1. San sa pasa te son sama aini a kemeente e du enke den bun moo taawan?

AINI a goontapu di wi e libi nownow, sama lobi sitee anga denseefi. Ala yuu den e wani wini, winsi den mu toto taawan puu a pasi seefi den ná abi toobi. Luku wantu fasi fa sama e du a sani ya. Wan bisnisman di wani seli moo den taa bodeleifi e du sani di e tyai takuu bakapisi gi taawan soso fu meke moo moni. Wan sama di e du sport sa gi wan taawan mankei soso fu di a wani wini. Wan pikin di e meke wan eksame e luku a pikin pampila efuso en telefon te a si taki a yefolow nai luku en. Enke Kelesten, u sabi taki den sani ya a ‘sani di a sondu sikin e du’, neen meke u nai du den (Gal. 5:19-21). Ma kande wi á sabi seefi taki a fasi fa wi e tyai useefi e meke taawan si enke wi e fii enke u bun moo den. Efu wi e tyai useefi so, taawan sa bigin du enke u tu. Neen meke u mu ondoosuku useefi luku efu u nai du sani di sa tyai sitee libi kon aini a kemeente.

2. San wi o luku aini a artikel ya?

² Aini a artikel ya, wi o luku wantu sani di sa meke u bigin sitee anga u baala efuso sisa. Wi o taki tu fu wantu sama di be e dini Yehofa a fositen di á be e sitee anga taawan. Meke u luku fosi san sa meke u bigin sitee anga taawan.

3. Sowtu sani u mu e akisi useefi?

³ Te a langa, ai de fanowdu fu sidon luku saide wi e du son sani. U sa akisi useefi taki: ‘Mi lobi maiki miseefi anga taawan aini a kemeente? A di mi wani bun moo taawan meke mi e wooko taanga aini a olikanisâsi? Efuso a di mi lobi Yehofa meke mi e wooko taanga?’ Saide a bun fu e akisi useefi den sani ya? Luku san a Wowtu fu Gadu e taki.

4. Enke fa Galasiyasama 6:3, 4 e soi, da saide wi á mu e maiki useefi anga taawan?

⁴ Beibel taki wi á mu e maiki useefi anga taawan. (Leisi Galasiyasama 6:3, 4.) Saide wi á mu du a sani ya? We, te yu e maiki iseefi anga taawan, yu o bigin fii enke i bun moo den. Ma a kan tu taki i bigin fii enke den bun moo i. Nawan fu den tu fasi fu denki ya bun (Rom. 12:3). Wan sisa den e kai Katerina, * di e tan a Giikikondee taki: ‘Mi be lobi maiki miseefi anga sama di be moin moo mi, sama di be sabi peleiki moo mi, efuso di be moo lai mati. A sani ya be e meke mi e fii enke mi á bun seefiseefi.’ U mu holi a pakisei taki a ná fu di u moin, fu di u sabi taki anga sama, efuso fu di sama lobi u, meke Yehofa hali u kon aini a olikanisâsi fi en. Yehofa teke wi aini en osufamii fu di a si taki u be de kabakaba fu libi enke fa a wani.​—Yoh. 6:44; 1 Kor. 1:26-31.

5. San a toli fu baala Hyun e leli i?

⁵ U mu akisi useefi tu taki: ‘Sama sabi mi enke wan sama di e libi bun anga ala sama, efuso mi nen e kai ala yuu te wan takitaki de aini a kemeente?’ Luku a toli fu wan baala den e kai Hyun, di e tan a Zuid-Koreya. Wan pisiten a be e fii enke son wan fu den baala di be e teke fesi be e si enke den bun moo taawan. A taki: ‘Mi be lobi kuutu den baala ya. Na ala yuu mi be e suku fowtu a den.’ San a be a bakapisi? Hyun taki: ‘A fasi fa mi be e tyai miseefi be meke paatifasi kon de aini a kemeente.’ Wantu fu den mati fi en yeepi en fu si taki a nai tyai enseefi bun. Hyun meke moiti kengi a fasi fa a be e denki, neen a kengi en manii. Nownow enseefi a wan owluman aini a kemeente. Efi i si taki i lobi taki sani di o meke den baala anga sisa aini a kemeente á libi na a wan moo, i mu meke moiti kengi a manii ya.

6. Enke fa Galasiyasama 5:26 e soi, da sowtu takuu manii e meke sama bigin sitee anga taawan?

⁶ Leisi Galasiyasama 5:26. Sowtu manii sa meke wan sama bigin sitee anga taawan? Wan fu den manii ya a heimembee. Wan sama di abi heimembee e fii enseefi, neen seefi namo ai denki. Wan taa manii di e meke sama sitee anga denseefi a dyalusu. Wan sama di e dyalusu anga taawan, e wani san a sama abi. Boiti dati, ai wani a sama lasi a sani di a abi tu. Te yu e dyalusu anga wan sama, a leti enke yu e buuse en. Nawan fu wi á wani abi den manii ya.

