1. San Yehofa du di Adan anga Efa sondu? (Genesesi 3:15)

 BAKA di Adan anga Efa sondu, Yehofa taki wan polofeititoli a Genesesi 3:15. (Leisi en.) A sani di Yehofa taki ya, e gi den bakapikin fu Adan howpu.

2. Saide a polofeititoli di sikiifi a Genesesi 3:15 pelensipali?

² Winsi fa a polofeititoli ya sikiifi aini Genesesi, a fosi buku fu Beibel, toku ala den taa Beibel buku abi fu du anga a polofeititoli ya. A sani di sikiifi a Genesesi 3:15 e soi san na a bosikopu fu a hii Beibel. A bosikopu ya, a taki Gadu be o sende wan sama kon fu kii Didibii anga den sama di e holibaka gi en. A sani ya o tyai wini gi ala den sama di e dini Yehofa!

3. San wo luku aini a artikel ya?

³ Aini a artikel ya, wo taki fu a polofeititoli di sikiifi a Genesesi 3:15. Wo luku den akisi ya: Sama a den sama di kai aini a polofeititoli ya? Fa a polofeititoli ya kon tuu? Sowtu wini we fende fu a polofeititoli ya?

4. Sama na ‘a sineki’? Faw du sabi a sani ya?

⁴ Genesesi 3:14, 15 e taki fu wan ‘sineki’ anga ‘a pikin’ fi en. Ai taki fu ‘wan uman’ anga ‘a pikin’ fi en tu. Beibel e yeepi u fu fusutan san den sani ya wani taki. * Kow taki fu a sineki fosi. Wan tuutuu sineki á be o poi fusutan den sani di Yehofa be taki aini a dyali fu Eden. Neen  meke u sa taki anga wan engel Yehofa be e taki. Sama na a engel ya? Openbaring 12:9 e soi u sama na a engel ya. A tekisi ya e soi taki a Saatan Didibii na ‘a fosi sineki’. Ma sama na a pikin fu a sineki?

5. Sama na a pikin fu a sineki?

⁵ Son yuu te Beibel e taki fu den pikin fu wan sama, a naabi fu de a sama pikin tuutuu. Ma te wan sama e tyai enseefi enke fa wan taa sama e tyai enseefi, da Beibel e kai en en pikin. Neen meke te Beibel e taki fu a pikin fu a sineki, a den engel anga den sama di daai baka gi Yehofa ai taki. Den e tyai denseefi leti enke Saatan, neen meke ai kai den ‘pikin fu a sineki’. Den engel di be gwe fika den tanpeesi a hemel na a ten fu Nowa de aini a kulu ya tu. Boiti dati, den sama di e tyai denseefi enke den dda Saatan Didibii de aini a kulu ya.​—Gen. 6:1, 2; Yoh. 8:44; 1 Yoh. 5:19; Yud. 6.

6. Saide u sa taki a uman di kai aini a polofeititoli a ná Efa?

⁶ Kow luku now sama na a uman di kai aini a polofeititoli ya. A uman ya á poi de Efa. Saide u sa taki a sani ya? A polofeititoli e taki a pikin fu a uman be ‘o masi a sineki neen ede’. Enke faw be luku kaba, da a sineki di kai aini a polofeititoli ya a Saatan. U sabi taki Saatan a wan yeye di abi makiti. Ma den pikin di Efa be o meke be o abi sondu. Neen meke nawan fu den pikin ya be o poi masi Saatan neen ede. Da sama be o masi en neen ede?

7. Enke fa Openbaring 12:1, 2, 5, anga 10 e soi, da sama na a uman di kai a Genesesi 3:15?

⁷ A lasiti buku fu Beibel e soi u sama  na a uman di kai aini a polofeititoli di sikiifi a Genesesi 3:15. (Leisi Openbaring 12:1, 2, 5, 10.) A uman ya a ná wan libisama. Openbaring 12:1 taki a mun de na a uman ya futu ondoo. Twalufu sitali de neen ede enke wan kownu ati. Boiti dati, a uman ya meke wan pikin di sama á be si noiti ete. A pikin ya na a Kownukondee fu Gadu. A Kownukondee ya de a hemel, neen meke u sa taki a uman ya de a hemel tu. A uman ya na a pisi fu a olikanisâsi fu Gadu di de a hemel. Ala den engel di e holibaka gi Yehofa de aini a olikanisâsi ya.​—Gal. 4:26.

