1. San Pawlesi á be e feele fu taigi taawan?

SEN á be e kisi apostel Pawlesi fu taigi taawan taki a be e fii swaki son yuu. * A be taki en sikin ‘be e swaki namo’. A be taki tu taki a ná ala yuu Yehofa be e piki den begi fi en enke fa a be wani (2 Kor. 4:16; 12:7-9; Rom. 7:21-23). Pawlesi be sabi taki den sama di á be lobi en be e soso en. Ma winsi fa sama be e soso en efuso winsi fa a be abi swakifasi, tokuso Pawlesi á be e fii enke a ná abi fa.​—2 Kor. 10:10-12, 17, 18.

2. Enke fa 2 Korentesama 12:9, 10 e soi, da sowtu pelensipali sani Pawlesi be fusutan?

² Pawlesi be fusutan wan pelensipali sani. A be fusutan taki wan sama sa taanga, winsi ai fii swaki. (Leisi 2 Korentesama 12:9, 10.) Yehofa be taigi Pawlesi taki: ‘Te i swaki, ala sama o si taki a mi e gi i kaakiti.’ Yehofa be wani soi Pawlesi anga a sani ya taki a be o gi en a kaakiti di a be abi fanowdu. Meke u luku saide a á de fu u booko-saka tumisi te sama e kosi u.

3. Saide u sa piisii winsi sama e kosi u?

³ Nawan sama á lobi te taawan e kosi en, ma efu wi e booko wi ede tumisi te den feyanti fu wi e kosi u, wi o lasi-ati (Odo 24:10). San u mu du te den feyanti fu wi e kosi u? Leti enke Pawlesi u sa ‘piisii te sama e kosi u’  (2 Kor. 12:10). Saide? Bika te sama e kosi u, efuso te den e du ogii anga u, da a sani ya e soi taki wi a den bakaman fu Yesesi (1 Peit. 4:14). Yesesi be taki sama be o du ogii anga den bakaman fi en (Yoh. 15:18-20). Na a sani ya be pasa anga den fosi Kelesten. Den sama di be teke den gwenti fu den Giikisama be e soso den Kelesten. Den be e si den enke don sama. Den Dyu be e fende tu taki son Kelesten, enke Peitilisi anga Yohanisi ‘á be go a hei sikoo’, neen meke den á be e si den fu wan sani (Toli 4:13). Den Kelesten á be e mumui anga politiki, den á be e toon suudati tu, neen meke omen sama á be e lesipeki den. Den be e si den enke sama di ná abi fa fu denseefi.

4. San den fosi Kelesten be e du te sama be e kosi den?

⁴ Winsi fa sama be e soso den fosi Kelesten, tokuso den á be tapu anga a peleikiwooko. Apostel Pawlesi anga Yohanisi be e si en enke wan gaandi taki sama be e du ogii anga den fu a biibi fu den ede (Toli 4:18-21; 5:27-29, 40-42). Den disipel be sabi taki a ná ogii den be e du, neen meke sen á be e kisi den te sama be e lafu den. Winsi fa sama á be e lesipeki den fosi Kelesten, toku den Kelesten ya du bun gi taawan moo den sama di be e soso den. Wan fu den fasi fa den Kelesten ya yeepi sama, a den buku fu Beibel di den sikiifi. Den buku ya e yeepi miliyunmiliyun sama aini a ten ya ete. A Kownukondee di den be e peleiki fi en e tii kaba. Dyonson na a Kownukondee ya o tii a hii goontapu (Mat. 24:14). Ma a tiimakiti fu Rome di be e du ogii anga den Kelesten á de moo. Boiti dati, den disipel fu Yesesi e tii enke kownu a hemel nownow, ma ala den sama di be e soso den, efuso di be e du ogii anga den, dede. Efu Yehofa o weki den baka, den o abi fu saka denseefi na a Kownukondee fu Kelestesi ondoo. A fu aseefi Kownukondee ya den fosi Kelesten be e peleiki di den be e du ogii anga den.​—Openb. 5:10.

