1-2. San a wantu sani di e miti den sama di e dini Yehofa anga den hii ati?

 DEN sani di e miti u sa kengi u libi wanboowanboo. Dataa taigi wan baala den e kai Luis a taki a abi kanker. Den be taigi en tu taki a wantu mun namo fika fu a libi ete. Monika anga en man be e wooko taanga gi Yehofa. A man fi en a be wan owluman. Ma wan dei a kon fusutan taki a omen yali kaba en man e waka gi en. Olivia a wan sisa di á toow ete. A be abi fu gwe fika en osu, bika wan gaan daai winta be e kon. Di a daai kon baka a si taki a winta booko ala a osu fi en. A libi fu Luis, Monika anga Olivia kengi wanboowanboo. Fai si enke den be e fii di den sani ya miti den? Wan sani miti i kaba di kengi i libi wanboowanboo?

² Winsi fa we dini Yehofa anga u hii ati, tokuso sani e miti u leti enke ala taa sama. A omen sama e buuse a foluku fu Gadu. Den e suku fu du ogii anga u tu. Yehofa nai kibii u fu den sani ya á miti u, ma a paamisi u taki aw yeepi u (Yes. 41:10). Na a yeepi di Yehofa e yeepi u meke we piisii te den sani ya e miti u. Winsi sai miti u, ai yeepi u fu sabi saw mu du fu wa gwe fika en. Aini a artikel ya, wo luku fo fasi fa Yehofa e yeepi u te tesi e miti u. Wo luku tu saw mu du fu fende wini fu a yeepi di ai yeepi a foluku fi en.

 YEHOFA O GII A FREIDE FI EN

3. Sai taanga giw fu du te wan gaan tesi miti u?

³ Den tesi di e miti u. Te wan gaan tesi miti u, ai taanga fu sabi saw mu du. Saide? Bika den sani di e miti u sa meke u fii booko-saka. Den sa meke u buuya tu. Son yuu u sa fii enke we waka a wan pasi sondee fu we si pe we go. Meke u luku fa den tu sisa di u be taki fu den kaba be e fii di tesi be miti den. Olivia taki: ‘Baka di a gaan winta poli mi osu, mi be buuya. Mia be sabi san mi mu du. Monika, a sisa di a man fi en be waka gi en taki: ‘Ná pikin fii mi be e fii booko-saka. Mi be e fii enke wan sama sutu mi anga wan sani a mi boofu-ati. A be e taanga gi mi fu du den sani di mi be gwenti du ala dei. Noiti mi be si enke a sani ya be o miti mi.’ San Yehofa paamisi u te we fii booko-saka?

4. Enke fa Filipisama 4:6, 7 e soi, da san Yehofa paamisi u?

⁴ San Yehofa paamisi u? Yehofa paamisi u taki aw gi wi ‘a freide fi en’. (Leisi Filipisama 4:6, 7.) A freide ya na a fii di Yehofa e giw taki sani o go bun anga u fu di wi anga en a mati. Wi enke libisama á poi fusutan fa Yehofa e gi wi a freide ya. Kande i foondoo wan leisi dii kaba begi Yehofa, bika i be si taki ya be e buuya moo. I be e fii bun, bika a be gi yu ‘a freide fi en’.

5. Fa a freide fu Gadu e kibii wi ati anga u fusutan?

⁵ Filipisama 4:7 taki tu taki a freide fu Gadu ‘o kibii wi ati anga u fusutan’. Te den be koboloiki a wowtu ‘kibii’ a fositen, da a be e soi fa suudati e kibii wan foto fu feyanti á kon aini. Den sama di e tan aini wan foto pe suudati e holi wakiti nai feele, bika den sabi taki den suudati o kibii den. A so a de anga freide di Gadu e giw tu. Te a freide fu Gadu kibii wi ati anga u fusutan, u nai buuya, bika u sabi taki ai kibii u (Ps. 4:8). Leti enke Hana, winsi sani á kengi wantenwanten, toku u sa abi a freide fu Gadu (1 Sam. 1:16-18). Te u nai buuya, ai moo makiliki giw fu denki kiin. We man du sani anga koni tu.

6. Saw mu du efu u wani fende a freide fu Gadu? (Luku a fowtow tu.)

⁶ Saw mu du? Leti enke fa den sama aini wan kondee be o bali kai den suudati fu kibii den, a so useefi sa akisi Yehofa fa yeepi u tu. Begi te enke i si taki i nai buuya moo (Luk. 11:9; 1 Tes. 5:17). Luis di u be taki fi en kaba e soi san be yeepi en anga en uman di dataa be taigi en  taki a wantu mun namo a be o libi ete. A taki: ‘Te den sowtu sani ya miti i, ai taanga fii sabi sai mu du. I nai sabi sowtu dataa yeepi i mu teke. Ma begi yeepi u tuutuu. Neen meke wa be e buuya.’ Luis anga en uman taki den be e begi Yehofa anga den hii ati. Na ala yuu den be e begi en fu a gi den a freide fi en anga a koni fu teke bun bosoloiti. Den be si kiin taki Yehofa be e yeepi den. Efu wan tesi e miti i nownow, begi Yehofa. Da yo si taki a freide fu Gadu o kibii yu ati anga i fusutan.​—Rom. 12:12.

