1. Saide u sa taki a Yehofa abi ala sani? (Luku a fowtow na a bigin.)

A YEHOFA abi ala sani. Neen abi „hemel anga ala den sani di de a hemel. Neen abi goontapu anga ala den sani di de a goontapu” (Deitolonomi 10:14; Openbaring 4:11). A Yehofa a u Dda bika neen meke libisama (Psalm 100:3). Ma fu ala den sama di libi a goontapu, a wantu namo Yehofa e si enke en mati.

2. Enke fa Beibel e soi, da sama Yehofa e si enke en foluku?

² Aini Psalm 135, Yehofa e kai den Islayelisama di be e dini en, wan „apaiti gudu” (Psalm 135:4). Polofeiti Hoseya be taki a fesi tu taki wantu taa kondee sama be o toon Yehofa foluku (Hoseya 2:23). A polofeititoli ya kon tuu, di Yehofa bigin salufu taa kondee sama fu tii makandaa anga Kelestesi (Toli 10:45; Romesama 9:23-26). Beibel e kai den sama di o tii anga Yesesi a hemel, wan ’foluku di santa’. Yehofa e si den enke „wan apaiti gudu”  (1 Peitilisi 2:9, 10). Ma fa Yehofa e si den Kelesten di o libi fu teego a goontapu ya? Yehofa e kai den en „foluku” tu. Yehofa taki ’den na sama di a teke’.​—Yesaya 65:22.

3. (a) Sowtu kulu e dini Yehofa aini a ten ya? (b) San wi o luku aini a artikel ya?

³ Aini a ten ya, a „pikin kulu” di o libi fu teego a hemel anga den „taa sikapu” di o libi fu teego a goontapu, e dini Yehofa makandaa enke „wan ipi” (Lukasi 12:32; Yohanisi 10:16). U wani soi Yehofa taki ai bigi gi u taki wi anga en a mati. Aini a artikel ya wi o luku fa u sa soi Yehofa taki wi e teke en fu bigi taki a gi wi a gaandi fu de en mati.

4. Fa u sa soi Yehofa taki ai bigi gi u fu de en mati? Fa Yesesi be du a sani ya?

⁴ U paamisi Yehofa taki wi o libi enke fa a wani, neen u dopu. U du a sani ya fu soi taki den sani di a du gi u, e bigi gi u. A so ala sama e si taki wi a fu Yehofa. Den e si tu taki u de kabakaba fu dini Yehofa (Hebrewsama 12:9). Na aseefi sani ya Yesesi du di a dopu. Winsi fa den Islayelisama be paamisi Yehofa kaba taki den o libi enke fa a wani, tokuso Yesesi seefi paamisi Yehofa taki a o libi enke fa a wani. A leti enke a taigi Yehofa taki: „Mi Gadu, mi e piisii fu du san i wani.”​—Psalm 40:7, 8.

5, 6. (a) San Yehofa taki di Yesesi dopu? (b) Sowtu ageisitoli e soi fa Yehofa e fii te u paamisi en taki wi o libi enke fa a wani?

⁵ Fa Yehofa fii di Yesesi dopu? Beibel taki: „Di Yesesi dopu, faisi a opo kon a tapu, neen hemel opo, neen Yohanisi si a yeye fu Gadu saka kon a Yesesi enke wan doifi. Boiti dati wan siten taki a hemel taki: ’Disi a mi manpikin, mi lobi en, ai meke mi piisii’” (Mateyesi 3:16, 17). Yesesi a be fu Yehofa kaba. Ma Yehofa piisii di a si taki Yesesi be de kabakaba fu dini en. Yehofa e piisii tu te u paamisi en taki wi o libi enke fa a wani. Ai belesi u te u du a sani ya.​—Psalm 149:4.

⁶ San u sa gi Yehofa winsi fa neen abi ala sani kaba? Pakisei wan man di abi wan moin dyali di lai anga boomiki. Wan dei neen a meisyo fi en booko wan fu den boomiki tyai go gi en. Wan dda di lobi en pikin o piisii, winsi neen abi den boomiki. Bika a sani ya e soi taki a meisyo lobi en. A o lobi a boomiki di a meisyo fi en gi en moo den taa boomiki di de aini a dyali. A so Yehofa e piisii tu te u paamisi en anga u hii ati taki wi o libi enke fa a wani.​—Ekisodesi 34:14.

