SUTUDI-ARTIKEL 4
SINGI 18 A pai a paiman gi wi
San a dede fu Yesesi e leli u?
‘Na a fasi ya Gadu soi taki a lobi u.’—1 YOH. 4:9.
SAN WO LELI
Aini a artikel ya, wo si san a dede fu Yesesi e leli u fu den manii fi en anga den manii fu Yehofa.
1. Sowtu wini we fende te we go na a Membeefesa ala yali?
A WAN gaan sani Yehofa du di a meke Yesesi kon dede gi u (2 Kor. 9:15). Fu di Yesesi dede gi u, meke wi anga Yehofa sa toon mati. Na a sani di a du ya meke u sa libi fu teego aini a ten di e kon. Neen meke a mu e bigi gi u taki Yehofa meke Yesesi kon dede gi u, bika a sani ya e soi taki ná pikin lobi a lobi u (Rom. 5:8). Na ala yuu u mu e teke a dede di Yesesi kon dede gi u fu bigi. Neen meke a be taigi den bakaman fi en taki den mu e holi a Membeefesa ala yuu.—Luk. 22:19, 20.
2. San wo luku aini a artikel ya?
2 A yali ya wo holi a Membeefesa a sataa 12 april 2025. U sabi taki we bigin teke seeka gi a dei ya kaba. We fende wini te we teke ten pakisei a sani di Yehofa anga Yesesi du gi u na a pisiten fu a Membeefesa. Aini a artikel ya, wo luku san a dede fu Yesesi e leli u fu Yehofa anga Yesesi seefi. Aini den taa artikel, wo si saw mu du fu fende wini fu a dede fu Yesesi anga faw sa soi taki we teke en fu bigi.
SAN A DEDE FU YESESI E LELI U FU YEHOFA?
3. Fa a dede fu wan man sa meke miliyunmiliyun sama fii fu sondu anga dede? (Luku a fowtow tu.)
3 A dede di Yesesi dede gi u e soi taki Yehofa a wan Gadu di lobi te sani e waka a wan letifasi (Deit. 32:4). Saide u sa taki a sani ya? Pakisei a sani ya: Di Adan ná aliki Yehofa, a sondu neen a dede. Fu di wi a bakapikin fu Adan anga Efa, meke useefi abi sondu. Na a sondu ya meke we dede tu (Rom. 5:12). Fu be man fii fu sondu anga dede, meke Yehofa sende en Manpikin kon dede gi u. Ma fa a dede fu wan sama namo sa fii u fu sondu anga dede? Apostel Pawlesi be taki: ‘Bika leti enke fa omen sama toon sondu sama fu di wan man taangayesi Gadu, a letiso omen sama toon leti-ati sama di wan man aliki Gadu’ (Rom. 5:19; 1 Tim. 2:6). Pawlesi be taki ala sama abi sondu, neen meke we dede fu di wan man ná aliki Gadu. Fu be man fii fu a sondu ya, da wan man di á be abi sondu be mu aliki Gadu.
Wan man tyai sondu kon gi ala u, neen meke ala we dede. Ma wan man meke u sa fii fu sondu anga dede (Luku paragraaf 3)
4. Saide Yehofa á fika den bakapikin fu Adan di be o aliki en fu libi fu teego?
4 A namonamo Yesesi be mu dede fu fii wi? Saide Yehofa á fika den bakapikin fu Adan di be o aliki en fu libi fu teego? Gi wi enke sondu libisama, a sani ya na a moo bun sani di Yehofa be sa du. Ma gi Yehofa, aa be o de wan bun sani, bika a be o gei enke Adan á be sondu noiti. Boiti dati, a be o gei enke den bakapikin fi enseefi á be abi sondu.
5. Saide u sa biibi taki Yehofa e du sani a wan letifasi ala yuu?
5 Ma san be o pasa efu Yehofa á be meke en Manpikin kon dede gi u? San be o pasa efu a be wai a sondu fu Adan poti a wan se fu di a be wani den bakapikin fi en fende teego libi? Efu a be du a sani ya, kande son sama be o go e denki taki Yehofa naw du den sani di a taki aw du aini a ten di e kon, bika aa be du sani a wan letifasi. Son sama be o go e akisi denseefi taki efu Gadu e du sani a wan letifasi ala yuu. Aw man du ala den sani di a paamisi u? Aa de fu u booko wi ede anga a pisi de. A du di Yehofa e du sani a wan letifasi anga a sende di a sende en wan kodo Manpikin kon dede gi u, e soi u kiin taki aw du sani a wan letifasi ala yuu.
