1. Faw mu si a begi di u poi begi Yehofa?

 A SAMA di meke hemel anga goontapu gii wan moin gaandi. A gii a gaandi fu begi en. Pakisei a sani ya: I sa taigi Yehofa ala san de a yu ati. I sa taki anga en on ten i wani. Winsi sowtu tongo ye taki, Yehofa e fusutan i. Aa de fii meke mofu anga en taki yo go taki anga en. Efu na a ati osu i de efuso sitaafu-osu, i sa biibi taki i dda di de a hemel o aliki i. Ai bigi gi u te ye, taki Yehofa gi wi a kado ya.

2. Fa David soi taki a be e teke en fu bigi taki a be poi begi Yehofa?

² Kownu David be e si en enke wan gaandi fu taki anga Yehofa. Neen meke a be singi gi Yehofa taki: ‘Meke a begi fu mi de enke sumee switi ofaandi gii baa Yehofa’ (Ps. 141:1, 2). Aini a ten fu David den pilisite be e boon sumee switi ofaandi gi Yehofa. A bunbun seeka den be e seeka den ofaandi ya (Ek. 30:34, 35). Leti enke fa den be e teke ten fu seeka den ofaandi ya, a letiso David be e pakisei bun fosi san a be o taki te a be o begi Yehofa. Na aseefi sani de u wani du tu, bika u wani Yehofa aliki den begi fu u.

3. Faw mu taki anga Yehofa? Saide u mu taki anga en na a fasi ya?

³ Te we taki anga Yehofa, wa mu taki anga en enke wi anga en a supee. Ma u mu soi taki we lesipeki en. Pakisei den fisyun di Yesaya, Daniyeli, Eseikiyeli anga Yohanisi be si. Winsi fa den fisyun di den man ya si a ná aseefi, toku ala den abi wan sani di e kai anga denseefi. Ala  den e soi taki Yehofa a wan gendee Kownu. Yesaya be ‘si Yehofa sidon a wan hei kownusutuu’ (Yes. 6:1-3). Eseikiyeli seefi be si Yehofa sidon a wan kownusutuu. Wan moin sani di be e gei mutyama efuso alenbo be lontu en (Eseik. 1:26-28). Daniyeli be kai Yehofa ‘a Gaandiwan fu Senten’. Aini a fisyun a be si a wei wan weti koosi. A be sidon a wan kownusutuu. Faya be e komoto na a kownusutuu ya (Dan. 7:9, 10). Yohanisi seefi be si Yehofa sidon a wan kownu sutuu. Wan mutyama di be gei smaragd-siton be lontu a kownusutuu ya (Openb. 4:2-4). Den sani ya e soi taki ná pikin makiti Yehofa abi. Neen meke a wan gaandi wi abi fu taki anga en. Ai soi tu taki u mu e taki anga en a wan lesipeki fasi. Ma san u mu taki te we begi?

4. San we leli fu den fosi sani di Yesesi be taki di a be leli den bakaman fi en fu begi aini Mateyesi 6:9, 10?

⁴ Leisi Mateyesi 6:9, 10. Aini a lezing di Yesesi be holi na a mongo, a be leli den disipel fu en fa den mu begi fu meke Yehofa piisii. Aini a begi fu Yesesi a kai den moo pelensipali sani fosi. A begi fu Yehofa nen sa santa. A begi fu a Kownukondee fu Gadu kon tu. Na a Kownukondee ya o kii den feyanti fu Gadu. Neen o meke u fende ala den bun sani di Yehofa abi a pakisei gi libisama tu. Te we taki fu den sani ya te we begi, we soi taki den sani di Yehofa wani pelensipali gi u.

5. A fowtu fu akisi Yehofa den sani di wi abi fanowdu?

⁵ Den taa sani di Yesesi taki aini a begi e soi taki aa fowtu fu akisi Yehofa den sani di wi abi fanowdu. U sa akisi Yehofa fu a yeepi u fu fende sani fu nyan. U sa akisi en paadon fu den fowtu di u meke. U sa akisi en tu fa yeepi u fu tesi á miti u. Boiti dati, u sa akisi en fu a kibii u fu Saatan á du ogii anga u (Mat. 6:11-13). Te we akisi Yehofa den sani ya, we soi en taki wi abi en fanowdu. We soi tu taki u wani a piisii anga u.