7. Fa Yehofa e si den sama di e dini en anga den hii ati, te u luku san sikiifi a Maleyaki 3:16?

⁷ Leisi Maleyaki 3:16. Saide u sa taki a paamisi di wi e paamisi Yehofa taki wi o dini en anga a dopu di wi e dopu pelensipali? A tuu taki senten di u meke, a Gadu abi u, bika neen meke u. Ma pakisei fa Yehofa o piisii efi i paamisi en taki yu o libi enke fa a wani. A o piisii tu efi i meke a tii yu (Odo 23:15). Yehofa sabi den sama di e dini en anga den hii ati. A sikiifi den nen fu den sama ya aini „wan buku fu membee den”.

8, 9. San Yehofa wani den sama di nen sikiifi aini en „buku” du?

 ⁸ Maleyaki taki efu wi á wani Yehofa puu u nen aini a „buku” fi en, u mu lesipeki en. Boiti dati u mu sidon pakisei san a nen fi en wani taki. Efu u dini wan sani efuso wan taa sama boiti Yehofa, a o puu u nen aini en buku.​—Ekisodesi 32:33; Psalm 69:28.

⁹ Winsi u paamisi Yehofa taki wi o libi enke fa a wani, neen u dopu, wi á kaba ete. A wan leisi namo wi e du den sani ya. Ma baka te u du den sani ya, u mu e soi anga ala san wi e du taki wi e dini Yehofa. Solanga u de a libi, u mu soi anga den sani di wi e du ala dei taki wi e aliki en.​—1 Peitilisi 4:1, 2.

10. San u mu si kiin te u luku den sama di e dini Yehofa anga den sama di nai dini en?

¹⁰ Aini a artikel a fesi, u be si taki Kain, Salomo anga den Islayelisama be e du enke den e dini Yehofa, ma den á be e dini en anga den hii ati. Den toli ya e leli u taki wi á mu e taki a mofu namo taki wi e dini Yehofa, ma u mu e buuse ogii, da u lobi san bun (Romesama 12:9). Yehofa taki u be o si kiin ’sama e libi a wan letifasi, anga sama e du ogii. Wi o si kiin tu sama e dini Gadu anga sama nai dini en’.​—Maleyaki 3:18.

11. Saide a á mu taanga gi taawan fu si taki a Yehofa wawan wi e dini?

¹¹ Ai bigi gi u taki Yehofa teke wi enke en foluku! A á mu taanga gi sama fu si taki a Yehofa se u de (Mateyesi 5:16; 1 Timotiyesi 4:15). I mu akisi iseefi taki: ’Sama man si taki mi e dini Yehofa anga mi hii ati? Sen e kisi mi fu taigi sama taki mi a wan Yehofa Kotoigi?’ Pakisei fa Yehofa o fii efu sen e kisi u fu taigi taawan taki wi e dini en.​—Psalm 119:46; leisi Malikisi 8:38.

12, 13. Fa son baala anga sisa meke a taanga gi sama fu sabi taki den a Yehofa Kotoigi?

¹² A tyali taki son Kotoigi bigin denki enke fa a ’goontapu e denki’. Te i luku den a taanga fu sabi taki den e dini Yehofa (1 Korentesama 2:12). A „goontapu” e gi sama taanga-sikin fu poti pakisei a san denseefi wani (Efeisesama 2:3). Winsi fa wi e leli omen leisi taki u mu wei koosi a wan fasi di fiti, tokuso son baala anga sisa e wei koosi di á fiti. Den e wei koosi di simpan tumisi efuso koosi di e poti den sikin a doo. Son leisi den e wei den koosi ya kon a komakandaa. Taawan e beei efuso koti uwii di de a modo, winsi den uwii ya á fiti wan Kotoigi (1 Timotiyesi 2:9, 10). Te baala anga sisa e du den sani ya, ai taanga gi taawan fu sabi taki den a wan Kotoigi.​—Yakowbesi 4:4.

 ¹³ Son Kelesten e du taa sani tu di e soi taki den e denki enke den sama fu a goontapu. Te den de a fesa, den e dansi efuso du taa sani di á fiti wan Kelesten. Taawan poti fowtow efuso sikiifi sani poti a internet di e soi taki den e denki enke den sama fu a goontapu. Kande den á puu den aini a Kelesten kemeente fu den sani ya ede, ma den sa de enke wan tesi gi den baala anga sisa di e meke moiti fu den á denki enke a goontapu.​—Leisi 1 Peitilisi 2:11, 12.

