1. Saide Yehofa sete a toow libi?

 YEHOFA na ‘a koloku Gadu’, neen meke a wani u de koloku tu (1 Tim. 1:11). A gi u omen kado di e meke wi e piisii fu a libi (Yak. 1:17). Te wan man anga wan uman toow, den e paamisi makandaa taki den o lobi denseefi, den o lesipeki makandaa tu. Te toowpaa e tan soi lobi gi denseefi, a sani ya e meke den e piisii tuutuu.​—Odo 5:18.

 2. Sai pasa aini son toow libi nownow?

² A tyali taki son toowpaa aini a ten ya nai tan soi lobi gi denseefi moo enke fa den be paamisi na a toowdei fu den. A sani ya meke den nai de koloku moo. A olikanisâsi di e luku gusontu toli a hii goontapu taki, a omen man e fon den uman, den e kosi den, a omen taa sani den e du anga den ete. Den man di e du den sowtu sani ya e libi switi anga den uman fu den te den de a sama ini. Ma te den de a osu, da den e kii den anga pina. A omen man di toow e luku sekisi felon tu, a sani ya e meke den uman fu den e fii enke den man á lobi den.

 3. San sa meke wan man e libi ogii anga en uman?

³ Son manengee e libi ogii anga den uman fu den, fu di kande den dda be gwenti libi ogii anga den mma di den be moo yonkuu. Na a sani ya meke den e si enke a ná wan fowtu sani fu abi den manii de. Taawan kiya kon anga a denki taki, yu enke manengee mu soi a uman taki a yu a ‘basi’ fu a osu. Neen meke den e du sani guwaguwa. Omen fu den á poi dwengi denseefi te den ati boon. Son manengee luku sekisi felon aini a ten di pasa te, neen meke den nai si umansama fu wan sani. Ondoosuku soi tu taki ala den sani ya kon moo ogii na a pisiten fu a COVID-19 siki. Ma winsi den sani ya be e miti yu aini a  ten di pasa, tokuso dati nai gii pasi fu libi ogii anga yu uman.

 4. Anga san den baala di toow mu luku bun? Saide a sani ya pelensipali?

⁴ Den baala di toow mu luku bun fu den nai si den uman fu den enke fa a goontapu e si umansama. a Saide? Bika den sani di wan sama e pakisei, a den sani de ai du. Apostel Pawlesi be wasikoi den Kelesten a Rome taki den á mu ‘libi enke den sama fu a goontapu moo’ (Rom. 12:1, 2). Na a ten di Pawlesi be sikiifi a biifi ya gi den, omen fu den a be Kelesten wan hii pisiten kaba. Tokuso a biifi fu Pawlesi be e soi taki a omen fu den be e libi enke sama di nai dini Yehofa. Neen meke a be gi den taanga-sikin fu kengi a fasi fa den be e denki anga a fasi fa den be e tyai denseefi. Den baala aini a ten ya sa wooko anga a sani di Pawlesi be taki ya tu. A tyali taki son wan fu den e denki enke den sama fu a goontapu ya ete, neen meke den e libi ogii anga den uman fu den. b Ma fa Yehofa wani manengee libi anga den uman? Wo fende a piki fu a akisi ya aini a tekisi di e holibaka gi a artikel ya.

 5. Enke fa 1 Peitilisi 3:7 e soi, da fa wan man mu libi anga en uman?

⁵ Leisi 1 Peitilisi 3:7. Yehofa e taigi ala den man di toow fu libi bun anga den uman. A sani ya wani taki den mu lobi den uman, den mu e solugu den. Aini a artikel ya, wo luku fa wan man mu libi anga en uman. Ma fosi dati, wo luku san a wantu sani di noiti wan man mu du anga en uman.

NÁ DU SANI DI O HATI YU UMAN

 6. Fa Yehofa e si den man di e fon den uman? (Kolosesama 3:19)

⁶ Wan man á mu e fon mi en uman. Yehofa e buuse iniiwan sama di e du ogii (Ps. 11:5). Neen meke ai buuse den man di e libi ogii anga den uman fu den efuso fon den. (Male. 2:16; leisi Kolosesama 3:19.) Enke fa 1 Peitilisi 3:7 e soi, da efu wan man nai libi bun anga en uman, en anga Yehofa naw poi de mati. Yehofa naw aliki den begi fi en tu.

