Soi tyali-ati gi „ala sowtu sama”
DI YESESI leli den bakaman fi en fa den mu peleiki, a taigi den taki a ná ala sama o aliki a bosikopu di den e paati (Lukasi 10:3, 5, 6). Wi di e peleiki aini a ten ya e si a sani ya tu. Son sama di wi e miti e taki goofu anga u. Taawan e bali u. Te den du den sani ya, ai moo taanga gi u fu soi tyali-ati gi den. Ai taanga gi u tu fu peleiki gi den wan taa leisi.
Wan sama di abi tyali-ati e si san taawan abi fanowdu. Sowan sama e fii gi taawan. Ai wani yeepi taawan tu. Ma san o pasa efu tyali nai kisi u gi den sama di wi e miti te wi e peleiki? U ná o peleiki anga u hii ati moo. Dati wani taki u ná o angii fu peleiki gi den. U ná o poi yeepi den tu. A angii di wi e angii fu peleiki gi sama de enke wan faya. Moo i poti udu gi wan faya, moo a faya e bigi. A so a de tu taki moo tyali e kisi u gi den sama, moo wi o angii fu peleiki gi den!—1 Tesalonikasama 5:19.
San o yeepi u fu abi moo tyali-ati gi taawan winsi a á makiliki? Wi o taki fu wantu sama di u sa waka a den baka: Yehofa, Yesesi, anga apostel Pawlesi.
MEKE MOITI FU ABI TYALI-ATI ENKE YEHOFA
A omen dunsu yali kaba sama e lei gi Yehofa. Ma tokuso ai du „bun gi den sama di á sabi kiyoo anga den ogii sama” (Lukasi 6:35). Fa Yehofa e soi bun-ati gi sama? A abi pasensi anga ala sama. A wani „ala sowtu sama kon fii” (1 Timotiyesi 2:3, 4). Winsi fa Gadu e buuse den ogii di sama e du, tokuso a lobi den sama. A á wani nawan fu den dede.—2 Peitilisi 3:9.
Yehofa sabi taki Saatan e koli sama fu biibi lei (2 Korentesama 4:3, 4). Son sama a senten den yonkuu, neen den e leli sani fu Gadu di á tuu. Neen meke a fasi fa den e denki anga a fasi fa den e fii e meke a taanga gi den fu biibi san Beibel taki. Ma Yehofa wani yeepi den. Fa u du sabi a sani ya?
Pakisei fa Yehofa be e si den sama fu a foto Ninifei. Winsi fa den be e du omen ogii, tokuso Yehofa taigi Yona taki: „Tyali á mu kisi mi gi a gaan foto Ninifei noh? A moo enke 120.000 sama de aini a foto ya di á sabi san a bun anga a ogii” (Yona 4:11). Tyali be e kisi Yehofa gi den sama ya di á be sabi en. Neen meke a sende Yona fu go wasikoi den.
Leti enke fa Yehofa lobi sama, a so useefi lobi sama. Useefi de kabakaba fu yeepi den sama di wani aliki, winsi ai gei enke den ná o kon a waaleiti.
MEKE MOITI FU ABI TYALI-ATI ENKE YESESI
Leti enke Yehofa a so tyali be e kisi Yesesi gi taawan te a be e si fa ’sama be e pina den anga fa den be e waka buuyabuuya enke sikapu di ná abi sikapuman’ (Mateyesi 9:36). Yesesi be sabi saide den sani ya be e miti den. A be sabi taki a den fesiman fu den keliki be e libi ogii anga den. Den be e leli den omen sani tu di á tuu. Winsi fa Yesesi be sabi taki somen fu den sama di be e aliki en á be o toon en bakaman, tokuso a leli den omen sani.—Malikisi 4:1-9.
Yu á mu fii booko-saka te wan sama á wani aliki a fosi leisi
Son leisi te sani miti wan sama en manii e kengi
Te wan sama á wani aliki a bosikopu di wi e paati, u mu meke moiti fu fusutan saide a á wani aliki u. Kande a di den si den ogii di sama di e kai denseefi Kelesten e du, meke den á wani sabi sani fu Beibel. Kande sama taigi den sani fu Kotoigi di á tuu. Son sama a di den e feele den famii meke den á wani aliki u. Taawan e si enke den sama fu a biiti fu den o lafu den.
A omen ogii miti son wan fu den sama di wi e peleiki gi. Wan zendeling sisa taki feti be e feti na a pisi pe ai peleiki, neen meke a omen fu den sama di ai miti te ai peleiki lasi ala san den be abi. Den nai si enke sani o go bun aini a ten di e kon. Den lai booko-ede. Den nai fitoow nawan sama. Son wan fu den sama ya e wani tapu den Kotoigi fu peleiki. Wan leisi sama naki a sisa ya di a be e peleiki.
San e yeepi Kim fu soi tyali-ati gi taawan winsi fa sama libi ogii anga en? Ala yuu ai meke moiti fu membee san sikiifi a Odo 19:11. Ape sikiifi taki: „Wan koni sama ati nai boon gaw.” Te ai pakisei den ogii di miti den sama fu a pisi pe ai peleiki, da tyali e kisi en gi den sama. Boiti dati a ná ala den sama di ai miti e libi ogii anga en. A abi wantu gobaka na a pisi pe ai peleiki.