6. San a wan taa sani di meke Yehofa sende en Manpikin kon dede gi u? (1 Yohanisi 4:9, 10)
6 A sende di Yehofa sende Yesesi kon dede gi u, e yeepi u fu fusutan on fuu a lobi u. (Yoh. 3:16; leisi 1 Yohanisi 4:9, 10.) A sende di a sende Yesesi kon dede gi u e leli u taki a ná teego libi namo Yehofa wani gi u, ma a wani fu u de aini en osufamii tu. Pakisei a sani ya: Di Adan sondu neen Yehofa puu en aini a osufamii fi en. Neen meke useefi á be poi de aini a osufamii fi en moo tu. Ma fu di Yesesi kon dede gi u, meke u poi fende paadon fu u sondu. Yehofa o tyai ala den sama di e biibi en anga di e du san a taki kon aini a osufamii fi en. Fu di Yehofa e gi u paadon fu u sondu, meke wi anga en anga den baala anga sisa fu useefi poi toon mati tu. A sani ya e soi taki ná pikin lobi Yehofa lobi u.—Rom. 5:10, 11.
7. San a pina di Yesesi pina e leli u fu a lobi di Yehofa lobi u?
7 Te we pakisei fa Yehofa be sai fii di a si fa en Manpikin be e pina, da we moo fusutan on fuu Yehofa lobi u. Saatan taki te sani e moo wan sama, aw gwe fika Yehofa. Fu soi taki Saatan a wan leiman, meke Yehofa fika Yesesi fu nyan pina fosi a dede (Yopu 2:1-5; 1 Peit. 2:21). Yehofa be si fa den be e soso en Manpikin, fa den suudati be fon mi en anga fa den be sipikii en a wan ponsu. A si fa a Manpikin fi en di a be lobi pina te enke a dede (Mat. 27:28-31, 39). Efu Yehofa be wani a be sa tapu den sani ya a iniiwan wan yuu, bika wan fu den sama di be de ape be taki: ‘Efu Gadu lobi en, da aw yeepi en.’ Ma winsi fa a be poi yeepi en Manpikin, tokuso aa du en (Mat. 27:42, 43). Efu Yehofa be du a sani ya, Yesesi á be o dede fu pai a paiman gi u. Neen meke Yehofa gi pasi taki Yesesi pina te enke a hali en lasiti boo.
8. Saide u sa taki a be musu e hati Yehofa di a si fa en Manpikin be e pina? (Luku a fowtow tu.)
8 Wa mu si enke fu di Yehofa na a moo makiti sama di de, da dati wani taki a naabi fii. Fu di Yehofa meke wi enke fa enseefi de, meke wi abi denseefi fii enke en. Beibel e soi taki ‘den be e du sani di be e hati en, den be e meke a tyali’ tu (Ps. 78:40, 41). Luku a toli fu Abalaham anga Isaki. Yehofa be taigi Abalaham taki a be mu gi en a wan kodo manpikin fi en enke ofaandi (Gen. 22:9-12; Heb. 11:17-19). Pakisei fa Abalaham be sai fii di a be mu seeka sani fu kii a wan kodo manpikin fi en. We moo fusutan fa Yehofa be e fii di a be e luku fa den be e pina a pikin fi en te enke den kii en. Luku a Saanantongo felon a jw.org di den e kai Teki na eksempre fu sma di ben abi bribi—Abraham, Pisi 2.
