Yehofa wani tu sama di toow anga denseefi de koloku. A wani a toowlibi fu den waka bun (Mat. 19:4-6). Efi i wani toow, pe i sa fende wan bun toowpaa? A Yehofa meke u, a sabi san u mu du efu u wani abi wan bun toowlibi. Neen meke efi i wani piisii tuutuu, i mu wooko anga den sani di a taki. Meke u luku wantu sani di u mu holi a pakisei.

A fosiwan na a sani di Beibel e taki fu wi ati. A taki: ‘A ati na a moo bidiigi sani di de. A sa koli i fu du sani di yu á be o wani du noiti. Sama poi sabi en?’ (Yel. 17:9) Te tu sama di wani toow bigin taki anga denseefi, a gawgaw den lobi fii fu den e goo. A sani ya e meke a taanga gi den fu du sani anga koni. Gaanse leisi te tu sama toow soso fu di den fii taki den lobi denseefi, sani nai waka bun bakaten (Odo 28:26). Neen meke a á be o de wan koni sani fu bigin taigi wan sama di yu á sabi bunbun taki i lobi en, efuso fu paamisi en taki yu anga en o de.

Odo 22:3 e taki: ‘Wan sama di koni e go kibii te a si taki ogii o miti en. Ma a sama di ná abi ondoofeni e waka go doo, neen meke sani o miti en.’ Sowtu sani sa miti wi a den sowtu website ya? A tyali taki a omen sama di go suku wan paa a den website ya, bigin taki anga sama di den á sabi. A baka di den kweki lobi fii gi den sama ya fosi, den kon si taki a koli a sama be e koli den. Son wan fu den sama di de a den website ya e poti taa sama nen efuso fowtow enke a den de ape. A omen sama den koli teke den moni. Son wan fu den e lei taki den a wan Yehofa Kotoigi.

Somen fu den website ya e akisi i fu sikiifi wantu sani fi iseefi, da a computer e luku taa sama di sikiifi denseefi sowtu sani, da anga den sama ya den e meke i bigin taki. Ma a ná te yu anga wan sama lobi denseefi sowtu sani, da dati wani taki yu anga en fiti fu toow. I si enke a wan koni sani fu meke wan computer di libisama meke, taigi yu anga sama i mu toow? A Yehofa na a moo bun sama di sa yeepi u fu fende wan bun toowpaa.​—Odo 1:7; 3:5-7.

Odo 14:15 e taki: ‘Wan sama di ná abi ondoofeni e biibi ala san sama e taki,  ma wan koni sama e luku bun pe ai poti en futu.’ I mu sabi wan sama bun fosi i bigin taki toow taki anga en. Ma efu a internet i miti a sama, yu á poi taki i sabi en tuutuu, winsi wi e taki omen yuu langa a telefon. A omen sama di be denki taki den lobi wan sama di den miti a internet, dyombo di den si a sama ya a fosi leisi. Den kon si taki a sama á de enke fa den be denki.

A psalm sikiifiman be taki: ‘Mi nai sidon anga sama di lobi lei. Mi nai paa anga sama di e bidiigi taawan’ (Ps. 26:4). A omen sama e si enke a wan kowownu sani fu sikiifi sani fu denseefi di á tuu te den de a den sowtu website ya. Te yu anga den e taki a internet, den ná o soi i den takuu manii fu den. Son sama e poti taki den a wan Yehofa Kotoigi. Ma i sabi efu a sama a wan dopu Kotoigi tuutuu? Winsi a dopu, i sabi efu a lobi Yehofa anga en hii ati? I sabi fa ai tyai enseefi aini a kemeente pe a de? I sabi efu a wan sama di sa de enke wan ‘takuu mati gi i’? (1 Kor. 15:33; 2 Tim. 2:20, 21) I sabi efu a wan sama di Beibel taki sa toow aini Masaa? Ala den sani ya, a sani di i mu sabi. Ma a o taanga fu sabi a piki fu den akisi ya efi yu á sabi taa Kotoigi di sabi a sama ya bun (Odo 15:22). Wan sama di lobi Yehofa anga en hii ati, ná o denki seefi fu go toow anga wan sama di nai dini Yehofa.​—2 Kor. 6:14; 1 Kor. 7:39.

Te i luku ala den sani di sa miti u te wi e suku sama fu toow a den sowtu website ya, da a be o moo bun fu luku wan taa fasi fu miti wan sama di i sa toow anga en. Pe i sa miti wan sama a wan fasi di o meke Yehofa seefi piisii? I sa miti sama a den kemeente komakandaa, den kelen komakandaa, konkelesi efuso taa peesi pe Kotoigi e kon makandaa.

Nownow a COVID-19 siki di paati a hii goontapu ya e meke wi á poi kon makandaa moo enke fa u be gwenti. Ma toku wi e kon makandaa a internet ete. A den sowtu komakandaa ya, i sa miti wan Kotoigi di á toow ete. Den lezing di ai holi anga den piki di ai gi, o yeepi i fu si efi en biibi taanga (1 Tim. 6:11, 12). Baka a komakandaa, den baala e meke pikin kambaa pe u sa taki moo bun aini pikin kulu. A den sowtu peesi ya, i sa luku fa a sama di i wani sabi moo bun e taki anga taawan, efuso fa ai tyai enseefi. A so yu o si sowtu manii a abi (1 Peit. 3:4). Te i kon sabi a sama ya moo bun, i sa luku efi yu anga en abi denseefi maiki.

Te sama di wani toow e suku wan toowpaa a wan fasi di e kai anga den leli fu Beibel, den o si taki a sani di sikiifi aini a Beibel buku Odo, a tuu. Ai taki: ‘A sama di fende wan bun uman (efuso man), fende wan bun sani. Yehofa o piisii anga en.’​—Odo 18:22.