U sa akisi useefi taki: ’Efu mi á be sabi a waaleiti, san mi be o du te Yehofa Kotoigi kon peleiki gi mi?’ San u be o du efu u be yee omen fu den lei di sama e taki fu den Yehofa Kotoigi? Kande useefi be o libi ogii anga den, da den be o abi fu soi tyali-ati gi u tu. Yesesi taki a fa u wani sama libi anga wi, a so u mu libi anga den. Neen meke u mu meke moiti fu fusutan fa den sama e fii, da u pasensi anga den winsi fa a sani ya á makiliki.—Mateyesi 7:12.
MEKE MOITI FU ABI TYALI-ATI ENKE PAWLESI
Apostel Pawlesi be e soi tyali-ati gi den sama di be e du ogii anga en te a be e peleiki. Saide? A be e pakisei fa enseefi be de di a á be sabi a waaleiti. A taki: „Mi be e taki ogii fu Gadu fosi, mi be e du ogii anga taawan. Mi á be abi sen. Ma toku a soi tyali-ati gi mi, fu di mi á be sabi san mi be e du. A di mi á be e biibi meke mi be e du den sani ya” (1 Timotiyesi 1:13). Pawlesi be sabi taki Yehofa anga Yesesi be soi tyali-ati gi en. A be e fusutan fa den sama di á be wani a peleiki be e denki, bika a so enseefi be e denki fosi.
Bakaten Pawlesi miti sama di be e dini falisi gadu. Fa a be e fii di a miti den sama ya? Toli 17:16 taki san pasa di Pawlesi doo Ateine. A taki: „A fooseli Pawlesi di a si den somen pobiki di den sama be e dini.” Ma Pawlesi koboloiki den sani di be e fooseli en, fu leli den sama fu a foto (Toli 17:22, 23). A kengi a fasi fa a be e peleiki, fu a be sa man leli den sama ya di be abi taa gwenti. A du a sani ya „fu yeepi sama fu fende a libi, winsi a wantu sama namo”.—1 Korentesama 9:20-23.
U mu waka a Pawlesi baka te wi e peleiki gi sama di taki goofu anga wi efuso sama di abi den eigi biibi. U sa taki fu sani di u sabi fu den, fu yeepi den fu yee a „bun nyunsu fu wan moo bun sani” (Yesaya 52:7). Wan sisa den e kai Dorothy taki: „Den sama fu a pisi pe mi e peleiki leli taki Gadu abi ogii-ati. Den leli tu taki Gadu lobi kuutu sama. Ma mi e gafa den fu di den e biibi taki Gadu de. Baka dati da mi e soi den aini Beibel fa Yehofa de tuutuu. Mi e soi den tu san a paamisi fu du gi wi aini a ten di e kon.”
„I MU E DU BUN NAMO, DA OGII NÁ O POI WINI I”
Moo a kaba fu a goontapu e koosube, moo den sama fu a goontapu ya o „kon moo ogii” (2 Timotiyesi 3:1, 13). Ma wi á mu weli fu soi tyali-ati gi taawan. Winsi san den e du anga u, u mu e piisii ete. Yehofa poi yeepi u fu e ’du bun naamo, fu ogii á sa wini u’ (Romesama 12:21). Wan pionili sisa di den e kai Jessica taki son leisi ai miti sama di e fii enke den bun moo taawan. Den e wisiwasi u anga a bosikopu di wi e paati. A taki: „A sani ya á makiliki. Te mi anga den sama ya e taki mi e begi Yehofa aini mi ati fu a yeepi mi fu si den enke fa ai si den.” A sani ya e yeepi Jessica fu a á poti pakisei neen seefi efuso a fasi fa ai fii. Ma ai luku fa a sa yeepi den.
Wi e tan suku sama di wani yee a bun nyunsu
Efu u pasensi anga den sama den o wani aliki u bakaten
Te wi e peleiki makandaa anga wan baala efuso sisa, u mu meke moiti fu gi den taanga-sikin tu. Jessica taki te a de aini a peleikiwooko te sani á waka bun gi wan fu den peleikiman, ai meke moiti fu a á poti pakisei na a sani de. Ma ai taki fu wan sani di sa gi den taanga-sikin. Son leisi ai taki fu den wini di a peleikiwooko abi winsi son sama nai aliki.
Yehofa sabi taki a ná ala yuu a makiliki gi u fu peleiki. Ma ai piisii te wi e meke moiti fu soi tyali-ati gi taawan enke en (Lukasi 6:36). Ma a ná fu teego Yehofa o abi pasensi anga den sama fu a goontapu ya. A ná fu teego a o soi tyali-ati gi den tu. U sa biibi taki a sabi on ten a mu poli a goontapu ya. A peleiki di wi e peleiki pelensipali, solanga a kaba á doo ete (2 Timotiyesi 4:2). Meke u meke moiti fu peleiki fayafaya anga fu soi tyali-ati „gi ala sama”.
