1. San Yehofa du gi i?

FA I du toon wan Yehofa Kotoigi? A fosi sani di yeepi i, a di i yee a ‘bun nyunsu’. Kande ai mma anga i dda leli i sani fu Yehofa. Kande a wan sama a wookope, efuso sikoo peleiki gi i. Ma a kan tu taki a yu osu sama be kon peleiki gi i (Malik. 13:10). Baka di i yee a bun nyunsu, wan sama sutudeli Beibel anga i. A sutudeli di i sutudeli Beibel, yeepi i fu kon lobi Yehofa. I leli tu taki Yehofa lobi i. Fu di Yehofa tyai i kon aini a osufamii fi en, meke yu abi a okasi fu libi fu teego aini a ten di e kon (Yoh. 6:44). A nai bigi gi i taki Yehofa meke wan sama yeepi i fu kon sabi en noh? A nai bigi gi i taki a teke yu aini a osufamii fi en noh?

2. San wi o luku aini a artikel ya?

² Now di i sabi a tuu kaba, Yehofa gi yu a gaandi fu yeepi taa sama fu kon dini en tu. Kande a nai taanga gi i fu peleiki osu fu osu. Ma ai taanga gi i fu sutudeli anga sama? Efu a sani ya e taanga gi i, a artikel ya o yeepi i. Wi o luku saide u mu yeepi sama fu kon dini Yehofa. Baka dati wi o luku fa u sa du a sani ya, winsi fa a á makiliki. Meke u luku fosi saide wi á mu e peleiki gi sama namo, ma u mu leli den tu fu du san Yehofa taki.

3. Saide wi e peleiki?

³ Di Yesesi be de a goontapu, a taigi den bakaman fi en fu du tu sani. A fosi sani di a taigi den, a fu peleiki a bun nyunsu fu a Kownukondee. A soi den tu fa den mu du a  sani ya (Mat. 10:7; Luk. 8:1). A taigi den san den mu du te sama e aliki a bun nyunsu, anga san den mu du te sama á be wani aliki den (Luk. 9:2-5). A be taigi den bakaman fi en tu taki a bun nyunsu be o paati na a hii goontapu (Mat. 24:14; Toli 1:8). Yesesi be taigi den taki winsi sama á be wani aliki den, toku den be mu tan meke moiti fu leli sama san a Kownukondee fu Gadu o du.

4. Enke fa Mateyesi 28:18-20 e soi, da san u mu du boiti taki wi e peleiki?

⁴ San na a taa sani di Yesesi be taigi den bakaman fi en fu du? A be taki den mu leli sama fu du ala den sani di a be taigi den. Son sama e fende taki a den fosi Kelesten wawan Yesesi be gi a wooko fu yeepi sama fu toon en bakaman. Ma a sani ya a tuu? Nono. Yesesi taki u be o du a wooko ya ‘te enke a kaba fu a goontapu doo’. (Leisi Mateyesi 28:18-20.) A gei a moo enke 500 disipel be de na a komakandaa di Yesesi taigi den a sani ya (1 Kor. 15:6). Aini a fisyun di a be soi Yohanisi, Yesesi soi kiin taki na ala den bakaman fi en abi a wooko fu yeepi sama fu kon dini Yehofa.​—Openb. 22:17.

5. Enke fa 1 Korentesama 3:6-9 e soi, da anga san Pawlesi ageisi a peleikiwooko di wi e du?

⁵ Apostel Pawlesi be taki a yeepi di wi e yeepi sama fu kon dini Yehofa, de enke a paandi di wan sama e paandi sani. A ná paandi i mu paandi namo da a kaba. A be taigi den Kelesten fu Korente taki: ‘Mi paandi, Apolos nati . . . Wi na a goon fu Gadu di ai wooko.’ (Leisi 1 Korentesama 3:6-9.) A wi e wooko a goon fu Gadu. Wi e paandi te wi e peleiki gi sama. Wi e nati den sani di u paandi te wi e yeepi den fu du san den leli (Yoh. 4:35). Ma u sabi taki a Gadu na a sama di e meke sani goo.

