1. San a wowtu ‘waaleiti’ wani taki?

‘FA I du kon a waaleiti?’ ‘A waaleiti i kiya?’ ‘On langa i de a waaleiti kaba?’ Kande sama akisi i den sani ya kaba, efuso kande yu akisi sama den sani ya. Ma san a wowtu ‘waaleiti’ wani taki? Gaanse leisi te wi e taki fu waaleiti, da a den sani di wi e biibi, den sani di wi e du te wi e dini Gadu, anga a fasi fa wi e libi wi e taki. Den sama di de a ‘waaleiti’ sabi san Beibel e leli. Den e meke moiti fu du den sani ya tu. A sani de e yeepi den fu abi wan moo bun libi winsi fa den e libi aini a goontapu fu Saatan.​—Yoh. 8:32

2. Enke fa Yohanisi 13:34, 35 e soi, da saide son sama e kon a waaleiti?

² Saide i kon a waaleiti? Kande a den bun manii fu a foluku fu Yehofa be meke i wani sutudeli Beibel (1 Peit. 2:12). Kande na a lobi di den lobi taawan hali i. Son sama nai membee san den be yee di den be kon a komakandaa a fosi leisi, ma den e membee a lobi di den baala anga sisa be soi den. A sani ya nai foondoo u, bika Yesesi be taki den bakaman fi en be o lobi denseefi. (Leisi Yohanisi 13:34, 35.) Na a lobi di u lobi useefi e meke sama sabi taki u na a foluku fu Gadu.

3. San sa pasa efu wan sama e dini Gadu soso fu di a si fa den baala anga sisa lobi denseefi?

³ A ná a lobi di a foluku fu Yehofa lobi denseefi namo mu meke u biibi taki wi abi a tuu biibi. Saide? Meke u taki wan owluman efuso wan pionili du wan gaan sondu. Efuso kande wan baala efuso wan sisa du wan hati sani anga i. Kande wan sama di i be lobi gwe fika a tuu biibi neen a bigin paati lei fu a olikanisâsi. San i be o du efu a sani ya pasa? I be o gwe fika Yehofa? Efu a fu sama ede yu e dini Yehofa, i ná o poi tan a waaleiti. A lobi di i lobi den baala anga sisa e  yeepi i fi i biibi taanga, ma a sani ya wawan á sai. I mu lobi Yehofa anga i hii ati tu. Efi i wani i biibi taanga tuutuu, i mu e sutudeli Beibel ala yuu. I mu meke moiti fu fusutan den sani di yu e leli. Boiti dati, i mu e ondoosuku luku efu den sani di yu e leli fu Yehofa a tuu.​—Rom. 12:2.

4. Enke fa Mateyesi 13:3-6, 20, 21 e soi, da san son sama e du te tesi miti den?

⁴ Yesesi be taki te son sama be o yee a wowtu den be o teke en ‘anga piisii’. Ma te tesi be o miti den, den á be o holidoo. (Leisi Mateyesi 13:3-6, 20, 21.) Kande den sama ya á be sabi taki tesi be o miti den di den be o toon wan bakaman fu Yesesi (Mat. 16:24). Kande den be denki taki te i toon wan Kelesten da ala sani fi yu o waka bun. A soso piisii yu o go e piisii. Ma nawan sama á poi de sondee booko-ede aini a goontapu ya. Son leisi a wanboowanboo u libi e kengi. A sani ya sa gi u booko-ede.​—Ps. 6:6; Peleik. 9:11.

5. San e soi taki gaanse baala anga sisa e biibi taki den abi a tuu biibi?

⁵ Te u luku a fasi fa gaanse sama aini a kemeente e tyai denseefi, da wi e si taki den e biibi tuutuu taki den de aini a tuu biibi. Saide u sa taki a sani ya? Bika winsi wan baala efuso sisa du wan sani di hati den, efuso kande wan sama di den be e lesipeki komoto a waaleiti, a sani ya nai meke den gwe fika Yehofa (Ps. 119:165). O moo tesi e miti den, o moo den biibi e taanga (Yak. 1:2-4). San i mu du efi yu á wani i biibi swaki te tesi miti i?

