AINI Beibel u sa leisi omen toli fu sama di be „abi denseefi fii di wi abi” (Yak. 5:17). Wi e fusutan fa Pawlesi be e fii di a taki den sani di sikiifi a Romesama 7:21-24. A taki: „Te mi wani du bun, da a ogii de aini mi. . . . A libi fu mi tyali oo!” Te den sondu fii fu wi e meke ai taanga gi u fu du san Gadu wani, ai gi u taanga-sikin fu sabi taki Pawlesi be abi denseefi fii di wi abi.

Ma boiti den sondu fii di be e fooseli Pawlesi, a be e taki fu taa sowtu fii tu. Aini Galasiyasama 2:20 Pawlesi taki: Yesesi „lobi mi. A dede fu mi ede”. Den wowtu ya e soi taki Pawlesi be e fii tuutuu taki Yesesi lobi en! Yu e fii so tu? Kande a ná ala yuu yu e fii so.

Kande wi e fii enke wi á bun fu di u be meke wan fowtu aini a ten di pasa. Kande a sani ya e meke a taanga gi u fu biibi taki Yehofa lobi u. Kande wi e si enke a á gi u paadon. Den sani ya sa meke a taanga gi u fu biibi taki Yesesi dede gi u tuutuu. I si enke a so Yesesi wani u si a dede di a kon dede gi u? San o yeepi u fu si a dede di Yesesi dede gi wi enke wan kado? Meke u luku den tu akisi ya.

Yesesi wani u si a dede fi en enke wan kado di a gi ibiiwan fu u. Saide u sa biibi a sani ya? Luku a toli di sikiifi a Lukasi 23:39-43. Den sipikii wan man a wan ponsu koosube fu Yesesi. A man ya piki taki a sondu tuu. A be musu de taki a wan gaan sani a du, bika a te wan sama be du wan gaan ogii fosi den be e sipikii en a wan ponsu. Den sani di a man ya be du be hati en neen meke a begi Yesesi taki: „Yesesi membee mi te i de aini i Kownukondee.”

San Yesesi du di a man taki a sani ya? Pakisei a pen di Yesesi be e fii di a daai luku a man. Ná pikin pen Yesesi be musu e fii, tokuso a booko lafu gi a man, neen a taigi en taki: „Tuutuu, mi e taigi i tide: Yu o de anga mi aini a paladeisi.” Yesesi be sa taigi a man taki ’a Manpikin fu libisama . . . kon fu gi en libi enke wan paiman fu fii omen sama’ (Mat. 20:28). Ma Yesesi á du a sani de. A poti pakisei na a man seefi. A taki switi anga en di a taigi en taki „yu” o de anga „mi” aini a Paladeisi a goontapu.

Yesesi be wani a man ya fii taki a dede gi en tu. A man ya be e du ogii fosi, a á be fende a okasi fu dini Gadu tu. Ma toku Yesesi be wani a fusutan taki a dede fi en be o tyai wini gi en tu. Na aseefi sani Yesesi wani wi enke dopu Kelesten fusutan tu. San o yeepi u fu biibi taki wi o fende wini fu a dede fu Yesesi winsi u be meke fowtu aini a ten di pasa?

A peleikiwooko be e yeepi Pawlesi fu fusutan taki Yesesi be dede gi en tu. Fa a sani ya be e yeepi en? A taki: „Mi e gi Kelestesi Yesesi, u Masaa daa. Neen gi mi kaakiti, di a si taki mi e aliki Gadu ala yuu. Neen meke a gi mi wan wooko fu  du, bika mi be e taki ogii fu Gadu fosi, mi be e du ogii anga taawan. Mi á be abi sen” (1 Tim. 1:12-14). Winsi fa Pawlesi be e du ogii fosi, toku Yesesi soi lobi anga tyali-ati gi en. A soi en tu taki ai fitoow en, di a gi en a gaandi fu paati a bun nyunsu. Na a sani ya yeepi Pawlesi fu biibi taki Yesesi dede gi en tuu. Yesesi gi wi a gaandi fu paati a bun nyunsu tu (Mat. 28:19, 20). Fa a peleikiwooko sa yeepi u fu biibi taki Yesesi dede gi wi tu?

Baka di wan baala den e kai Albert komoto a waaleiti wan sani fu 34 yali, a daai kon a Yehofa baka. A taki: „Mi á poi feegete den sani di mi be du. Ma a peleikiwooko e yeepi mi fu fii taki leti enke apostel Pawlesi, Yesesi gi mi a wooko fu paati a bun nyunsu. A sani ya e yeepi mi fu piisii. Ai toosutu mi te mi e fii enke mi á bun. Ai yeepi mi fu biibi taki mi libi o waka bun aini a ten di e kon.”​—Ps. 51:3.

Fosi wan baala den e kai Allan kon a waaleiti, a be e du omen ogii. A be lobi feti. A taki: „Te anga now mi e pakisei den somen ogii di mi du anga taawan. Son leisi a sani ya e meke mi e fii booko-saka. Ma ai bigi gi mi taki Yehofa gi mi enke wan sondu sama a gaandi fu paati a bun nyunsu anga taawan. Te mi e si fa sama e piisii fu yee a bun nyunsu, a sani de e membee mi taki Yehofa a wan bun Gadu, a lobi sama tuutuu. Mi e fii enke ai koboloiki mi fu yeepi taawan di e meke moiti fu fika denseefi ogii di mi be e du fosi.”

Te u de a peleikiwooko wi e piisii bika wi e pakisei sani di e gi u taanga-sikin. A gaandi di wi abi fu peleiki e soi u kiin taki Yesesi lobi u, a abi tyali-ati. Ai soi taki ai fitoow u tu.

Solanga u de aini a goontapu fu Saatan ya ete, kande u kosensi o go e fon wi fu den sani di u be e du fosi. San o yeepi u fu feti anga den fii ya?

Fosi, wan sisa di den e kai Jean be e du enke ai dini Yehofa anga en hii ati, ma a á be e tyai enseefi bun te a be de anga sama di nai dini Yehofa. A taki: „Ai bigi gi mi fu sabi taki ’Gadu bigi moo wi ati’” (1 Yoh. 3:19, 20). Leti enke Jean wi e fii bun te u sabi taki Yehofa anga Yesesi e fusutan taki wi a sondu sama. Wi á mu feegete taki a fu di den lobi u meke den seeka sani fu fii sondu libisama. Den á du a sani yaaso gi sama di ná abi sondu ma gi den sama di e tyali fu den sondu di den du.​—1 Tim. 1:15.

Te wi e begi, da u teke ten pakisei a fasi fa Yesesi be e libi anga sama di be abi sondu, a sani ya o yeepi u fu biibi taki useefi sa fende wini fu a dede fu Yesesi. Te wi e du ala san u man aini a peleikiwooko a sani ya seefi o yeepi u fu biibi taki Yesesi dede gi u. Efu wi e du den sani ya, da leti enke Pawlesi useefi o poi taki: Yesesi „lobi mi. A dede fu mi ede”.