A be e du Yehofa ogii di a be e si fa en Manpikin e pina (Luku paragraaf 8)
9. San Romesama 8:32, 38, 39 e leli i fu a lobi fu Yehofa?
9 A dede di Yesesi kon dede gii e soi taki sama á de di lobi i moo Yehofa. A lobi i moo wan famii fii dii sabi taki lobi i tuutuu efuso a moo bun mati di yu abi. (Leisi Romesama 8:32, 38, 39.) Yehofa lobi i moo enke fai lobi iseefi. Ya wani libi fu teego noh? Na a sani de Yehofa wani gii, a wani i libi fu teego. Ya wani fende paadon fu den sondu fii noh? Yehofa de kabakaba fu gii paadon. Neen meke a wan sani namo a wani i du, a wani i soi taki ye teke san a du gii fu bigi. A wani i biibi en, a wani i aliki en tu. A dede di Yesesi kon dede gii a wan kado di e soi taki ná pikin lobi Yehofa lobi i. Aini a nyun goontapu yo kon sabi omen taa sani di Yehofa du gii fu di a lobi i.—Peleik. 3:11.
SAN A DEDE FU YESESI E LELI U FI EN
10. (a) Saide Yesesi be e booko en ede di a be mu dede? (b) Fa Yesesi soi taki a Yehofa abi leti? (Luku a faki di den e kai ‘ A holi di Yesesi holidoo e soi taki a Yehofa abi a leti fu tii’.)
10 Yesesi be e booko en ede anga san sama be e denki fi en Dda (Yoh. 14:31). Fosi Yesesi dede a be e booko en ede, bika den be taki a kosi Gadu. A sani ya be sa poli en Dda nen. Neen meke a begi taki: ‘Nda, efu a poi, da gaantangi puu a kan ya a mi fesi baa’ (Mat. 26:39). Yesesi tan dini Yehofa te enke en boo koti. A sani ya e soi kiin taki den lei di Saatan taki fu Yehofa a ná tuu.
11. Fa Yesesi soi taki a lobi sama? (Yohanisi 13:1)
11 A dede fu Yesesi e leli u taki ai booko en ede anga sama tuutuu, moomoo den bakaman fi en. (Odo 8:31; leisi Yohanisi 13:1.) Yesesi be sabi taki son wan fu den sani di a be mu du a goontapu á be o makiliki. Wan fu den sani ya na a dede di a be mu dede. Ma tokuso a du ala den sani ya, ná fu di neen Dda be sende en namo, ma fu di a be lobi sama tuutuu. Na a lobi ya meke a be e peleiki gi sama, a be e leli den, a be e yeepi den tu. A dei di den be o kii en, a wasi ala den futu fu den apostel, a leli den, a gi den taanga-sikin, a soi den fa den mu du sani tu (Yoh. 13:12-15). Di den be sipikii en na a ponsu ná pikin pen a be e fii. Tokuso Yesesi taigi wan fu den man di den be sipikii neen se taki aw de anga en aini a paladeisi. Boiti dati, a be e booko en ede anga en mma, neen meke a be taigi Yohanisi fu a solugu en mma gi en (Luk. 23:42, 43; Yoh. 19:26, 27). A ná di Yesesi de fu dede namo a soi taki a lobi sama, a be e libi bun anga den. A be e soi switifasi gi den tu.
12. Fa Yesesi e yeepi u nownow?
12 A tuu taki a wan leisi namo Yesesi kon dede gi u, ma tokuso te anga now ai yeepi wi ete (Rom. 6:10). A omen sani ai du fu u sa fende wini fu a dede fi en. Ai tii enke u Kownu anga gaan Pilisite. Neen na a ede fu a kemeente tu (1 Kor. 15:25; Efe. 5:23; Heb. 2:17). Nownow ai tyai ala den salufu Kelesten anga a gaan kulu kon a wan. Aw kaba anga a wooko ya fosi a gaan banowtu kaba a (Mat. 25:32; Malik. 13:27). Boiti dati, ai koboloiki a koni saafu di u sa fitoow fu gi u den leli di wi abi fanowdu fu u sa tan dini Yehofa (Mat. 24:45). Di aw tii na a pisiten fu a Dunsu yali tii fi en, aw tan yeepi wi ete. Ala den sani ya e soi taki Yehofa sende en Manpikin kon dede gi u tuu.
