1. San Yehofa wani u du aini a ten ya?

 AINI a ten ya Gadu wani u paati a bun nyunsu fu a Kownukondee gi ala sama a goontapu (Malik. 13:10; 1 Tim. 2:3, 4). A Yehofa abi a wooko ya. A wooko ya pelensipali gi en te, neen a poti en manpikin Yesesi fu tii a wooko ya. U sa biibi taki fosi a kaba doo Yesesi o seeka sani fu du a wooko ya leti enke fa Yehofa abi a pakisei.​—Mat. 24:14.

2. San wo luku aini a artikel ya?

² Aini a artikel ya, wo si taki Yesesi poti ‘a koni saafu di u sa fitoow’ fu gi u den leli di wi abi fanowdu. A poti den tu fu seeka a peleikiwooko di e du a hii goontapu (Mat. 24:45). Boiti dati, wo si faw sa holibaka gi Yesesi anga den baala ya.

3. Sowtu makiti Yehofa gi Yesesi?

³ A Yesesi e tii a peleikiwooko. Faw du sabi a sani ya? Fosi Yesesi go a hemel a komakandaa anga den bakaman fi en a wan mongo a Galileya. A taigi den taki: ‘Mi fende ala makiti a hemel anga goontapu.’ Baka dati a taki: ‘Go a sama fu ala kondee, da u meke den toon mi bakaman’ (Mat. 28:18, 19). A sani ya e soi taki di Yehofa gi Yesesi makiti, a poti en fu teke fesi aini a peleikiwooko tu.

4. Faw du sabi taki a Yesesi e tii a peleikiwooko aini a ten ya?

⁴ Yesesi be taki den bakaman fi en be o peleiki gi sama fu ‘ala kondee’. A be taigi den tu taki ‘ao de anga den te  enke a kaba fu a goontapu doo’ (Mat. 28:20). A sani ya e soi taki Yesesi e teke fesi na a peleikiwooko di e du aini a ten ya tu.

5. Fa we yeepi fu meke a polofeititoli di sikiifi a Psalm 110:3 kon tuu?

⁵ Yesesi á be e si enke sama á be o de sai fu du a peleikiwooko na a ten fu a kaba. A be sabi taki a polofeititoli di a Psalm sikiifiman be taki be o kon tuu: ‘Di a dei o doo fu den suudati fii go a feti, a foluku fii o de kabakaba fu go’ (Ps. 110:3). Efu ye du a peleikiwooko da ye holibaka gi Yesesi anga a koni saafu di u sa fitoow. Ye yeepi fu meke a polofeititoli di a Psalm sikiifiman be taki kon tuu. Ma toku a ná ala yuu a makiliki fu du a peleikiwooko.

6. San a wantu sani di e miti u te we du a peleikiwooko?

⁶ Wan fu den sani di e meke a peleikiwooko taanga gi u, a te sama e libi ogii anga u. Son sama di komoto a waaleiti, keliki fesiman anga politikiman e taigi sama omen ogii fu u. Son yuu den mati anga den famii fu we biibi den lei ya. Neen meke den e wani dwengi u fu tapu anga a dini di we dini Yehofa. Den e wani u tapu anga a peleikiwooko tu. Aini son kondee den e taigi u taki efu wa tapu anga a peleikiwooko den o du ogii anga u. Son yuu den e fon den baala anga sisa te den á wani tapu anga a peleikiwooko. Den e sooto den tu. Ma den sani ya nai foondoo u, bika Yesesi be taki: ‘Sama o buuse u na ala kondee fu mi ede’ (Mat. 24:9). A fasi fa sama e libi anga u, e soi u kiin taki Yehofa e piisii anga u (Mat. 5:11, 12). A Didibii e meke sama e libi so anga u. Ma Yesesi abi makiti moo en. A fu di Yesesi e holibaka gi u meke u poi peleiki gi sama na ala kondee. Saide u sa taki a sani ya?

7. Sai soi taki a polofeititoli di sikiifi a Openbaring 14:6, 7 e kon tuu?

⁷ Wan taa sani di e meke a ná ala yuu a makiliki gi u fu du a peleikiwooko, a den tongo di sama e taki. A ná ala we taki aseefi tongo. Aini a fisyun di Yesesi be soi apostel Yohanisi, a be taki ala sama be o yee a bun nyunsu winsi sowtu tongo den e taki. (Leisi Openbaring 14:6, 7.) Fa a sani ya be o pasa? We du ala san u poi fu paati a bun nyunsu gi ala sama aini ala sowtu tongo. Aini a ten ya, sama sa leisi Beibel a jw.org aini moo enke 1000 tongo. Boiti dati, den baala di e tii a wooko a hii goontapu, gi piimisi fu meke a I sa piisii fu teego! buku aini moo enke 700 tongo! Anga a buku ya we sutudeli anga sama nownow. Den baala e meke felon fu yeepi dofusama fu kon sabi a Wowtu fu Gadu. Den e meke buku gi sama di beendi tu. A sani ya e meke we si fa den polofeititoli di sikiifi aini Beibel e kon tuu. Beibel taki sama fu ala nasi be o ‘leli taki a soifili tongo’. Dati wani taki den be o kon sabi den tuu leli fu Beibel (Sak. 8:23; Sef. 3:9). A fu di Yesesi e tii a peleikiwooko meke u poi du ala den sani ya.