7. Gi wan ageisitoli di e soi saide a á bun fu abi heimembee efuso e dyalusu anga taawan.

⁷ Den bakapisi fu heimembee anga dyalusu, de enke tyobo di de aini a oli fu a masini fu wan opalani. Efu a oli tyobo, a opalani o fee wan pisiten, ma bakaten den tyobo o tapu den peipi fu a masini.  A sani ya o meke a opalani kai. A letiso wan sama di abi den manii ya o dini Yehofa wan pisiten, ma efu a á kengi en manii a o gwe fika Yehofa bakaten (Odo 16:18). Boiti dati, a sa du ogii anga taawan tu. San u mu du efu wi á wani abi den manii ya?

8. San o yeepi u fu u ná abi heimembee?

⁸ Efu wi e holi a sani di apostel Pawlesi be taki a pakisei, u ná o abi heimembee. A be taki: ‘Wi á mu e sitee anga useefi. Wi á mu e fii useefi, ma u mu abi sakafasi. U mu e si enke taawan pelensipali moo wi’ (Filip. 2:3). Efu wi e si taawan pelensipali moo wi, u ná o go e sitee anga u baala anga sisa te u si taki den poi du son sani bun moo u. Ma wi o piisii anga den, moomoo efu den e koboloiki a koni fu den fu wooko gi Yehofa. Boiti dati, efu den baala anga sisa ya e wooko anga san Pawlesi taki, da denseefi o go e poti pakisei a den sani di i poi du bun. Efu ala sama aini a kemeente e du den pisi, a hii kemeente o libi na a wan.

9. San o yeepi u fu wi á dyalusu anga taawan?

⁹ Sakafasi o yeepi u fu holi a pakisei taki sani de di wi á poi du bun enke taawan. Efu wi abi sakafasi, u ná o go e sitee anga taawan, ma wi o meke moiti fu leli wan sani fu den. Kande i sabi wan baala di e holi moin lezing. I sa akisi a baala ya fa ai seeka enseefi. Efu a wan sisa di sabi boli, i sa akisi en efu a sa soi i son sani di o yeepi i fu boli moo bun. Efi yu a wan yonkuuwan di ai taanga gi fu meke mati, i sa akisi wan sama di e meke mati gaw fa i sa du a sani ya. Efi yu e du sani na a fasi ya, i ná o go e dyalusu anga taawan. Boiti dati, yu o moo sabi du son sani.

10. San be miti Gidiyon?

¹⁰ Luku a toli fu Gidiyon. A man ya a be fu a lo fu Manase. Yehofa be yeepi Gidiyon anga den 300 man fi en fu wini wan gaan feti. Pe fu den man fu a lo fu Efrayim poolo anga en, a kwali den go kwali  anga Gidiyon, bika den be fende taki Gidiyon á go kai den na a bigin fu a feti. A sani di Gidiyon du be meke sama gafa Yehofa. Boiti dati, na a hii foluku be fende wini fu a sani ya. Ma den man fu Efrayim be e booko den ede anga fa taa sama be e si a lo fu den te, neen den á poti pakisei moo a den moo pelensipali sani.​—Kuut. 8:1.

11. Fa Gidiyon piki den man fu Efrayim?

¹¹ Gidiyon be abi sakafasi, neen meke a taigi den man fu Efrayim taki: ‘U du omen gaan sani moo mi.’ Baka dati, a kai omen sani di e soi fa Yehofa belesi den sama fu Efrayim. A fasi fa Gidiyon taki anga den, meke den ati koo (Kuut. 8:2, 3). Gidiyon be de kabakaba fu saka enseefi, neen meke toobi á be kon na a foluku fu Gadu mindii.

12. San wi e leli fu a toli fu Gidiyon anga den man fu Efrayim?

¹² San a toli ya e leli u? Te u luku a fasi fa den man fu Efrayim be tyai denseefi, da wi e leli taki wi á mu e suku fu fende gaandi te, da u nai poti pakisei a Yehofa moo. Osufamii edeman anga owluman sa leli wan sani fu Gidiyon tu. Efi i si taki wan sama ati boon fu wan sani di i du, meke moiti fu fusutan a sama. Gafa en fu den sani di a du bun. Efi i ná abi sakafasi, i ná o man du a sani ya, moomoo te wi e si kiin taki na a sama fowtu. Ma leti enke Gidiyon, u mu holi a pakisei taki a libi di wi anga u baala anga sisa mu libi na a wan, pelensipali moo a fende di u mu fende leti ala yuu.

