Mi meke aini 1935 aini Darlaston, wan foto aini Ingiisikondee. Den bodeleifi di be de na a pisi kondee ya, be e puu somoko go a tapu te da a peesi be e dunguu pii. Neen meke sama be e kai a foto ya a Baaka Kondee. Di mi be abi fo yali, mma anga nda bigin sutudeli Beibel anga den Yehofa Kotoigi. Di mi be abi 14 yali, mi be kon si taki u be fende a tuu biibi. Neen meke di mi be abi 16 yali, mi paamisi Yehofa taki mi o libi enke fa a wani, neen mi dopu.

Aini aseefi yali de, mi be bigin wooko aini a kantoo fu wan bodeleifi di be e meke sani fu seeka wagi. Mi be e leli fu wooko enke seketasi aini a kantoo ya. Ná pikin lobi mi be lobi a wooko ya.

A pisiten de mi be e go a wan kemeente den e kai Willenhall. Wan leisi a kelen owluman be akisi mi fu holi a buku sutudi aini a kemeente ya. Mi á be sabi san mi mu du, bika a ten de a tu peesi mi be e go a komakandaa. Te mi be mu go na a mindiiwiki komakandaa, mi be e go na a kemeente a Bromsgrove, bika a be de koosube fu mi wookope. Ma a be de wan sani fu 32 kilomeiti fu pe mi be e tan. Sataa anga sonde te mi be de a osu, mi be e go na a kemeente a Willenhall.

Mi be wani holibaka gi a olikanisâsi fu Yehofa, neen meke mi teke a faantiwowtu di a kelen owluman be gi mi. A sani ya be wani taki mi be abi fu fika a wooko fu mi, winsi fa mi be lobi en. Di mi du a sani ya, a leti enke mi be meke Yehofa tii a libi fu mi. Noiti a hati mi taki mi du a sani ya, bika a omen sani mi be poi du gi Yehofa bakaten.

Di mi be e go na a kemeente aini Bromsgrove, mi be miti wan moin sisa den e kai Anne. A sisa ya be e poti a dini di a be e dini Yehofa na a fosi peesi aini en libi. Mi anga en toow aini 1957. Ná pikin piisii Anne be e meke mi piisii, bika u be poi du omen sani gi Yehofa makandaa. U be fende a gaandi fu du a pioniliwooko, a spesuutu pioniliwooko, anga a  kelen wooko. U be fende a gaandi fu wooko a Betel tu.

Aini 1966 u be fende a gaandi fu go na a Gileyad sikoo. Disi a be du fu 42 leisi di a sikoo ya be holi. Di a sikoo kaba, den baala sende u go a Malawi. Sama e kai a kondee ya a ati fu Afiikan, bika den sama aini a kondee ya lobi sama. Den e libi switi anga sama tu. Ma wa be sabi seefi taki wa be o poi tan de langa.

U doo aini Malawi na a 1 februari 1967. Aini a fosi mun, u be e leli a tongo fu a kondee. Baka dati, u bigin du a kelen wooko. A ten de u be e lei wan sowtu hei-futu wagi. Sama be e si enke u be sa go na a ala peesi anga a wagi ya. Den be e si enke u be poi abaa liba tu. Ma a sani ya a ná be tuu. Aini pikin peti wataa namo u be poi lei pasa. Son yuu aini tasi-osu u be e tan. Te alen yuu u be e poti pela gi a osu, bika a be e leki. Winsi fa den sani ya be e miti u di u bigin du a zendeling wooko, toku u be lobi a wooko ya anga u hii ati.

Aini april fu a yali de, mi kon si taki sani á be e go bun aini Malawi. Hastings Banda, a peleisidenti fu a kondee, be taki a laadiyow taki Yehofa Kotoigi nai pai lanti moni. A be taki we mumui anga politiki tu. Ma den sani ya a ná be tuu. A fu di wa be e bai den kaita di e soi sowtu politikiman we holibaka gi, meke den á be lobi u.

Aini september, a peleisidenti poti a kolanti taki den Kotoigi e du ogii aini a kondee. Neen meke a be taki ao meke wan weiti di be o tapu a wooko fu den Yehofa Kotoigi aini a kondee. Di a du a sani ya, den tapu a wooko  fu u a 20 oktober 1967. Baka dati, sikowtu kon tapu a beikantoo fu u. Boiti dati, den yaki ala den zendeling puu aini a kondee.

Den be sooto u dii dei langa. Di den losi u, den sende u go a wan kondee den e kai Maurisiyus. A ten de a Ingiisikondee be e taki gi a kondee ya. Ma den tiiman fu a kondee ya, á be wani u tan aini a kondee. Neen meke den sende u go a Rhodesia (a so den be e kai Zimbabwe fosi). Di u doo de, u miti wan sikowtu di á be wani u tan aini a kondee. A be taki goofu anga u. A taigi u taki: ‘Den yaki u puu aini Malawi, den á wani wi aini Maurisiyus tu, neen u wani kon fika ya?’ Di a taki a sani de, Anne bigin kee. Bika a be gei enke nawan sama á be wani wi aini den kondee. Di a sani ya pasa, mi be wani fika a wooko da mi daai go a Ingiisikondee baka. Ma bakaten den sikowtu gi u pasi fu siibi na a kantoo fu den a neti de. Ma a taa dei u be mu go na a edekantoo fu den. U be weli, ma u fika ala sani gi Yehofa. U foondoo di den taigi wi a taa dei taki u be sa tan aini Zimbabwe. Noiti mi naw feegete a dei de, bika mi be si kiin taki a Yehofa be e tii a libi fu u.

