1-2. Fa den sani di Yehofa paamisi wi a Yesaya 65:16, 17 e yeepi u fu holidoo?

‘NÁ GI ABAA!’ A dati a be a nen fu a konkelesi fu 2017. U be leli na a konkelesi ya fa u sa holidoo te tesi e miti u. Nownow a fo yali pasa kaba di u be go na a konkelesi ya. Ma toku wi abi fu tan holidoo anga pasensi aini a ogii goontapu ya.

² Sowtu polobelema miti i den ten di pasa? Wan famii efuso wan mati fi i dede? Yu abi wan siki di dataa á poi deesi? Ai taanga gi i fu du den sani di i be gwenti fu di i kon gaandi? Seke-doti efuso gaan wataa poli ala den sani fi i? Lanti e du ogii anga i fu di yu e dini Yehofa? Gaanse fu wi e fii den takuu bakapisi fu a COVID-19 siki di paati na a hii goontapu ya. Wi e angii fu a ten te Gadu o puu ala den booko-ede anga den fuka fu u. Di a ten de o doo, u ná o go e pakisei den sani di be miti u moo, bika den o toon fositen sani.​—Leisi Yesaya 65:16, 17.

3. San u mu du nownow? Saide u mu du a sani ya?

³ A libi taanga nownow. Dyonson a o moo taanga, bika moo gaan tesi o miti u (Mat. 24:21). Neen meke u mu tan meke moiti fu taanga a biibi fu u, bika na a sani ya o yeepi u fu holidoo. Saide u mu holidoo? Yesesi be taki: ‘Efu u holidoo, wi o fende libi’ (Luk. 21:19). Efu wi e poti pakisei a fa taa baala anga sisa e holidoo te tesi e miti den, a sani ya o yeepi u fu holidoo tu.

4. Saide u sa taki a Yehofa na a moo bun sama di u sa waka neen baka efu u wani holidoo?

⁴ Sama na a moo bun sama di u sa waka neen baka efu u wani holidoo? A Yehofa Gadu. Kande yu e foondoo fu sabi taki Yehofa e holidoo. Ma efi i luku a toli ya fini, yu o si  taki a wan hii pisiten kaba Yehofa e holidoo. A Didibii e tii a goontapu ya, neen meke a soso ogii e pasa. Yehofa abi a makiti fu seeka a goontapu na a yuu di a wani. Toku a á du a sani ya ete (Rom. 9:22). Ai wakiti anga pasensi te enke a dei doo di a poti fu poli Saatan anga a ogii goontapu fi en. Meke u luku neigin fasi fa Yehofa e holidoo.

5. Fa sama poli a nen fu Gadu? Fa a sani ya e meke i fii?

⁵ Sama e poli Yehofa nen. Yehofa lobi a nen fi en, a wani ala sama lesipeki en tu (Yes. 42:8). Ma a moo enke sigisi dunsu yali kaba sama e poli a nen fu Yehofa (Ps. 74:10, 18, 23). A sani ya bigin aini a dyali Eden, di Didibii (di wani taki Leiman) lei gi Gadu taki a á gi Adan anga Efa ala san den be abi fanowdu fu de koloku tuutuu (Gen. 3:1-5). Fanafu a ten de, neen sama e lei gi Yehofa taki a nai gi libisama san den abi fanowdu fu piisii tuutuu. Yesesi seefi be e booko en ede anga a poli di sama e poli a nen fi en Dda. Neen meke a leli den disipel fi en fu begi taki: ‘U Dda di de a hemel, i nen mu santa.’​—Mat. 6:9.

