1, 2. San a wani taki fu e luku Yehofa?

A LIBI e „taanga” gi wi aini a ten ya (2 Timotiyesi 3:1). Dyonson Yehofa o puu ala den ogii di e pasa, da o meke sani waka bun a goontapu. Ma fosi a ten de, a libi o moo taanga. Neen meke u mu akisi useefi taki: ’Sama mi e luku fu langa wan ana gi mi? Sama mi e luku fu poti mi a pasi?’ Kande yu o taki „Yehofa”. We dati na a moo bun sani di i sa taki.

² San a wani taki fu luku Yehofa fu a langa wan ana gi u? Fa u sa soi taki u nai puu wi ain a Yehofa te wi abi polobelema? Wan fu den man di sikiifi Beibel be taki senten saide a Yehofa u mu e luku fu langa wan ana gi u. (Leisi Psalm 123:1-4.) A taki te wi e luku Yehofa, wi e soi taki u de enke wan futuboi di e luku en masaa. A on fasi? Wan futuboi e luku en masaa fu kibii en. Ai fitoow en masaa fu a gi en a nyanyan di a  abi fanowdu. Ma na a taase, a futuboi mu e luku en masaa ala yuu efu a wani fusutan san en masaa wani a du. Te a fusutan kaba, a mu du san en masaa wani. Na aseefi sani u mu du tu. U mu ondoosuku Gadu Wowtu ala dei fu sabi san Yehofa wani u du. Boiti dati, u mu du san Yehofa wani. Te u du den sani ya u sa biibi taki Yehofa o yeepi u te wi abi polobelema.​—Efeisesama 5:17.

3. San sa tapu u fu poti pakisei a Yehofa?

³ Anga ala fa u sabi taki Yehofa poi yeepi u, tokuso u sa bigin poti pakisei a taa sani. Na a sani ya be pasa anga wan mati fu Yesesi den e kai Maata. A „be e pakisei taa sani, bika a be abi omen wooko e du” (Lukasi 10:40-42). Wan sama enke Maata di be e dini Yehofa anga en hii ati be bigin poti pakisei a taa sani winsi fa en anga Yesesi be de fesi a fesi. A sani ya e soi taki efu wi á luku bun, useefi sa bigin poti pakisei a taa sani. San a den sani di sa meke u nai poti pakisei a Yehofa moo? Aini a artikel ya wi o si taki den sani di taawan e du sa tapu u fu poti pakisei a Yehofa. Wi o si san o yeepi u fu e luku Yehofa ala yuu.

4. Saide ai foondoo wi taki Mosesi lasi a gaandi di a be abi fu go aini a Paamisi Kondee?

⁴ Mosesi a be wan man di be e luku Yehofa fu sabi san a mu du. Beibel taki „a be e holidoo leti enke a be e si a sama di wi á poi si anga ain” (Leisi Hebrewsama 11:24-27.) Boiti dati Beibel taki: „Noiti moo wan polofeiti enke Mosesi be de aini Islayeli. Yehofa be sabi en bun” (Deitolonomi 34:10). Ma winsi fa Mosesi anga Yehofa a be mati, toku a lasi a gaandi di a be abi fu go aini a Paamisi Kondee (Numeri 20:12). Saide a lasi a gaandi ya?

5-7. San pasa di den Islayelisama komoto a Egepte? San Mosesi du di a sani ya pasa?

⁵ Baka tu mun di den Islayelisama komoto a Egepte, wan gaan sani pasa. A sani ya be pasa fosi den doo Sinai Mongo. A foluku be e kuutu taki den ná abi wataa. Den bigin kwali anga Mosesi. Den ati boon te neen „Mosesi bali kai Yehofa. A akisi en taki: ’San mi mu du anga a foluku ya? Dyonson moo den o fiingi siton naki mi kii!’” (Ekisodesi 17:4) Yehofa taigi Mosesi kiin san a be mu du. A taigi en taki a mu teke en tiki, da a naki a siton fu Horeb anga en. Beibel taki: „Mosesi du a sani ya a den gaanwan fu Islayeli fesi.” Neen wataa komoto aini a siton. Den Islayelisama be abi wataa sai fu diingi. A polobelema fu den be losi.​—Ekisodesi 17:5, 6.

⁶ Beibel taki Mosesi kai a peesi de Masa anga Meriba. Masa wani taki „tesi”. Meriba wani taki „kwali”. Saide Mosesi gi a peesi ya den nen ya? A fu di „den Islayelisama be e kuutu. Den be e tesi Yehofa di den  be e taki: ’Yehofa de anga u tuutuu?’”​—Ekisodesi 17:7.

