1. Fa Beibel taki Yehofa de?

 I AKISI iseefi wan leisi kaba fa Yehofa de? Te ye begi en, san ye pakisei? Winsi fa wa poi si Yehofa, toku Beibel e soi u fa a de tuutuu. Beibel e kai Yehofa ‘wi san anga wi skelt’. Ai soi u tu taki Yehofa de enke wan ‘faya di e boon ala sani’ (Ps. 84:11; Heb. 12:29). Eseikiyeli be si Yehofa aini wan fisyun enke wan safir-siton, wan sani di e beenki, anga a mutyama (Eseik. 1:26-28). Sowan den a sani ya sa meke u foondoo. Den sa meke u si enke wa pelensipali tu.

2. San sa meke a taanga giw fu kon koosube a Yehofa?

² Fu di wa poi si Yehofa meke son yuu we si enke aa lobi u. Son sama e fii enke Yehofa á lobi den, bika a omen sani be miti den aini a ten di pasa. Son wan fu den sama ya á sabi san a wani taki fu abi wan dda di lobi den. Yehofa e fusutan fa we fii. A sabi tu saide ai taanga giw fu kon koosube neen. Neen meke a meke sama sikiifi aini Beibel sowtu manii a abi.

3. Saide u mu poti pakisei na a lobi di Yehofa lobi u?

³ Beibel e soi taki Yehofa a lobi (1 Yoh. 4:8). Ala den sani di Yehofa e du a fu di a lobi u meke ai du den. A lobi ya nai kaba noiti, neen meke aa poi tapu fu soi wi a lobi ya. Winsi wan sama á lobi en, toku a lobi en (Mat. 5:44, 45). Aini a artikel ya, wo taki fu a lobi di Yehofa lobi u. Moo we leli sani fi en, moo wo kon lobi en.

 YEHOFA LOBI U TUUTUU

4. Fa a lobi di Yehofa lobi u e meke i fii? (Luku a fowtow tu.)

⁴ ‘Yehofa lobi sama tuutuu’ (Yak. 5:11). Aini Beibel Yehofa e maiki enseefi anga wan mma (Yes. 66:12, 13). Pakisei fa wan mma e solugu a yonkuu pikin fi en. Ai holi en neen bowtu tapu, da ai taki saafi anga en. Te ai kee efuso te wan sani du en, ai gi en san abi fanowdu. Te wi abi booko-ede u sa biibi taki Yehofa lobi u. Wan psalm sikiifiman be taki: ‘Te sani be e moo mi, a yu be e toosutu mi fu mi sa piisii baka.’​—Ps. 94:19.

5. Fa a gwe di Yehofa nai gwe fika den mati fi en e meke i fii?

⁵ Yehofa nai gwe fika den mati fi en (Ps. 103:8). Winsi u meke wan fowtu, toku Yehofa lobi wi ete. A omen leisi den Islayelisama be e du sani di aa lobi. Ma te den be soi taki a sani di den be du e hati den tuutuu, neen den tapu fu du a sani de, a be e soi den taki a lobi den ete. Wan leisi a be taigi den taki: ‘Mi e si wi enke gudu, neen meke mi e lesipeki u. Mi lobi u’ (Yes. 43:4, 5). A so Yehofa lobi u tu. Efu u du wan gaan sondu, Yehofa nai poti wi a wan se. Efu u soi taki a sani di u du e hati u tuutuu, neen u daai kon baka a Yehofa, wo si taki a lobi wi ete. A paamisi u taki ‘aw giw paadon anga en hii ati’ (Yes. 55:7). Beibel taki a gi di Yehofa e giw paadon ‘e giw kaakiti.’​—Toli 3:19.

6. San Sakaliya 2:8 e leli u fu Yehofa?

⁶ Leisi Sakaliya 2:8. Yehofa e si wi enke en ain gaasi. Wi ain a wan fu den moo pelensipali pisi fu u sikin. Neen meke te Yehofa e maiki wi anga en ain gaasi a leti enke ai taki: ‘Iniiwan sama di o langa ana holi a foluku fu mi, e du ogii anga den sama fu mi di mi nai meke sipowtu anga den. Fu di Yehofa lobi u, meke ai fusutan fa we fii. A de kabakaba fu yeepi u. Tyali e kisi en te wi abi booko-ede. Neen meke u sa biibi taki aw aliki u te we begi en. U sa begi taki: ‘Kibii mi enke yu ain gaasi baa’.​—Ps. 17:8.

7. Saide u mu biibi taki Yehofa lobi u?

 ⁷ Yehofa wani i biibi taki a lobi i. Ma a sabi taki fu di son sani miti i aini a ten di pasa, meke kande ye si enke aa lobi i. Kande sani e miti i nownow di e meke ye si enke Yehofa á lobi i tu. Saw yeepi i fu moo fitoow Yehofa? Meke u luku fa Yehofa soi taki a lobi Yesesi, den salufu Kelesten, anga wi.