6. Saide Yehofa wakiti langa so fu soi taki neen abi a leti fu tii?

⁶ A omen sama e fende taki Gadu ná abi a leti fu tii. A Yehofa wawan too abi a leti fu tii hemel anga goontapu. Neen wawan poi tii a wan fasi di o tyai wini gi ala sama (Openb. 4:11). Ma Didibii koli engel anga libisama fu denki taki Gadu ná abi a leti fu taki gi den. Ten be de fanowdu fu man sabi efu a sani di Saatan taki fu Yehofa a be tuu. Neen meke Yehofa gi libisama a okasi fu tii denseefi wan hii pisiten. Nownow ala sama poi si kiin taki te libisama e tii denseefi, noiti sani e waka bun (Yel. 10:23). Di Gadu o puu ala den ogii sama a pasi, nawan sama o poi taki a ná abi a leti fu tii, bika a omen yali kaba ai pasensi anga libisama. Ala sama o si kiin taki neen na a moo bun Tiiman di de. Den o si tu taki na a Kownukondee fi en wawan poi tyai tuutuu freide kon a goontapu.

7. Sama a wantu fu den sama di daai baka gi Yehofa? San Yehofa o du anga den sama ya?

⁷ A omen fu den pikin fu Yehofa daai baka gi en. Di Yehofa meke den engel, den á be abi sondu. Den fosi libisama di a meke, á be abi sondu tu. A di Saatan (di wani taki ‘Sitee’) koli Adan anga Efa fu taangayesi Gadu, neen den kon abi sondu. A omen engel aliki Saatan, neen den waka a Adan anga Efa baka (Yud. 6). Bakaten, den Islayelisama di Yehofa be teke enke en foluku be bigin taangayesi en, neen den go dini falisi gadu (Yes. 63:8, 10). A ná pikin hati a sani ya hati Yehofa, toku a holidoo anga pasensi. Yehofa e wakiti a yuu di a o puu den sama di e taangayesi en a pasi. Di a ten de o doo, ná pikin poolo den sama di e dini Yehofa anga den hii ati o poolo, bika sama ná o de moo di e taangayesi Gadu.

8-9. Sowtu lei Saatan e paati fu Yehofa? Fa u sa yeepi santa a nen fu Yehofa?

⁸ Den somen lei fu Didibii. Yopu a wan man di be e dini Gadu anga en hii ati. Ma Saatan be taki a fu di Yehofa be e belesi Yopu, meke a be e dini en, ma a ná fu di a be lobi Yehofa tuutuu. Ma a ná Yopu wawan a be e taki. Efi i luku en bun, da na ala den sama di e dini Yehofa Saatan be e taki (Yopu 1:8-11; 2:3-5). Te enke a dei fu tide Saatan e taki ete taki sama nai dini Gadu fu di den lobi en tuutuu (Openb. 12:10). Te u nai gwe fika Yehofa winsi sowtu tesi e miti u, da wi e soi taki Saatan  a wan leiman. Leti enke fa Yehofa be belesi Yopu di a be holidoo, a so a o belesi u tu efu wi holidoo.​—Yak. 5:11.

⁹ Saatan e koboloiki falisi keliki fu leli sama taki Yehofa a wan ogii-ati Gadu di e meke sama e pina. Fa ai du a sani ya? Te wan pikin dede, da son keliki e taigi a mma anga dda taki Gadu be abi wan engel fanowdu aini hemel, neen meke a teke a pikin fu den. Ma den sama di e dini Yehofa sabi taki a sani ya a wan gaan lei. Efu u siki wan bunbun siki, efuso wan sama fu u dede, noiti wi e taki a Gadu e du anga u. U sabi taki aini a ten di e kon siki ná o de moo. U sabi tu taki Gadu o weki ala den sama fu u di dede baka. Neen meke wi e taigi ala sama di wani aliki, den moin sani di Yehofa o du gi wi aini a ten di e kon. Te wi e du a sani ya, da Yehofa o poi piki a sama di e soso en.​—Odo 27:11.