YEHOFA O YEEPI I

7. Fa we fii son yuu te gaan tesi e miti u?

⁷ Den tesi di e miti u. Te wan tesi e miti u, den fii fu u, a fasi fa we denki, anga a fasi fa we du sani nai de enke faw be gwenti moo. Leti enke fa den balon aini a ze e wipi wan sipi go na ala se, a letiso den fii fu u sa buuya u. Ana, di u be taki fi en na a bigin taki a be e buuya baka di en man dede. A taki: ‘Son yuu te mi be e kusumi, mi ati be e boon te mi be e pakisei a dede fu a man fu mi.’ Boiti dati, te a be e du den sani di a man fi en be gwenti du, a be e taanga gi en, bika neen wawan de. Son yuu a be e fii enke a de aini a ze, neen den balon e wipi en go na ala se. Fa Yehofa e yeepi u fu wa buuya te den sowtu tesi ya e miti u?

8. Enke fa Psalm 94:18 e soi, da saw sa biibi?

⁸ San Yehofa paamisi u? A paamisi u taki aw yeepi u. (Leisi Psalm 94:18.) Te wan gaan winta e wai aini a ze, ná pikin seke ai seke den sipi. Ma den meke wan sani na a sipi sikinbee fu yeepi en fu aa lolo tumisi. A sani ya e yeepi a sipi fu aa sungu kii den sama. Den sama aini a sipi nai seke go seke kon tu. Ma a te a sipi e go anga fesi fosi a sani di den e poti neen sikinbee poi yeepi en. A letiso Yehofa e yeepi u tu te we meke moiti fu tan dini en te tesi e miti u.

9. Fa den sani di Yehofa giw fu ondoosuku a Beibel e yeepi u fu wa buuya? (Luku a fowtow tu.)

⁹ Saw mu du? Te wan tesi e meke ye fii booko-saka, begi Yehofa, go a den komakandaa, du a peleikiwooko. Kande yo si taki ya poi du tyaipi sani moo enke fai be gwenti, ma holi a pakisei taki Yehofa nai akisi u fu du sani di wa poi du. (Luku Lukasi 21:1-4 tu.) Boiti den sani ya, u mu meke ten tu fu sutudeli anga useefi. U mu teke ten pakisei saw leli tu. Saide? A olikanisâsi fu Yehofa seeka omen sani fu ondoosuku a Beibel. Den  sani ya e yeepi u fu wa buuya. Efii wani ondoosuku wan toli i sa go na a JW Library^® app anga a Wakititolen LIBRARY A INTERNET. I sa luku a Saanantongo buku di den e kai Ondrosuku Bijbel moro fini​—Gi Yehofa Kotoigi tu. Monika di u be taki fi en kaba, be ondoosuku sani aini a Ondrosuku Bijbel moro fini​—Gi Yehofa Kotoigi te den tesi di be e miti en be e meke a fii booko-saka. A be suku san a wowtu ‘mandi’ wani taki. Bakaten a be e suku toli di e taki fu tei toowpaa waka gii efuso san a wowtu ‘getrow’ wani taki. Te a be fende den artikel di a be e suku, a be e leisi den te enke a kisi enseefi. A taki: ‘Te mi be bigin leisi mi be e tyali ete, ma te mi be kaba mi be e fii taki Yehofa de koosube fu mi. Moo mi be e leisi, moo mi be e fii taki Yehofa e fusutan fa mi e fii. Mi be e fii taki a wani yeepi mi tu.’ A holi di Yehofa e holibaka giw e yeepi u fu wa buuya te enke u kisi useefi baka.​—Ps. 119:143, 144.

YEHOFA O HOLIBAKA GII

10. Fa we fii son yuu baka te wan gaan sani miti u?

¹⁰ Den tesi di e miti u. Son leisi te wan gaan sani miti u, we abi dei di we fii booko-saka te. Son yuu we fii enke wan sama di e siteelon. Te wan sama di e lon kisi mankei, a nai poi lon gaw enke fa a be gwenti moo. Ai moo lon saafi. Te we fii booko-saka u nai poi du den sani di u be gwenti du moo. U nai poi du den sani di be e meke we piisii tu. Son yuu we fii enke Eliya. U nai poi opo. We wani siibi go doo (1 Kow. 19:5-7). San Yehofa paamisi u te we fii booko-saka?

11. San a wan taa fasi fa Yehofa e yeepi u? (Psalm 18:18)

¹¹ San Yehofa paamisi u? A paamisi u taki aw holibaka giw. (Leisi Psalm 18:18.) Leti enke fa wan sama di e siteelon abi taanga-sikin fanowdu fu lon go doo, a so useefi abi taanga-sikin fanowdu tu fu tan dini Yehofa. Te we fii booko-saka Yehofa paamisi u taki: ‘Mi Yehofa, i Gadu, holi yu ai leti-ana. A mi e taigi i taki: “Ná feele. Mio yeepi i”’ (Yes. 41:13). Kownu David be si taki a sani ya a tuu. Di sani be e miti en a be taigi Yehofa taki: ‘I leti-ana o holibaka gi mi’ (Ps. 18:35). Ma fa Yehofa e yeepi u?

