1. Saide we feele son yuu?

 ALA we feele son yuu. Ma di u sutudeli Beibel, u kon si taki aa de fu u feele dedesama. U nai feele den ogii yeye moo tu. Boiti dati, aa de fu u booko wi ede anga saw pasa aini a ten di e kon. Tokuso we libi aini wan ten di taanga, bika a omen sani e pasa di sa meke u feele. Sani enke oloku, siki, anga a du di sama e du ogii anga taawan (Luk. 21:11). A fasi fa den tiiman e libi anga u sa meke u feele tu. Son yuu a den famii fu u e libi ogii anga u fu di we holibaka gi a tuu biibi. Boiti dati, son sama e si enke den naw poi pasa den tesi di e miti den nownow efuso den tesi di o miti den aini a ten di e kon.

2. San be miti David di a be de a Gat?

² Son yuu David seefi be e feele tu. Di Kownu Saul be wani kii en, a be lowe go na a foto fu den Filisteyasama a Gat. Bakaten kownu Akes fu Gat be kon yee taki a David na a sama di den be e singi gi taki a kii omen dunsu Filisteyasama. Di David yee san den taki ‘ná pikin feele a be e feele’ (1 Sam. 21:10-12). A be e booko en ede, bika aa be sabi san Akes be o du anga en. San be yeepi David fu abi deki-ati winsi fa a be e feele?

3. Enke fa Psalm 56:1-3, 11 e soi, da san yeepi David fu aa feele moo?

³ Aini Psalm 56, David e taki fa a be e fii di a be de a Gat. Ai taki aini a Psalm ya saide a be e feele, ma ai taki  tu san be yeepi en fu aa feele moo. Te David be e feele a be e fitoow Yehofa. (Leisi Psalm 56:1-3, 11.) A be sabi fu saide a be e fitoow en. Fu di Yehofa be yeepi David, meke a be du wan sani di be kibii en libi. A be du enke a law. Di Akes si David, aa be wani kii en moo. A be wani a gwe komoto na a pisi kondee fi en. A so David be man lowe gi Akes.​—1 Sam. 21:13–22:1.

4. Gi wan toli di e soi saw yeepi u fu moo fitoow Yehofa.

⁴ Efu useefi e fitoow Yehofa, neen we du sani anga koni u naw feele moo. Ma saw yeepi u fu moo fitoow Yehofa te we feele? Pakisei a toli ya. Efu dataa taigi i taki yu abi wan siki, biginbigin yo feele. Ma efi ye fitoow a dataa, i naw feele so moo. Kande a omen sama di be abi a siki de a yeepi. Ai aliki i di ye taigi en saide ye feele. Ye si taki ai booko en ede anga i. Kande aw gii wan deesi di be yeepi den taa sama. A so a de anga a fitoow di we fitoow Yehofa tu. Te we luku den sani di Yehofa du kaba, den sani di ai du nownow, anga den sani di aw du aini a ten di e kon, a sani ya o yeepi u fu moo fitoow en. Na a sani ya David be du. Te wo luku wantu fu den sani di David taki a Psalm 56, da luku sai sa du fu moo fitoow Yehofa te ye feele.

SAN YEHOFA DU KABA?

5. San David be e pakisei te a be e feele? (Psalm 56:12, 13)

⁵ Te sani be e miti David, a be e pakisei den sani di Yehofa du kaba. (Leisi Psalm 56:12, 13.) A sani ya a wan sani di David du en hii libi langa. Son yuu a be e sidon pakisei den sani di Yehofa meke. A sani ya be e membee en taki Yehofa abi makiti. A lobi libisama tu (Ps. 65:6-9). David be e pakisei san Yehofa be du gi taawan tu (Ps. 31:19; 37:25, 26). Boiti dati, a be e pakisei san Yehofa du gi en. Senten di David yonkuu neen Yehofa e kibii en (Ps. 22:9, 10). Fu di a be e teke ten pakisei den sani ya meke a be e fitoow Yehofa.