6. San be yeepi den fosi Kelesten fu den biibi be taanga?

⁶ Den fosi Kelesten be meke moiti fu sabi den ‘tuu leli fu a bun nyunsu’, neen meke den biibi be taanga. Den be sabi a Wowtu fu Gadu anga den sani di Yesesi be e leli sama (Gal. 2:5). Den tuu leli fu a bun nyunsu, na ala den sani di wi enke Kelesten e biibi. Wi e biibi taki Yesesi dede gi u fu u sa fende paadon fu sondu. Wi e biibi tu taki Yehofa weki en baka. Apostel Pawlesi be e biibi den sani ya tu. Saide? Bika a be e sutudeli a Wowtu fu Gadu bun. A sani ya be yeepi en fu si taki Yesesi be mu pina te enke a dede, da Gadu be o weki en baka (Toli 17:2, 3). Den Kelesten fu a ten de be e biibi den leli ya. Den be e biibi tu taki a santa yeye be o yeepi den fu fusutan a Wowtu fu Gadu. Den be e ondoosuku sani finifini fu di den be wani sabi efu den sani di den be e leli a tuu (Toli 17:11, 12; Heb. 5:14). Den á be e dini Gadu namo fu di den be lobi de makandaa anga taa baala anga sisa. A sani ya wawan á be o yeepi den fu den biibi taanga. A sani di be o meke den biibi taanga, a te den be o sabi den ‘dipi toli fu Gadu’.​—Kol. 1:9, 10.

7. Sowtu wini wi o fende te wi e biibi den leli fu Beibel?

⁷ Den leli fu Beibel nai kengi (Ps. 119:160). Winsi wan baala efuso sisa du wan hati sani anga u, efuso winsi wan sama di u be e lesipeki du wan sani di meke den puu en na a kemeente, tokuso den leli ya nai kengi. Winsi sowtu tesi e miti u, a sani ya nai kengi den leli fu Beibel. Neen meke u mu meke moiti fu sabi Beibel bun. U mu e biibi den sani di sikiifi aini Beibel tu. Leti enke fa wan ankaa e holi wan boto a wan peesi, a so wi o man holidoo te tesi e miti wi efu wi e biibi den sani di sikiifi aini Beibel. San o yeepi i fu biibi taki aini a tuu biibi i de?

8. Enke fa 2 Timotiyesi 3:14, 15 e soi, da san yeepi Timotiyesi fu biibi taki a de aini a tuu biibi?

⁸ Timotiyesi be e biibi den sani di a be e leli aini a Wowtu fu Gadu. San be yeepi en? (Leisi 2 Timotiyesi 3:14, 15.) En mma anga en gaanmma be leli en den sani di sikiifi aini den ‘santa buku fu Gadu’. Ma enseefi be e meke moiti fu sutudeli a Wowtu fu Gadu. Neen meke a be sabi taki den sani di a be e leli a be tuu. Bakaten Timotiyesi mma anga en gaanmma toon Kelesten. A lobi di Timotiyesi be si aini a Kelesten kemeente be hali en. Neen meke a be wani de makandaa anga den baala anga sisa. A be wani yeepi den tu (Filip. 2:19, 20). Ma a ná a sani ya wawan be meke Timotiyesi biibi taanga. Den sani di a be leli aini Gadu Wowtu be yeepi en tu fu toon Yehofa mati. Efi i wani i biibi taanga, i mu e sutudeli Beibel.

9. Sowtu dii pelensipali sani i mu biibi?

⁹ Efi i wani i biibi taanga, i mu sabi dii pelensipali sani. A fosiwan, i mu biibi taki a Yehofa Gadu meke ala sani (Ek. 3:14, 15; Heb. 3:4; Openb. 4:11). Du fu tu, i mu biibi taki Beibel na a Wowtu fu Gadu (2 Tim. 3:16, 17). Du fu dii, i mu biibi taki Yehofa abi wan kulu sama a goontapu di e meke moiti fu dini en enke fa a wani. Den sama ya e biibi taki a Yesesi na a edeman fu a olikanisâsi ya. I mu biibi tu taki a Yehofa Kotoigi na a kulu sama ya (Yes. 43:10-12; Yoh. 14:6; Toli 15:14). I ná abi fu sabi a hii Beibel fosi yu o man biibi den dii sani di u kai ya. Ma te yu e sutudeli, i mu meke moiti fu si efu den sani di yu e leli a tuu.​—Rom. 12:1.