 7. Enke fa Efeisesama 4:31, 32 e soi, da san wan man di toow á mu e taki?

⁷ Wan man á mu e bali en uman efuso taigi en hati sani. A omen man e taki goofu anga den uman, den e taigi den sani di e hati den tu. U mu holi a pakisei taki Yehofa ‘e buuse takuu atiboon, babali anga kosi’. c (Leisi Efeisesama 4:31, 32.) Yehofa e yee ala sani. Neen meke ai booko en ede anga a fasi fa wan man e taki anga en uman, winsi a den wawan de a wan peesi. Wan man di e taki goofu anga en uman e poli en toowlibi. A sani ya sa meke en anga Yehofa á de mati moo.​—Yak. 1:26.

 8. Fa Yehofa e si sekisi felon?

⁸ Wan man di toow á mu e luku sekisi felon. Yehofa e buuse en te sama e luku sekisi felon. Winsi a sekisi fowtow wan baala e luku tokuso en anga Yehofa sa poli, bika ai soi taki a nai lesipeki en uman. d Yehofa á wani den man di toow waka gi  den uman. Wan man di lobi en uman naw waka gi en noiti. Noiti aw denki fu du so wan sani tu. Yesesi taki wan man di e luku wan uman anga a fii fu didon anga en, siibi anga en kaba ‘aini en ati’. e​—Mat. 5:28, 29.

 9. Saide Yehofa e buuse en te wan man e dwengi en uman fu du son sani te ai siibi anga en?

⁹ Ya mu e fooseli yu uman fu du son sani te ye siibi anga en. Son man e dwengi a uman fi en fu du son sani, ma kande den sani ya e fooseli a kosensi fu a uman. Kande ai meke a fii enke en man á lobi en. Yehofa á lobi en seefiseefi te wan man e libi so anga en uman. A sani di Yehofa wani, a taki wan man mu lobi en uman, a mu e libi switi anga en. A mu e lesipeki a kosensi fi en uman. A mu holi den fii fi en a pakisei tu (Efe. 5:28, 29). Ma saw yeepi wan baala di gwenti dwengi en uman fu du son sani te den e siibi anga denseefi? San sa yeepi wan baala efu ai luku sekisi felon? Saw yeepi en fu kengi en denki? Saw yeepi en fu tyai enseefi bun?

SAW YEEPI WAN MAN FU TAPU ANGA TAKUU GWENTI?

10. Fa wan man sa waka a Yesesi baka?

¹⁰ Saw yeepi wan baala di toow fu a nai fooseli en uman efuso dwengi en fu du son sani? A sa puubei fu du sani enke Yesesi. Winsi fa noiti Yesesi toow, tokuso a be e libi switi anga den bakaman fi en. A letiso den baala di toow mu libi switi anga den uman tu (Efe. 5:25). Meke u luku san den manengee di toow sa leli fu a fasi fa Yesesi be e libi anga den apostel fi en anga a fasi fa a be e taki anga den.

11. Fa Yesesi be e libi anga den bakaman fi en?

¹¹ Yesesi be e libi switi anga den bakaman fi en, a be e lesipeki den tu. Noiti a kosi den efuso libi ogii anga den. Winsi fa a be abi makiti moo den, tokuso noiti a koboloiki a makiti ya fu meke den fii wan fasi efuso feele. A be e booko en ede anga taawan (Yoh. 13:12-17). A be taigi den bakaman fi en taki: ‘U luku san mi e du. Da wo fende kaakiti baka, bika mi ati safu, mi abi sakafasi’ (Mat. 11:28-30). A ná tei abi sakafasi da dati wani taki i lagi, bika Yesesi be abi a manii ya. A be e soi taki a poi dwengi enseefi. Te sama be e du sani anga en fu meke en ati boon, a be e de pii. Aa be e ligei anga den.

12. Fa Yesesi be e taki anga taawan?

¹² Den sani di Yesesi be e taki be e gi taawan taanga-sikin. Aa be e taki goofu anga den bakaman fi en (Luk. 8:47, 48). Te den sama di be e buuse en be e puubei fu meke en ati boon ‘aa be e kosi baka’ (1 Peit. 2:21-23). Son yuu Yesesi be e de pii, aa be e piki nawan sani (Mat. 27:12-14). Den Kelesten baala di toow e leli wan moin sani fu a fasi fa Yesesi be e tyai enseefi.

13. Enke fa Mateyesi 19:4-6 e soi, da fa wan man o ‘poi tan anga en uman’? (Luku a fowtow tu.)

¹³ Yesesi taigi ala manengee di toow taki den á mu waka gi den uman. En Dda seefi be taki wan man mu ‘tan anga en uman’. (Leisi Mateyesi 19:4-6.) A Giiki wowtu di vertaal anga ‘tan anga’ wani taki ‘fasi efuso miti kon a wan’. A sani ya e soi taki a lobi di toowpaa mu lobi denseefi mu taanga. Solanga wan fu den á du sani fu booko a toow fu den, den á mu paati. Wan man di lobi en uman tuutuu naw waka gi en. A naw go e luku sekisi felon efuso buku. A naw go e poti pakisei a  ‘sani di á bun’ (Ps. 119:37). Leti enke Yopu, ai meke wan kuudei anga en ain taki noiti aw luku wan taa uman a wan fasi di á fiti.​—Yopu 31:1.