10. San Psalm 22:23, 24 e leli u fu Yehofa?

¹⁰ Yehofa e si fa den sama di e dini en e pina. Yehofa a wan Gadu di lobi sama. Neen meke ai hati en te ai yee fa wi e kee fu di sama e du ogii anga u, fu di u siki, efuso fu di wi e meke fowtu. (Leisi Psalm 22:23, 24.) Tyali e kisi Yehofa te ai si san e miti u, neen meke a wani yeepi u. Di a yuu o doo a o puu ala den sani di e meke wi e pina. (Luku Ekisodesi 3:7, 8; Yesaya 63:9 tu.) Beibel taki Yehofa ‘o dee den wataa ain fu u, dede, tyali, kee, anga pen ná o de moo’.​—Openb. 21:4.

11. Fa Yehofa e fii te ai pakisei den mati fi en di dede?

¹¹ A omen fu den mati fu Yehofa dede. Fa Yehofa e fii te ai pakisei den sama di be e dini en a fositen? A wani si den sama ya baka (Yopu 14:15). Yehofa musu e angii fu si en mati Abalaham baka (Yak. 2:23). Efuso Mosesi di be e ‘taki fesi a fesi anga  Gadu’ (Ek. 33:11). Yehofa musu e angii fu yee den moin poku di David anga den taa psalm sikiifiman be e pee fu gafa en (Ps. 104:33). Winsi fa den mati fu Yehofa ya dede, toku a á feegete den (Yes. 49:15). Yehofa sabi ala sani fu den sama ya ete. A leti enke den de a libi ete gi en (Luk. 20:38). Di a yuu o doo Yehofa o weki ala den mati fi en ya, fu den sa dini en go doo. Efu wan sama fi i dede, da poti pakisei a den sani di Yehofa paamisi u, bika a den sani ya o toosutu i.

12. Fa Yehofa e fii te ai si fa sama e pina?

¹² A pina di ogii sama e pina taawan. Di den fosi sama aini Eden taangayesi Yehofa, a be sabi taki a goontapu be o kon ogii bunbun fasi, fosi a be o kon baka enke fa a mu de. Yehofa e buuse den somen ogii di sama e du, anga a du di den nai du sani a wan letifasi. Yehofa e booko en ede anga den sama di ná abi fa fu denseefi, den pikin di ná abi mma anga dda, den sama di siki, den sama di gaandi, den sama di swaki, anga den uman di man dede (Sak. 7:9, 10). Ai hati Yehofa te ai si fa sama e pina a foluku fi en, efuso te den e sooto den fu di den e dini en. Yehofa lobi ala den sama fi en di e holidoo aini a ogii goontapu ya.

13. Sowtu sani sama e du di Gadu e buuse? San Yehofa o du anga den sama ya?

¹³ Dei fu dei libisama e moo libi wan yayo libi. Di Yehofa meke libisama, a meke den enke fa enseefi de. Saatan e piisii te ai koli libisama fu du sani di Yehofa e buuse. Aini a ten fu Nowa, Gadu be si taki ‘sama be e du ogii moo anga moo’. Di Yehofa si den somen ogii di sama e du, a be hati en taki a meke libisama (Gen. 6:5, 6, 11). Den sama aini a ten ya betee moo den sama fu a ten fu Nowa? Nono! Saatan e poolo te ai si fa man anga uman e libi wan waka libi, fa man anga man, efuso uman anga uman e siibi anga denseefi (Efe. 4:18, 19). Ai moo switi gi Saatan baka te a si taki wan sama di e dini Yehofa, daai go du den sowtu sani ya. Di a yuu fu Yehofa o doo, a o kii ala den sama di e libi wan yayo libi.

14. San libisama e du anga den sani di Gadu meke?

¹⁴ Libisama e poli a goontapu di Gadu meke. Boiti taki libisama e libi ogii anga denseefi, den e poli a goontapu, anga den meti di Yehofa gi den fu luku (Peleik. 8:9; Gen. 1:28). Koniman di e ondoosuku sani taki efu libisama á daai wan ana anga a fasi fa den e poli a goontapu, da aini den yali di e kon, a wan sani fu wan miliyun bon, anga meti paansu ná o de moo. A sani ya e meke omen sama e booko den ede, bika den e si taki a goontapu e kaba a soso. Ma Yehofa paamisi u taki dyonson moo ‘a o kii den sama di e poli a goontapu’, da a o meke a hii goontapu toon wan paladeisi.​—Openb. 11:18; Yes. 35:1.

