1. San omen sama e poti pakisei aini a ten ya?

 AINI a ten ya, a omen sama e booko den ede anga denseefi. Den nai booko den ede anga taawan. A omen fu den e poti den sani di den e du a internet, soso fu di den wani sama poti pakisei a den. We si tu taki a wantu sama namo e poti pakisei a Gadu. Neen meke aini a artikel ya, wo luku san a wani taki fu gi Yehofa gaandi anga saw yeepi u fu du a sani ya. Boiti dati, wo si faw sa gi Gadu gaandi anga fa enseefi o gi en nen gaandi aini a ten di e kon.

SAN A WANI TAKI FU GI YEHOFA GAANDI?

 2. San Yehofa be du na a Sinai mongo? (Luku a fowtow a fesise fu A Wakititolen)

² San a wani taki fu ‘gi gaandi’? Aini Beibel a wowtu ‘gaandi’ e soi go a iniiwan sani di e soi a kaakiti di wan sama abi. Baka di Yehofa fii a foluku fi en puu a Egepte, a soi den a kaakiti fi en baka wantu dei. Pakisei a sani ya: A omen miliyun Islayelisama be kon a wan a Sinai mongo fu yee san a Gadu fu den be abi fu taigi den. Wan baaka woluku be tapu a hii mongo. Somoko be lontu en tu. Wanboowanboo a doti bigin seke, dondoo be e bali, faya be e koti a tapu, i be poi yee wan tutu e bali taanga (Ek. 19:16-18; 24:17; Ps. 68:8). Den Islayelisama be musu foondoo di Yehofa du a sani ya, den be musu si a kaakiti fi en.

 3. San a wani taki fu gi Yehofa gaandi?

 ³ Ma fa fu wi enke libisama? U poi gi Yehofa gaandi? Eeye, u poi. Wan fasi faw sa du a sani ya, a te we taigi taawan den moin sani di Yehofa du anga den moin manii di a abi. Te we teke san ai du gi u fu bigi, a wan fasi fa we gi en gaandi tu (Yes. 26:12). Kownu David a wan sama di u sa waka neen baka te u luku fa a be e gi Yehofa gaandi. Wan leisi di a be e begi na a foluku fu Islayeli fesi, a be taki: ‘Yehofa, a yu na a moo gaan Gadu, yu abi makiti, a yu ala bun sani e komoto, neen meke a yu fiti fu fende ala gaandi.’ Baka di David kaba begi, ‘ala den sama di be kon ape gafa Yehofa’.​—1 Kolon. 29:11, 20.

 4. Fa Yesesi be e gi Yehofa gaandi?

⁴ Di Yesesi be de a goontapu a be e taigi sama taki a Yehofa be e gi en a kaakiti fu du wonduu, a so a be e gi en Dda gaandi (Malik. 5:18-20). A be e yeepi taawan fu si den bun sani di Yehofa e du. A be e libi bun anga taawan tu. Wan leisi di Yesesi be e leli sama aini a snoga, wan uman be de ape di ogii yeye be e fooseli 18 yali langa. A ogii yeye be e meke a uman ya waka bendibendi. Yesesi be fusutan fa a uman ya be e fii, neen meke a be wani yeepi en. A waka go neen, neen a taki switi anga en. A taigi en taki: ‘Uman, i kon bun, i naabi a siki ya moo. Faisi a poti ana na a uman tapu, a so a opo taampu wanten neen a bigin gafa Gadu.’ A uman be e gi Yehofa daa taki a be meke a betee baka (Luk. 13:10-13). A wan bun sani taki a uman ya be e gafa Yehofa na a okasi de. Meke u luku wantu sani di e meke we gafa Yehofa aini a ten ya.

SAIDE WE GI YEHOFA GAANDI?