8. Sama na a moo pelensipali bakapikin fu a uman? On ten a toon a moo pelensipali bakapikin fu a uman? (Genesesi 22:15-18)

⁸ A Wowtu fu Gadu e yeepi u fu sabi sama na a pikin fu a uman di kai aini a polofeititoli. Beibel e soi u taki a pikin ya be o de wan bakapikin fu Abalaham. (Leisi Genesesi 22:15-18.) A Yesesi na a bakapikin fu Abalaham di a polofeititoli be e taki (Luk. 3:23, 34). Ma a pikin ya be mu abi makiti moo libisama, bika Beibel e taki ao kii Saatan Didibii. Neen meke di Yesesi be abi 30 yali, Gadu salufu en anga santa yeye. A so a toon a moo pelensipali bakapikin fu a uman (Gal. 3:16). Baka di Yesesi weki baka, en Dda gi en ‘gaandi anga makiti. A gi en ala makiti a hemel anga goontapu’. A gi en a makiti ya ‘fu kon tapu den wooko fu Didibii’.​—Heb. 2:7; Mat. 28:18; 1 Yoh. 3:8.

9-10. (a) Sama a den taa pikin fu a uman? On ten den e toon wan fu den pikin fu a uman? (b) San wo luku aini den paragraaf di e kon?

⁹ Ma a ná Yesesi wawan na a pikin fu a uman. Apostel Pawlesi be soi sama a den taa pikin fu a uman. A be taigi den Dyu anga den taa salufu Kelesten taki: ‘Efu wa fu Kelestesi, da wa tuutuu bakapikin fu Abalaham. Wa sama di o fende a gudu di Gadu paamisi’ (Gal. 3:28, 29). A sani ya e soi taki te Yehofa salufu wan sama anga santa yeye, a sama ya e toon wan fu den pikin fu a uman. A pikin fu a uman a Yesesi Kelestesi, anga den 144.000 sama di o tii makandaa anga en (Openb. 14:1). Ala den sama ya e meke moiti fu du sani enke fa Yehofa e du sani.

¹⁰ Now di u kon fusutan sama a den sama di kai a Genesesi 3:15, meke u luku fa a polofeititoli ya kon tuu, anga sowtu wini wo fende fi en.

11. Fa a sineki gi a pikin fu a uman mankei neen baka-futu?

¹¹ A polofeititoli fu Genesesi 3:15 e soi taki a sineki be o gi a pikin fu a uman mankei ‘neen baka-futu’. A sani ya kon tuu, di Saatan meke den Dyu anga den Romesama kii a Manpikin fu Gadu (Luk. 23:13, 20-24). Te wan sama kisi mankei neen baka-futu, a nai waka bun. Ai kinika fu wan pisiten. A letiso a de tu anga a dede di Yesesi be dede. A dii dei langa aa be poi du nawan sani.​—Mat. 16:21.

12. Fa Yesesi o masi a sineki neen ede? On ten ao du a sani ya?

¹² A polofeititoli a Genesesi 3:15 e soi taki Yesesi be o weki baka. Faw du sabi a sani ya? Bika a polofeititoli e soi taki a pikin fu a uman be mu masi a sineki neen ede. A sani ya e soi taki Yesesi be  o weki baka. A so sani waka tu! Dii dei baka di Yesesi dede, Gadu weki en baka enke wan engel. Di a yuu fu Gadu o doo, Yesesi o kii Saatan (Heb. 2:14). Den sama di o tii makandaa anga Yesesi o yeepi en fu kii den pikin fu a sineki puu a goontapu.​—Openb. 17:14; 20:4, 10. *

13. Sowtu wini we fende fu a polofeititoli fu Genesesi 3:15?

¹³ Ala sama di e dini Yehofa e fende wini fu a polofeititoli ya. Di Yesesi be de a goontapu a be e du sani enke fa Yehofa e du sani (Yoh. 14:9). Neen meke di u kon leli sabi Yesesi, u kon sabi Yehofa moo bun. A sani ya meke u kon lobi en. We fende wini fu a fasi fa Yesesi e tii a kemeente aini a ten ya. We fende wini fu den leli fi en tu. Ai leli u faw mu libi fu Yehofa sa piisii anga u. Boiti dati, a dede fi en e tyai wini gi u. Saide u sa taki a sani ya? Bika a buulu fi en ‘e kiin ala den sondu fu u’.​—1 Yoh. 1:7.

