1-2. (a) Enke fa Yesesi taki a Mateyesi 28:18-20, da san na a moo gaan wooko fu a Kelesten kemeente? (b) Sowtu akisi wi o luku aini a artikel ya?

DEN apostel be e piisii di den kon makandaa a wan mongo. Baka di Yesesi weki baka, a taigi den bakaman fi en fu den kon miti en ape (Mat. 28:16). Kande na a peesi ya a „meke moo enke 500 baala di be de makandii si en” (1 Kor. 15:6). Saide Yesesi taigi den bakaman fi en fu den kon miti en ape? A fu di a be wani sende den fu du wan sani. A taigi den taki: „Neen meke u mu go a sama fu ala kondee, da u meke den toon mi bakaman.”​—Leisi Mateyesi 28:18-20.

² Bakaten den bakaman fu Yesesi di yee san a taki, be de aini a fosi Kelesten kemeente. A moo gaan wooko fu a kemeente ya, a be fu yeepi moo sama fu toon Yesesi bakaman. * Aini a ten ya, a omen Kelesten kemeente de a hii goontapu. Na aseefi wooko di a fosi Kelesten kemeente be e du, den kemeente fu a ten ya e du tu. Wi o luku den akisi ya aini a artikel ya: Saide u mu yeepi sama fu toon Yesesi bakaman? San u mu du te wi e yeepi sama fu toon Yesesi bakaman? Na ala Kelesten sa yeepi anga a wooko ya? Saide u mu abi pasensi te wi e yeepi sama fu toon Yesesi bakaman?

3. Enke fa Yohanisi 14:6 anga 17:3 e soi, da saide u mu yeepi sama fu toon Yesesi bakaman?

³ Saide u mu yeepi sama fu toon Yesesi bakaman? A fu di a den bakaman fu Kelestesi wawan too sa toon Gadu mati. Boiti dati, den bakaman fu Kelestesi libi e moo waka bun aini a ten ya. Den abi a howpu tu fu libi fu teego aini a ten di e kon. (Leisi Yohanisi 14:6; 17:3.) A wan gaan faantiwowtu Yesesi gi u, ma a á fika u wawan fu du a wooko ya. Apostel Pawlesi be taki sama be e yeepi en anga den taa Kelesten fu du a wooko ya. A be sikiifi taki: „Wi a sama di e wooko makandii anga Gadu” (1 Kor. 3:9). A wan gaandi Yehofa anga Kelestesi gi wi enke sondu libisama fu wooko makandaa anga den.

4. San a ondoofenitoli fu Ivan anga Matilde e leli u?

⁴ A yeepi di wi e yeepi sama fu toon Yesesi bakaman a wan wooko di e meke u piisii. Luku a toli fu Ivan anga en uman Matilde di e tan a Kolombiya. Di den peleiki gi wan yonkuman den e kai Davier a taigi den taki: „Mi wani kengi, ma mi á poi.” Davier be e bokusu fu moni. A be e somoko takuu tabaka, boiti dati a be e diingi pasa maiki. A be e libi anga wan uman den e kai Erika. Ivan taki: „U bigin sutudeli Beibel anga en. Anga baisigii u be mu lei omen yuu langa fu doo pe a be e tan, bika a be e tan faawe. Den pasi á be bun tu. Di Erika si taki Davier be e kengi en manii, enseefi bigin sutudeli Beibel.” Bakaten Davier tapu anga a somoko di a be e somoko anga a diingi di a be e diingi sopi. A á be e bokusu moo tu. A toow anga Erika. Matilde taki: „Di Davier anga Erika dopu aini 2016, u membee taki Davier be lobi taki: ’Mi wani kengi, ma mi á poi.’ U piisii te neen wataa lon a wi ain.” A ondoofenitoli ya e soi kiin taki te u yeepi wan sama fu toon Kelestesi bakaman, a sani ya e meke u piisii.

5. San na a fosi sani di u mu du efu u wani fende sama di wani toon Yesesi bakaman?

⁵ A fosi sani di u mu du, a suku u mu „suku sama” di wani leli sabi Yehofa (Mat. 10:11). Te wi e yeepi ala sama di wi e miti fu kon sabi Yehofa, wi e soi taki wi a Yehofa Kotoigi. Te wi e du a peleikiwooko enke fa Yesesi sende u, wi e soi tu taki wi a tuu Kelesten.

6. San o yeepi u fu fende wini te wi e peleiki?

⁶ Son sama di wi e miti e wani sabi san Beibel e taki. Taawan baka nai booko den ede anga den sani di wi e soi den aini Beibel. Kande wi abi fu taki sani di o meke den wani aliki. Efu u wani fende wini te wi e peleiki, u mu seeka bun. Pakisei sowtu toli o hali den sama pakisei na a pisi pe yu e peleiki. Baka dati, luku fa i sa bigin a takimakandaa.

