1. San ala sama wani?

FA YU e fii te wan sama di i lobi efuso e lesipeki feegete i nen? Fa yu e fii efu a sama á sabi i moo seefiseefi? A sani ya sa meke i fii booko-saka. Saide? Bika ala sama wani taawan poti pakisei a den. Ma wi á wani den sabi u nen namo da a kaba. U wani den sabi u manii anga den bun di wi e du.​—Numeri 11:16; Yopu 31:6.

2, 3. San sa pasa te wi e angii fu sama poti pakisei a wi? (Luku a fowtow na a bigin.)

² Ma efu wi á luku bun, wi o wani taawan poti pakisei a u pasa peesi. A goontapu fu Saatan e gi u taanga-sikin fu suku balinen. Te wi e feti fu abi balinen u nai gi u Dda Yehofa a gaandi di u mu gi en.​—Openbaring 4:11.

³ Son wan fu den keliki fesiman fu a ten fu Yesesi be wani sama poti pakisei a den pasa peesi. Yesesi be wasikoi den disipel fi en taki: „U mu luku bun anga den man  di e leli sama a Weiti. Den lobi waka anga langa koosi. Den lobi te sama e gi den odi a wowoyo. Den lobi sidon a den moo bun peesi tu te den de a wan fesa.” A taki tu: „A sitaafu di den man ya o fende o moo ibi” (Lukasi 20:46, 47). Ma Yesesi gafa wan pooti uman di be poti tu pikin moni aini a moni kisi. A uman ya á be e suku nen a libisama (Lukasi 21:1-4). Den sani di libisama e poti pakisei, a ná den sani de pelensipali gi Yehofa anga Yesesi. A artikel ya o yeepi u fu si pe u mu suku bun nen.

4. Sama na a moo bun sama di sa poti pakisei a wi?

⁴ Sama na a moo bun sama di sa poti pakisei a wi? Aini a ten ya, a omen sama wani balinen. Den e meke moiti fu go a hei sikoo, fu du wan wooko efuso wan sani di o meke den gudu. Ma Pawlesi be taki sama na a moo bun sama di sa poti pakisei a u. A be taki: „Ma di u kon sabi Gadu kaba, fu taki en moo kiin, di Gadu kon sabi u kaba, fa a waka wi e daai go baka a den wisiwasi sani fu a goontapu ya di ná abi wini? Saide u wani dini den sani ya baka enke saafu?” (Galasiyasama 4:9) Sani á de di switi enke te u sabi taki ’Yehofa e poti pakisei a wi’, bika en na a moo Gaan Gadu fu hemel anga goontapu. Yehofa sabi u. A lobi u. Boiti dati a wani u toon en mati. A di a wani u toon en mati meke a meke u.​—Peleikiman 12:13, 14.

5. San u mu du efu u wani toon Yehofa mati?

⁵ U sabi Mosesi enke wan man di be de Yehofa mati. A begi Yehofa taki: „Meke mi kon sabi den pasi fi i.” Neen Yehofa taigi en taki: „A sani di yu akisi mi ya, mi o du en tu, bika mi lobi i. Mi sabi yu a yu nen” (Ekisodesi 33:12-17). Yehofa sa si wi enke en mati tu. Ma san u mu du efu u wani toon Yehofa mati? U mu lobi en, da u paamisi en taki wi o libi enke fa a wani.​—Leisi 1 Korentesama 8:3.

6, 7. San sa meke wi anga Yehofa á de mati moo?

⁶ U mu du ala san u poi fu wi anga u Dda Yehofa á poli. Leti enke den fosi Kelesten fu Galasiya, u mu meke moiti fu wi á daai go a „den wisiwasi sani” fu a goontapu baka. Wan fu den wisiwasi sani fu a goontapu ya, na a suku di sama e suku balinen anga a feti di den e feti fu kon gudu (Galasiyasama 4:9). Den baala anga sisa fu Galasiya be sabi Gadu kaba. Gadu seefi be sabi den. Ma toku Pawlesi taigi den taki den be e „daai go baka a den wisiwasi sani fu a goontapu ya”. A leti enke Pawlesi be akisi den taki: ’Saide u go toon saafu fu den wisiwasi sani ya baka?’

⁷ A sani ya sa miti wi aini a ten ya? Eeye a sa miti u. Leti enke Pawlesi kande di u kon dini Yehofa, u fika a balinen anga a gaandi di u be abi aini a goontapu fu Saatan. (Leisi Filipisama 3:7, 8.) Kande u gwe fika sani enke hei sikoo efuso wan wooko di e  pai omen moni. Kande u be sa kon gudu efuso abi balinen fu di u sabi singi efuso fu di u sabi du wan sport. Ma tokuso u daai baka gi ala den sani ya (Hebrewsama 11:24-27). A á be o bun fu a hati u taki u gwe fika den sani ya. Wi á mu si enke u libi be o moo waka bun efu wi á be gwe fika den sani ya. A sani de sa meke u daai go a den sani fu a goontapu di useefi be si enke ’wisiwasi sani’ efuso ’sani di ná abi wini’.