6. Fa u du sabi taki a ná den sani di Yesesi be leli bakaman fi en namo u sa begi Yehofa?

 ⁶ Di Yesesi be leli den bakaman fi en fu begi, aa be wani den leli a begi ya a ede. Den taa leisi di Yesesi be e begi a be e taki fu taa sani di be e gi en booko-ede (Mat. 26:39, 42; Yoh. 17:1-26). A letiso useefi sa begi fu den sani di e gi u booko-ede tu. Te u mu teke wan bosoloiti u sa akisi Yehofa fa yeepi fu du sani anga koni (Ps. 119:33, 34). Efu u fende wan wooko di e taanga gi u fu du, u sa akisi Yehofa fu a yeepi u fu sabi fa fu du en (Odo 2:6). Mma anga dda sa begi gi den pikin fu den. Pikin sa begi gi den mma anga dda tu. Boiti dati, ala u sa begi gi den sutudi fu u. U sa begi gi den sama di we peleiki gi tu. Ma te we begi, wa mu e akisi Yehofa sani namo.

7. Saide u mu gafa Yehofa te we begi?

⁷ Te we begi, wa mu feegete fu gafa Yehofa. Neen na a sama di fiti fu u gafa. Bika ‘a bun, a de kabakaba fu gi sama paadon. Ai soi sama bun-ati pasa maiki, en ati nai boon gaw’ (Ps. 86:5, 15). Den sani di Yehofa e du e soi taki ala yuu u sa gafa en.

8. Fu san u sa gi Yehofa daa te we begi? (Psalm 104:12-15, 24)

⁸ Boiti taki u mu gafa Yehofa te we begi, u mu e gi en daa tu fu den sani di ai du gi u. U sa gi en daa fu den moin kololu, den moin boomiki anga den switi nyanyan di we nyan. U sa gi en daa tu fu den bun mati di wi abi. A di Yehofa lobi u meke a gi u ala den sani ya. (Leisi Psalm 104:12-15, 24.) Ma u mu e gi Yehofa daa fu den leli di ai gi u tu. Bika a sani ya na a moo pelensipali sani di ai du gi u. Boiti dati, u mu e gi en daa fu den sani di a paamisi wi aini a ten di e kon.

9. San sa yeepi u fu wa feegete fu gi Yehofa daa? (1 Tesalonikasama 5:17, 18)

⁹ Son yuu we feegete fu gi Yehofa daa fu den sani di ai du gi u. San sa yeepi u fu wa feegete? I sa sikiifi den sani di i  akisi Yehofa a pampila. I mu e luku a pampila ya ala yuu, da yo si fa Yehofa piki den begi fii. Te i si taki a piki wan fu den begi fii, gi en daa. (Leisi 1 Tesalonikasama 5:17, 18.) Pakisei fa ye fii te taawan e gii daa. Ye piisii taki a sama teke a sani di i du gi en fu bigi. A letiso a de anga Yehofa tu. Te u nai feegete fu gi en daa, ai piisii (Kol. 3:15). Ma ete wan taa pelensipali sani de di u mu gi Yehofa daa fi en.

10. Enke fa 1 Peitilisi 2:21 e soi, da saide u mu e gi Yehofa daa taki a sende Yesesi kon a goontapu?

¹⁰ Leisi 1 Peitilisi 2:21. U mu e gi Yehofa daa taki a sende en Manpikin fu kon gi u leli. A omen sani we leli fu Yehofa te we luku a libi fu Yesesi. A libi fi en e soi u faw mu du sani fu meke Yehofa piisii. Efu we du sani di e soi taki we biibi taki Yesesi kon pai fu den sondu fu u, wi anga Yehofa o toon bun mati.​—Rom. 5:1.

11. Saide u mu e begi aini a nen fu Yesesi?

¹¹ Ai bigi gi u taki u sa begi Yehofa aini a nen fu Yesesi. Yehofa e meke Yesesi gi u den sani di we akisi en. Efu u wani Yehofa aliki den begi fu u, u mu begi aini a nen fu Yesesi. Yesesi be taki: ‘Winsi san wi akisi aini mi nen, mi o du en gi u. A so a Manpikin o gi a Dda gaandi.’​—Yoh 14:13, 14.

12. Saide u mu gi Yehofa daa fi en Manpikin?

¹² A fu di Yesesi kon dede gi u meke Yehofa e gi u paadon fu den sondu fu u. Beibel e soi taki Yesesi a wan ‘gaan pilisite di sidon na a leti ana fu a kownusutuu fu a moo Gaan Gadu a hemel’ (Heb. 8:1). Beibel e soi tu taki Yesesi na a sama di Yehofa poti fu yeepi u (1 Yoh. 2:1). Ai bigi gi u taki Yehofa gi u wan Gaan Pilisite di e fusutan den swakifasi fu u. Neen na a sama di e ‘taki’ anga Yehofa gi u (Rom. 8:34; Heb. 4:15). Ala wi abi sondu. Neen meke efu Yesesi á be kon dede gi u, wa be o poi begi Yehofa. Ná pikin bigi ai bigi gi u taki Yehofa sende en Manpikin kon dede gi u.