6. San u mu yeepi den sutudi fu u fu du?

⁶ Wi e suku den sama ‘di ati bun fu fende a teego libi’ (Toli 13:48). Te u fende den sama ya, u mu yeepi den fu du wantu sani. (1) U mu yeepi den fu fusutan den sani di den e leli, (2) u mu yeepi den fu biibi den sani ya, anga (3) u mu yeepi den fu du san den e leli (Yoh. 17:3; Kol. 2:6, 7; 1 Tes. 2:13). Na ala sama aini a kemeente sa yeepi wan Beibelsutudi fu go a fesi. A fasi fa den e tyai denseefi, anga a fasi fa den o libi anga a sutudi, o yeepi en fu go a fesi (Yoh. 13:35). A bunbun moiti a sama di abi a sutudi seefi o abi fu meke fu yeepi en fu fika son sani di a be gwenti (2 Kor. 10:4, 5). Son leisi a omen mun ai teke fu yeepi wan sutudi fu go a fesi te enke a dopu. Ma a moiti di wi o meke anga a sama ná o de fu soso.

7. San e gi u taanga-sikin fu leli sama sani fu Yehofa winsi a á makiliki?

⁷ Saide wi e meke moiti fu yeepi sama fu kon dini Yehofa? Wan fu den sani di meke wi e peleiki, a di u lobi Yehofa. Te wi e peleiki gi sama, anga te wi e yeepi den fu toon Yesesi bakaman, wi e soi taki u lobi Gadu (1 Yoh. 5:3). A di i lobi Yehofa meke yu e go a sama osu fu peleiki gi den. A sani ya be makiliki gi i? A á be makiliki gi gaanse fu u. Kande i be e senuwe a fosi leisi di i be mu peleiki osu fu osu. Ma toku i teke deki-ati neen i go, bika i sabi taki a Yesesi gi wi a wooko ya. Kande nownow a nai taanga gi i so moo fu peleiki osu fu osu. Ma fa a de anga a sutudeli di u mu sutudeli anga sama?  Yu e feele fu sutudeli anga sama? Kande yu e senuwe pikinso. Ma efi yu akisi Yehofa fu yeepi i, da i meke moiti suku wan Beibelsutudi, Yehofa seefi o gi yu a fii fu du a wooko ya anga piisii.

8. Enke fa Malikisi 6:34 e soi, da sowtu taa sani meke u wani yeepi sama fu kon dini Yehofa?

⁸ Du fu tu sani di e meke wi e peleiki, a di u lobi taa sama. Wan leisi Yesesi anga den disipel fi en be weli fu di den be peleiki hii dei. Neen meke den go suku wan peesi fu boo pikinso. Ma di den doo ape, den si wan gaan kulu sama. Tyali fu den kisi Yesesi, neen meke a bigin ‘leli den omen sani’. (Leisi Malikisi 6:34.) Winsi fa Yesesi be weli, toku a du ala san a poi fu yeepi den sama ya. Saide? Bika a be sabi fa den be e fii. A be e si fa den be e pina fu di den á be abi howpu, neen meke a be wani yeepi den. A letiso a de anga den sama aini a ten ya tu. Den lai booko-ede. Winsi son yuu ai gei enke ala sani fu den e go bun, yu á mu meke a sani ya koli i. Bika den de enke sikapu di ná abi sikapuman. Pawlesi be taki den sama ya á sabi Gadu, neen meke den ná abi howpu (Efe. 2:12). Den sama ya de na a baala pasi di e tyai sama go dede (Mat. 7:13). Te u luku ala den wini di sama o fende te den o sabi Gadu, da a lobi di u lobi den, o meke u wani yeepi den. A moo bun fasi fu yeepi sama, a te yu e sutudeli Beibel anga den.