5. Enke fa Yohanisi 15:19 e soi, da saide son sama nai lesipeki Yehofa Kotoigi?

⁵ Aini a ten ya son sama nai lesipeki u, den e soso u, den e si wi enke don sama. Saide? A di u nai du sani enke den. Wi e meke moiti fu abi sakafasi, wi e wooko anga den weiti fu lanti. Ma omen sama aini a goontapu ya abi heimembee, den nai wani du san lanti taki. U nai mumui anga politiki, u nai toon suudati tu. U nai libi enke den sama fu a goontapu ya, neen meke den e soso u.​—Leisi Yohanisi 15:19; Rom. 12:2.

6. Sowtu gaan sani Yehofa e meke a foluku fi en du?

⁶ Winsi fa den sama fu a goontapu nai si u fu bunbun sama, tokuso Yehofa e meke u du gaan sani gi en. Ai yeepi u fu peleiki na a ala se fu goontapu. A foluku fi en e meke buku aini omen ondoo tongo. Den buku ya paati moo ala taa buku a goontapu. Den e wooko anga a Beibel tu fu yeepi miliyunmiliyun sama fu abi wan moo bun libi. A Yehofa e gi den a kaakiti fu du den sani ya. Ai meke sama di a goontapu e si fu wisiwasiman du gaan sani gi en. Ma fa a de anga i? I si enke Yehofa sa meke i du gaan sani gi en? San i mu du efi i wani Yehofa meke i wooko gi en? Wi o luku dii sani di u sa leli fu apostel Pawlesi.

7. San na a fosi sani di u sa leli fu Pawlesi?

⁷ Wan sani di wi e leli fu Pawlesi, a taki te wi e dini Yehofa wi á mu e fitoow a koni fu u, efuso den sani di wi abi. Te u luku a libi fu Pawlesi anga den sani di a be poi du, da a be sa abi heimembee. A be sa si enke a ná abi Yehofa fanowdu tu. Pawlesi meke aini Tarsus, a mamafoto fu Silisiya. Tarsus a be wan gudu foto. A foto ya be abi hei sikoo pe omen sama be e wani go. A Gamaliyeli, wan fesiman fu den Dyu di omen sama be e lesipeki be leli Pawlesi (Toli 5:34; 22:3). Bakaten Pawlesi seefi be toon wan bigiman aini a Dyu keliki. A be taki: ‘Mi be e go a fesi aini a Dyu biibi moo omen fu den supee fu mi’ (Gal. 1:13, 14; Toli 26:4). Tokuso Pawlesi á be e fitoow enseefi.

8. Enke fa Filipisama 3:8 e soi, da fa Pawlesi be e si den sani di a fika fu toon wan bakaman fu Kelestesi? Saide a be e ‘piisii te a be swaki’?

⁸ A á be taanga gi Pawlesi fu fika den sani di den sama fu a goontapu e si fu gaan sani. Bakaten Pawlesi taki a be e si den sani ya ‘enke dyiko’. (Leisi Filipisama 3:8.) Ná pikin sani miti Pawlesi di a toon wan bakaman fu Kelestesi. En eigi foluku be e buuse en (Toli 23:12-14). Winsi fa a be abi pampila fu Rome, tokuso den Romesama fon mi en, neen den poti en a sitaafu-osu (Toli 16:19-24, 37). Boiti den sani ya, Pawlesi be mu e feti anga den sondu fii fi en (Rom. 7:21-25). Ma winsi fa sama be e du ogii anga Pawlesi, winsi fa a be abi fu feti anga den sondu fii fi en, toku den sani ya á tapu Pawlesi fu waka a Yesesi baka. Beibel taki Pawlesi be e ‘piisii te a be swaki’. Saide? Bika te a be swaki, da a be e si fa Gadu be e yeepi en.​—2 Kor. 4:7; 12:10.