13. Fa Yesesi soi taki a lobi den bakaman fi en?

¹³ A neti fosi Yesesi dede, a begi gi den bakaman fi en. A be akisi en Dda fu ‘kibii den gi a ogiiwan’ (Yoh. 17:15). A sani ya e soi taki ná pikin lobi Yesesi lobi den bakaman fi en. Winsi fa a be sabi taki sama o pina en dyonson, toku a be e booko en ede anga den bakaman fi en.

14. Fa u sa soi taki u lobi u baala anga sisa?

¹⁴ We soi taki we waka a Yesesi baka te u nai pakisei useefi namo te we begi. Neen meke na ala yuu u mu e begi gi den baala anga sisa fu u. Te we du a sani ya, we soi taki we aliki Yesesi. Bika a be taigi u taki u mu lobi useefi. We soi Yehofa tu taki u lobi den baala anga sisa fu u (Yoh. 13:34). A begi di we begi gi den baala anga sisa fu u e yeepi den. Beibel taki: ‘Te wan sama di e libi a wan letifasi e begi anga en hii ati, Gadu e aliki a begi fi en.’​—Yak. 5:16.

15. Saide u mu e begi gi den baala anga sisa fu u?

¹⁵ A omen sani e miti den baala anga  sisa fu u, neen meke u mu e begi gi den. U sa akisi Yehofa fu yeepi den fu holidoo te den siki, te gaan ogii pasa na a pisi pe den e tan, te feti booko a pe den e tan, efuso te sama e libi ogii anga den. U sa begi gi den baala anga sisa tu di e go yeepi den baala anga sisa di de a nowtu. Efii sabi wan sama di de a nowtu i sa kai en nen te ye begi. Te we begi Yehofa fu yeepi den baala anga sisa fu u te den de a nowtu, we soi taki u lobi den.

16. Saide u mu begi gi den baala di e teke fesi?

¹⁶ Den baala di e teke fesi aini a kemeente e teke en fu bigi te we begi gi den, bika den begi ya e yeepi den. Apostel Pawlesi seefi be e teke a sani ya fu bigi. A be taki: ‘I mu begi gi mi taki te mi opo mi mofu, mi á mu feele fu taki fu den santa kibii toli di abi fu du anga a bun nyunsu’ (Efe. 6:19). Aini a ten ya den baala di e teke fesi e wooko taanga tu. We soi taki u lobi den baala ya te we akisi Yehofa fu belesi a wooko di den e du.

17-18. On ten i sa begi gi taawan? Sai mu holi a pakisei te ye du a sani ya?

¹⁷ Son yuu kande taawan e akisi i fu begi gi den. Wan sisa sa akisi wan taa sisa di tyai en go a wan sutudi fu begi gi den. Ma a sisa di tyai a taawan go na a sutudi, á kaba sabi a sutudi bun. Neen meke a be o moo bun fu akisi en fu tapu anga begi. A sani ya o yeepi en fu sabi san a mu taki te ai begi.

¹⁸ Son baala e fende a gaandi fu begi a komakandaa efuso fu begi a wan peleikiwooko komakandaa. Wan baala di fende a gaandi ya, mu holi a pakisei san wo leli a komakandaa a dei de. Te ai begi, aa mu si en enke wan okasi fu poti sama a pasi aini a begi. A ná aini a begi a mu taigi a kemeente san a den sani di den baala wani u sabi tu. Den baala mu holi a pakisei taki te wo singi anga begi, ala den tu sani ya mu kaba aini feifi miniti. Neen meke te den e begi den á mu begi langa, moomoo na a bigin fu a komakandaa.​—Mat. 6:7.

19. San o yeepi u fu de seekaseeka te a dei fu Gadu doo?

¹⁹ U mu soi taki we si begi enke wan pelensipali sani aini u libi, bika a dei fu Yehofa e koosube namo. Yesesi be taki: ‘U mu de na ain, da we begi naamo fu u sa pasa ala den sani ya di de fu pasa’ (Luk. 21:36). Efu we begi ala yuu, u biibi o taanga. Wo de seekaseeka di a dei fu Gadu o doo tu.

20. Fa den begi fu u sa de enke sumee switi ofaandi gi Yehofa?

²⁰ San u leli aini a artikel ya? U si taki a taki di u poi taki anga Yehofa, a wan gaandi. A moo pelensipali sani di u mu akisi te we begi, a fu sani waka enke fa Yehofa abi a pakisei. Wa mu feegete fu gi Yehofa daa fu en Manpikin. Wa mu feegete fu gi en daa fu a Kownukondee fi en tu. U mu e begi gi den baala anga sisa fu u. U sa akisi Yehofa fu a gi u den sani di wi abi fanowdu. U sa akisi en fu a yeepi u fu u biibi kon moo taanga tu. Te we pakisei bun san wo taki aini den begi fu u, we soi taki we teke en fu bigi taki u sa taki anga Yehofa. Den sani di wo taki o de enke sumee switi ofaandi gi en. ‘Den o meke a piisii.’​—Odo 15:8.