Mi be e wooko na a diniwooko kantoo na a Betel fu Zimbabwe. Aw be e luku a wooko fu Malawi anga Mosambik. Sama be e libi ogii anga den baala anga sisa aini Malawi, neen meke den kelen owluman be e sikiifi biifi fu taigi u fa sani be e go anga den. Den taa baala á be e fusutan a tongo di den be e taki a Malawi, neen meke a mi be e poti den biifi ya aini Ingiisitongo gi den. Wan neti di mi be e seeka wan fu den biifi ya, mi bali kee di mi leisi den ogii di sama be e du anga den baala anga sisa fu wi aini Malawi. * Ma a biifi be e soi tu taki den baala anga sisa be abi biibi anga deki-ati. Den á be e gwe fika Yehofa tu. A sani ya be gi mi taanga-sikin.​—2 Kor. 6:4, 5.

U be e meke ala moiti fu den baala anga sisa aini Malawi anga den wan di be lowe kon a Mosambik be sa fende den buku fu a olikanisâsi fu u fu taanga den biibi. A Tyityewatongo den e moo taki aini Malawi. Den baala anga sisa di be e poti den buku fu u aini a tongo ya, be foloisi go a wan goon fu wan baala fu man du a wooko ya moo bun. A baala di be abi a goon be meke osu anga wan kantoo gi den. A so den be poi go doo anga a wooko ya.

U be e seeka sani gi den kelen owluman fu Malawi fu kon na a konkelesi a Zimbabwe di be e holi ala yali aini Tyityewatongo. Te den be kon da u be e gi den a lezing pampila. Te den be de a pasi e go a Malawi, den be e paati san den leli anga den taa baala. Wan fu den yali di den kelen owluman kon na a konkelesi a Zimbabwe, u be holi a Kownukondee Diniwooko sikoo fu gi den taanga-sikin.

Aini febrauri 1975 mi go a Mosambik fu gi den baala anga sisa di be lowe komoto a Malawi taanga-sikin. Den baala aini den loweman kampu be e wooko anga ala den kengi di be kon aini a olikanisâsi fu Yehofa. Wan fu den kengi ya, a taki den á be e poti wan kodo owluman moo fu luku wan kemeente, ma den be e poti wantu owluman fu du a wooko ya. A omen sani den nyun owluman ya be e du gi den baala anga sisa aini den loweman kampu a Mosambik. Den be e luku a deiwowtu anga A Wakititolen-sutudi. Den be e holi kelen komakandaa tu. Den be seeka den kemeente aini den kampu ya leti enke fa we seeka sani te u de a konkelesi. Den be poti sama fu kiin a peesi, sama fu paati nyanyan, anga sama di be e solugu taki sani go bun aini a kampu. Mi be e si taki Yehofa be de anga den baala ya tuutuu. Ná pikin taanga-sikin mi fende di mi go luku den.

Baka a yali 1970 na a Beikantoo fu Zambiya be e luku a wooko aini Malawi. Ma na ala yuu mi be e pakisei den baala anga sisa anda. Na ala yuu mi be e begi gi den tu. Den taa baala anga sisa seefi be e begi gi den. A ede kantoo be e sende baala go luku  fa a wooko e go a Malawi, Zuid-Afiikan, anga Zambiya. Ala yuu te den baala ya be kon, u be e sidon luku fa u sa yeepi den baala anga sisa aini Malawi moo bun.

Bakaten sani be e go moo bun aini Malawi. Den baala anga sisa di be lowe, be e daai go a Malawi baka. Sama á be e libi ogii so moo anga den wan di be fika anda. Den kondee di be lontu Malawi be e gi den Kotoigi pasi fu kon makandaa anga fu peleiki baka. Den tiiman fu Mosambik seefi be du a sani ya aini 1991. Ma u be e akisi useefi taki: ‘On ten den o du a sani ya gi den Kotoigi a Malawi tu?’

Baka wan pisiten, wan taa sama be e tii Malawi. Aini 1993 den gi den Kotoigi pasi fu kon makandaa anga fu peleiki baka. Di u yee a sani ya, wan baala akisi mi taki: ‘Yo daai go a Malawi baka?’ A ten de a 59 yali mi be abi, neen meke mi piki en taki: ‘Nono, mi gaandi tumisi.’ Ma aseefi dei de den baala di e tii a wooko sende akisi wi efu u be wani go a Malawi baka.