TAN LELI NYUN SANI
13. Fai sa tan leli sani fu a lobi di Yehofa anga Yesesi soi u?
13 I sa tan leli sani fu a lobi di Yehofa anga Yesesi soi u, te ye teke ten pakisei a gaan sani di den du gi u. Den wiki fosi a Membeefesa, i sa leisi wantu fu den buku di e taki fu a libi fu Yesesi. Baka a Membeefesa i sa leisi den ete. Ya mu leisi omen kapitel wan pasi. Teke i ten te ye leisi, dai pakisei saide u mu lobi Yehofa anga Yesesi. Ná feegete fu taigi taawan sai leli.
14. Enke fa Psalm 119:97 e soi, da fa a ondoosuku di yo ondoosuku sani o yeepi i fu tan leli sani fu a dede fu Yesesi? (Luku a fowtow tu.)
14 Efii de a waaleiti omen yali kaba, kande ye akisi iseefi efu nyun sani de fu leli ete fu a fasi fa Yehofa e kuutu sani, a lobi fi en anga a dede fi en Manpikin. Na ala yuu yo go e leli nyun sani fu den sani ya. Neen meke a sani dii mu du, a fu sutudeli den toli ya aini den buku fu u. Efii leisi wan sani aini Beibel di ya kaba fusutan, go ondoosuku en. Bakaten dai pakisei a sani dii sutudeli anga san ai leli i fu Yehofa anga Yesesi. Luku tu fa a toli dii sutudeli e soi taki den lobi i.—Leisi Psalm 119:97.
Winsi u de a waaleiti omen yali kaba, toku u sa leli nyun sani fu a dede fu Yesesi. A sani ya o meke u moo teke a sani di Yehofa anga Yesesi du gi u fu bigi (Luku paragraaf 14)
15. Saide i mu meke moiti fu leli nyun sani te ye leisi Beibel?
15 Ya mu fii booko-saka efi ya fende nyun sani di ye leisi. A ná ala yuu yo fii fu leisi tu. Ma i mu si iseefi enke wan sama di e suku gowtu. Wan sama di e suku gowtu mu wooko omen yuu langa efuso omen dei fosi ai fende wan pikin pisi gowtu. Ma tokuso a nai gi abaa, bika a sabi taki a den pikin pisi gowtu de o toon wan sani bakaten. Neen meke den pikin pisi gowtu di ai fende pelensipali gi en. Den nyun sani di ye leli aini Beibel pelensipali moo gowtu (Ps. 119:127; Odo 8:10). Du ala sai poi fu tan leisi Beibel. Meke moiti ala yuu fu leli nyun sani.—Ps. 1:2.
16. Faw sa waka a Yehofa anga Yesesi baka?
16 Te ye sutudeli, meke moiti fu wooko anga den sani dii leli. Noiti u mu feegete taki Yehofa a wan Gadu di e du sani a wan letifasi. Useefi e soi taki we waka a Yehofa baka te u nai paatibee. Leti enke Yesesi, we soi taki u lobi Yehofa anga taawan te we du sani enke fa a wani anga te we yeepi taawan, winsi sani nai go enke faw wani son yuu. Te we yeepi taawan fu kon sabi san Yehofa du gi den, a wan fasi fa we soi tu taki we waka a Yesesi baka.
17. San wo luku aini a taa artikel?
17 O moo we leli sani fu a dede fu Yesesi, o moo wo lobi Yehofa anga Yesesi. Efu u lobi den, den o lobi u tu (Yoh. 14:21; Yak. 4:8). Neen meke u mu e wooko anga ala den sani di Yehofa gi u. Aini a taa artikel, wo luku wantu taa wini di we fende fu a dede fu Yesesi anga faw sa soi taki u sabi kiyoo.
SINGI 107 Yehofa soi u san a lobi
a ‘Den sani’ di Pawlesi taki Gadu be o tyai kon a wan di sikiifi a Efeisesama 1:10, a ná aseefi enke den sani di Yesesi taki ‘Gadu kai’ a Mateyesi 24:31 anga Malikisi 13:27. Pawlesi be e soi go na a ten di Yehofa be o salufu den sama di o go tii makandaa anga Yesesi a hemel anga en santa yeye. Yesesi be e taki fu a ten di den salufuwan di o de a goontapu ya ete o kisi a kai fu go a hemel na a ten fu a gaan banowtu.