⁷ Fa Yehofa be si a sani di pasa a Meriba? Yehofa á be si enke anga Mosesi wawan den Islayelisama be e kwali. A be e si enke anga en den be e kwali tu. Den á be e saka denseefi neen ondoo. (Leisi Psalm 95:8, 9.) Den Islayelisama á be tyai denseefi bun. Ma Mosesi tyai enseefi bun. A poti pakisei a Yehofa, neen a du san a taigi en.

8. San be pasa di den Islayelisama be de fu komoto aini a sabana?

⁸ Ma fa sani waka baka 40 yali di aseefi sani ya pasa? Den Islayelisama be de fu komoto aini a sabana. Den be doo Kades, wan peesi di be de koosube fu a Paamisi Kondee. Bakaten sama be kon sabi a peesi ya enke Meriba tu. * (Luku a maiki a ondoo.) Saide? Bika den Islayelisama be e kuutu baka taki den ná abi wataa (Numeri 20:1-5). Ma a leisi ya Mosesi meke wan gaan fowtu.

9. San Yehofa be taigi Mosesi? Ma san Mosesi du? (Luku a fowtow na a bigin.)

⁹ San Mosesi du di a foluku be e kwali anga en? A akisi Yehofa baka fu taigi en san a mu du. Ma a leisi ya Yehofa á sende Mosesi fu a naki a siton. A taigi Mosesi fu a teke en tiki, da a tyai a foluku go koosube fu a siton. Baka dati a mu taki anga a siton (Numeri 20:6-8). Mosesi du san Yehofa taigi en? Nono. En ati boon te, neen a bali a foluku taki: „Den sama ya wi abi taangayesi. Wi aliki san mi e taki. U wani u puu wataa gi wi aini a siton ya fu u diingi?” Neen Mosesi naki a siton. A ná wan leisi namo, ma tu leisi.​—Numeri 20:10, 11.

10. Fa Yehofa be si a sani di Mosesi du?

¹⁰ Yehofa ati boon a Mosesi (Deitolonomi 1:37; 3:26). Saide Yehofa ati boon a Mosesi? Kande a fu di Mosesi á du sani enke fa Yehofa taigi en a leisi ya, meke en ati boon neen.

11. Saide Mosesi be sa meke den Islayelisama denki taki a ná wan wonduu Yehofa du di a naki a siton?

¹¹ Kande a fu wan taa sani ede Yehofa ati be boon a Mosesi. A gaan siton di be de na a fosi Meriba be taanga gingin. Winsi on taanga wan sama be o naki a siton ya, wataa á be o komoto aini. Ma den siton di be de na a du fu tu Meriba be de taa fasi. Den siton ya be safu, neen meke son wan fu den be e holi wataa. Sama be e  meke olo a den fu fende wataa. Wi á sabi pilisisi san a foluku be pakisei di Mosesi naki a siton. Kande den denki taki na a wataa di be de aini a siton be komoto aini. Kande den á be e si enke a wan wonduu Yehofa du. * (Luku a maiki a ondoo.)

12. San a be wan taa sani di meke Yehofa ati boon a Mosesi anga Aron?

¹² Ma a kan tu taki wan taa sani be meke Yehofa ati boon a Mosesi anga Aron. Mosesi taigi a foluku taki: „U wani u puu wataa gi wi aini a siton fu u diingi?” Di Mosesi taki u wani „u” puu wataa gi u, kande a be wani taki neen anga Aron be meke wataa komoto na a siton gi den sama. Ma winsi fa, Mosesi á be soi lesipeki gi Yehofa, bika a á gi Yehofa a gaandi di a be mu gi en fu a wonduu di a du. Psalm 106:32, 33 taki: „Den meke Mosesi ati boon a den a Meriba pe wataa be de. Den meke sani á waka bun gi Mosesi. Den meke a lasi enseefi te a taki sani sondee fu denki” * (Luku a maiki a ondoo.) (Numeri 27:14). Mosesi á gi Yehofa a gaandi di a be mu gi en. Neen meke Yehofa taigi en anga Aron taki: „Wi á du san mi taki” (Numeri 20:24). A sani de a be wan gaan sondu tuutuu.

13. Fa Yehofa soi taki ai du sani a wan letifasi di a sitaafu Mosesi?

¹³ Yehofa be wani Aron anga Mosesi tyai denseefi bun, bika a den a be fesiman fu a foluku (Lukasi 12:48). Aini a ten di pasa Yehofa á be meke gaanse fu den Islayelisama go aini a paamisi kondee fu di den taangayesi en (Numeri 14:26-30, 34). Neen meke di Yehofa sitaafu Mosesi, a soi taki a nai paati bee, ma ai du sani a wan letifasi. Leti enke fa Yehofa be sitaafu den taa Islayelisama di be taangayesi en, a so a sitaafu Mosesi tu. Mosesi seefi á be fende a okasi fu go aini a Paamisi Kondee.

14, 15. Saide Mosesi á be du sani enke fa Yehofa wani?