15-16. San e yeepi u fu holidoo leti enke Yehofa? Gi wan ageisitoli.

¹⁵ Ná pikin sani miti u Dda di de a hemel aini den dunsudunsu yali di pasa (Luku a faki ‘ Den sani di e miti Yehofa.’) Yehofa abi a makiti fu seeka ala sani a goontapu na a yuu di a wani. Ma a omen wini libisama fende fu di Yehofa abi pasensi. Meke u luku wan ageisitoli fu fusutan a sani ya moo bun. Meke u taki wan uman de anga bee, ma dataa taigi en anga en man taki a pikin di den o meke, o malengii, a ná o libi langa tu. Toku te a pikin ya meke, a mma anga a dda e piisii, winsi fa den sabi  taki a ná o makiliki fu solugu en. Fu di den lobi a pikin fu den meke den ná o abi toobi fu pina, soso fu man gi en den sani di a abi fanowdu.

¹⁶ A letiso a de anga ala den bakapikin fu Adan anga Efa. Anga sondu wi e meke kon a goontapu, toku Yehofa lobi u, ai solugu u tu (1 Yoh. 4:19). A mma anga a dda aini a ageisitoli á poi deesi a pikin fu den, ma Yehofa poi seeka u fu toon sama di ná abi sondu moo. A poti a dei kaba pe a o puu ala den sani di e fooseli libisama (Mat. 24:36). Yehofa e holidoo fu di a lobi u. Te useefi e holidoo da wi e soi taki u lobi Yehofa.

17. Fa den sani di Hebrewsama 12:2, 3 e taki fu Yesesi, e yeepi u fu holidoo?

¹⁷ A Yehofa na a moo bun sama di u sa waka neen baka, te u luku a fasi fa ai holidoo. Di Yesesi be de a goontapu, a be holidoo di sama be e kosi en, di den be e soso en, te enke den sipikii en a wan ponsu. A du a sani ya fu di a lobi u. (Leisi Hebrewsama 12:2, 3.) Na a fasi fa Yesesi be si en Dda e holidoo, yeepi en fu holidoo tu. Efu wi e poti pakisei na a fasi fa Yehofa e holidoo, a sani de o yeepi u fu waka neen baka.

18. Fa 2 Peitilisi 3:9 e yeepi u fu fusutan sowtu wini wi e fende fu di Yehofa abi pasensi?

¹⁸ Leisi 2 Peitilisi 3:9. Yehofa sabi san na a moo bun yuu fu poli a ogii goontapu ya. A di Yehofa abi pasensi, meke miliyunmiliyun sama fende a okasi fu kon dini en. Ai bigi gi ala den sama di de aini a olikanisâsi fu Yehofa nownow, taki a á poli a goontapu fosi den kon dini en. Di wi o si ala den miliyunmiliyun sama di holidoo te na a kaba, da wi o si taki a ná fu soso Yehofa pasensi so langa.

19. San ala u mu meke moiti fu du? Sowtu wini wi o fende te u du a sani ya?

¹⁹ Yehofa e leli u fa u sa holidoo anga pasensi. Winsi fa Saatan du omen sani fu meke Yehofa tyali, toku Beibel e kai Yehofa ‘a koloku Gadu’ (1 Tim. 1:11). Anga ala piisii wi e wakiti a dei di Yehofa o santa a nen fi en. A o soi taki neen wawan abi a leti fu tii, da a o puu ala den sani di e fooseli wi aini a ten ya. A sabi di u sabi taki u Dda di de a hemel e holidoo, e yeepi u fu useefi holidoo anga piisii. Beibel taki: ‘A sama di e holidoo te tesi e miti en o piisii, bika Yehofa paamisi taki a o gi den sama di tan lobi en a tuutuu libi.’​—Yak. 1:12.