6. Saw yeepi u fu fitoow Yehofa te we feele?

 ⁶ Efi ye feele son yuu, akisi iseefi taki: ‘San Yehofa du kaba?’ Poti pakisei a den sani di a meke. Pakisei den foo anga den boomiki. Den sani ya naabi den manii fu Yehofa. Den á poi dini en tu. U pelensipali moo den sani ya. Neen meke aa de fu u booko wi ede, bika Yehofa o solugu u. Efu we teke ten pakisei den sani ya, wo moo fitoow en (Mat. 6:25-32). Pakisei den sani di Yehofa e du gi den sama di e dini en. I sa sutudeli den toli aini Beibel fu sama di biibi be taanga efuso i sa leisi den ondoofenitoli fu den baala anga sisa. a Pakisei fa Yehofa yeepi i kaba. Fa a yeepi i fii kon sabi en? (Yoh. 6:44) Fa ai piki den begi fii? (1 Yoh. 5:14) Sowtu wini ye fende fu a dede di Yesesi kon dede giw?​—Efe. 1:7; Heb. 4:14-16.

7. Fa a toli fu Daniyeli be yeepi Vanessa fu aa feele moo?

⁷ Vanessa, b a wan sisa di e tan a Haiti. Wan tesi be miti a sisa ya. Wan man na a pisi pe a be e tan be e telefon en ala dei. A be e sende app gi en ala dei tu. A man ya be wani dwengi en fu a siibi anga en. Vanessa be soi en kiin taki a naw du a sani de. Ma sani be kon moo ogii, bika a man be taigi en taki aw du sani anga en. Vanessa taki: ‘Ná pikin feele mi be e feele.’ San yeepi en fu aa feele moo? A du san a poi fu kibii en enseefi. Wan owluman be gi en taanga-sikin fu telefon den sikowtu. Ma a be e pakisei tu fa Yehofa be e yeepi den sama di be e dini en aini a ten di pasa. A taki: ‘A fosi sama di mi be pakisei a Daniyeli. Den be iti en go aini wan lew olo winsi fa aa be du nawan ogii. Angii be e kii den lew, ma Yehofa be tapu den mofu. Mi begi Yehofa fu a man á fuufeli mi moo. Bakadati mia be e feele moo.’​—Dan. 6:12-22.

SAN YEHOFA E DU NOWNOW?

8. San David be e biibi? (Psalm 56:8)

⁸ Ogii be sa miti David di a be a Gat. Ma aa be e poti pakisei a den sani di be e meke a feele. A be e poti pakisei a den sani di Yehofa be e du gi en a pisiten de. David be sabi taki Yehofa be e soi en fa a mu du sani. A be e kibii en tu. Boiti dati, a be sabi taki Yehofa be e fusutan fa a be e fii. (Leisi Psalm 56:8.) David be abi bun mati tu di be e yeepi en. Tu fu den mati ya a be Yonatan anga gaan pilisite Akimeilek (1 Sam. 20:41, 42; 21:6, 8, 9). Winsi fa Kownu Saul be wani kii en, toku a be man lowe gi en. David be e biibi taki Yehofa sabi sai miti en. A sabi fa ai fii tu.

9. San Yehofa e si te a luku iniiwan fu u?

⁹ Te tesi e miti i di e meke ye feele, holi a pakisei taki Yehofa e si sai miti i. A sabi fa ye fii tu. Yehofa á be e si san be e miti den Islayelisama di be de a Egepte namo, ma a be e si ‘fa den be e pina’ (Ek. 3:7). David be singi taki, Yehofa, ‘ye si fa mi e tyotyo. I sabi sai miti mi’ (Ps. 31:7). Te a foluku fu Gadu be e pina fu di den be e teke don bosoloiti, ‘a be e du en ogii’ (Yes. 63:9). Te ye feele, Yehofa e fusutan fa ye fii. A wani yeepi i fi ya feele moo.