8. Saide u mu wani Yehofa poti pakisei a wi?

⁸ Saide u mu wani Yehofa poti pakisei a wi, pe fu a goontapu poti pakisei a wi? Wi o taki fu tu sani. A fosiwan, ala yuu Yehofa e soi den sama di e dini en anga den hii ati taki a lobi den. (Leisi Hebrewsama 6:10; 11:6) Yehofa lobi ala den sama di e dini en anga den hii ati. Efu a á be e poti pakisei a den, a be o de enke a nai du sani a wan ’letifasi’. Ala yuu Yehofa e poti pakisei „a den sama fi en” (2 Timotiyesi 2:19). Ai „si fa den bun-ati sama e tyai denseefi”. A sabi tu fa a mu yeepi den.​—Psalm 1:6; 2 Peitilisi 2:9.

9. Fa Yehofa be soi taki a lobi a foluku fi en?

⁹ Aini a ten di pasa Yehofa be e du gaan sani gi a foluku fi en fu soi den taki a lobi den (2 Koloniki 20:20, 29). Pakisei fa Yehofa yeepi a foluku fi en na a Lebi Se di Farao anga den suudati fi en be e lon a den baka (Ekisodesi 14:21-30; Psalm 106:9-11). A sani ya be foondoo den taa kondee sama di be yee a toli ya, bika baka wan sani fu 40 yali den be e gi a toli ya ete (Yowsuwa 2:9-11). Ai gi u taanga-sikin te wi e pakisei fa Yehofa be yeepi a foluku fi en aini a ten di pasa, bika dyonson Gok fu Magok o kon feti anga u (Eseikiyeli 38:8-12). A ten de wi o piisii taki wi á be suku balinen a goontapu, ma u be e meke moiti fu Yehofa lobi u.

10. San a wan taa sani di Yehofa e du gi den sama di a lobi?

¹⁰ Du fu tu, Yehofa e belesi den sama di a lobi a wan fasi di den á be denki. Efu wan sama e du bun gi taawan fu di a wani sama gafa en, Yehofa ná o pai en. Saide? Yesesi taki te taawan gafa den sowtu sama ya, da den fende den paiman kaba. (Leisi Mateyesi 6:1-5.) Ma Yehofa e „si ala san wi e du”. Ai si den sama di taawan á gafa fu den bun di den du. A sabi san den sama ya du, neen meke a o belesi den. Son leisi Yehofa e belesi den sama di e dini en a wan fasi di den á be denki. Meke u poti pakisei a tu sama di Yehofa be belesi.

11. Fa Yehofa soi Maliya taki a lobi en?

¹¹ Yehofa be meke wan yonkuu uman den e kai Maliya, toon a mma fi en Manpikin Yesesi. Maliya be e tan a wan pikin foto den e kai Nasaleti. A foto ya á be de koosube fu Yelusalem pe a moin tempel be de. (Leisi Lukasi 1:26-33.) Saide Yehofa gi Maliya a gaandi ya? Wan engel fu Gadu di den e kai Gabiliyeli be taigi Maliya taki: ’Gadu lobi i.’ Den sani di Maliya taigi Elisabet bakaten e soi taki Maliya anga Yehofa a be tuutuu mati (Lukasi 1:46-55). Yehofa be e poti pakisei a Maliya. A be si taki Maliya be e dini en anga en hii ati, neen meke a belesi Maliya a wan fasi di Maliya á be denki.

12, 13. Fa Yehofa gi Yesesi gaandi di a meke? Fa a gi en gaandi di Maliya tyai en go na a tempel baka 40 dei?

¹² Sama Yehofa be taigi taki Yesesi meke? A á taigi den tiiman efuso den edeman fu Yelusalem anga Betelehem. Ma a sende engel go taigi wantu sikapuman di be abi sakafasi san be pasa. Den man ya be de anga den sikapu fu den a doose fu a foto Betelehem (Lukasi 2:8-14). Di den sikapuman yee fu a yonkuu pikin ya neen den go luku en (Lukasi 2:15-17). Maliya anga Yowsefu be musu foondoo di Yehofa gi Yesesi gaandi na a fasi ya. A fasi fa Saatan e du sani anga a fasi fa Yehofa e du sani, a ná aseefi. Di Saatan sende man di e luku sitali fu go luku Yesesi anga en mma anga en dda, neen ala sama aini Yelusalem be kon yee taki Yesesi meke. A sani ya be tyai omen polobelema kon (Mateyesi 2:3). Te fu kaba den be kii omen pikinnengee sosokaali.​—Mateyesi 2:16.