13. San be miti Hana? San a du di a sani ya miti en?

¹³ Luku a toli fu Hana. Hana be toow anga Elkana, wan man fu a lo fu Leifi. Ma Elkana be abi wan taa uman di den be e kai Penina. Winsi fa a be moo lobi Hana toku Hana á be poi meke pikin, ma Penina be abi pikin. Na ala yuu Penina be e soso Hana, bika ‘a be wani Hana kusumi fu di a á be abi pikin’. Fa Hana be e fii? A sani ya be e du Hana ogii te da a soso kee a be e kee, ‘nyan seefi a á be e wani nyan’ (1 Sam. 1:2, 6, 7). Nawan peesi aini Beibel wi e leisi taki Hana be suku fu libi ogii anga Penina baka. Hana taigi Yehofa fa ai fii, neen a fika ala sani gi en. Beibel nai taigi wi efu Penina be kengi en manii. Ma u sabi taki baka di Hana begi Yehofa, a be kisi enseefi baka. Beibel taki: ‘I be man si neen fesi taki a á be e kusumi moo.’​—1 Sam. 1:10, 18.

14. San a toli fu Hana e leli u?

¹⁴ San a toli fu Hana e leli u? Efu wan sama wani sitee anga i, yu á mu sitee  anga en baka. Pe fi i pai ogii fu ogii, meke moiti fu libi bun anga en (Rom. 12:17-21). Winsi a á wani kengi, toku yu o go e piisii fu di i sabi taki i du san i be mu du.

15. Sowtu sani Apolos anga Pawlesi be poi du?

¹⁵ Luku a toli fu Apolos anga apostel Pawlesi. Den tu man ya be sabi a Wowtu fu Gadu bun. Den a be bun leliman tu. Boiti dati, a omen sama den tu man ya be yeepi fu toon Yesesi bakaman. Ma toku noiti den be e dyalusu anga denseefi.

16. Sama a be Apolos?

¹⁶ Apolos a be ‘wan Dyu fu Aleksandriya’. A foto ya a be wan pelensipali foto pe omen sama be e go fu teke leli. Apolos ‘a be wan bun takiman di be sabi a Wowtu fu Gadu bun’ (Toli 18:24). Di Apolos be go luku a kemeente a Korente, a omen fu den baala ape be fende taki den lobi en moo Pawlesi anga den taa baala di be e go luku den (1 Kor. 1:12, 13). A wan sani Apolos be du meke den sama ya bigin taki so? Nono. Bika bakaten Pawlesi be sende en fu go luku a kemeente a Korente baka (1 Kor. 16:12). Efu a be e du sani di be o tyai paatifasi kon aini a kemeente, Pawlesi á be o sende en go na a kemeente de moo. A sani ya e soi kiin taki Apolos be e koboloiki den koni fi en fu paati a bun nyunsu, anga fu gi den baala anga sisa taanga-sikin. Apolos be abi sakafasi tu, bika di Preskela anga Akwila ‘soi en moo fini san na a pasi fu Gadu’ a á be mandii, ma  a be wooko anga san den leli en.​—Toli 18:24-28.

17. Fa Pawlesi be soi taki a be wani a kemeente libi na a wan?

¹⁷ Apostel Pawlesi be sabi ala den bun sani di Apolos be e du. Toku Pawlesi á be e fii enke Apolos be wani teke en peesi. A á be e sitee anga en tu. Te i luku a sani di a taigi den sama fu Korente, da wi e si kiin taki Pawlesi be abi sakafasi. Bika a á be poolo anga den sama di be e taki ‘mi a fu Pawlesi’, ma a taigi den taki a Yehofa anga Yesesi den mu si enke den fesiman.​—1 Kor. 3:3-6.

18. Te i luku san sikiifi a 1 Korentesama 4:6, 7, da san wi e leli fu Apolos anga Pawlesi?

¹⁸ San wi e leli fu a toli fu Apolos anga Pawlesi? A toli ya e leli u taki winsi wi abi a gaandi fu yeepi omen sama fu kon dini Yehofa, toku wi á mu feegete taki a Yehofa e yeepi u fu du den sani ya. Ai leli u tu taki te wi abi moo faantiwowtu aini a olikanisâsi, a sani ya e gi u moo okasi fu yeepi taawan fu libi na a wan. U lobi den owluman anga den dinali di e wooko anga den leli fu Beibel fu yeepi a kemeente fu libi na a wan. Den baala ya nai suku balinen gi denseefi, ma den e meke moiti fu waka a Yesesi baka.​—Leisi 1 Korentesama 4:6, 7.

19. San ala u mu du? (Luku a faki ‘ Ná tyai sitee libi kon aini a kemeente.’)

¹⁹ Yehofa gi ala wi a koni fu man du son sani. U sa ‘koboloiki a koni ya fu dini makandaa’ (1 Peit. 4:10). Kande yu e fii enke a sani di i poi du á pelensipali. Ma den sani di ibiiwan fu u poi du, de enke den siton di wan sama e meke wan osu. Ala den siton ya de fanowdu fu opo a osu taampu. A letiso ala sama aini a kemeente pelensipali. Neen meke wi á mu e sitee anga useefi, ma meke u wooko makandaa fu a kemeente sa libi na a wan.​—Efe. 4:3.