¹⁴ Saide Mosesi á du san Yehofa taki? Psalm 106:32, 33 taki: „Den meke Mosesi ati boon a den a Meriba pe wataa be de. Den meke sani á waka bun gi Mosesi. Den meke a lasi enseefi te a taki sani  sondee fu denki.” Winsi fa a den Islayelisama be e kuutu Yehofa, tokuso a Mosesi be lasi enseefi. A á be poi holi enseefi, neen meke a taki sani sondee fu pakisei den bakapisi.

¹⁵ A fasi fa taawan be e tyai denseefi be meke Mosesi á poti pakisei a Yehofa moo. A fosi leisi di den Islayelisama be kaagi fu wataa, Mosesi be tyai enseefi bun (Ekisodesi 7:6). Ma kande Mosesi be kon weli fu di den be e kuutu omen yali kaba. Kande a be e poti pakisei na a fasi fa a be e fii, pe fu a pakisei fa a be mu gi Yehofa gaandi.

16. Saide u mu poti pakisei na a fowtu di Mosesi meke?

¹⁶ Mosesi a be wan polofeiti di be e dini Gadu anga en hii ati, tokuso a be meke wan gaan fowtu. A sani ya sa pasa anga wi aini a ten ya tu. Leti enke fa Mosesi be de koosube fu a Paamisi Kondee, a so useefi de koosube fu a nyun goontapu (2 Peitilisi 3:13). Wi á wani lasi a gaandi di wi abi fu go aini a nyun goontapu. Ma efu u wani a gaandi ya, u mu e poti pakisei  a Yehofa naamo, da u du san a taki (1 Yohanisi 2:17). San u sa leli fu a fowtu di Mosesi meke?

17. San o yeepi u fu wi á lasi useefi te wi ati boon?

¹⁷ Te yu ati boon, yu á mu lasi iseefi. Son leisi aseefi tesi e miti wi omen leisi. Ma Beibel taki: „Wi á mu weli fu du bun, bika te a yuu doo wi o si den wini, efu wi á gi abaa” (Galasiyasama 6:9; 2 Tesalonikasama 3:13). San wi e du te wan sama du wan sani di e meke wi ati boon? Wi e holi useefi? Wi e denki fosi u taki? (Odo 10:19; 17:27; Mateyesi 5:22) Te taawan e suku toobi anga u, u mu meke moiti fu ’fika den gi Gadu fu a puu boon ati a den’. (Leisi Romesama 12:17-21.) A sani ya wani taki pe fu wi ati boon, wi o wakiti Yehofa anga pasensi fu a yeepi wi anga a polobelema na a yuu di a si taki de fanowdu. Efu u puubei fu du wan sani anga a sama baka, wi e soi taki u nai lesipeki Yehofa.

18. Fa u mu si den nyun fasi di den baala e soi u fu du sani?

¹⁸ Meke moiti fu sabi den nyun fasi fa den baala wani u du sani. Yu e du den sani di Yehofa e taigi u fu du aini a ten ya? Wi á mu du sani namo enke fa u be gwenti du den aini a ten di pasa. Ma u mu meke moiti fu wooko anga den nyun sani di a olikanisâsi fu Yehofa taki (Hebrewsama 13:17). U mu meke moiti tu fu wi á „du sani di á sikiifi aini den santa buku” (1 Korentesama 4:6). Te wi e du sani enke fa Yehofa taigi u, wi e soi taki wi e aliki en.

19. San o yeepi u fu wi anga Yehofa á poli te taawan e meke fowtu?

¹⁹ Yu á mu meke den fowtu fu taawan meke yu anga Yehofa poli. Efu wi e poti pakisei a Yehofa, wi anga en ná o poli fu di taawan e meke fowtu. A sani ya pelensipali, moomoo gi den wan di abi son faantiwowtu aini a olikanisâsi fu Gadu enke Mosesi. Ma na ala u mu meke moiti fu du san Yehofa wani. A sani ya o meke sani waka bun anga u (Filipisama 2:12). Ma o moo faantiwowtu wi abi, moo u mu meke moiti fu du sani enke fa Yehofa wani (Lukasi 12:48). Efu u lobi Yehofa tuutuu, winsi san e pasa u ná o gwe fika en.​—Psalm 119:165; Romesama 8:37-39.

20. San u mu de kabakaba fu du?

²⁰ A ten di wi e libi ya á makiliki. A omen sani e miti u. Neen meke a Yehofa „di e tan a hemel” u mu e luku fu sabi san u mu du. Noiti u mu meke a fasi fa taawan e tyai denseefi poli wi anga Yehofa. A sani di miti Mosesi e leli u wan pelensipali sani. Wi á mu lasi useefi te taawan e meke fowtu, ma u mu e ’luku Yehofa te enke a soi bun-ati gi u’.​—Psalm 123:1, 2.