9. Enke fa Filipisama 2:13 e soi, da fa Yehofa sa yeepi i?

⁹ Kande yu e daaidaai fu suku wan sutudi fu di i sabi taki a wan sani di o teke omen ten fi i. Efu na a sani de e tapu i, taigi Yehofa fa yu e fii. Akisi en fu a yeepi i fu kon abi a fii fu yeepi sama fu toon en mati. (Leisi Filipisama 2:13.) Apostel Yohanisi be taki solanga den sani di wi e akisi Gadu e kai anga a wani fi en, a o piki den begi fu u (1 Yoh. 5:14, 15). Neen meke efi i nai fii fu sutudeli anga sama, i sa begi Yehofa da a o yeepi i fu kon abi a fii fu yeepi sama fu kon dini en.

10-11. San a wan sani di sa meke u si enke u ná o poi abi sutudi?

¹⁰ U sabi taki a yeepi di wi e yeepi sama fu kon dini Yehofa, a wan pelensipali wooko. Ma toku a ná ala yuu a makiliki fu du a sani ya. Wi o luku wantu sani di e meke a wooko ya moo taanga gi u, anga san u sa du efu wi abi wan fu den polobelema ya.

¹¹ Kande yu á poi du ala san i wani aini a peleikiwooko. Son peleikiman á poi komoto a osu fu di den kon gaandi, efuso fu di den siki. A wan fu den tu sani ya e meke a taanga gi i fu abi sutudi? Efu a so, da luku wan pelensipali sani di u leli di a COVID-19 siki ya paati a hii goontapu. U kon si taki i ná abi fu komoto a yu osu seefi fosi yu o man sutudeli anga wan sama. I sa du a sani ya anga telefon efuso tablet. Wan taa wini di a sani ya abi, a taki fosi a ná ala yuu den sama be e poi sutudeli a den yuu di u be e de aini a peleikiwooko. Ma nownow yu anga a sama sa sutudeli a wan yuu di bun gi en. Leti enke fa Yesesi be peleiki gi Nikodeimesi a neti, a so useefi sa luku efu u sa sutudeli na a yuu di a sama poi, winsi a neti efuso fuuku mamanten.​—Yoh. 3:1, 2.

12. Saide u sa biibi taki u poi du a wooko di wi abi fu sutudeli anga sama?

¹² Kande yu e fii enke yu á sabi fa fu sutudeli anga sama. Kande yu e si enke i mu  sabi a Beibel moo bun fosi yu o man du a sani ya. Efu a so yu e fii, da luku dii sani di o yeepi i fu biibi taki i poi sutudeli anga sama. A fosiwan, Yehofa e biibi taki i poi du a wooko ya bun (2 Kor. 3:5). Du fu tu, a Yesesi seefi di Yehofa gi ‘ala makiti a hemel anga goontapu’ gi yu a wooko fu leli taawan, bika a sabi taki i poi du en (Mat. 28:18). Du fu dii, yu abi baala anga sisa di de kabakaba fu holibaka gi i. Te Yesesi be e peleiki, a be e leli sama san en Dda be leli en. Na aseefi sani de i sa du tu (Yoh. 8:28; 12:49). I sa akisi a sama di e teke fesi na a peleikiwooko komakandaa, i sa akisi wan pionili, efuso wan peleikiman di abi ondoofeni fu yeepi i fu bigin wan Beibelsutudi. Den sa soi i tu fa fu go doo anga a sutudi. Wan taa sani di o yeepi i fu toon wan moo bun leliman, a te yu e go anga sama di abi ondoofeni a den Beibelsutudi fu den.

13. Saide u mu de kabakaba fu leli nyun sani?

¹³ Kande ai taanga gi u fu wooko anga den nyun sani di den baala meke. A fasi fa u be e sutudeli anga sama fosi kengi. A Piisii fu teego!-buku di wi e sutudeli anga sama nownow, de taa fasi enke den buku di u be abi fosi. Den paragraaf ná ipi so moo, neen meke wi abi moo ten fu taki anga a sama fu fusutan fa ai denki tuutuu. Wi e wooko anga felon, a JW Library^® efuso taa sani fu yeepi a sutudi fu fusutan den sani di ai leli moo bun. Efi yu á kaba sabi wooko anga den sani ya, i sa akisi wan sama fu yeepi i. A á makiliki fu fika a fasi fa u gwenti du sani. Ma Yehofa poi yeepi i fu du sani enke fa a wani. Taa baala anga sisa sa yeepi i tu. Te i bigin du sani enke fa den baala di e teke fesi taki, yu o moo piisii fu du a wooko ya. Wan pionili taki a ná den sutudi wawan e fende wini fu a nyun fasi fa wi e sutudeli anga sama, den peleikiman seefi e fende wini fu a sani ya.

