1. San o pasa aini a ten di e kon? Saide we biibi a sani ya?

 TE YE luku ala den ogii di e pasa aini a goontapu nownow, kande ye akisi iseefi efu sani o go moo bun aini a ten di e kon? Den sama aini a goontapu ya e moo ogii dei fu dei. Sama e denki denseefi namo, den nai poi dwengi denseefi. Osufamii nai libi bun anga denseefi moo enke fosi. Ai taanga gi omen sama tu fu fitoow den tiiman. Ma winsi fa den sani ya e pasa, toku u sa biibi taki sani o go bun aini a ten di e kon. Bika den sani di e pasa nownow e soi taki aini den ‘lasiti dei’ we libi (2 Tim. 3:1-5). Ala sama e si kiin taki den sani di taki aini a polofeititoli ya e pasa nownow. A sani ya e soi taki Yesesi bigin tii enke Kownu fu a Kownukondee fu Gadu. Ma a omen taa polofeititoli de ete di e taki fu a Kownukondee ya. Wo luku wantu taa polofeititoli di kon tuu aini den yali di pasa. Te wo luku den polofeititoli ya, ao taanga a biibi fu u.

2. San wo luku aini a artikel ya? Saide wo luku den sani ya? (Luku a fowtow a fesise fu A Wakititolen.)

² Aini a artikel ya, wo luku (1) wan polofeititoli di e soi on ten Gadu Kownukondee bigin tii, (2) wantu polofeititoli di e soi taki Yesesi e tii enke Kownu fu a Kownukondee ya a hemel, anga (3) wantu taawan di e soi fa  den feyanti fu Gadu Kownukondee o kisi poli. Wo si tu fa den polofeititoli ya e kai pilisisi anga denseefi. A sani ya o soi u kiin aini sowtu pisiten we libi.

3. San a polofeititoli di sikiifi a Daniyeli 7:13, 14 e taki fu a Kownu fu Gadu Kownukondee?

³ A polofeititoli di sikiifi a Daniyeli 7:13, 14 e soi taki a Yesesi na a moo bun sama di be sa tii a Kownukondee fu Gadu. A tekisi e soi taki sama fu ala kondee be o ‘dini en’ anga piisii. Ai soi tu taki a be o tii fu teego. Wan taa polofeititoli aini Daniyeli e soi taki Yesesi be o toon Kownu na a kaba fu seibin ten. Ma fa wo du sabi on ten a sani ya pasa?

4. Fa Daniyeli 4:10-17 e yeepi u fu sabi on ten Yesesi toon Kownu? (Luku san a maiki e taki.)

⁴ Leisi Daniyeli 4:10-17. Den ‘seibin ten’ di kai aini a tekisi ya, a 2520 yali. A pisiten de bigin aini a yali 607 Fosi Kelestesi, di den Babilonsama poli Yelusalem. Di den du a sani ya, den puu a lasiti kownu di be e tii na a kownusutuu fu Yehofa a Yelusalem. Den seibin ten kon a wan kaba aini 1914 di Yehofa poti Yesesi, ‘a sama di abi a leti fu tii’, enke Kownu fu Gadu Kownukondee. *​—Eseik. 21:25-27.

5. Sowtu wini we fende fu a polofeititoli di e taki fu den ‘seibin ten’?

⁵ Sowtu wini we fende fu a polofeititoli ya? Efu we fusutan a polofeititoli di e taki fu den ‘seibin ten’, a sani ya o yeepi u fu biibi taki Yehofa o du den sani di a paamisi u. A Kownukondee fi en bigin tii na a ten di a be poti. A leti so den taa polofeititoli seefi o pasa na a ten di a taki tu. A dei fu Yehofa ‘naw kon lati’!​—Hab. 2:3.

6. (a) Sai soi taki Yesesi e tii enke Kownu a hemel? (b) Fa Openbaring 6:2-8 e soi taki Yesesi e tii a hemel tuu?

⁶ Fosi Yesesi go a hemel, a be taigi den bakaman fi en wantu sani di be o soi taki a bigin tii enke Kownu a hemel. A be taki kondee be o go e feti anga denseefi, angiiten be o de na ala se fu goontapu. Boiti dati, a be taki takuu siki be o de ‘a omen peesi’. A COVID-19 siki a wan fu den siki ya. Beibel taki den sani ya a den ‘maiki’ di e soi taki Yesesi e tii a hemel (Mat. 24:3, 7; Luk. 21:7, 10, 11). Moo enke 60 yali di Yesesi go a hemel, a be meke apostel Yohanisi si wan fisyun di e soi taki den sani ya be o pasa tuutuu. (Leisi Openbaring 6:2-8.) Ala den sani ya bigin pasa aini a yali 1914. Aini a yali ya Yesesi toon Kownu a hemel.