8. Sowtu wini sama e fende fu a peleikiwooko?

⁸ Aini a ten ya, a moo enke aitin miliyun sama fu 240 kondee de aini a olikanisâsi fu Yehofa. Boiti dati, ala yali a omen dunsu sama e paamisi Yehofa taki den o libi enke fa a wani da den dopu. A moo pelensipali sani a taki den Kelesten ya e ‘meke moiti fu toon nyun sama’. Den e meke moiti fu kon abi denseefi  manii di Gadu abi (Kol. 3:8-10). Fosi den kon dini Yehofa, son wan fu den sama ya be e libi wan hululibi. Taawan be e feti anga sama. Son wan fu den be e paati bee tu. Ma fu di den sama ya kengi a fasi fa den be e libi, meke a polofeititoli di sikiifi a Yesaya 2:4 kon tuu. Ai taki: ‘Den naw leli feti moo.’ Te we meke moiti fu kengi a fasi faw be de fosi anga te we yeepi sama fu kon aini olikanisâsi fu Yehofa, we soi taki we du san Yesesi a fesiman fu u taki (Yoh. 13:35; 1 Peit. 2:12). Den sani ya nai pasa sosokaali, ma a fu di Yesesi e yeepi u meke u poi du den sani ya.

9. Enke fa Mateyesi 24:45-47 e soi, da san Yesesi be taki o pasa na a ten fu a kaba?

⁹ Leisi Mateyesi 24:45-47. Yesesi be taki na a pisiten fu a kaba, a be o poti a ‘koni saafu di u sa fitoow’ fu gi u den leli di wi abi fanowdu. Aini a ten ya, we si fa a saafu ya e wooko taanga. Den baala ya a wan pikin kulu salufu Kelesten di Yesesi poti fu gi u ‘leli na a ten di wi abi en fanowdu’. Den e yeepi sama di wani kon sabi a waaleiti tu. Den baala ya nai si enke den a basi fu den taa baala anga sisa (2 Kor. 1:24). Ma den e fusutan taki a Yesesi na a ‘fesiman’ fu a foluku fu Gadu.​—Yes. 55:4.

10. Sowtu wan fu den buku na a fowtow yeepi i fu bigin waka a pasi di e tyai sama go a teego libi?

¹⁰ Fanafu 1919, ná pikin buku a koni saafu meke fu yeepi sama fu kon sabi Yehofa. Aini a yali 1921, den baala meke a buku di den e kai ‘A harpu fu Gadu’ aini Ingiisitongo. A buku ya be meke fu yeepi sama fu kon sabi den moo pelensipali leli fu Beibel. Bakaten a omen taa buku den baala ya meke fu yeepi sama.  Sowtu wan fu den buku ya i sutudeli fu kon sabi Yehofa? A be a buku di den e kai ‘Gadu e taki a tuu’ di de aini Bakaatongo, ‘A tuu di o meke i fende teego libi’ di de aini Bakaatongo, ‘Joe kan libi foe têgo na ini wan paradijs na grontapoe’, ‘Sabi di e tjari joe go na têgo libi’, ‘San Bijbel e leri wi trutru?’ efuso a ‘San Bijbel kan leri yu?’ Ma kande aini a I sa piisii fu teego! buku i sutudeli te enke i dopu. Den baala meke den buku ya fu yeepi sama fu kon sabi a waaleiti. Den buku ya a pilisisi san u be abi fanowdu a ten di den meke den.

11. Saide ala wi abi den leli fu Beibel fanowdu?

¹¹ A ná den sama di wani kon sabi Yehofa wawan mu meke moiti fu fusutan a Beibel. Ma useefi mu meke moiti fu fusutan en moo bun tu. Apostel Pawlesi be taki: ‘Taanga nyanyan a fu gaansama.’ Baka dati a taki efu we meke moiti fu fusutan den leli fu Beibel, a sani ya o yeepi u fu ‘sabi san bun anga san á bun’ (Heb. 5:14). Fu di we libi aini wan ogii goontapu meke a ná ala yuu ai makiliki fu du sani enke fa Yehofa wani. Fu di Yesesi sabi a sani ya meke a poti a koni saafu di u sa fitoow fu gi u den leli di wi abi fanowdu fu taanga u biibi. Na a wowtu fu Gadu den baala ya e koboloiki fu gi u den leli ya. A Yesesi e holibaka gi a wooko di den baala ya e du.