10. Saide ye biibi taki Yehofa e booko en ede anga i? Saide ye biibi taki aw yeepi i te tesi e miti i?

 ¹⁰ Efu wan tesi e miti i di e meke ye feele, kande i nai si fa Yehofa e yeepi i. Sai sa du? Akisi en fii si fa ai yeepi i (2 Kow. 6:15-17). Bakadati akisi iseefi taki: Wan lezing efuso wan piki a komakandaa gi mi taanga-sikin? Wan buku, felon, efuso wan singi gi mi deki-ati? Wan sama leisi wan moin tekisi gi mi? Son yuu we feegete taki den baala anga sisa lobi u. Son yuu we feegete fa a Wowtu fu Gadu e yeepi u tu. Ma den sani ya a kado di Yehofa giw (Yes. 65:13; Malik. 10:29, 30). Den sani ya e soi taki Yehofa e booko en ede anga i (Yes. 49:14-16). Den e soi tu taki i sa fitoow en.

11. San yeepi Aida fu aa feele moo?

¹¹ Aida a wan sisa di e tan a Senegal. A sisa ya be e poti pakisei a fa Yehofa be e yeepi en di tesi be miti en. Neen a fosi pikin fi en mma anga en dda. Neen meke en mma anga en dda be wani a wooko tyaipi moni fu solugu den anga fu a solugu enseefi. Ma bakaten di Aida bigin pionili aa be e abi tyaipi moni. A sani ya meke den sama fi en ati be e boon neen. A taki: ‘Mi be e feele taki mia be o poi yeepi mma anga nda. Mi be e si enke sama be o go e si mi wan fasi. Mi be gi Yehofa a fowtu, bika sani á be e go bun seefiseefi.’ Bakaten Aida yee wan lezing a komakandaa. A taki: ‘A baala di be holi a lezing be taki Yehofa sabi sai giw booko-ede. Fu di den owluman anga den taa baala anga sisa be e soi mi fa mi mu du sani, meke te fu kaba mi be bigin e biibi baka taki Yehofa lobi mi. Te mi be e begi, mi be e biibi taki Yehofa o yeepi mi. Te mi be si fa a be e piki den begi fu mi, ná pikin piisii mi be e piisii.’ Bakaten Aida fende wan wooko di be yeepi en fu tan du a pioniliwooko anga fu solugu en mma anga en dda. A be poi yeepi taawan tu. A taki: ‘Mi leli taki mi mu fitoow Yehofa anga mi hii ati. Nownow te mi kaba begi mi nai feele moo.’

 SAN YEHOFA O DU AINI A TEN DI E KON?

12. Enke fa Psalm 56:9 e soi, da san David be e biibi?

¹² Leisi Psalm 56:9. A tekisi ya e taki fu wan taa sani di be yeepi David di a be e feele. Winsi fa ogii be sa miti en, toku a be e pakisei san Yehofa be o du gi en aini a ten di kon. A be sabi taki a be o kibii en na a moo bun yuu. Yehofa be taki a David be o tii enke kownu fu Islayeli, bika aa be wani Saul tii enke kownu moo (1 Sam. 16:1, 13). David be e biibi taki Yehofa be o du ala den sani di a paamisi en.

13. San Yehofa o du?

¹³ San Yehofa taki aw du giw? U sabi taki Yehofa naw puu ala den polobelema fu u nownow. c Ma u sabi taki winsi sowtu tesi e miti u, aw puu ala den sani ya aini a nyun goontapu (Yes. 25:7-9). A Sama di meke u abi a kaakiti fu weki den sama fu u di dede. Aw deesi den siki fu u. Aw puu ala den sama di e fooseli u tu.​—1 Yoh. 4:4.

