Di mi bigin pionili bakaten, mi libi kengi a wan fasi di mi á be denki (Efe. 3:20). Kande yu e akisi iseefi fa a sani ya pasa. Meke mi gi yu a toli.

Mi meke a Berlijn, wan foto a Doisilikondee wantu mun baka di a du fu Tu Goontapu Feti bigin aini 1939. A ten di a feti be de fu kaba aini 1945, opalani be e fee abaa Berlijn, da den be e losi bom towe aini a foto. Wan leisi, wan bom kai aini a sitaati pe u be e tan, neen mi anga nda, mma anga mi pikin sisa lon go na a peesi pe sama e go kibii gi den bom. Bakaten u foloisi go a Erfurt a foto pe mma be meke.

Mma be e suku a tuu biibi fayafaya, neen meke a be e leisi omen buku di koniman sikiifi. A go a omen keliki tu, ma a á be fende wini. Aini 1948, tu Yehofa Kotoigi kon peleiki gi u. Mma kai den kon aini se neen a bigin poti akisi gi den. Den á taki doo wan yuu seefi, neen mma taigi mi anga mi pikin sisa taki: „Mi fende a tuu biibi!” A á langa baka dati, neen mi, mma anga mi pikin sisa bigin go a komakandaa a Erfurt.

Aini 1950 u foloisi go a Berlijn baka. U be e go a komakandaa a kemeente Berlijn-Kreuzberg. Bakaten u foloisi go a wan taa peesi aini Berlijn, neen u bigin go a komakandaa a kemeente Berlijn-Tempelhof. Bakaten, mma dopu ma mi be e daaidaai. Saide?

Fu di sen be e siki mi meke mi á be man du moo gi Yehofa. Tu yali langa mi go aini a peleikiwooko sondee fu peleiki gi wan sama. Ma di mi meke mati anga baala anga sisa di be soi taki den abi deki-ati fu dini Yehofa winsi san e pasa, neen sani kengi. Den be sooto son wan fu den baala anga sisa ya a Nazi sitaafuman kampu, taawan be sooto a wantu sitaafu-osu a Owstu Doisilikondee. Taa baala anga sisa be e kibii tyai buku go a Owstu Doisilikondee winsi  fa den be sa sooto den. Mi be pakisei taki efu den baala anga sisa ya be de kabakaba fu dede efuso go a sitaafu-osu fu di den be lobi Yehofa anga den baala anga sisa, da mi á mu meke sen tapu mi fu wooko gi Yehofa.

Wan taa sani di yeepi mi fu sen á kisi mi so moo, a di u be mu paati wan bolosilo aini 1955. Baala Nathan Knorr be sikiifi aini wan biifi di be kon aini a Informateur, * taki a wooko ya a be wan fu den moo gaan wooko di a olikanisâsi be o du. A be taki efu ala peleikiman be o du a wooko ya, a be o de a moo switi ten di u du a peleikiwooko makandaa. A dati pasa tu. A á langa baka dati mi paamisi Yehofa taki mi o dini en neen mi dopu aini 1956, makandaa anga nda anga mi sisa. Baka di mi dopu, mi be mu teke wan pelensipali bosoloiti.

Mi be sabi taki a pioniliwooko na a moo bun wooko di mi be sa du, ma mi be e daaidaai fu bigin anga en. Mi go wooko a wan bodeleifi a Berlijn di be e bai sani seli baka, fu di mi be wani leli a wooko ya. Baka dati mi du a wooko ya wan pisiten fu di mi be wani sabi en moo bun fosi mi bigin pionili. Aini 1961 mi fende wan wooko a Hamburg, wan fu den moo gaan bodeleifi fu Doisilikondee di be e bai sani seli baka. Mi be kon lobi a wooko ya, mi á be wani fika en fu go pionili. San mi be o du?

