be e abi fo futu. Den be e poti wan daki gi den tu anga peesi fu poti lai. Wan buku e taki: ‘A daki di den be e poti a den asiwagi ya be e meke a moo makiliki fu go a faawe peesi, bika a be e switi fu sidon aini.’​—An Exegetical Commentary

A Etiyopiyaman be e leisi di Filipesi go miti en. Beibel e soi taki ‘Filipesi bigin lon na a sikin wagi. Neen a yee taki ‘na a buku fu polofeiti Yesaya a man be e leisi’ (Toli 8:30). Den asiwagi di sama be e lei te den be e go a peesi á be e lei taanga. Fu di a asiwagi á be e lei taanga, meke a Etiyopiyaman be man leisi. Neen meke Filipesi be man lon go miti en tu.

A Etiyopiyaman ‘kai Filipesi fu subi kon aini a asiwagi fi en’ (Toli 8:31). Den asiwagi di den be e koboloiki fu siteelon a taamputaampu sama be e de aini. Ma den wan di den be e go a peesi, be e abi peesi gi tu sama fu sidon.

Enke fa Toli fu den apostel 8 anga den taa sani fu a ten de e soi, den buku fu u abi fowtow fu a Etiyopiyaman di be de aini wan gaan asiwagi di bigi moo den wan di den be e koboloiki fu feti anga fu siteelon.