7. Fa u sa bigin wan takimakandaa anga wan sama? Saide i si enke a bun fu aliki, anga fu lesipeki den sama di wi e peleiki gi?

⁷ Luku wantu sani di i sa du. I sa akisi a sama taki: „Mi sa akisi i fa yu e denki fu wan sani? Somen fu den sani di e miti u nownow e miti sama na a hii goontapu. I si enke wan tiiman de di o man puu ala den polobelema ya?” Baka dati leisi Daniyeli 2:44, da i taki fi en. Efuso i sa  akisi wan sama taki: „San na a moo bun fasi fu leli wan pikin fu abi bun manii? Fa yu e si a toli?” Baka dati leisi Deitolonomi 6:6, 7, da i taki fi en. Winsi sowtu toli yu e taki anga wan sama, meke moiti fu sabi san o hali a sama pakisei. Pakisei sowtu wini den sama o fende fu a sani di yu o leli den. Te yu e taki anga den, i mu soi taki yu e lesipeki a fasi fa den e denki. A sani ya o yeepi i fu fusutan den moo bun, denseefi o wani aliki i tu.

8. Saide u mu e du ala san u man fu go baka a den sama di wani sabi moo?

⁸ Efu u wani wan sama bigin sutudeli Beibel anga wi, u mu meke ten fu go neen baka. Saide? A ná ala yuu te u go a wan sama ai abi ten fu taki anga u. Son leisi a sama nai de a osu tu. Son leisi a baka te u go na a sama omen leisi, te a kon gwenti u fosi ai wani sutudeli Beibel anga u. Holi a pakisei taki a te yu e nati wan boomiki ala yuu fosi a o man goo bun. A so a de anga wan sama di wani sabi moo. Moo yu e taki anga en, moo a o kon lobi Yehofa anga Yesesi. Na a sani ya o meke a wani sutudeli Beibel.

9-10. Saide u sa taki na ala Kelesten e yeepi suku sama di wani toon wan bakaman fu Kelestesi?

⁹ Na ala Kelesten e yeepi suku sama di wani sabi Yehofa. A wooko di wi e du, de enke te sama e suku wan pikin di lasi. Saide u sa taki a sani ya? Meke u luku wan toli fu wan boi di be lasi. A boi ya be abi dii yali. A wan sani fu 500 sama be e yeepi suku a boi ya. Baka wan sani fu 20 yuu, neen wan fu den  sama di be e yeepi suku en go fende en aini wan kalu goon. A man di fende a boi á be wani sama gafa en taki a fende a boi. A taki: „A di omen ondoo sama yeepi suku a pikin, meke u fende en.”

¹⁰ A omen sama de enke a pikin ya. Den sama ya e fii enke den lasi. Den ná abi howpu, neen meke u mu yeepi den (Efe. 2:12). A moo enke aitin miliyun sama e wooko makandii fu suku sama di wani sabi Gadu. Kande yu á fende wan sama di wani i sutudeli Beibel anga en, ma taa peleikiman di e wooko na aseefi peesi, e fende sama di wani sutudeli. Te wan baala efuso sisa yeepi wan sama fu toon wan bakaman fu Kelestesi, ala sama di e yeepi suku sama di wani aliki, e piisii taki wan sama toon wan bakaman fu Kelestesi.

11. Winsi i ná abi sutudi, fa i sa yeepi sama fu toon Yesesi bakaman?

¹¹ Winsi i ná abi Beibelsutudi nownow, tokuso i sa yeepi sama fu toon Yesesi bakaman. Te wan nyun sama kon a komakandaa, i sa bali wadaa gi en. I sa yeepi en anga taa sani tu. Efi yu e soi nyun sama taki i lobi den, yu o yeepi den fu si taki wi a tuu Kelesten (Yoh. 13:34, 35). Te yu e gi satu piki a komakandaa, yu e yeepi nyun sama fu sabi fa den mu paati san den leli anga taawan. I sa wooko makandaa anga nyun peleikiman da i leli den fa den mu koboloiki a Beibel fu leli sama. Te yu e du a sani ya, yu e yeepi den fu waka a Kelestesi baka.​—Luk. 10:25-28.

12. Wi abi apaiti koni fanowdu fu yeepi sama fu toon Yesesi bakaman? Gi wan ondoofenitoli.

¹² Nawan fu u mu si enke wi abi wan apaiti koni fanowdu fu man yeepi sama fu toon bakaman fu Yesesi. Saide u sa taki a sani ya? Luku a toli fu Faustina di e tan a Bolifiya. Di a bigin sutudeli Beibel, a á be sabi leisi. Nownow ai leisi pikinso. A dopu tu. A lobi a peleikiwooko. Ala wiki ai sutudeli anga feifi sama. Winsi fa Faustina nai leisi bun enke wantu fu den sutudi fi en, toku a yeepi sigisi sama fu kon a waaleiti.​—Luk. 10:21.