14. Faw du sabi taki den sani di Yehofa taki aini a dyali fu Eden á be o pasa wantenwanten?

¹⁴ Den sani di Yehofa taki aini a dyali fu Eden, e soi taki a polofeititoli ya á be o kon tuu wantenwanten. A be o teke ten fu kon sabi sama na a pikin fu a uman. A be o teke ten tu fu Didibii koli omen sama fu holibaka gi en. A baka omen ten fosi i be o man si kiin fa den sama di e holibaka gi Didibii be o du ogii anga den sama di e holibaka gi Yehofa. A sabi di u kon sabi san a polofeititoli ya wani taki e tyai wini gi u, bika ai soi taki Saatan anga den sama di e holibaka gi en e buuse den sama di e dini Yehofa. Yesesi be taigi den bakaman fi en a sani ya tu (Malik. 13:13; Yoh. 17:14). Aini den 100 yali di pasa, u si fa a pisi fu a polofeititoli ya kon tuu. Saide u sa taki a sani ya?

15. Saide sama e moo buuse a foluku fu Gadu? Saide u naabi fu feele Saatan?

¹⁵ Baka di Yesesi toon Kownu aini 1914, a fiingi Saatan kon a goontapu. Nownow Saatan á poi go a hemel moo. A wakiti we wakiti fu a ten doo fu Yesesi kii en (Openb. 12:9, 12). Saatan ati e boon, bika a sabi taki dyonson ao dede. Neen meke ai libi ogii anga a foluku fu Gadu (Openb. 12:13, 17). Na a sani ya meke sama e moo libi ogii anga a foluku fu Gadu aini a ten ya. Ma u naabi fu feele Saatan anga den sama di e holibaka gi en. Leti enke apostel Pawlesi, we biibi taki Gadu e holibaka gi u. A be taki: ‘Efu Gadu de anga u, da san sama o poi du anga u?’ (Rom. 8:31) Gaanse fu a polofeititoli di sikiifi a Genesesi 3:15 kon tuu kaba, neen meke u sa fitoow Yehofa. U sa biibi taki a taa pisi fu a polofeititoli ya o kon tuu.

16-18. Sowtu wini Curtis, Ursula, anga Jessica fende di den kon fusutan a polofeititoli di sikiifi a Genesesi 3:15?

¹⁶ Den sani di Yehofa taki a Genesesi 3:15 e yeepi u fu holidoo te tesi e miti u. Curtis, wan zendeling di e tan a Guam taki: ‘Son yuu sani be e miti mi pe mi be mu soi taki mi nai gwe fika Yehofa. Te mi be pakisei a polofeititoli di sikiifi a Genesesi 3:15, mi be e moo fitoow Nda di de a hemel.’ Curtis e wakiti a ten te  Yehofa o puu ala den tesi di e miti wi aini a ten ya.

¹⁷ Wan sisa den e kai Ursula, di e tan a Bavariya taki di a kon fusutan a polofeititoli di sikiifi a Genesesi 3:15, a kon si taki a Beibel na a Wowtu fu Gadu tuu. A kon si fa ala den taa polofeititoli aini Beibel e kai anga a polofeititoli ya. A sani ya be doo en ati. A taki: ‘Di mi si taki Yehofa seeka sani gi u wantenwanten fu u sa abi howpu, mi kon moo lobi en.’

¹⁸ Wan sisa den e kai Jessica, di e tan a Mikronesiya taki: ‘Mi sabi ete fa mi be e fii di mi fusutan taki mi fende a tuu biibi. A polofeititoli di sikiifi a Genesesi 3:15 e kon tuu. Den sani di e pasa anga u nownow, a ná san Yehofa be abi a pakisei gi u. A polofeititoli ya e yeepi mi fu biibi taki efu mi e dini Yehofa enke fa a wani, mi libi o waka moo bun. Mi o abi wan moo bun libi aini a ten di e kon tu.’

19. Saide u sa biibi taki a taa pisi fu a polofeititoli o kon tuu?

¹⁹ Enke faw si aini a artikel ya, da a polofeititoli di sikiifi a Genesesi 3:15 e kon tuu nownow. U kon fusutan sama na a pikin fu a uman, anga a pikin fu a sineki. Yesesi na a moo pelensipali bakapikin fu a uman. A pisi fu a polofeititoli di e taki a be o kisi mankei neen baka-futu, kon tuu kaba. Nownow ai tii a hemel enke Kownu fu Gadu Kownukondee. Nownow Yehofa e teke den lasiti sama di o go tii makandaa anga en Manpikin a hemel. U sa biibi taki a taa pisi fu a polofeititoli seefi o kon tuu, bika a fosi pisi fi en kon tuu kaba. Ná pikin piisii a foluku fu Gadu o piisii te Saatan naw de moo! Solanga a ten de á doo ete, wa mu gi abaa. U mu tan fitoow Yehofa, bika ao meke a pikin fu a uman tyai belesi gi ‘ala den foluku a goontapu’.​—Gen. 22:18.