12. Sama Yehofa e koboloiki fu giw taanga-sikin te we fii booko-saka?

 ¹² Yehofa e koboloiki den baala anga sisa fu giw taanga-sikin. Wan leisi di David be e fii booko-saka, en mati Yonatan be gi en taanga-sikin (1 Sam. 23:16, 17). A so Yehofa be meke Elisa gi Eliya taanga-sikin tu (1 Kow. 19:16, 21; 2 Kow. 2:2). Aini a ten ya, Yehofa e koboloiki den famii, den mati fu u, efuso den owluman fu yeepi u. Son yuu te we fii booko-saka, u nai wani mosoo anga taawan. Aw wawan e wani de. Aa fowtu efi ye fii so. Ma saw mu du efu u wani Yehofa yeepi u?

13. Saw mu du efu u wani Yehofa yeepi u? (Luku a fowtow tu.)

¹³ Saw mu du? U mu meke moiti fu u nai de u wawan. Efu u nai mosoo anga taawan, aw seefi namo wo go e denki anga den polobelema fu u. A sani ya sa meke u teke don bosoloiti (Odo 18:1). Te wan gaan sani miti u, we abi ten di we wani de u wawan. Ma efu u be o de u wawan wan hii pisiten, u be o tapu den sama di Yehofa e koboloiki fu yeepi u. Neen meke efu wan tesi e miti i, meke den famii, den mati, anga den owluman yeepi i. A Yehofa e koboloiki den baala anga sisa ya fu giw taanga-sikin.​—Odo 17:17; Yes. 32:1, 2.

YEHOFA O TOOSUTU I

14. San a wantu sani di e meke we feele?

¹⁴ Den tesi di e miti u. Son yuu sani e miti u di e meke we feele. A omen toli de aini Beibel fu sama di be e dini Yehofa anga den hii ati. Son leisi sani be e miti den di be e meke den feele tu. Son yuu a den feyanti fu den be e wani kon feti anga den (Ps. 18:4; 55:1, 5). A letiso sama e libi ogii anga wi a sikoo efuso wooko. Son yuu a den famii fu u efuso lanti e libi ogii anga u. Kande ye feele taki yo dede fu dii siki. Te den sowtu sani ya e miti u, we fii enke wan pikinnengee di á poi yeepi enseefi. Fa Yehofa e yeepi u te den sani ya e miti u?

15. Enke fa Psalm 94:19 e soi, da san Yehofa taki aw du?

¹⁵ San Yehofa paamisi u? Ai toosutu u. (Leisi Psalm 94:19.) A psalm ya e meke u pakisei wan pikin meisyo di e feele. Aa poi siibi, bika wan gaan alen e  kai. Kande ye si fa a pikin ya dda e waka go teke en. A holi en te enke a siibi. Winsi fa a alen e kai ete toku a pikin nai feele moo, bika en dda holi en. Te tesi e miti u, wi abi u dda a hemel fanowdu fu holi wi aini en ana te enke u bigin fii bun baka. Saw mu du efu u wani Yehofa toosutu u?

16. Saw mu du efu u wani Yehofa toosutu u? (Luku a fowtow tu.)

¹⁶ Saw mu du? Meke ten fi yu anga Yehofa de makandaa. Begi en. Leisi a Wowtu fi en (Ps. 77:1, 12-14). Efi yu abi a gwenti fu du den sani ya, da a fosi sani di yo du te tesi e miti i, yo go suku yeepi ai Dda a hemel. Taigi Yehofa san a den sani di e gii booko-ede. Taigi en san a den sani di e meke ye feele tu. Bakadati dai meke Yehofa taki anga i. Ye meke Yehofa taki anga i te ye leisi a Wowtu fi en. Efi ye du den sani ya, yo si fa Yehofa e toosutu i (Ps. 119:28). Te ye leisi son pisi fu Beibel yo si taki den o toosutu i te ye feele. Den Beibel buku Yopu, Psalm, Odo anga den sani di Yesesi taki aini Mateyesi kapitel 6 sa toosutu i te ye leisi den. Efi ye begi Yehofa neen ye leisi a Wowtu fi en, yo fende taanga-sikin.

17. Saw sa biibi?

¹⁷ U sa biibi taki Yehofa o yeepi u te tesi e miti u. Noiti aw fika u wawan (Ps. 23:4; 94:14). Yehofa paamisi u taki aw gi wi a freide fi en, aw yeepi u, aw holibaka giw. Ai toosutu u tu. Yesaya 26:3 taki: ‘Yo kibii den sama di e fitoow yu, yo meke sani waka bun gi den fu ala ten.’ Fitoow Yehofa, dai meke a yeepi i. Efi ye du den sani ya, yo poi holidoo winsi sowtu tesi e miti i.