9. Fa u mu si den sani di sa meke u fii booko-saka?

⁹ Efu u wani Yehofa yeepi u, wi á mu e si enke u bun moo taawan fu di u taanga, fu di u go a hei sikoo, fu di u gudu, efuso fu di wi abi pampila fu wan gudu kondee. Bika a ná den sani ya Yehofa e luku. Somen fu den sama di e dini Yehofa ‘a ná sama di taawan e si enke  koniman. Gaanse fu u ná abi makiti. Den famii fu wi á gudu. Ma Gadu teke den swakiwan fu a goontapu fu wooko gi en’ (1 Kor. 1:26, 27). Neen meke winsi yu á gudu, winsi yu á go a hei sikoo, efuso i nai teli fu koniman, tokuso i sa wooko gi Yehofa. Te u ná abi den sani di den sama fu a goontapu e si enke pelensipali sani, da wi o moo si fa Yehofa e gi u kaakiti. Kande yu a wan sama di e feele fu taki anga sama di e soso i. Efu a so, i sa akisi Yehofa fu a gi i deki-ati fu taigi den sani yu e biibi (Efe. 6:19, 20). Efi yu abi wan siki di nai betee, i sa akisi Yehofa fu a yeepi i fu e fende okasi fu peleiki. Te yu e si fa Yehofa e yeepi i, a sani ya o gi i kaakiti. I biibi o kon moo taanga tu.

10. Saide a bun fu e ondoosuku a libi fu sama di be e dini Gadu anga den hii ati, enke den sama di kai a Hebrewsama 11:32-34?

¹⁰ Pawlesi be lobi ondoosuku a Wowtu fu Gadu. A omen sani a leli fu den sama di be e dini Yehofa anga den hii ati. Di a sikiifi biifi gi den Kelesten, a gi den taanga-sikin fu pakisei den sama di be e dini Yehofa a fesi. (Leisi Hebrewsama 11:32-34.) Wan fu den sama ya a be Kownu David. A ná den feyanti fu David wawan be e suku fu du ogii anga en, ma sama di a be e si enke en mati be wani du ogii anga en tu. Wi o si sowtu taanga-sikin Pawlesi be fende te a be e sidon pakisei a libi fu David. Wi o si tu fa u sa waka a Pawlesi baka.

11. Saide a be e gei enke David be swaki te i be maiki en anga Goliyat? (Luku a fowtow a fesise fu A Wakititolen.)

¹¹ Di Goliyat si David a ‘bigin soso en’. A sani ya nai foondoo wi, bika Goliyat be bigi gadyaa moo David. A be abi bun fetisani, a be sabi feti tu. Ma David a be wan pikin boi. A á be go a feti ete. A á be abi fetisani tu. Te i be luku David, a be e gei enke a swaki. Ma fu taki en kiin a bunbun taanga a be taanga, bika a be e fitoow Yehofa. Neen meke Yehofa gi en a kaakiti fu kii Goliyat.​—1 Sam. 17:41-45, 50.

12. San a wan taa tesi di be miti David?

¹² Wan taa tesi be miti David di be sa meke a fii booko-saka tu. A be wooko anga en hii ati gi Saul, a sama di Yehofa be poti fu tii Islayeli. Kownu Saul be lobi David, ma bakaten a be kon abi heimembee, neen meke a be bigin dyalusu anga David. Saul libi ogii anga David. A omen leisi a misi fu kii David.​—1 Sam. 18:6-9, 29; 19:9-11.

13. San David du di Kownu Saul be e libi ogii anga en?

¹³ Winsi fa Kownu Saul be e libi ogii anga David, tokuso David be e lesipeki en ete, bika a Yehofa be poti en enke kownu (1 Sam. 24:6). David ati á be e boon a Yehofa di Saul be e libi ogii anga en, ma a be e fitoow Yehofa. A be e biibi tu taki Yehofa be o yeepi en fu holidoo.​—Ps. 18:1.

14. Saide u sa taki a denseefi sani di be miti David be e miti Pawlesi?

¹⁴ A denseefi sowtu sani di be miti David be e miti apostel Pawlesi. Den feyanti fi en be taanga omen toon moo en. A omen tiiman be e buuse en tu. Son leisi den be e meke sama fon mi en te a fon da den poti en a sitaafu-osu. Leti enke David, a omen sama di Pawlesi be e si enke en mati be daai e libi ogii anga en. Son sama aini a Kelesten kemeente seefi  be e buuse Pawlesi (2 Kor. 12:11; Filip. 3:18). Ma Pawlesi wini ala den sama di be e feti anga en. Fa a du a sani ya? A tan paati a bun nyunsu winsi san sama be e du anga en. A tan soi den baala anga sisa taki a lobi den tu, winsi fa son wan fu den be e du hati sani anga en. Ma a moo pelensipali sani a taki Pawlesi dini Yehofa anga en hii ati te enke a dede (2 Tim. 4:8). A di a be e fitoow Yehofa anga en hii ati meke a be man du a sani ya.

