1. Saw sa du fu meke Yehofa piisii?

 MEKE u taki i gi wan sama dii lobi wan moin kado, a sa du omen sani anga en. Ya be o fii bun efu a be o kibii en poti aini wan dosu, efuso kande noiti a koboloiki en. Ma efu a gii daa fu dii gi en a kado, neen ai koboloiki en, ná pikin poolo yo poolo. San a sani ya e leli u? Yehofa meke en Manpikin kon dede gi u. Neen meke a musu e poolo te we soi taki u lobi en anga te we soi taki we teke en fu bigi taki a sende en Manpikin Yesesi kon dede gi u​—Yoh. 3:16; Rom. 5:7, 8.

 2. San wo luku aini a artikel ya?

² Fu di den yali e pasa, meke kande son yuu wo feegete a pelensipali sani di Yehofa du gi u. Efu u nai teke a sani di Yehofa du gi u fu bigi moo, da a leti enke we poti a moin kado di a gi u a wan peesi pe wa poi si en efuso pakisei fi en moo. Efu wa wani a sani ya miti u, da na ala yuu u mu e pakisei a sani di Yehofa anga Yesesi du gi u. A artikel ya o yeepi u fu du a sani ya. Wo luku sowtu wini we fende nownow fu a dede di Yesesi kon dede gi u anga sowtu wini wo fende aini a ten di e kon. Wo luku tu faw sa soi taki a lobi di Yehofa soi u e bigi gi u, moomoo a pisiten fu a Membeefesa

SOWTU WINI WE FENDE NOWNOW

 3. San a wan fasi fa we fende wini fu a dede fu Yesesi nownow?

³ A nownow kaba we fende wini fu a dede fu Kelestesi. Na a dede di a kon dede gi u meke Yehofa poi gi u paadon fu den sondu fu u. Yehofa á be abi fu gi u paadon, ma a  fu di a be wani meke a du a sani ya. Fu di a be e bigi gi a psalm sikiifiman taki Yehofa e gi u paadon meke a be taki: ‘Yehofa, ya wan bun Gadu. I de kabakaba fu gi sama paadon.’​—Ps. 86:5; 103:3, 10-13.

 4. Sama a den sama di Yehofa meke Yesesi kon dede gi? (Lukasi 5:32; 1 Timotiyesi 1:15)

⁴ Son wan fu u e fii enke wa bun sai fu Yehofa gi u paadon. A tuu taki wa be abi a leti ya. Neen meke apostel Pawlesi be fusutan taki ‘aa fiti fu den kai en apostel’. Ma tokuso a be taki: ‘A di Gadu soi mi bun-ati meke mi de enke fa mi de nownow’ (1 Kor. 15:9, 10). Te u nai du den ogii di u be e du moo, da Yehofa e gi u paadon. Saide? A ná fu di u bun so, ma a fu di a lobi u. Efi ye fii enke ya bun sai fu Yehofa gii paadon, dai mu holi a pakisei taki Yehofa á meke Yesesi kon dede gi sama di naabi sondu. A kon dede gi sama di abi sondu, fu den kengi a fasi fa den e tyai denseefi.​—Leisi Lukasi 5:32; 1 Timotiyesi 1:15.

 5. A musu Yehofa musu fu gi u paadon?

⁵ A ná fu di we dini Yehofa omen yali kaba, da a musu fu gi u paadon. Yehofa nai feegete den bun sani di we du gi en (Heb. 6:10). A dede di a meke en Manpikin kon dede gi u, a wan kado di a gi u. A ná pai ai pai u fu di we dini en. Neen meke a ná wan bun sani efu we denki taki Yehofa abi fu gi u paadon fu di we dini en omen yali kaba. Efu we denki so, da a leti enke we taki aa be de fu Yesesi kon dede gi u.​—Luku Galasiyasama 2:21 tu.

 6. Saide Pawlesi be e wooko taanga gi Yehofa?

⁶ Pawlesi be e fii enke noiti Yehofa be o gi en paadon, winsi on langa a be wooko gi en. Da saide a be e wooko taanga so? A be e du a sani ya fu soi Yehofa taki ai teke en fu bigi taki ai soi en bun-ati (Efe. 3:7). Leti enke Pawlesi, we tan dini Yehofa fayafaya. Ná fu di u wani a soi u bun-ati namo, ma a fu di we teke en fu bigi taki a meke en Manpikin kon dede gi u.

 7. San a wan taa fasi fa we fende wini fu a dede fu Yesesi nownow? (Romesama 5:1; Yakowbesi 2:23)

⁷ Wan taa fasi fa we fende wini fu a dede fu Yesesi nownow, a taki wi anga Yehofa e toon moo bun mati. a Enke faw be si aini a artikel di pasa, da te u meke da wi anga Gadu á na mati ete. Ma a fu di Yesesi kon dede gi u, meke u sa piisii fu di ‘wi anga Gadu poi toon mati’.​—Leisi Romesama 5:1; Yakowbesi 2:23.