13. Winsi wi abi omen sani fu du, san a wantu wini di wi o fende te wi e yeepi sama fu toon Yesesi bakaman?

¹³ Winsi fa son Kelesten abi omen pelensipali sani fu du, toku den e meke ten fu sutudeli Beibel anga sama. A sani ya e meke den piisii. Luku a toli fu Melanie di e tan a Alaska. A sisa ya ná abi man, neen wawan be e kiya a meisyo fi en di  be abi aitin yali. A be e wooko feifi dei aini a wiki tu. Boiti dati, a be mu solugu en dda di be abi kanker. A Melanie wawan a be Kotoigi aini a pikin foto di a be e tan. A be e begi Yehofa fu gi en kaakiti fu go peleiki winsi fa a peesi be e koo. A be e meke moiti fu fende sama di be wani sutudeli Beibel. Bakaten a miti wan uman den e kai Sara. A uman ya piisii di a leli sabi Gadu nen. Baka wan pisiten, Sara be wani sutudeli Beibel. Melanie taki: „Feeda neti mi be e weli te, ma toku mi anga a meisyo fu mi be e fende wini te u be go sutudeli anga Sara. U be e piisii te u be e suku den piki fu den akisi di a be e poti gi u. U piisii te di Sara toon Yehofa mati.” Sara soi deki-ati, neen a holidoo di tesi miti en. A komoto na a keliki di a be de, neen a dopu.

14. (a) Saide u sa taki a peleikiwooko de enke a wooko di wan fisiman e du? (b) Sowtu wini i fende fu a sani di Pawlesi sikiifi a 2 Timotiyesi 4:1, 2?

¹⁴ Winsi i nai miti sama di wani toon wan bakaman fu Yesesi, toku i mu tan suku. Yesesi be taki a wooko di wi e du de enke a wooko di fisiman e du. Son leisi a omen yuu de e wooko fosi den kisi fisi. Son leisi den e wooko gaan neti efuso fuuku mamanten. Son leisi a te a faawe den abi fu go fu kisi fisi (Luk. 5:5). Na aseefi fasi son peleikiman abi fu wooko omen yuu fosi den e fende sama di wani aliki. Son leisi den abi fu peleiki a taa peesi efuso taa yuu fu a dei. Saide? A sani ya e yeepi den fu miti  sama di wani aliki. Den sama di e du a peleikiwooko na a fasi ya, e fende wini bika den e fende sama di wani yee a bun nyunsu. I si enke i sa peleiki a wan yuu efuso a wan peesi di i sa miti sama?​—Leisi 2 Timotiyesi 4:1, 2.

15. Saide u mu abi pasensi te wi e sutudeli Beibel anga wan sama?

¹⁵ Saide u mu abi pasensi te wi e sutudeli Beibel anga wan sama? U mu abi pasensi anga en, bika a so wi o man yeepi en fu kon sabi den leli fu Beibel. U mu yeepi en tu fu lobi den leli ya. Boiti dati, u mu yeepi en fu kon sabi Yehofa, a Sama di sikiifi Beibel. U mu yeepi en fu a kon lobi Yehofa tu. Wi á mu leli a sutudi san Yesesi wani den bakaman fi en du namo, ma u mu yeepi en tu fu sabi fa a mu libi enke wan tuu Kelesten. U mu pasensi anga en te ai meke moiti fu du den sani di a leli. Son sama a wantu mun namo den abi fanowdu fu kengi a fasi fa den be e denki anga a fasi fa den be e tyai denseefi, ma taawan abi moo ten fanowdu.

16. San a toli fu Raúl leli i?

¹⁶ A toli fu wan zendeling baala aini Peru e soi taki a abi wini te wi e pasensi anga den sutudi fu u. A baala ya taki: „Mi be sutudeli tu buku anga wan man den e kai Raúl, ma toku a be taanga gi en fu du san a be e leli. En toowlibi á be e waka bun, a be e kosi, den pikin fi en á be e lesipeki en bika a á be tyai enseefi bun. Ma a be e kon a komakandaa ala yuu, neen meke mi be e tan yeepi en anga en osufamii. Baka di mi sutudeli moo enke dii yali anga en, neen a dopu.”

17. San wi o luku aini a taa artikel?

¹⁷ Yesesi taki u mu ’go a sama fu ala kondee, da u meke den toon en bakaman’. A omen sowtu sama wi e miti te wi e du a wooko ya. Son wan fu den sama ya nai go a keliki, taawan nai biibi seefi taki wan Gadu de. Aini a taa artikel wi o luku fa u sa peleiki gi den sama ya.