Yesesi be e leli sama fu libi bun anga denseefi. Ma wan leisi a be taigi den bakaman fi en taki: ‘Ya mu denki a freide mi tyai kon a goontapu. A ná freide mi tyai kon, ma a wan feti-how. Mi kon fu paati wan man anga en dda, wan umanpikin anga en mma, anga wan uman anga en main’ (Mat. 10:34, 35). San Yesesi be wani taki anga a sani ya?

Yesesi á be kon a goontapu fu paati osufamii, ma a be sabi taki den sani di a be e leli sama be o meke paati fasi kon aini a osufamii. Neen meke den sama di wani toon Yesesi bakaman, mu fusutan taki a ná ala den famii fu den o piisii taki den wani du a sani ya. Son leisi den toowpaa, efuso wan taa sama aini den osufamii sa du sani fu tapu den fu dini Yehofa enke fa a wani. A sani ya sa meke a taanga gi den fu du san Beibel e taki.

Beibel e gi Kelesten taanga-sikin fu ‘libi bun anga ala sama’ (Rom. 12:18). Ma den leli fu Yesesi sa de enke wan ‘feti-how’ aini son osufamii. Te wan sama toon wan bakaman fu Yesesi, a ná ala den sama aini en osufamii e lobi a sani ya. Neen meke den e du sani fu tapu en fu aa dini Yehofa moo. Te a sani ya pasa, da a leti enke den taa sama aini a osufamii e toon ‘feyanti’ fu a sama di e dini Yehofa.​—Mat. 10:36.

Son Kelesten e tan aini wan osu anga sama di de a wan taa biibi. Son yuu sani e miti den Kelesten ya pe den abi fu soi sama se den o teke. Kande den famii fu den e dwengi den fu holi fesa di Yehofa á lobi. Sama se den o teke te a sani ya miti den? Yesesi be taki: ‘A sama di lobi en dda efuso en mma moo mi, á fiti fu de mi bakaman’ (Mat. 10:37). Yesesi á taki wa mu lobi u mma anga u dda, ma a soi a be wani soi u sama u mu poti a fesi aini u libi. Efu u famii e tapu u fu dini Yehofa wa mu buuse den, ma u mu holi a pakisei taki a Yehofa na a moo pelensipali sama aini u libi.

Ai hati u te u famii e libi ogii anga u fu di we dini Yehofa, ma we holi a sani di Yesesi be taigi den bakaman fi en a pakisei. A be taki: ‘Iniiwan sama di á wani teke en pina-udu fu waka a mi baka, naw poi toon mi bakaman’ (Mat. 10:38). A sani ya e soi taki Kelesten mu de kabakaba fu nyan pina. Son leisi a den famii fu den e libi ogii anga den. Ma den e howpu taki a fasi fa den e tyai denseefi sa yeepi den famii fu den fu kon dini Yehofa makandaa anga den.​—1 Peit. 3:1, 2.