¹³ A Weiti di Yehofa be gi den Islayelisama be e soi taki baka 40 dei te wan mma meke wan manpikin, a mu tyai wan ofaandi gi Yehofa. Neen meke Maliya anga Yowsefu tyai Yesesi go na  a tempel di be de a Yelusalem. A pasi fu Betelehem go a Yelusalem be langa wan sani fu 9 kilomeiti (Lukasi 2:22-24). Di Maliya be de a pasi e go a Yelusalem, kande a be e akisi enseefi efu a pilisite be o gi Yesesi gaandi. Di den doo na a tempel sama gi Yesesi gaandi a wan fasi di Maliya á be denki. Yehofa be meke Simeyon, „wan man di be e lesipeki Gadu” anga Ana wan mma di be abi 84 yali, soi kiin taki a Yesesi be o toon a Mesiyas efuso Kelestesi.​—Lukasi 2:25-38.

14. Fa Yehofa belesi Maliya?

¹⁴ Yehofa belesi Maliya bakaten fu a solugu di a solugu Yesesi? Eeye. Gadu meke den sikiifi wantu fu den sani di Maliya taki anga wantu fu den sani di a du aini Beibel. Di Yesesi be e peleiki den dii anga afu yali, a gei enke Maliya á be e poi go anga en a den peesi pe a be e go. Neen meke a á si den sani di den sama di be de koosube fu Yesesi be si. Ma bakaten di den kii Yesesi a be de ape (Yohanisi 19:26). A be de a Yelusalem anga den disipel fu Yesesi fosi den be fende santa yeye na a Pinksterfesa (Toli 1:13, 14). A gei enke enseefi be fende santa yeye tu. Efu na so, da a o de anga Yesesi aini hemel fu teego. A sani ya a wan gaan belesi tuutuu!

15. Di Yesesi be de a goontapu fa Yehofa soi taki a lobi en?

¹⁵ Yesesi á be e suku gaandi a den keliki fesiman anga den tiiman fu a ten fi en. A dii leisi Yehofa taki komoto a hemel taki a lobi en. A sani ya be musu gi Yesesi taanga-sikin. Faisi a kaba dopu aini a Yordaan liba, neen Yehofa taki: „Disi a mi Manpikin, mi lobi en, ai meke mi piisii” (Mateyesi 3:17). A gei enke a Yesesi anga Yohanisi a dopuman wawan be yee san Yehofa taki. Ma wan yali fosi Yesesi dede, neen dii fu den apostel fi en yee di Yehofa taki: „Disi a mi Manpikin,  mi lobi en, ai meke mi piisii. U mu aliki en” (Mateyesi 17:5). Boiti dati wantu dei fosi Yesesi dede, Yehofa taki anga en komoto a hemel baka.​—Yohanisi 12:28.

16, 17. Fa Yehofa gi Yesesi gaandi a wan fasi di a á be denki?

¹⁶ Yesesi be sabi taki sama be o lei gi en taki a nai lesipeki Gadu. A be sabi taki den o kii en a wan sen fasi tu. Tokuso a begi taki sani mu waka enke fa Gadu wani, ná enke fa enseefi wani (Mateyesi 26:39, 42). Yesesi „be de kabakaba fu dede na a pina ponsu, winsi fa a be sabi taki a wan sen sani”. A be e meke moiti fu en Dda lobi en. A á be e suku balinen a goontapu ya (Hebrewsama 12:2). Fa Yehofa soi taki a lobi Yesesi?

¹⁷ Di Yesesi be de a goontapu, a begi en Dda fu a gi en a gaandi di a be abi di a be de a hemel (Yohanisi 17:5). Beibel nai soi taki Yesesi be wani gaandi moo san a be abi a hemel kaba. A á be e sidon luku fu Yehofa pai en fu san a be kon du a goontapu ya. Ma toku san Yehofa du? A belesi en a wan fasi di Yesesi á be denki. Di a weki Yesesi, a „hei en moo fa a be de kaba”. A meke Yesesi toon wan yeye di á poi dede moo. Nawan sama be fende a libi ya ete. * (Luku a maiki a ondoo.) (Filipisama 2:9; 1 Timotiyesi 6:16). Yehofa belesi Yesesi a wan foondoo fasi tuutuu di a du san a wani.

18. San o yeepi u fu du san Yehofa lobi, a peesi fu suku balinen aini a goontapu ya?

¹⁸ San o yeepi u fu du san Yehofa lobi, a peesi fu suku balinen aini a goontapu ya? A te wi e holi a pakisei taki ala yuu Yehofa e poti pakisei a den sama di e dini en anga den hii ati. U mu holi a pakisei tu taki ai belesi den a wan fasi di den á be denki. Winsi fa u sabi taki Yehofa o belesi wi aini a ten di e kon, tokuso wi á sabi finifini san a o du gi u. Winsi san e miti wi aini a goontapu fu Saatan ya, u mu holi a pakisei taki dyonson a goontapu ya ná o de moo. A balinen di sama abi aini a goontapu ya ná o de moo tu (1 Yohanisi 2:17). Ma u Dda Yehofa lobi u. Noiti a ’o feegete a wooko di u du gi en, anga a soi di u soi taki u lobi a nen fi en, bika ai du sani a wan letifasi’ (Hebrewsama 6:10). A o belesi u, a ná abi misi. Kande u foondoo te u si fa a belesi u.