14. San u mu du fu wi anga Yehofa á poli?

¹⁴ Ala den sani fu a goontapu ya sete fu gi u taanga-sikin fu poti pakisei a ’den sani di a sondu sikin wani anga den sani di ain wani. Den e gi u taanga-sikin tu fu e poolo anga den gudu fu u’ (1 Yohanisi 2:16). Wi a fu Yehofa, neen meke u de taa fasi. Wi e „koti pasi gi ogii anga den takuu fii di den sama fu a goontapu abi”. Wi e meke moiti „fu wooko anga bunbun fusutan, fu libi anga wan kiin ati, anga fu dini Gadu anga u hii ati aini a ten ya” (Titesi 2:12). Te taawan luku a fasi fa wi e libi, a fasi fa wi e taki, den sani di wi e nyan, den sani wi e diingi, den koosi di wi e wei anga a wooko di wi e du, den mu man si kiin taki wi a fu Yehofa.​—Leisi 1 Korentesama 10:31, 32.

15. Saide u mu libi bun anga den baala anga sisa?

¹⁵ Na a fasi fa wi e libi anga u baala anga sisa o soi efu wi e teke en fu bigi  taki wi anga Yehofa a mati. Denseefi e dini Yehofa, leti enke wi. Efu u holi a sani ya a pakisei, ala yuu wi o libi bun anga den. Wi o go e soi den tu taki u lobi den (1 Tesalonikasama 5:15). Saide a sani ya pelensipali? Yesesi be taigi den bakaman fi en taki: „A so ala sama o sabi taki wi a mi bakaman, te u lobi useefi.”​—Yohanisi 13:35.

16. Fa a Weiti fu Mosesi e soi taki Yehofa lobi den sama di e dini en?

¹⁶ A Weiti fu Mosesi e yeepi u fu fusutan fa u mu libi anga taawan aini a kemeente. A omen supun, nefi, foluku anga taa sani be de aini a tempel fu du santa wooko. A Weiti be e soi kiin fa den Leifisama be mu seeka den sani ya. Den be mu kii den sama di á be seeka den sani ya enke fa a Weiti be taki (Numeri 1:50, 51). Efu Yehofa be e booko en ede anga a fasi fa sama be mu wooko anga den sani di sama be e koboloiki aini a tempel fu dini en, da u sa biibi taki a musu e booko en ede anga a fasi fa sama e libi anga den sama di e dini en anga den hii ati. A meke u sabi tu taki a lobi u. A taki: „A sama di o holi u, e holi mi ain gaasi.”​—Sakaliya 2:8.

17. Sowtu sani Yehofa e „poti pakisei” te a luku u?

¹⁷ Maleyaki taki Yehofa e „poti pakisei” na a fasi fa a foluku fi en e libi anga denseefi (Maleyaki 3:16). Yehofa „sabi sama a den sama fi en” (2 Timotiyesi 2:19). Ai si ala san wi e du. Ai yee fa wi e taki anga taawan tu (Hebrewsama 4:13). Yehofa e si te  u nai libi bun anga u baala anga sisa. Ma ai si tu te u lobi kai sama kon a wi osu, te wi e gi taawan paadon, te u lobi gi sama sani anga te wi e libi switi anga taawan.​—Hebrewsama 13:16; 1 Peitilisi 4:8, 9.

18. Fa u sa soi Yehofa taki ai bigi gi u taki wi e dini en?

¹⁸ U wani soi Yehofa taki wi e teke en fu bigi taki a gi wi a gaandi fu dini en. U sabi taki di u paamisi en taki wi o libi enke fa a wani, na a moo bun sani u du. Winsi fa den sama fu a goontapu ya e ’du omen ogii’, u nai waka a den baka. „U de enke faya di e kiin peesi aini a goontapu” (Filipisama 2:15). Neen meke noiti u wani du wan sani di Yehofa á lobi (Yakowbesi 4:7). U lobi den baala anga sisa fu u. Wi e lesipeki den tu, bika denseefi e dini Yehofa.​—Romesama 12:10.

19. Fa Yehofa e pai den sama di e dini en?

¹⁹ Beibel paamisi taki: „Yehofa ná o gwe fika a foluku fi en” (Psalm 94:14). U sa biibi a sani ya. Winsi san e miti u, Yehofa o de anga u. Winsi u dede, a ná o feegete u (Romesama 8:38, 39). „Te u de a libi, wi e libi gi Yehofa. Efu u dede, wi e dede gi Yehofa. Neen meke efu u de a libi efuso u dede, wi a fu Yehofa” (Romesama 14:8). Wi e angii fu si a ten di Yehofa o weki ala den mati fi en di dede (Mateyesi 22:32). Nownow seefi wi e fende wini fu den somen sani di Yehofa gi u. Beibel taki: „A foluku di abi Yehofa enke den Gadu o de koloku. A foluku di a teke enke en gudu o de koloku.”​—Psalm 33:12.