 8. Saide u mu e teke en fu bigi taki u poi taki anga Yehofa aini begi?

⁸ Fu di wi anga Yehofa a mati, meke u poi begi en. A ná te u de a komakandaa efuso te wi anga taawan de namo Yehofa e aliki den begi fu u. Winsi u wawan de a wan peesi e begi en, tokuso ai aliki u. Te we begi u nai booko we ede so moo. Ma a ná disi na a wan kodo wini di we fende. A begi di u poi begi e meke wi anga Gadu toon moo bun mati (Ps. 65:2; Yak. 4:8; 1 Yoh. 5:14). Di Yesesi be de a goontapu na ala yuu a be e begi, fu di a be sabi taki Yehofa e aliki en. A sani ya meke en anga en Dda a be bun mati (Luk. 5:16). Ai bigi gi u taki Yesesi kon dede gi u, bika na a dede fi en e meke wi anga Yehofa poi toon mati. U poi begi en tu.

 DEN WINI DI WO FENDE FU A DEDE FU YESESI

 9. Sowtu wini den sama di e dini Yehofa anga den hii ati o fende fu a dede fu Yesesi aini a ten di e kon?

⁹ A omen wini wo fende fu a dede fu Yesesi. A omen sama e si enke a sani ya naw pasa, bika a omen dunsudunsu sama dede aini den yali di pasa. Ma a sani di Yehofa be wani gi libisama a taki den mu libi fu teego. Efu Adan á be sondu, a fu teego u be o libi. Efu kande ai taanga gii fu biibi taki i poi libi fu teego, da pakisei a gaan sani di Yehofa du gii. A pai a paiman kaba di a meke en Manpikin kon dede gii, neen meke i sa biibi taki yo poi libi fu teego.​—Rom. 8:32.

10. San den sama di o tii a hemel anga den sama di o libi a goontapu ya e wakiti?

¹⁰ Winsi fa a ná nownow wo libi fu teego, toku Yehofa wani u teke ten pakisei fi en. Den salufu Kelesten e wakiti a ten di den o go a hemel fu go tii makandaa anga Yesesi (Openb. 20:6). Den taa sikapu e wakiti fu libi fu teego a goontapu ya aini wan paladeisi, pe nawan pen, nawan tyotyo efuso tyali naw de moo (Openb. 21:3, 4). Yu a wan fu den sikapu di abi a howpu fu libi fu teego a goontapu ya? A sani ya á wani taki den sama di o libi a hemel hei moo den wan di o tan a goontapu ya. Yehofa meke libisama fu libi a goontapu, neen meke te wo libi fu teego a goontapu ná pikin piisii wo piisii.

11-12. San a wantu belesi di wo fende aini a paladeisi? (Luku a fowtow tu.)

¹¹ Pakisei fa aw de fu libi fu teego a goontapu ya aini wan paladeisi. I naw booko yu ede taki yo siki efuso taki yo dede (Yes. 25:8; 33:24). Yehofa o gii ala den bun sani dii wani. Sowtu sani i be o wani leli? I be o wani sabi moo sani fu den foo efuso meti? I wani sabi pee wan poku sani efuso teken? Aini a paladeisi  sama o de fanowdu di sabi meke osu, di sabi paandi sani, di sabi boli anga di sabi meke wooko sani. Sama o de fanowdu tu di sabi fa den mu solugu den sani ya (Yes. 35:1; 65:21). Te yo libi fu teego, yo abi ten sai fu leli den sani ya anga den taa sani dii wani sabi.

¹² Ná pikin piisii wo piisii fu bali wadaa gi den sama fu u di o weki baka (Toli 24:15). Pakisei fa aw switi te we ondoosuku den sani di Yehofa meke (Ps. 104:24; Yes. 11:9). Ma san moo moin, a taki wo poi dini Yehofa sondee fu akisi en fu a gi u paadon, bika a ten de u naw abi sondu moo. I be o wani fika den belesi di yo fende aini a ten di e kon dai ‘piisii fu wan pisiten namo fu sondu’? (Heb. 11:25) Noiti u be o wani du a sani de. Den belesi di wo fende aini a ten di e kon ipi moo den wan di we fende nownow. A ná pakisei namo wo go e pakisei a paladeisi efuso angii fi en, ma a wan sani di o pasa tuutuu aini a ten di e kon. Bika Yehofa lobi u te neen a meke en Manpikin kon dede gi u.