Ai bigi gi mi taki Yehofa meke wantu baala yeepi mi fu fusutan taki a dini di mi e dini en na a moo pelensipali sani aini mi libi. A omen mati fu mi be bigin anga a pioniliwooko, mi be sa waka a den baka. Baala Erich Mundt, di be de aini wan sitaafuman kampu gi mi taanga-sikin fu fitoow Yehofa. A taki di den be de aini a sitaafuman kampu, den baala di be e fitoow denseefi biibi be kon swaki bakaten. Ma den wan di be e fitoow Yehofa anga den hii ati á gwe fika en, a so den be man holibaka gi a olikanisâsi fi en.

Baala Martin Poetzinger, di toon wan fu den baala di be e tii a wooko bakaten, be lobi gi den baala taanga-sikin. A be lobi taigi den taki: „Deki-ati na a moo pelensipali manii di u mu abi!” Baka di mi sidon pakisei a sani ya, mi fika a wooko di mi be e du, neen mi bigin pionili aini yuni 1963. Na a moo bun sani di mi be sa du. Baka tu mun, fosi mi bigin suku wan taa wooko, neen mi fende a gaandi fu du a spesuutu pioniliwooko. Baka wantu yali, Yehofa belesi mi a wan fasi di mi á be denki. Den kai mi fu go na a Gileyad sikoo. Disi a be du fu fotenti a fo leisi di a sikoo ya be holi.

Wan fu den pelensipali sani di mi leli na a Gileyad sikoo a disi: „Ná fika wan wooko di Yehofa gi i fu du.” Baala Nathan Knorr anga Lyman Swingle be lobi taigi wi a sani de. Den gi u taanga-sikin fu tan du a wooko di a olikanisâsi gi u, winsi a á makiliki. Baala Knorr be taki: „San yu o poti pakisei? Na a tyobo fu a peesi pe yu o go? Yu o poti pakisei a den kakaaka anga den feefee efuso makisita, anga a fasi fa den sama pooti? Efuso yu o poti pakisei a den bon, den boomiki anga a fasi fa den sama e lafu? Meke moiti fu lobi den sama!” Wan dei di Baala Swingle be e taki fu den sama di gwe fika a wooko di a olikanisâsi gi den, ala en ain be fuu anga wataa. A be abi fu tan te a kisi enseefi fosi neen a taki go doo. Mi fii a sani te. Mi poti a mi ede taki noiti mi o meke Kelestesi anga den baala fi en fii tyali.​—Mat. 25:40.

Di den baala taigi u sowtu kondee wi o go, wantu baala di be e wooko a Betel akisi u pe wi o go. Den be e poolo anga ala den taawan di den taigi den pe den o go. Ma di mi taigi den taki a Kongo (Kinshasa) mi o go, neen den de pii. Baka dati den taki: „Oo a Kongo yu o go. Meke Yehofa de anga i ye.” A pisiten de na ala yuu Kongo (Kinshasa) be e de a nyunsu fu di den be e feti aini a kondee. Ma mi be e pakisei den sani di mi be leli a Gileyad. Baka di a sikoo  kaba aini september 1967, neen mi anga Heinrich Dehnbostel anga Claude Lindsay go a Kinshasa, a mamafoto fu Kongo.

Di u doo a Kinshasa, u leli Faansi dii mun. Baka dati u fee anga opalani go a Lubumbashi, di sama be sabi enke Elisabethville, di be de koosube fu Zambiya. U be go tan aini wan zendeling osu di be de na a mindii foto.

Gaanse sama aini Lubumbashi á be yee a bun nyunsu ete, neen meke u be piisii fu paati a bun nyunsu gi den. A á teke langa fosi u be abi omen Beibelsutudi. Den sama di be wani sutudeli be ipi te wi á be poi sutudeli anga ala den. U be e peleiki gi den heiheiman di be e wooko gi lanti tu. Boiti dati, u be e peleiki gi sikowtu. Gaanse fu den be e lesipeki a Wowtu fu Gadu anga a wooko di u be e du. Gaanse fu den sama a Swahili den be e taki, neen meke mi anga Claude Lindsay leli a tongo ya tu. A á langa baka dati, neen den baala sende u go a wan kemeente di e taki Swahilitongo.