 5. San a wantu sani di e meke we lesipeki Yehofa?

⁵ We gi Yehofa gaandi fu di we lesipeki en. A omen sani de saide we lesipeki Yehofa. Yehofa abi a makiti fu du iniiwan sani di a wani, noiti ai weli tu (Ps. 96:4-7). A koni fi en de kiin fu si a den sani di a meke. Neen gi u libi anga ala den sani di wi abi fanowdu fu tan a libi (Openb. 4:11). A nai kengi mofu (Openb. 15:4). Ala sani di ai du e waka bun. Ai du san a paamisi ala yuu (Yow. 23:14). Neen meke polofeiti Yelemiya be sikiifi fu Yehofa taki: ‘Bika nawan koniman efuso kownu fu a hii goontapu de enke yu’ (Yel. 10:6, 7). A omen sani de saide we lesipeki u Dda di de a hemel. Boiti dati, u lobi en anga u hii ati.

 6. Saide u lobi Yehofa?

⁶ We gi Yehofa gaandi fu di u lobi en. U lobi Yehofa, bika a abi bun manii. A abi tyali-ati, ai booko en ede anga u (Ps. 103:13; Yes. 49:15). Te we tyali enseefi e tyali tu (Sak. 2:8). Ai yeepi u fu kon moo koosube neen fu di a wani u toon en mati (Ps. 25:14; Odo 17:27). Yehofa a wan Gadu di abi sakafasi. ‘Ai bendi te a doti fu luku hemel anga goontapu. Ai diki a pootiman puu a doti’ (Ps. 113:6, 7). Ala den sani ya e meke we gi Yehofa gaandi.​—Ps. 86:12.

 7. Sowtu okasi wi abi?

⁷ We gi Yehofa gaandi fu di u wani taa sama sabi en. A omen sama á sabi fa Yehofa de tuutuu, bika Saatan beendi a fusutan fu den anga den lei di ai paati (2 Kor. 4:4). Saatan meke omen sama e biibi tu taki Yehofa a ná wan bun Gadu. Ai paati lei taki Gadu nai booko en ede anga u, a taki neen e meke ogii e miti u.  Ma u sabi fa Gadu de tuutuu. Neen meke wi abi a okasi fu soi taawan den moin manii fu Yehofa, fu denseefi sa gafa en tu (Yes. 43:10). Psalm 96 e soi taki u mu poti pakisei na a gi di we gi Yehofa gaandi. A Psalm ya o soi u faw sa gi Yehofa a gaandi di a mu fende.

FAW SA GI YEHOFA A GAANDI DI A MU FENDE?

 8. San a wan fasi faw sa gi Yehofa gaandi? (Psalm 96:1-3)

⁸ Leisi Psalm 96:1-3. We gi Yehofa gaandi anga den sani di we taki fi en. Den vers ya e soi u taki u mu ‘singi gi Yehofa’, u mu ‘gafa en’, u mu ‘paati a bun nyunsu taki Gadu e fii sama’, u mu ‘taigi ala sama san ai du gi u’. Ala den okasi ya a moin fasi fa we gi Yehofa gaandi. Den Kelesten fu fosi be e soi taawan den bun manii di Yehofa abi anga ala den bun sani di a be e du gi den (Dan. 3:16-18; Toli 4:29). Faw sa du a sani ya?

9-10. San a toli fu Angelena e leli i? (Luku a fowtow tu.)

⁹ Meke u luku a toli fu Angelena, a wan sisa di e tan na Ameekankondee. Fu di a be abi deki-ati, meke a be opo taki gi a biibi fi en a wookope. Di a be bigin wooko, den be kai en anga den taa sama di be o bigin wooko ape fu kon a wan komakandaa fu be leli sabi denseefi moo bun. Angelena be seeka wantu fowtow fu soi den taki en a wan Yehofa Kotoigi di e dini Gadu anga piisii. Ma fosi a yuu doo fu Angelena be soi den sama, sama neen, wan fu den taa wookoman di be e taki be taigi den sama taki a be kiya enke wan Yehofa Kotoigi. A omen ogii a man ya be taki fu wi enke Kotoigi anga den sani di we biibi. Angelena taki: ‘Ná pikin naki mi ati be e naki. Ma mi be sabi taki den sani di a man ya be e taki fu Yehofa a ná tuu. Neen meke mi pakisei taki: “Mi naw poi de pii.” Mi musu taigi den fa Yehofa de tuutuu.’