15. San u mu du te sama e libi ogii anga u?

¹⁵ Den pikin a sikoo, den sama a pe yu e wooko, efuso famii e libi ogii anga i fu di yu e dini Yehofa? Wan sama aini a kemeente du wan hati sani anga i? Efu den sani ya miti i, pakisei David anga Pawlesi. Leti enke den, i poi ‘tan du bun fu wini ogii’ (Rom. 12:21). Te sama e du ogii anga i, yu á poi kii den enke fa David be kii Goliyat, ma i sa koboloiki a Beibel fu yeepi den fu kon sabi Yehofa moo bun. Te yu e du a sani ya i mu e soi lesipeki gi den, i mu e taki a wan switifasi tu. I mu e meke moiti fu du bun gi ala sama, winsi den nai libi bun anga i.​—Mat. 5:44; 1 Peit. 3:15-17.

16-17. San Pawlesi á feegete noiti?

¹⁶ Di Pawlesi be de wan yonkuman, a á be e lesipeki den bakaman fu Yesesi seefiseefi. A be e du ogii anga den (Toli 7:58; 1 Tim. 1:13). A Yesesi seefi be abi fu tapu Pawlesi fu a á du ogii anga a Kelesten kemeente moo. A hemel Yesesi be de di a taki anga Pawlesi. A meke a beendi, neen a taigi en taki efu a wani si baka, a be mu go suku yeepi a denseefi sama di a be e du ogii anga den. Pawlesi soi taki a abi sakafasi bika a go a wan bakaman fu Yesesi den be e kai Ananiyas fu a yeepi en. A man ya meke Pawlesi si baka.​—Toli 9:3-9, 17, 18.

¹⁷ Bakaten di Pawlesi toon wan Kelesten a omen gaandi a be abi aini a kemeente. Ma noiti Pawlesi feegete a sani di Yesesi be leli en di a be de a pasi e go a Damaskus. Pawlesi tan soi sakafasi, a  be e teke a yeepi di baala anga sisa be e gi en. A taki ná pikin taanga-sikin den baala anga sisa be e gi en.​—Kol. 4:10, 11.

18. Saide ai taanga son yuu fu aliki te taawan e poti wi a pasi?

¹⁸ San a toli fu Pawlesi e leli u? Di u bigin paa anga a foluku fu Yehofa, u be e suku yeepi a taawan, bika u be sabi taki a omen sani u be mu leli ete (1 Kor. 3:1, 2). Ma wi e suku yeepi a taawan ete? Kande a omen yali kaba wi e dini Yehofa. Kande wi abi ondoofeni tu. Den sani ya sa meke u fii wan fasi te taawan e poti wi a pasi, moomoo efu u de a waaleiti langa moo a sama. Ma a den baala anga sisa fu u Yehofa e koboloiki fu taanga u (Rom. 1:11, 12). Neen meke efu u wani Yehofa gi u kaakiti, u mu meke den baala anga sisa yeepi u.

19. San be yeepi Pawlesi fu du omen sani gi Yehofa?

¹⁹ Di Pawlesi toon wan Kelesten a omen sani a du gi Yehofa. San be yeepi en fu man du den sani ya? Pawlesi be leli taki a ná abi toobi pe wan sama komoto, efu a sama taanga, sowtu sikoo a sama go, efuso omen moni a abi, ma efu wan sama abi sakafasi neen ai fitoow Yehofa, a o poi du omen sani aini a olikanisâsi. Ala u sa waka a Pawlesi baka. Fu man du a sani ya u mu du dii sani. (1) U mu e fitoow Yehofa, (2) u mu waka a sama baka di be e dini Yehofa anga den hii ati, (3) u mu meke baala anga sisa yeepi u. Te wi e du den sani ya, da winsi u swaki Yehofa o gi u kaakiti.