10. Boiti taki wi e biibi taki Beibel na a Wowtu fu Gadu, san u mu du moo?

¹⁰ Efi yu e biibi taki a Gadu meke ala sani, taki Beibel na a Wowtu fi en, anga taki a abi wan foluku a goontapu, da i mu yeepi taa sama fu biibi den sani ya tu. Saide?  Bika Kelesten abi a faantiwowtu fu leli taa sama san Beibel e taki * (1 Tim. 4:16). Te wi e meke moiti fu yeepi taa sama fu biibi den sani di sikiifi aini Beibel, a sani ya e yeepi u fu u biibi kon moo taanga.

11. Fa apostel Pawlesi be e leli sama? Fa u sa waka neen baka?

¹¹ Te Pawlesi be e leli sama, a be e koboloiki ‘a Weiti fu Mosesi anga den buku fu den Polofeiti’ fu soi den taki den sani di den leli fu Yesesi a tuu (Toli 28:23). Fa u sa waka a Pawlesi baka te wi e leli sama? Wi á mu e taigi den Beibelsutudi fu u namo san Beibel e taki, ma u mu soi den tu fa denseefi sa ondoosuku Beibel. U mu yeepi den fu sidon pakisei den sani di den e leli. A sani ya o yeepi den fu den anga Yehofa toon mati. Wi á wani den dini Yehofa fu di den lobi u, ma u wani den dini en fu di den e biibi taki den sani di den e leli fi en a tuu.

12-13. Fa dda anga mma sa yeepi den pikin fu den fu tan dini Yehofa?

¹² Dda anga mma wani den pikin fu den dini Yehofa. Kande den e si enke te den pikin fu den o abi bun mati aini a kemeente, da den biibi o taanga. Ma efi i wani den pikin fi i biibi den sani di den e leli aini Beibel, a ná bun mati namo den mu abi. Den anga Yehofa seefi mu toon mati. Den mu e biibi anga den hii ati taki den sani di Beibel taki a tuu.

¹³ Efu dda anga mma wani den pikin fu den sabi Yehofa, denseefi mu e sutudeli Beibel ala yuu. Den mu e teke ten pakisei den sani di den e leli, da den pikin fu den o waka a den baka. A omen dda anga mma e leli den Beibelsutudi fu den fa den mu wooko anga a Wakititolen Library a internet anga a JW Library App fu ondoosuku sani, ma den á mu feegete fu leli den pikin fu den fa den mu wooko anga den sani ya. Efu dda anga mma e du a sani ya, den o yeepi den pikin fu den fu lobi Yehofa. Den o yeepi den tu fu ‘fitoow a koni saafu’ di Yehofa poti fu leli u (Mat. 24:45-47). Dda anga mma, wi á mu e leli den pikin fu u den makiliki sani fu Beibel namo. Efu u wani den pikin fu u biibi taanga, u mu yeepi den fu fusutan den dipi toli fu Gadu. Te wi e leli den pikin fu u, u mu holi a pakisei omen yali den abi anga omen sani den o man fusutan.​—1 Kor. 2:10.

14. Saide u mu e sutudeli den polofeititoli fu Beibel? (Luku a faki ‘ I sabi san den polofeititoli ya wani taki?’)

¹⁴ Wan fu den sani di e yeepi u fu moo fitoow Yehofa, a den polofeititoli di de aini  Beibel. Sowtu polofeititoli e taanga i biibi? Kande a den polofeititoli di e taki fu ‘den lasiti dei’ (2 Tim. 3:1-5; Mat. 24:3, 7). Ma san a wantu polofeititoli di pasa kaba di sa taanga i biibi? Efu wan sama be akisi i, i be o poi taigi en fa den polofeititoli di sikiifi a Daniyeli kapitel 2 efuso Daniyeli kapitel 11 kon tuu aini den ten di pasa? I be o poi taigi en fa den e kon tuu aini a ten ya? * Te yu e biibi den sani di sikiifi aini Beibel anga i hii ati, a sani ya o yeepi i fi yu á gwe fika Yehofa. Luku a toli fu den baala anga sisa fu u di den be du ogii anga den aini Doisilikondee na a ten fu a Du Fu Tu Goontapu Feti. Winsi fa den á be e kaba fusutan ala den polofeititoli di e taki fu den lasiti dei, tokuso den be e biibi den sani di den be leli aini a Wowtu fu Gadu.