¹⁰ Di a man kaba taki, Angelena begi aini en ati neen a taigi a man a wan switifasi taki: ‘Miseefi kiya enke wan Yehofa Kotoigi, ma te anga now mi a wan Kotoigi ete.’ Winsi fa den á be e go na a wan se, tokuso Angelena á ligei. A soi den taa wookoman fowtow fi en anga  baala anga sisa pe den e dini Yehofa anga piisii. A soi den a wan lesipeki fasi san ai biibi tu (1 Peit. 3:15). Di Angelena kaba taki, a man á be e ligei moo. Neen meke a taigi den wantu bun sani fu den Yehofa Kotoigi a ten di a be e mosoo anga den di a be moo yonkuu. Angelena taki: ‘A fiti fu opo taki gi Yehofa. A wan gaandi wi abi fu taki fu a nen fi en te sama e lei gi en.’ Useefi sa du a sani ya tu te sama e poli Gadu nen.

11. Fa den fosi Kelesten be e wooko anga a sani di sikiifi a Psalm 96:8?

¹¹ Leisi Psalm 96:8. We gi Yehofa gaandi te we koboloiki den sani di wi abi fu dini en. Na a sani ya den sama di be e dini en aini a ten di pasa be e du (Odo 3:9). Aini a ten di pasa, den Islayelisama be e gi moni fu yeepi meke a tempel anga fu seeka en (2 Kow. 12:4, 5; 1 Kolon. 29:3-9). Den bakaman fu Yesesi seefi ‘be e koboloiki den gudu fu den fu holibaka gi en’ (Luk. 8:1-3). Beibel e soi tu taki te son Kelesten fu fositen á be abi nyanyan, da den taa baala anga sisa be e sende gi den (Odo 11:27-29). Useefi aini a ten ya e gi Yehofa gaandi te we gi san wi abi fu holibaka gi a olikanisâsi fi en.

12. Fa den sani di we gi fu holibaka gi a wooko e gi Yehofa gaandi? (Luku a fowtow tu.)

¹² Meke u luku wan toli di e soi fa we gi Yehofa gaandi te we gi sani fu holibaka gi a wooko. Aini 2020, wan gaan deeten be kon a Zimbabwe. A omen sama be de fu dede fu di den á be e abi nyanyan. Wan sisa den e kai Prisca be e tan anda tu. Winsi fa a san be e hati, tokuso Prisca be e go a peleiki ala diidewooko anga feeda. Den sama di be e tan koosube fi en be e soso en. Den be e taigi en taki a moo betee a go wooko en goon pe fu a go a peleiki. Den taigi en taki: ‘Yo dede anga angii.’ Ma fu di Prisca be sabi taki Yehofa be o solugu en, meke a be e piki den ala yuu taki: ‘Noiti Yehofa e gwe fika den sama di e dini en.’ Aa langa seefi, neen a olikanisâsi sende nyanyan sani gi en. Fu di we gi sani fu holibaka gi a wooko di e du a hii goontapu, meke den baala be poi yeepi Prisca anga den taa baala anga sisa anga den sani di den be abi fanowdu. Den sama di be e tan koosube fu Prisca be e foondoo, den be  taigi en taki: ‘U si taki Gadu e yeepi yu ala yuu, useefi wani kon leli sabi sani fi en tu.’ Seibin fu den sama di be e tan koosube fi en be bigin go anga en a den komakandaa.

13. Fa a fasi fa we tyai useefi e gi Yehofa gaandi? (Psalm 96:9)

¹³ Leisi Psalm 96:9. We gi Yehofa gaandi anga a fasi fa we tyai useefi. Den pilisite be mu wasi den sikin. Den be mu kiin denseefi fosi den be go dini Yehofa na a tempel (Ek. 40:30-32). Ma san moo pelensipali a taki a naw sikin wawan u mu kiin. U mu koti pasi gi sani di Yehofa e buuse (Ps. 24:3, 4; 1 Peit. 1:15, 16). A bunbun moiti u mu meke fu ‘kengi a fasi fa u be de fosi’. U mu fika son gwenti efuso manii di á bun, u mu toon ‘nyun sama’, u mu kengi a fasi fa we denki, daw meke moiti fu kon abi manii di Yehofa lobi (Kol. 3:9, 10). Winsi wan sama a be wan gaan ogiiman fosi, tokuso Yehofa poi yeepi en fu toon wan nyun sama.