Winsi fa u be lobi a wooko di u be e du, toku son leisi sani be e miti u. A omen leisi u be e miti duungu suudati di be de anga goni. Son leisi sikowtu be e lei gi u tu. Wan leisi di u be e holi komakandaa aini a pionili osu, neen wan kulu sikowtu di be de anga goni booko kon aini a osu. Den tyai u go a sitaafu-osu, neen den meke u sidon a doti te enke tin yuu neti fosi den losi u.

 Mi bigin du a kelen wooko aini 1969. Mi be e waka langa pasi. Den pasi be e tokotoko, a gaasi be e hei. Wan leisi di mi go a wan kampu, wan umanfoo anga den pikin fi en kon siibi a mi bedi ondoo. Noiti mi o feegete fa a be e weki mi a musude fosi peesi kiin. Mi e membee ete fa a be e switi fu sidon anga taa baala anga sisa a sikin faya e gi Beibel toli.

Wan fu den moo gaan tesi di be miti wi a ten de, a den sama di be e du enke den a Kotoigi. Den sama ya be e wooko gi a Kitawala kulu. * Son wan fu den be dopu, taawan be toon owluman. Den sama ya di be de enke „gaan siton di kibii a ondoo wataa” á be poi koli den baala anga sisa di be e dini Yehofa anga den hii ati (Yud. 12). Bakaten Yehofa puu den sama ya aini a kemeente. Baka dati moo anga moo sama be e kon aini a tuu biibi.

Aini 1971, den be kai mi fu go wooko na a beikantoo a Kinshasa. A omen wooko mi du ape. Mi be e wooko na a Dienstafdeling pe u be e piki den biifi di sama be e sende kon na a beikantoo. Mi be e poti den buku di den kemeente be e sende akisi aini dosu. Mi leli fa fu seeka a wooko aini gaan kondee pe sani enke sitolomu, bun pasi anga besi á de. Son leisi, te u be sende biifi gi den kemeente, a baka omen mun fosi den be e fende den biifi. Te u be sende den biifi anga opalani, da den be e puu den poti aini boto. Son leisi a omen wiki den boto ya be e fasi a den deki gaasi di de aini a liba. Winsi fa den sani ya be e pasa, tokuso a wooko be e go doo.

Mi be e foondoo fu si fa den baala be e holi gaan konkelesi winsi fa den á be abi tyaipi moni. Denseefi be e meke den podium. Den be e tapu a peesi lontu anga gaasi. Den be e meke kunsu anga gaasi tu fu sidon. Den be e meke osu anga tutu, da den be e tapu den anga wan sowtu penpen. Den be e meke tafaa anga a penpen ya tu. Fu di den á be abi sipikii meke den be e koboloiki udububa fu tei den ponsu miti. Mi be e foondoo fu si fa den baala anga sisa ya be e koboloiki san den be abi fu seeka sani fu holi a konkelesi. Ná pikin lobi mi lobi den. Mi be e angii fu den te di den baala gi mi wan taa faantiwowtu.

Aini 1974, mi foloisi go na a beikantoo di de a Nairobi, aini Keniya. A wooko be ipi, bika a beikantoo fu Keniya be e luku a wooko fu tin taa kondee di be de koosube. Den be tapu a wooko aini son wan fu den kondee ya. Den be lobi sende mi go a den kondee ya, moomoo Etiyopiya pe tesi be e miti den baala anga sisa fu u. Sama be e du ogii anga omen fu den, den be poti son wan fu den a sitaafu-osu, den be kii taawan seefi. Ma den baala anga sisa be e holidoo fu di den be lobi Yehofa anga fu di den be lobi denseefi.

Aini 1980, mi toow anga Gail Matheson, wan sisa di meke a Kanada. Mi anga Gail be de aini aseefi kalasi di u be go na a Gileyad sikoo. U be e sikiifi biifi gi useefi. Gail be de zendeling aini Bolifiya. Baka 12 yali, neen mi anga en miti a New York. A á langa baka dati neen u toow a Keniya. Ai bigi gi mi taki mi toow anga Gail, bika ala yuu ai meke moiti fu denki enke fa Yehofa e denki. Ai tifeedi tu anga san a abi. Te anga now ai holibaka gi mi.