7. Saide sani kon moo ogii a goontapu di Yesesi toon Kownu?

⁷ Saide sani kon moo ogii a goontapu di Yesesi toon Kownu? Openbaring 6:2 e soi taki a fosi sani di Yesesi du di a toon Kownu, a feti a go feti. Anga sama a feti a feti ya? A feti anga Saatan anga den ogii yeye. Openbaring kapitel 12 e soi taki Saatan lasi a feti ya. Di a lasi a feti, Yesesi fiingi en anga den ogii yeye kon a goontapu. A sani ya meke Saatan ati boon te, neen a bigin du ogii anga den sama a goontapu. Fu di Saatan de a  goontapu ya, meke Beibel bali ‘heelu gi goontapu’.​—Openb. 12:7-12.

8. Sowtu wini we fende te we si fa den polofeititoli aini Beibel e kon tuu?

⁸ Sowtu wini we fende fu a polofeititoli ya? Enke faw be luku kaba, da a fasi fa sama e tyai denseefi nownow e soi kiin taki Yesesi e tii enke Kownu a hemel. Den sani ya e soi taki den sani di sikiifi aini Beibel e kon tuu. Neen meke wa mu booko wi ede te we si taki sama e moo ogii dei fu dei, bika den sani ya e soi taki Gadu Kownukondee e tii nownow (Ps. 37:1). Boiti dati, o moo Alimakedon e koosube, o moo sani o ogii a goontapu (Malik. 13:8; 2 Tim. 3:13). Ai bigi gi u taki u Dda di de a hemel e yeepi u fu fusutan saide ogii lai a goontapu so.

9. Enke fa Daniyeli 2:28, 31-35 e soi, da sowtu tiimakiti be o de na a ten di Yesesi be o toon Kownu a hemel?

⁹ Leisi Daniyeli 2:28, 31-35. We si fa a polofeititoli ya seefi e kon tuu aini a ten ya. A deen fu Nebukadnesar e soi san be o pasa na ‘a kaba fu den dei’. Dati wani taki baka te Yesesi be o bigin tii enke Kownu. A lasiti goontapu tiimakiti di kai aini Beibel be o de wan fu den feyanti fu Yesesi. A tiimakiti ya na a paata-futu fu a pobiki di meke anga ‘tokotoko anga ayee’. A tiimakiti ya e tii nownow. A bigin tii na a ten fu a Fosi Goontapu Feti di Ameekankondee anga Ingiisikondee bigin wooko makandaa. A pobiki aini a deen fu Nebukadnesar e soi taki, tu sani be o de  di be o meke a goontapu makiti ya á de enke den taawan di be waka neen fesi.

10. (a) San Daniyeli be taki fu Ingiisikondee anga Ameekankondee? Fa we si a sani de aini a ten ya? (b) Anga san u mu luku bun? (Luku a faki di den e kai ‘ Ná go aini a kulu fu den sama di de enke a tokotoko’.)

¹⁰ A fosi sani di a polofeititoli e soi, a taki a tiimakiti ya á meke anga taanga sani enke solufu efuso gowtu, ma a meke anga ayee mokisa anga tokotoko. A tokotoko na ala sowtu sama a goontapu (Dan. 2:43). Den sama ya e sitemu, den e feti gi a leti fu den. Boiti dati, den e go waka a sitaati te sani nai go enke fa den wani. A sani ya e meke a taanga gi a tiimakiti fu Ingiisikondee anga Ameekankondee fu du sani enke fa den wani.

11. Saide u sa biibi taki aini den lasiti dei u de nownow?

¹¹ Du fu tu sani di a polofeititoli e soi, a taki a tiimakiti fu Ingiisikondee anga Ameekankondee na a lasiti goontapu makiti. Nawan taa tiimakiti o tii neen baka, bika a Kownukondee fu Gadu o poli en anga ala den taa tiimakiti di de a goontapu na a feti fu Alimakedon. *​—Openb. 16:13, 14, 16; 19:19, 20.

12. Sowtu taa sani aini a polofeititoli fu Daniyeli e soi taki a kaba koosube?

¹² Sowtu wini we fende fu a polofeititoli fu Daniyeli? A polofeititoli ya e soi u wantu taa sani di e yeepi u fu biibi taki a kaba de koosube. Wan sani fu 2500 yali pasa, Daniyeli be taki fu fo tiimakiti di be o tii goontapu. Den tiimakiti ya be o libi ogii anga foluku fu Gadu. Boiti dati, a be taki a lasitiwan fu den tiimakiti ya be o tii na aseefi ten di Yesesi be o tii enke Kownu a hemel. A tiimakiti ya a Ingiisikondee anga Ameekankondee. A sani ya e soi taki dyonson a Kownukondee fu Gadu o poli ala den tiimakiti a goontapu, da en wawan o tii. A sani ya e toosutu u, ai gi u howpu tu.​—Dan. 2:44.