14. San a toli fu Jack e leli i? (Luku a fowtow tu.)

¹⁴ Meke u luku a toli fu wan man den e kai Jack. A man ya be ogii, neen meke sama be e kai en ‘A Didibii’. Fu di a be e du omen ogii, meke den be leisi dede sitaafu gi en. Ma di Jack be e wakiti fu den kii en, wan baala di be e kon na a sitaafu-osu pe den be sooto en be akisi en efu a wani sutudeli Beibel. Jack be bigin sutudeli Beibel anga en. Winsi fa Jack be du omen ogii, tokuso a be kengi en manii. Baka wan pisiten neen a dopu enke wan Yehofa Kotoigi. Ná pikin kengi Jack be kengi. Neen meke a dei di den be e go kii en, wantu fu den sama di be e holi wakiti na a sitaafu-osu ain be e lon wataa di den bali adyosi gi en. Wan fu den suudati di be e wooko na a sitaafu-osu taki: ‘Jack be de wan fu den moo ogii sitaafuman na a peesi ya. Ma nownow neen na a moo bun wan.’ A wiki baka di Jack dede, a baala di be abi a gwenti fu go holi komakandaa na a sitaafu-osu be miti wan taa sitaafuman di be kon a komakandaa fu a fosi leisi. A be go fu di a be foondoo fu a fasi fa Jack be kengi, neen meke a be wani sabi san a be mu du fu dini Yehofa tu. A sani ya e soi kiin taki a fasi fa we tyai useefi e gi Yehofa gaandi.​—1 Peit. 2:12.

 FA YEHOFA O SANTA A NEN FI EN AINI A TEN DI E KON?

15. Fa Yehofa o soi ala sama dyonson taki neen na a sama di fiti fu fende ala gaandi? (Psalm 96:10-13)

¹⁵ Leisi Psalm 96:10-13. Den lasiti vers fu Psalm 96 e soi taki Yehofa a wan Kownu anga wan Kuutubakaa di e kuutu sani a wan letifasi ala yuu. Fa Yehofa o santa a nen fi en aini a ten di e kon? Aw du a sani ya te aw meke sani waka a wan letifasi. Dyonson moo, aw poli a Gaan Babilon, bika den falisi keliki e poli en nen (Openb. 17:5, 16; 19:1, 2). Te a Gaan Babilon o kisi poli, kande wantu sama di o si a sani ya o wani kon dini Yehofa. Te fu kaba, Yehofa o poli ala den sama di e taangayesi en efuso poli en nen na a gaan dei fi en di den e kai Alimakedon. Ma na a taa se, aw fii den sama di e aliki en efuso di e santa en nen (Malik. 8:38; 2 Tes. 1:6-10). Na a kaba fu a Dunsu Yali Tii fu Kelestesi, Yehofa o soi taki neen na a sama di fiti fu fende ala gaandi (Openb. 20:7-10). Na a ten de, ‘leti enke fa a se fuu anga wataa, a so ala sama o sabi taki Yehofa gendee’.​—Hab. 2:14.

16. Sai de kabakaba fu du? (Luku a fowtow tu.)

¹⁶ Ná pikin moin aw moin te ala sama a goontapu o gafa Yehofa. Ma fosi a dei de doo, u mu du ala saw poi fu taki fu a Gadu fu u. U mu tyai useefi a wan fasi di e gi en nen gaandi. Fu di wa mu feegete a sani ya, meke den baala di e tii a wooko poti Psalm 96:8 enke a tekisi fu a yali 2025. Ai taki: ‘Gafa Yehofa fu a nen fi en ede.’