Aini 1986, mi anga Gail fende a gaandi fu du a kelen wooko. Mi be de aini a Beikantoo Komte tu. Di mi be e du a kelen wooko u be e go a omen fu den kondee di a beikantoo fu Keniya be e luku.

Mi e membee ete fa u be e seeka sani fu holi wan konkelesi a Asmara (wan foto aini Eritreya) aini 1992. A ten de a wooko fu wi á be tapu aini a kondee ya. A peesi pe u be fende fu holi a konkelesi a be wan gaandi magisin. A be tyobo te. A dei fu a konkelesi, mi foondoo fu si fa den baala anga sisa seeka a peesi. A so u be  man dini Yehofa ape. A omen fu den tyai koosi kon tapu den peesi di á be moin fu si. U be piisii te fu de na a konkelesi ya. Ala anga ala a 1279 sama be kon na a konkelesi.

A kelen wooko á be makiliki bika ala wiki a wan taa peesi u be e siibi. Kande a wiki ya u siibi aini wan moin osu di be de koosube fu a se, taa wiki u siibi aini wan pikin senki osu. Son leisi a 100 meter u be mu waka fu go a toilet. Ma winsi pe u be go, a be e bigi gi u fu wooko aini a peleikiwooko makandaa anga pionili anga peleikiman di be e wooko fayafaya. Di den baala gi u wan taa wooko, u gwe fika omen mati di u lobi tuutuu.

Aini 1987 te anga 1992 lanti be gi u pasi fu peleiki aini wantu kondee di a beikantoo fu Keniya be e luku. Neen meke den baala sete beikantoo anga taa kantoo aini den kondee ya fu luku a wooko. Aini 1993, u be fende a gaandi fu wooko na a kantoo a Addis Ababa, di de aini Etiyopiya. A omen yali den baala anga sisa be e peleiki kibiikibii aini a kondee ya. Ma now lanti á be e tapu u fu peleiki moo.

Yehofa belesi a wooko a Etiyopiya. A omen baala anga sisa bigin anga a pioniliwooko. Fanafu a yali 2012, te i be teli 10 peleikiman da 2 fu den a be pionili. Den sikoo di a olikanisâsi e holi, yeepi den baala anga sisa fu du den wooko moo bun. Den be meke moo enke 120 Kownukondee zaal. Aini 2004 a Betelfamii foloisi go a wan nyun peesi. Boiti dati den meke wan peesi fu holi gaan komakandaa aini aseefi dyali. A sani ya be tyai wini gi den baala anga sisa tuutuu.

Den yali di pasa, mi anga Gail meke omen bun mati a Etiyopiya. Den lobi gi sama sani, den lobi sama, neen meke u lobi den. Fu di u gusontu e go a baka meke den sende u go na a beikantoo a Doisilikondee. Den baala anga sisa ya e solugu u te, ma toku wi e angii fu den baala anga sisa fu wi a Etiyopiya.

U luku duun fa Yehofa meke a wooko go a fesi (1 Kor. 3:6, 9). A fosi leisi di mi peleiki gi wantu man fu Rowanda di be e suku kopoo a Kongo, peleikiman á be de aini Rowanda. Nownow a moo enke 30.000 baala anga sisa de aini Rowanda. Aini 1967 a 6000 peleikiman be de aini Kongo (Kinshasa), nownow a wan sani fu 230.000 peleikiman de aini a kondee. Aini 2018 a moo enke wan miliyun sama kon na a Membeefesa. Nownow a moo enke 100.000 peleikiman de aini den kondee di a beikantoo fu Keniya be e luku fosi.

Wan sani fu 50 yali pasa, Yehofa be koboloiki omen baala fu gi mi deki-ati fu du a fuuten diniwooko. Te anga now sen e kisi mi ete, ma mi leli taki mi mu fitoow Yehofa. A wooko aini Afiikan leli mi fu abi pasensi anga fu tifeedi anga san mi abi. Mi anga Gail lobi a fasi fa den baala anga sisa e soi switifasi, fa den e holidoo winsi san e pasa anga fa den e fitoow Yehofa. Ai bigi gi mi taki Yehofa soi mi bun-ati. A belesi mi a omen fasi di mi á be denki.​—Ps. 37:4.