FA YEHOFA SOI A LOBI FI EN

8. Saide Yesesi be e biibi taki en dda lobi en?

⁸ A omen miliyun yali kaba Yehofa anga en Manpikin de makandaa. A sani ya meke den sabi denseefi bun. Den a bun mati tu. Boiti dati, den lobi denseefi tuutuu. Aini Mateyesi 17:5, Yehofa e taki fa a lobi Yesesi. A be sa taki: ‘Neen e meke mi piisii.’ Ma a be wani soi u taki ná pikin lobi a lobi en, neen meke a be taki ‘a mi Manpikin de ya, mi lobi en’. Yehofa be e piisii anga Yesesi, bika a be de kabakaba fu dede giw (Efe. 1:7). Yesesi seefi be e biibi taki en Dda lobi en. Neen meke na ala yuu a be e taki en Dda lobi en.​—Yoh. 3:35; 10:17; 17:24.

9. Sai soi taki Yehofa lobi den salufu Kelesten? (Romesama 5:5)

⁹ Yehofa lobi den salufu Kelesten tu. (Leisi Romesama 5:5.) Aini Giikitongo a tekisi ya e soi taki a lobi fu Yehofa de enke a wataa fu wan sula. A sani ya e soi taki Yehofa lobi den salufu Kelesten tuutuu. Den salufu Kelesten sabi taki Yehofa ‘lobi den’ (Yud. 1). Apostel Yohanisi be taki: ‘Luku fa a Dda lobi u. Ai kai u pikin fu Gadu. A so a de tuu’ (1 Yoh. 3:1). A den salufu Kelesten wawan Yehofa lobi? Nono. Yehofa lobi ala sama.

10. Sai soi taki Yehofa lobi u tuutuu?

¹⁰ Sai soi taki Yehofa lobi u tuutuu? Na a dede di a meke Yesesi kon dede giw. A sani ya e soi taki ná pikin lobi Yehofa lobi u (Yoh. 3:16; Rom. 5:8). Yehofa fika a manpikin fi en fu dede gi libisama fu u sa fii fu sondu anga dede. Nownow wi anga en a mati (1 Yoh. 4:10). Moo we teke ten pakisei san Yehofa anga Yesesi du giw, moo wo fusutan taki den lobi iniiwan fu u (Gal. 2:20). Yehofa á meke Yesesi dede giw namo da a kaba, ma a du a sani ya fu di a lobi u. A fu di a lobi u meke a fika a Manpikin fi en fu pina te enke den kii en fu a bun fu wi ede.

11. San Yelemiya 31:3 e leli u?

¹¹ A ná lobi namo Yehofa lobi u, ma enseefi taigi u taki a lobi u. (Leisi Yelemiya 31:3.) A fu di Yehofa lobi u meke a hali u kon neen. (Luku Deitolonomi 7:7, 8 tu.) Nawan sani á poi tapu Gadu fu aa lobi u (Rom. 8:38, 39). Fa a sani ya e meke i fii? Leisi Psalm 23 da yo si fa David be e fii. Yo si fa a sa meke i fii tu.

FA A LOBI DI YEHOFA LOBI I E MEKE I FII?

12. San a den moo pelensipali sani di sikiifi a Psalm 23?

¹² Leisi Psalm 23:1-6. Aini Psalm 23, David e taki fa ai fii taki Yehofa lobi en. En anga Yehofa a be bun mati. Neen meke a be kai en mi Sikapuman. David be e piisii te Yehofa be e soi en fa a mu du sani. A be e fitoow en anga en  hii ati tu. A be sabi taki solanga a de a libi Yehofa o tan lobi en. Saide David be e biibi taki Yehofa lobi en?

13. Saide David be e biibi taki Yehofa e booko en ede anga en?

¹³ ‘Mi naw mankei nawan sani.’ David be sabi taki Yehofa be e booko en ede anga en, bika na ala yuu a be e yeepi en fu fende den sani di a abi fanowdu. A sabi taki Yehofa neen mati. A be sabi tu taki Yehofa e piisii anga en. Neen meke winsi san be o miti en aini a ten di e kon, a be sabi taki aw yeepi en. Fu di David be e biibi taki Yehofa lobi en, meke aa be e booko en ede. A be e piisii tuutuu.​—Ps. 16:11.

14. Fa Yehofa e solugu u?

¹⁴ Yehofa e booko en ede anga u, moomoo te sani e miti u. Claire a a wan sisa di wooko a Betel wan sani fu 20 yali langa. Aa be sabi fa a mu yeepi en famii di tesi be miti den. Buulu be naki en dda. En pikin sisa be komoto a waaleiti. Den sama fi en be abi moni polobelema. Te fu kaba den á be abi peesi fu tan moo. Fa Yehofa soi taki a lobi den? Claire taki: ‘Yehofa be e solugu taki den sama fu mi fende ala den sani di den be abi fanowdu. Son yuu a be e giw moo enke saw be abi fanowdu. Mi lobi pakisei fa Yehofa be yeepi u. Noiti mio feegete a lobi di a soi gi mi anga den sama fu mi. A sani ya yeepi mi fu tan wooko gi en anga piisii winsi fa taa tesi be e miti mi.’