14. Saw sa teke ten pakisei?

¹⁴ Te ye feele, pakisei san Yehofa o du aini a ten di e kon. Pakisei fa aw de te Saatan o kisi poli, te a soso den sama di e libi a wan letifasi o de a goontapu, anga te u naw abi sondu moo. Na a konkelesi di be holi aini 2014, den baala be pee wan dalaama fu soi faw sa teke ten pakisei a howpu fu u. Wan dda be e taki anga en osufamii fa den sani di sikiifi a 2 Timotiyesi 3:1-5, be o sikiifi taa fasi efu a tekisi ya be e taki fu fa a libi o de aini a paladeisi. A taki: ‘A so a libi o de aini a nyun goontapu. Sama o lobi denseefi, den o lobi a tuu, den o sabi san den poi du anga san den á poi du, den o abi sakafasi, den o gafa Gadu, den o aliki den mma anga den dda, den o sabi kiyoo, den naw gwe fika taawan, den o lobi den osufamii, den o meke kuudei, den o taki bun fu taawan ala yuu, den o man dwengi denseefi, den o abi switifasi, den o lobi bun sani, sama o fitoow den, den naw du san denseefi wani, den naw abi heimembee, den o lobi Gadu moo piisii, den o dini Gadu anga den hii ati. Anga den sowtu sama ya i mu e paa.’ Yu anga yu osufamii efuso den baala anga sisa e taki fa a libi o de aini a nyun goontapu?

15. San yeepi Tanja fu aa gwe fika Yehofa winsi fa a be e feele?

¹⁵ Luku a toli fu wan sisa di e tan a Noord Masedoniya den e kai Tanja. En mma anga en dda be e libi ogii anga en di a bigin sutudeli Beibel. Ma te a be e pakisei den sani di Yehofa o du giw aini ten di e kon, a sani ya be e yeepi en fu aa feele moo. A taki: ‘Sowan fu den sani di mi be e si enke be o pasa, pasa tuu. Ala baka komakandaa mma be e fon mi. Den taigi mi taki efu mi toon wan Yehofa Kotoigi den o kii mi.’ Te fu kaba den sama fu Tanja yaki en poti a doo. San a du di a sani ya pasa? A taki: ‘Mi be e pakisei fa mio piisii fu teego te mia gwe fika Yehofa. Mi be e pakisei tu fa Yehofa o belesi mi aini a nyun goontapu gi ala den sani di mi gwe fika fu kon dini en. A ten de u naw pakisei nawan fu den ogii di be e miti u moo.’ Tanja á gwe fika Yehofa. Boiti dati, Yehofa yeepi en fu a fende wan peesi fu tan. Nownow Tanja  toow anga wan baala di e dini Yehofa anga en hii ati. Ala den tu man e du a spesuutu-pioniliwooko. Ná pikin piisii den e piisii.

MEKE MOITI FU MOO FITOOW YEHOFA

16. Saw yeepi u fu abi deki-ati te den sani di sikiifi a Lukasi 21:26-28 e pasa?

¹⁶ Te a gaan banowtu o bigin, den sama aini a goontapu ‘o feele te’. Ma a foluku fu Gadu o taampu gingin. Den o abi deki-ati. (Leisi Lukasi 21:26-28.) Saide u naw feele? Bika u be e fitoow Yehofa kaba. Tanja di u be taki fi en kaba taki den sani di miti en aini a ten di pasa yeepi en fu pasa den taa tesi di miti en. A taki: ‘Mi leli taki winsi sowtu tesi e miti u, Yehofa poi yeepi u fu holidoo. Aw belesi u tu. Son yuu ai gei enke son sama sa du san den wani anga u, ma Yehofa taanga moo den. Winsi fa den tesi di e miti u taanga son leisi, toku den naw tan fu teego.’

17. Fa a tekisi fu a yali 2024 o yeepi u? (Luku a fowtow a fesise fu A Wakititolen.)

¹⁷ Aini a ten ya, a omen sani de di sa meke u feele. Ma leti enke David, wa mu meke feele basi u. A tekisi fu a yali 2024 a wan begi fu David. A be taki: ‘Te mi e feele, a yu mi e fitoow’ (Ps. 56:3). Wan sabiman di e ondoosuku Beibel taki: ‘David á be e tan pakisei den sani di be e meke ai feele. Aa be e tan pakisei den polobelema fi en tu. A be e fitoow a Sama di be o fii en.’ Pakisei a tekisi fu a yali ya aini den mun di e kon, moomoo te tesi e miti i. Teke ten pakisei san Yehofa du kaba, san ai du nownow, anga san aw du aini a ten di en kon. Da leti enke David iseefi o taki: ‘Te mi e feele, a yu mi e fitoow.’​—Ps. 56:4.