12. Fa we soi taki we gi a nen fu Yehofa gaandi leti enke Yesesi?

¹² Leti enke fa Yesesi be gi a nen fi en Dda gaandi, a so useefi e gi a nen fu Yehofa gaandi tu (Yoh. 17:6, 26). Neen meke aini a yali 1931 u bigin tyai a nen Yehofa Kotoigi. A so we soi taki a nen fu Yehofa pelensipali gi u (Yes. 43:10-12). Fanafu oktober fu 1931, a koni saafu di u sa fitoow bigin poti a nen fu Yehofa a  fesise fu a Wakititolen. Di den baala poti a Beibel aini taa tongo, den poti a nen fu Yehofa baka a den peesi pe sama be puu en. A sani ya e soi taki wi anga den keliki a ná aseefi.

13. Sai yeepi i fu biibi taki a Yesesi e tii a ‘koni saafu di u sa fitoow’? (Yoh. 6:68)

¹³ Yesesi abi wan olikanisâsi a goontapu ya di e yeepi u fu dini Yehofa enke fa a wani. Na a ‘koni saafu di u sa fitoow’ a poti fu teke fesi aini a olikanisâsi ya. Fa ye fii taki i de aini a olikanisâsi ya? Kande ye fii leti enke fa apostel Peitilisi be e fii, di a be taigi Yesesi taki: ‘Masaa sama wo go? Yu abi wowtu di e meke sama libi fu teego’ (Yoh. 6:68). Fai denki a libi fii be o de efi ya be de aini a olikanisâsi fu Yehofa? Yesesi e koboloiki a olikanisâsi ya fu gi u den leli di wi abi fanowdu fu u sa tan dini Yehofa. Ai yeepi u tu fu du a peleikiwooko moo bun. Boiti dati, ai yeepi u fu ‘kengi u manii’ fu Yehofa sa piisii anga u.​—Efe. 4:24.

14. Sowtu wini i fende fu a olikanisâsi fu Yehofa di a COVID-19 siki paati a hii goontapu?

¹⁴ Te sani nai waka bun a goontapu, Yesesi e leli u fu du sani anga koni. Di a COVID-19 siki paati a hii goontapu, u si sowtu wini we fende te we du den sani di Yesesi e taigi u. A omen sama á be sabi san fu du. Ma den sama di e dini Yehofa á buuya, bika Yesesi leli u san u mu du fu kibii useefi fu a siki ya á du ogii anga u. Den baala be e gi u taanga-sikin fu wei sani tapu u nosu anga u mofu. Den be e gi u taanga-sikin fu wa go koosube a sama tumisi tu. Den baala di e tii a wooko be gi den owluman taanga-sikin fu poti pakisei a den baala anga  sisa aini a kemeente. Den be mu gi den taanga-sikin tu (Yes. 32:1, 2). Boiti dati, den baala di e tii a wooko a hii goontapu e meke felon fu gi u taanga-sikin. Den e soi wi aini den felon ya faw mu du sani tu.

15. Fa den baala seeka sani gi den komakandaa anga a peleikiwooko di a COVID-19 siki paati a hii goontapu? Sowtu wini u fende fu a sani ya?

¹⁵ Di a siki ya paati na a hii goontapu, den baala ya taigi u faw mu holi komakandaa anga faw mu du a peleikiwooko. Den baala be seeka sani gawgaw fu holi komakandaa, kelen komakandaa anga konkelesi anga telefon. U bigin du a peleikiwooko anga telefon. U be e sikiifi biifi gi sama tu. Ná pikin belesi Yehofa belesi a moiti fu u. A omen beikantoo be kon si taki den abi moo peleikiman. A omen baala anga sisa fende wini di den wooko anga den sani di den baala taigi u.​—Luku a faki di den e kai ‘ Yehofa e belesi a peleikiwooko’.

16. San u sa biibi?

¹⁶ Son sama be e si enke den baala di e tii a wooko a hii goontapu be e kenisi tumisi di a COVID-19 siki paati a hii goontapu. Ma a omen leisi u si fa den sani di den baala ya taigi u tyai wini gi u (Mat. 11:19). Boiti dati, te we luku a fasi fa Yesesi e tii a foluku fu Yehofa aini a ten ya, a sani ya e yeepi u fu fitoow en. Ai yeepi u tu fu biibi taki winsi san o miti wi aini a ten di e kon Yehofa anga en Manpikin o kibii u.​—Leisi Hebrewsama 13:5, 6.

17. Saide ai bigi gii taki a Yesesi na a fesiman fu u?

¹⁷ Ai bigi gi u taki a Yesesi e tii u. U de aini wan olikanisâsi pe sama e taki ala sowtu tongo. We libi na a wan, winsi fa wa ná fu aseefi nasi. We fende leli di e yeepi u fu taanga u biibi. We leli faw mu du a peleikiwooko moo bun tu. Boiti dati, den leli ya e yeepi u fu kon abi den manii di Gadu lobi. Den e yeepi u fu lobi useefi tu. Ala den sani ya e soi taki u sa gafa Yesesi, a fesiman fu u.