Ma a sani ya be taanga gi u, bika u be lobi Zimbabwe. A omen mati u be abi anda. U be sa tan aini Zimbabwe, bika den baala be taigi u taki aa be de fu u go a Malawi namonamo. Ma mi pakisei a toli fu Abalaham anga Sala. Den be gwe fika a moin osu fu den winsi fa den be gaandi kaba, fu di den be wani aliki Yehofa.​—Gen. 12:1-5.

Neen meke u du san den baala akisi u. U go a Malawi na a 1 februari 1995. A dei de a be pilisisi 28 yali pasa di u be go a Malawi fu a fosi leisi. Di u doo Malawi den be sete wan nyun Beikantoo Komte. A mi anga ete tu taa baala be fende a gaandi fu du a wooko ya. A so u bigin seeka a wooko fu Yehofa Kotoigi aini Malawi baka.

Mi e piisii te mi si fa Yehofa meke a wooko a Malawi go a fesi gawgaw. Aini 1993 u be abi 30 dunsu peleikiman, ma aini 1998 u be abi 42 dunsu peleikiman. * Fu di den peleikiman be e moo ipi namo, meke a wooko seefi be e moo ipi tu. Neen meke den baala di e tii a wooko be si taki a de fanowdu fu meke wan nyun Betel osu a Malawi. U be bai wan pisi doti fu 12 hectare aini Lilongwe fu meke a Betel osu ya. Den baala be poti mi fu luku a bow wooko.

Di a Betel kaba meke, den holi a lezing fu  gi a osu abaa a Yehofa aini mei 2001. A Baala Guy Pierce, wan fu den baala di e tii a wooko a hii goontapu, be holi a lezing ya. A moo enke 2000 Kotoigi be kon aliki a lezing ya. Gaanse fu den be dopu moo enke 40 yali kaba. A omen yali langa sama be e libi ogii anga den baala anga sisa ya di a wooko fu u be tapu a Malawi. Den be pooti, ma den anga Yehofa a be bun mati. I be e si fa den be e piisii di den kon luku a nyun Betel osu. Di den be e waka luku a peesi, den be e singi den Kownukondee singi anga den hii ati enke fa sama e singi na Afiikan. A sani ya a wan fu den moo moin sani di mi si aini mi libi. A sani ya be e soi kiin taki Yehofa e belesi den sama di e holidoo te tesi e miti den.

Baka di u kaba meke a Betel osu, den baala gi u pasi fu meke wantu Kownukondee zaal aini Malawi. Mi be piisii te, di mi yee a sani ya. A olikanisâsi be seeka sani fu yeepi den kondee pe den baala anga sisa naabi moni sai fu meke wan Kownukondee zaal. Den kemeente aini Malawi be fende wini fu a sani ya. Fosi den zaal meke, den baala anga sisa be e kon makandaa aini osu di denseefi be meke. Den daki fu den osu ya be meke anga wan sowtu paata matamata den e kai ketebe. A sani ya be meke anga gaasi. Den bangi aini den zaal ya be meke anga tokotoko. Di u be e meke den nyun Kownukondee zaal, den baala anga sisa be e wooko taanga. A denseefi be e meke siton anga ana. Ma den á be wani sutuu fu sidon aini a zaal. Den be wani sidon a den langa bangi fu den ete, bika den be taki: ‘Moo sama sa sidon a den bangi ya.’

Mi be e piisii te mi be e si fa den yonkuu baala na Afiikan be e meke moiti. Den be de kabakaba fu wooko gi a olikanisâsi. A omen nyun sani den be e leli te den be e du den wooko ya. Neen meke den be poi tyai moo gaan faantiwowtu aini den kemeente. Son wan fu den be e fende a gaandi fu wooko a Betel tu. Boiti dati, den baala be poti nyun kelen owluman fu luku den kemeente. Gaanse fu den be toow. Winsi fa den sama na a pisi pe den e tan be e gi den taanga-sikin fu meke pikin, toku den á be wani du a sani ya, bika den be wani du moo gi Yehofa.

Baka di mi tan 52 yali na Afiikan, mi gusontu bigin go anga baka. Den baala fu a Betel Komte fu Zimbabwe be si enke a be o moo bun fu mi daai go a Ingiisikondee baka. Den baala fu a edekantoo seefi be si en so tu. Ná pikin tyali kisi u di we gwe, bika u be lobi a wooko di u be e du aini Malawi. Ma di u kon a Ingiisikondee, ná pikin solugu den baala anga sisa ya solugu u.

Mi sabi taki na a moo bun sani mi du di mi meke Yehofa tii a libi fu mi. Bika mia sabi fa mi libi be o de di mi be o wooko aini a goontapu ya. Yehofa sabi san mi be abi fanowdu, neen meke ‘a seeka a pasi fu mi’ (Odo 3:5, 6). Di mi be yonkuu mi be lobi a wooko di mi be e du aini a gaan bodeleifi. Ma a wooko di mi du aini a olikanisâsi fu Yehofa, yeepi mi fu moo piisii aini mi libi. A sani ya na a moo bun sani di mi be sa du anga mi libi.