14. San u mu holi a pakisei te wi e peleiki a peesi pe sama nai wani aliki u? Fa 1 Korentesama 3:6, 7 e gi u taanga-sikin?

¹⁴ Kande a taanga fu fende sutudi na a pisi pe yu e tan. A ná ala sama e wani aliki a bosikopu di wi e paati. Son leisi sama e ligei anga u. San o yeepi i fu tan du i wooko anga piisii te yu e peleiki a den sowtu peesi ya. I mu holi a pakisei taki sani e kengi. Son yuu sani e miti sama, di e meke den kengi a fasi fa den be e denki (Mat. 5:3). A omen sama di á be wani aliki u fosi bigin sutudeli Beibel bakaten. U sabi tu taki a Yehofa abi a wooko di wi e du (Mat. 9:38). A taki u mu e paandi, da wi e nati den sani di u paandi, ma wi á mu feegete taki neen e meke sani goo (1 Kor. 3:6, 7). Wi á mu feegete tu taki a ná te sama e aliki u fosi, da Yehofa o piisii anga u. Winsi sama nai aliki u, toku Yehofa o pai u fu di wi e du san a taki. *

15. Fa Yehofa e fii te wan sama di e sutudeli Beibel bigin du san ai leli?

¹⁵ Yehofa e piisii te den sama di kon dini en, bigin peleiki gi taawan (Odo 23:15, 16). Ai switi gi Yehofa te ai si fa wi e peleiki fayafaya aini a ten ya. Winsi fa siki seke hii goontapu aini a yali 2020, toku u sutudeli anga 7.705.765 sama. Aini a yali de, a 241.994 sama paamisi Yehofa taki den o libi enke fa a wani,  neen den dopu. Den sama ya seefi o sutudeli anga taa sama di o dopu bakaten. A so moo sama e kon dini Yehofa ala yali (Luk. 6:40). Te wi e yeepi sama fu toon Yesesi bakaman, Yehofa e piisii anga u.

16. Sowtu maiki i sa poti?

¹⁶ A yeepi di u mu yeepi sama fu kon dini Yehofa a ná wan makiliki wooko. Ma Yehofa e holibaka gi u, bika neen abi a wooko ya. Kande i sa poti en enke maiki fu abi winsi wan Beibelsutudi. Te i teke deki-ati akisi den sama di yu e miti efu den wani sutudeli, kande i dyombo fu si omen sutudi yu o fende. I sa biibi taki Yehofa o belesi a moiti di yu e meke.

17. Fa wi o fii te wi abi wan Beibelsutudi?

¹⁷ A wan gaandi wi abi fu peleiki, anga fu yeepi sama fu du san den e leli. A wooko ya e meke u piisii. Apostel Pawlesi di be yeepi omen sama aini Tesalonika fu kon dini Yehofa taki: ‘San e meke wi abi howpu, san e meke u piisii? Sowtu pai u fende di o meke u piisii te Masaa Yesesi kon? A u na a pai di u fende. Fu tuu, a wi e meke u piisii’ (1 Tes. 2:19, 20; Toli 17:1-4). A so omen sama e fii aini a ten ya tu. Wan sisa den e kai Stéphanie anga en man be abi a gaandi fu yeepi omen sama fu go a fesi te enke den dopu. A sisa ya taki: ‘Sani á de di e meke i piisii moo enke a sabi di i sabi taki i be poi yeepi wan sama fu kon dini Yehofa.’