13. San na a ‘du fu aitin kownu’ di kai a Openbaring 17:9-12? San a den ‘tin kownu’? Fa a polofeititoli ya kon tuu?

¹³ Leisi Openbaring 17:9-12. Baka a Fosi Goontapu Feti wan taa polofeititoli kon tuu. Ná pikin ogii pasa na a ten fu a feti ya. Di den tiiman si so, den be wani tyai freide kon a goontapu, neen meke aini yanuari 1920 den opo wan olikanisâsi den e kai a Volkenbond. Aini oktober 1945 den opo wan taawan den e kai a Verenigde Naties. Neen teke a peesi fu a Volkenbond. Beibel e kai a olikanisâsi ya a ‘du fu aitin kownu’. Ma a olikanisâsi ya a ná wan goontapu tiimakiti. A den kondee di e holibaka gi en meke a abi makiti. Beibel e kai den tiiman di e holibaka gi a olikanisâsi ya ‘tin kownu’.

14-15. (a) San Openbaring 17:3-5 e taki fu ‘a Gaan Babilon’? (b) San son sama di be e go a keliki e du nownow?

¹⁴ Leisi Openbaring 17:3-5. Yehofa be meke apostel Yohanisi si wan fisyun fu wan hulu-uman den e kai ‘a Gaan Babilon’. A hulu-uman ya, na ala den falisi keliki a goontapu. Fa a polofeititoli ya kon tuu? A omen yali kaba falisi keliki e wooko makandaa anga den tiiman fu a goontapu ya. Den e du sani fu soi taki den e holibaka gi den tu. Ma dyonson Yehofa o meke den tiiman ya du ‘san a abi a pakisei’. Den ‘tin kownu’ o  daai baka gi den falisi keliki, da den o poli den.​—Openb. 17:1, 2, 16, 17.

¹⁵ Faw du sabi taki den tiiman o poli a Gaan Babilon dyonson? Efu u wani sabi a piki fu a akisi ya, u mu pakisei a foto Babilon fu fositen. A Eufraat Liba be lontu a foto ya, neen meke taa kondee á be poi kon feti anga en makiliki. Openbaring e maiki den miliyunmiliyun sama di e holibaka gi a Gaan Babilon anga ‘wan liba’ di e kibii en (Openb. 17:15). Ma Openbaring e soi tu taki a liba ya ‘o dee’. A sani ya e soi taki omen sama be o daai baka gi ‘a Gaan Babilon’ (Openb. 16:12). A polofeititoli ya e kon tuu aini a ten ya, bika a omen sama nai go a keliki moo. Den e suku taa fasi fu losi den polobelema fu den.

16. Sowtu wini we fende fu a polofeititoli di e taki fu a Verenigde Naties anga a wan di e taki fu a Gaan Babilon?

¹⁶ Sowtu wini we fende fu den polofeititoli ya? Enke faw si kaba, da den tiiman opo a Verenigde Naties. Boiti dati, a omen sama nai go a keliki moo aini a ten ya. Den sani ya e soi u kiin taki a  kaba de koosube. Ma winsi fa a liba di e kibii a Gaan Babilon e dee, toku a ná a sani ya o meke falisi keliki á de moo. A Yehofa o meke ‘den tin kownu’ du ‘san a abi a pakisei’. Den ‘tin kownu’ a den tiiman di e holibaka gi a Verenigde Naties. Den tiiman ya o poli a Gaan Babilon wanboowanboo. A sani ya o dyombo sama a hii goontapu * (Openb. 18:8-10). Te a Gaan Babilon o poli, den sama fu a goontapu o buuya. A libi o taanga gi omen sama a ten de tu. Ma a foluku fu Gadu o piisii, bika a Gaan Babilon a wan fu den feyanti fu Gadu. Den o piisii tu bika a yuu o doo gi Yehofa fu fii a foluku fi en!​—Luk. 21:28.

17-18. (a) Faw sa taanga a biibi fu u? (b) San wo luku aini a taa artikel?

¹⁷ Daniyeli be taki sama be o kon sabi ‘omen tuu toli’. Sani pasa pilisisi enke fa Daniyeli be taki. Aini a ten ya, we fusutan den polofeititoli di e taki fu a ten fu u moo bun (Dan. 12:4, 9, 10). Sani e pasa pilisisi enke fa den polofeititoli ya e taki. A sani ya e meke u moo fitoow Yehofa. We moo biibi tu taki Beibel na a Wowtu fi en tuu (Yes. 46:10; 55:11). Neen meke u mu tan sutudeli Beibel anga u hii ati. U mu yeepi taa sama fu kon leli sabi Yehofa tu. Bika Yehofa o kibii den sama di e fitoow en. Ao meke ‘sani waka bun anga den ala yuu’. ​—Yes. 26:3.

¹⁸ Aini a taa artikel, wo luku wantu polofeititoli di e taki fu a Kelesten kemeente aini a ten ya. Wo si taki den polofeititoli ya seefi e taki fu den lasiti dei. Wo si tu taki a Yesesi, a Kownu fu u, e tii den bakaman fi en aini a ten ya.