14. San wan man di e libi ogii anga en uman mu du efu a wani Yehofa piisii anga en baka? San a mu du efu a wani en uman lobi en baka?

¹⁴ Efu wan man be e fon mi en uman efuso taigi en hati sani, da a omen sani a abi fu du fu seeka a toowlibi fi en. A mu meke moiti fi en anga Yehofa toon mati baka tu. A fosi sani, a taki a mu fusutan taki aa be e tyai enseefi bun. A mu fusutan taki Yehofa e yee ala sani, ai si san we du tu (Ps. 44:21; Peleik. 12:14; Heb. 4:13). Du fu tu, aa mu e fon mi en uman moo. A mu kengi en manii (Odo 28:13). Du fu dii, a mu akisi a uman fi en anga Yehofa paadon (Toli 3:19). A mu begi Yehofa fu a yeepi en fu kengi a fasi fa a be e denki anga a fasi fa a be e taki. A mu akisi en fu du sani enke fa a wani tu (Ps. 51:10-12; 2 Kor. 10:5; Filip. 2:13). Du fu fo, a mu du sani enke fa a be akisi Yehofa aini den begi fi en. A mu e buuse ogii, aa mu e kosi moo (Ps. 97:10). Du fu feifi, a mu go a den owluman wanten fu den yeepi en (Yak. 5:14-16). Du fu sigisi, kande a sa sikiifi wantu sani a pampila di o yeepi en fu aa du denseefi ogii moo. Efu wan baala di toow e luku sekisi felon, da a mu du den sigisi sani di kai a tapu ya tu. Yehofa o belesi a moiti di ai meke fu kengi a fasi fa a be e tyai enseefi (Ps. 37:5). Boiti taki wan man mu tapu fu libi ogii anga en uman, a mu leli fu lesipeki en tu. Fa a sa du a sani ya?

FAI SA SOI LOBI ANGA LESIPEKI GI YU UMAN?

15. Fa wan man sa soi taki a lobi en uman?

¹⁵ Soi yu uman taki i lobi en. Son baala e meke moiti ala dei fu du son sani fu soi taki a lobi en uman (1 Yoh. 3:18). Wan baala di toow naafu du omen gaan kofaliki sani ala yuu fu soi en uman taki a lobi  en. A sa holi en neen ana, efuso kande gi en wan baasa. Kande a sa sende wan app gi en taki ‘Mi lobi i ye’, efuso ‘Fai dei de te anga now’? Son yuu a sa sikiifi wan lobi biifi gi en fu taigi en taki a lobi en. Te wan man e du den sani ya, ai soi taki ai booko en ede anga en uman. A toowlibi fu den o moo waka bun tu.

16. Saide wan man mu e gafa en uman?

¹⁶ Gi yu uman daa fu den sani di ai du. Wan man di e lesipeki en uman e teke den sani di a uman e du fu bigi. A bun fu gi en daa fu den pikinpikin sani di ai du fu holibaka gi a osufamii (Kol. 3:15). Te wan man e gafa en uman, a sani ya e meke a fii bun. Efi ye taigi yu uman san fi en i lobi, aw teke en fu bigi. Aw piisii anga i tu.​—Odo 31:28.

17. Fa wan man sa soi taki ai lesipeki en uman?

¹⁷ Soi switifasi anga lesipeki. Wan man di e lesipeki en uman e soi taki ai booko en ede anga en. Aw si en enke wan moin kado di Yehofa gi en tu (Odo 18:22; 31:10). Neen meke aw libi switi anga en, aw lesipeki en, moomoo te ai siibi anga en. A naw dwengi en fu a du wan sani di e toobi a kosensi fi en. f Enseefi o du ala san a poi tu fi en kosensi tan kiin.​—Toli 24:16.

18. San wan man mu de kabakaba fu du? (Luku a faki di den e kai ‘ Fo sani di o yeepi wan man fu soi lesipeki gi en uman’.)

¹⁸ Ná pikin poolo Yehofa e poolo te a si a moiti di ye meke fu lesipeki yu uman anga den sani di ye taki anga den sani di ye du. De kabakaba fu soi lesipeki gi en, ná du sani fu hati en, libi switi anga en tu. Te ye du a sani ya, ye soi yu uman taki i lobi en, ye soi en taki a pelensipali gii. Ma san moo moin, a taki yu anga Yehofa o tan mati tu.​—Ps. 25:14.