SOI TAKI I SABI KIYOO

13. Faw sa soi taki we teke en fu bigi taki Yehofa lobi u? (2 Korentesama 6:1)

¹³ Wan fasi faw sa soi taki we teke en fu bigi taki Yehofa lobi u, a te we poti a dini di we dini en na a fosi peesi aini u libi (Mat. 6:33). Yesesi dede ‘gi ala sama. Neen meke den sama di de a libi á mu e libi gi denseefi moo, ma den mu libi gi a sama di dede gi den. A sama ya kon a libi baka’ (2 Kor. 5:15). Ná pikin lobi Yehofa lobi u, neen meke ai gi u paadon. Te we du ala saw poi fu dini en, we soi en taki we teke a gaan sani di a du gi u fu bigi.​—Leisi 2 Korentesama 6:1.

14. Faw sa soi taki we biibi den leli di Yehofa e gi u?

¹⁴ We soi taki u lobi Yehofa te we fitoow en anga te we wooko anga den sani di ai taigi u. U sa du a sani ya te u mu du son sani. Te wo luku sowtu sikoo leli wo teke, efuso kande sowtu wooko wo du, u mu meke moiti fu sabi san Yehofa wani u du (1 Kor. 10:31; 2 Kor. 5:7). Te we meke moiti fu wooko anga den sani di Yehofa e leli u, u biibi e kon moo taanga. Wi anga en e toon moo bun mati tu. Boiti dati, wo si a howpu di wi abi fu libi fu teego enke wan tuutuu sani.​—Rom. 5:3-5; Yak. 2:21, 22.

15. Faw sa soi taki we teke a sani di Yehofa du gi u fu bigi na a pisiten fu a Membeefesa?

¹⁵ A wiki fosi a Membeefesa anga baka a Membeefesa, u mu soi Yehofa taki we teke a sani di a du gi u fu bigi. Te we du a sani ya, da we soi en taki ai bigi gi u taki a lobi u. Boiti taki useefi e teke seeka fu go na a Membeefesa, u mu kai taa sama  tu (1 Tim. 2:4). Taigi den sama di yo kai kon na a Membeefesa kiin saw pasa. I sa soi den den felon a jw.org di den e kai Saide Yesesi be mu dede? anga Membee a dede fu Yesesi fu yeepi den. Den owluman mu kai den sama di nai kon a komakandaa moo. Pakisei fa Yehofa, Yesesi anga den engel a hemel o piisii efu wan fu den sikapu di be lasi daai kon baka aini a kulu. Den baala anga sisa seefi o piisii tu (Luk. 15:4-7). Te u go na a Membeefesa u mu meke moiti fu bali wadaa gi den nyun sama di o kon ape tu. Boiti dati, u mu poti pakisei a den sama di á be e kon wan pisiten a komakandaa moo. U wani den fii taki we poolo anga den taki den kon na a Membeefesa.​—Rom. 12:13.

16. Saide i mu du moo aini a peleikiwooko a pisiten fu a Membeefesa?

¹⁶ I si enke i sa du moo aini a peleikiwooko a wiki fosi a Membeefesa? We efii du a sani ya, ye soi taki ye teke a sani di Yehofa anga en Manpikin Yesesi du gii fu bigi. O moo we go aini a peleikiwooko, o moo wo go e si fa Yehofa e yeepi u, wo moo fitoow en tu (1 Kor. 3:9). Wa mu feegete fu leisi den leisi pisi fu Beibel di de aini a Deiwowtu efuso den pisi di de aini a mindiiwiki komakandaa buku. Kande i sa sutudeli den toli ya a pisiten fu a Membeefesa.

17. Sai meke Yehofa piisii? (Luku a faki di den e kai ‘ Faw sa soi Yehofa taki ai bigi gi u taki a lobi u’.)

¹⁷ Kande ya poi fende a okasi fu du ala den sani di u taki aini a artikel ya. Ma ya mu feegete a sani ya, Yehofa nai maiki yu anga taawan. A sabi sai poi du gi en. A sabi fai lobi en tu. Ai piisii te ai si taki ye teke en fu bigi taki a meke en Manpikin kon dede gii.​—1 Sam. 16:7; Malik. 12:41-44.

18. Saide we gi Yehofa anga Yesesi Kelestesi daa?

¹⁸ Fu di Yesesi kon dede gi u meke u poi fende paadon fu u sondu. A sani ya meke wi anga Yehofa poi toon mati. Boiti dati, u sa libi fu teego aini a ten di e kon. Meke u soi Yehofa ala yuu taki ai bigi gi u taki a lobi u, bika na a lobi ya meke wo fende den sani di a paamisi u (1 Yoh. 4:19). Fu di Yesesi lobi u, meke a dede gi u fu u sa fende teego libi. Neen meke u mu soi en taki a sani di a du ya e bigi gi u.​—Yoh. 15:13.