15. San be e gi David kaakiti baka? (Luku a fowtow tu.)

 ¹⁵ ‘Ai gi mi kaakiti baka.’ Son yuu David be e fii booko-saka te, bika a omen tesi be e miti en (Ps. 18:4-6). Ma a lobi di Yehofa be lobi en be e gi en kaakiti baka. Yehofa be gi a mati fi en di be weli ‘guun gaasi’ anga ‘tyaipi wataa’. A sani ya be gi David kaakiti, neen meke a be man tan dini Yehofa.​—Ps. 18:28-32.

16. Fa a lobi di Yehofa lobi i e gii kaakiti?

¹⁶ A so a de anga wi aini a ten ya tu. Na a lobi di Yehofa lobi u e yeepi u fu pasa den tesi di e miti u (Tyali 3:22; Kol. 1:11). Luku a toli fu wan sisa den e kai Rachel. A be e fii booko-saka di a man fi en gwe fika en na a ten di a COVID-19 siki be paati a hii goontapu. A ten de a man fi en be gwe fika Yehofa tu. San Yehofa du fu yeepi en? A taki: ‘Mi be e fii taki Yehofa anga den baala anga sisa lobi mi. Den mati fu mi be e de makandaa anga mi, den be e tyai nyanyan kon gi mi, den be e app mi, den be e sende tekisi gi mi, den be e lafu anga mi. Den be e tan membee mi tu taki Yehofa e booko en ede anga mi. Ala yuu mi e gi Yehofa daa fa gaan famii di a gi mi.’

17. Saide David be taki a ‘nai feele nawan sani’?

¹⁷ ‘Mi nai feele nawan sani, bika i de anga mi.’ Na ala yuu sani be e miti David pe a be sa lasi en libi. Den feyanti fi en be taanga moo en. Tokuso aa be e feele, bika a sabi taki Yehofa lobi en. David be poi si kiin taki winsi san be e miti en, Yehofa be de anga en. Neen meke a be singi taki: ‘[Yehofa] yeepi mi fu mia feele moo’ (Ps. 34:4). Son yuu ná pikin feele David be e feele, ma a sabi di a be sabi taki Yehofa lobi en be yeepi en fu aa feele moo.

18. Fa a lobi di Yehofa lobi u o yeepi u te we feele?

¹⁸ Fa a sabi di u sabi taki Yehofa lobi u e yeepi te we feele? Wan pionili sisa den e kai Susi taki fa en anga en man be fii di a boi fu den kii enseefi. A taki: ‘Te sowan sani miti i, ai du yu ogii te. Ye si  enke moo gaan sani o miti i. Ma a lobi di Yehofa lobi u be e yeepi u fu wa feele moo.’ Rachel di u be taki fi en kaba taki: ‘Wan neti ná pikin fii mi be e fii booko-saka. Mi be e booko mi ede. Neen meke mi begi Yehofa. Aa langa seefi neen mi bigin fii bun baka. Mi be e fii enke wan yonkuu pikin di en mma e koli te enke a siibi. Bakadati neen mi siibi. Noiti mio feegete a ten de.’ Wan owluman den e kai Tasos be de fo yali langa a sitaafu-osu, bika aa be wani go a suudati. Fa a baala ya si taki Yehofa e booko en ede anga en? A taki: ‘Yehofa be e gi mi moo enke san be abi fanowdu. A sani ya yeepi mi fu fitoow en anga mi hii ati. Boiti dati, Yehofa be e meke mi piisii, winsi fa mi be de a wan peesi di be e meke mi e kusumi. A sani ya yeepi mi fu si taki moo mi e fitoow Yehofa, moo mio si taki a lobi mi. Neen meke mi be bigin du a kowownu-pionili wooko winsi fa mi be de a sitaafu-osu.’

KON KOOSUBE NA A GADU FU U DI LOBI SAMA TUUTUU

19. (a) Fa a sabi di u sabi taki Gadu lobi u, e yeepi u fu sabi saw mu taki te we begi? (b) I si a lobi fu Yehofa aini i libi kaba? (Luku a faki di den e kai ‘ Tekisi di e meke u fii taki Yehofa lobi u tuutuu.’)

¹⁹ Den toli di u luku aini a artikel ya, e soi taki Yehofa ‘a Gadu fu lobi’ de anga u (2 Kor. 13:11). Ai booko en ede anga iniiwan fu u. We biibi tu taki ‘ai soi bun-ati gi den sama di e fitoow en’ (Ps. 32:10). Moo we teke ten pakisei fa Yehofa lobi u, moo wo si taki ai booko en ede anga u. U sa begi en ala yuu. U sa taigi en san wi abi fanowdu tu. U sa taigi en ala den sani di e giw booko-ede, bika ai fusutan fa we fii. A wani yeepi u.​—Ps. 145:18, 19.

20. Fa a lobi di Yehofa lobi u e yeepi u fu kon koosube neen?

²⁰ Leti enke fa sama e go waan faya te a peesi koo, a so a lobi fu Yehofa sa toosutu u te tesi miti u. Neen meke u mu piisii, bika Yehofa lobi u. Useefi mu taki: ‘Mi lobi Yehofa tuutuu’​—Ps. 116:1.