15-17. San yeepi den baala anga sisa fu holidoo di den Nazisama be e du ogii anga den?

¹⁵ Di den Nazisama be e tii Doisilikondee a omen dunsu baala anga sisa den sende go a sitaafuman kampu. Hitler anga Heinrich Himmler, a edeman fu den SS suudati á be lobi Yehofa Kotoigi seefiseefi. Wan sisa taki Himmler be taigi wantu sisa di be de a sitaafuman kampu taki: ‘A Yehofa fu wi e tii hemel, ma a wi e tii goontapu. Wi o soi u sama o tan, wi efuso Yehofa Kotoigi.’ San yeepi a foluku fu Yehofa fu holidoo?

¹⁶ Den Beibel Ondoosukuman be sabi taki a Kownukondee fu Gadu be bigin tii aini 1914. Den á be e foondoo taki tesi be e miti den. A foluku fu Yehofa be sabi taki nawan libisama tiiman be o poi tapu Gadu fu du san a abi a pakisei. Hitler á be poi kii ala den Yehofa Kotoigi. A á be poi sete wan tiimakiti di taanga moo a Kownukondee fu Gadu tu. Den baala anga sisa fu u be sabi taki a tiimakiti fu Hitler be o kon a wan kaba.

¹⁷ A sani di den baala anga sisa be e biibi pasa tuu. A á langa seefi neen a tiimakiti fu den Nazisama booko. Heinrich  Himmler, a man di be taki a den e tii a goontapu ya be e lon gi en libi. Di a be e lowe neen a miti baala Lubke. Himler be sabi a baala ya bika a be de aini a sitaafuman kampu fosi. Himler booko-saka te neen a akisi baala Lubke taki: ‘We, Beibel Ondoosukuman san o pasa now?’ Baala Lubke soi Himler taki den Yehofa Kotoigi be sabi senten kaba taki a tiimakiti fu den Nazisama be o booko. Den be sabi tu taki a foluku fu Gadu be o fii. Himler di be gwenti taki ogii fu den Yehofa Kotoigi be de pii. A á be poi taki nawan sani. A á langa baka dati neen a kii enseefi. San a sani ya e leli u? Te wi e sutudeli Beibel, te wi e meke moiti fu fusutan den Beibel polofeititoli, da u biibi e moo taanga. Ai yeepi u tu fu u man holidoo te sama e du ogii anga u fu u biibi ede.​—2 Peit. 1:19-21.

18. Enke fa Yohanisi 6:67, 68 e soi, da saide u mu kon sabi den tuu toli fu Gadu finifini?

¹⁸ Ala u mu soi taki u lobi den baala anga sisa fu u, bika na a sani ya o yeepi sama fu sabi taki wi a tuu Kelesten. Boiti dati, ‘u mu kon sabi den tuu toli fu Gadu finifini’. U mu meke moiti fu fusutan kiin san Gadu wani (Filip. 1:9). Efu wi á du den sani ya, wi o de enke wan boto di paana e tyai go na ala se. Sama o buuya wi anga ala sowtu leli (Efe. 4:14). Di omen bakaman fu Yesesi á be wani waka neen baka moo, apostel Peitilisi soi taki a be e biibi taki Yesesi be abi wowtu ‘di e meke sama libi fu teego’. (Leisi Yohanisi 6:67, 68.) A ten di Peitilisi be taki a sani ya a á be kaba fusutan ala den sani di Yesesi be e leli den. Toku a tan waka a Yesesi baka, bika a be sabi taki Yesesi na a Kelestesi. Efi i meke moiti, i biibi o taanga enke Peitilisi. A sani ya o yeepi i fu holidoo winsi san e miti i. Yu o man yeepi taa sama tu fu taanga den biibi.​—2 Yoh. 1, 2.