1-2. Sama a be Sadok? (1 Koloniki 12:22, 26-28)

 PUUBEI fu si a sani ya ai fesi: Wan sani fu 340,000 man e kon a makandii fu poti David enke kownu fu Islayeli. Den man ya tan dii dei langa a den siton mongo koosube fu Hebron. Den e gi toli e lafu, da den e singi gafa Yehofa (1 Kolon. 12:39). Ma aini a gaan kulu ya, i be abi wan yonkuman den e kai Sadok. Winsi u be de ape kande wi á be o poi si en seefi aini den somen sama. Ma tokuso Yehofa meke u kon sabi taki a yonkuman ya be de ape (Leisi 1 Koloniki 12:22, 26-28). Sama a be Sadok?

² Sadok a be wan pilisite di be e wooko makandii anga Gaan Pilisite Abiyatar. Gadu be gi Sadok koni fu man du a wani fi en (2 Sam. 15:27). Sama be lobi go a Sadok te den be wani sabi fa den mu du son sani. A be lobi yeepi den. Boiti dati, a be abi deki-ati tu. Aini a artikel ya wo luku fa Sadok soi taki a be abi deki-ati.

3. (a) Saide den sama di e dini Yehofa mu abi deki-ati? (b) San wo luku aini a artikel ya?

³ Aini den lasiti dei ya, Saatan e du ala san a man fu swaki a biibi fu den sama di e dini Yehofa (1 Peit. 5:8). Neen meke u mu abi deki-ati te enke Yehofa tyai wan kaba kon na a ogii goontapu ya (Ps. 31:24). Meke u luku dii fasi fa u sa soi taki wi abi deki-ati enke Sadok.

HOLIBAKA GI GADU KOWNUKONDEE

4. Saide a foluku fu Yehofa abi deki-ati fanowdu fu man holibaka gi a Kownukondee? (Luku a fowtow.)

⁴ Enke a foluku fu Yehofa, we du ala san u man fu holibaka gi a Kownukondee fi en, ma son yuu wi abi deki-ati  fanowdu fu man du a sani ya (Mat. 6:33). Aini a ten ya, wi abi deki-ati fanowdu fu man holi useefi a den weiti fu Yehofa anga fu du a peleikiwooko fayafaya (1 Tes. 2:2). Wi abi deki-ati fanowdu tu, fu soi taki u nai teke se aini politiki (Yohanisi 18:36). A omen sama aini a ten ya lasi omen moni fu di den e dini Yehofa. A omen fu den sama e fon efuso poti a sitaafu-osu fu di den nai mumui aini politiki. Den e pina taawan tu fu di den á wani go a suudati.

5. Saide Sadok be abi deki-ati fanowdu fu man holibaka gi David?

⁵ Sadok á go a Hebron fu go luku namo fa den be o poti David enke kownu. Ma a be go seekaseeka, bika a tyai ala den feti sani fi en (1 Kolon. 12:38). A be de kabakaba fu go anga David fu go feti gi Islayeli. Winsi fa Sadok á be abi ondoofeni tokuso a go fu di a be abi deki-ati.

6. Fa David soi deki-ati? Fa Sadok be man waka neen baka? (Psalm 138:3)

⁶ Wan sani di be yeepi Sadok fu abi deki-ati, na a sabi di a be sabi omen sama di be abi a manii ya. A omen sani a be e leli fu den sama ya. Fu di David a be wan bun fesiman, fu di a be sabi feti bun, meke ala den Islayelisama be wani poti en enke kownu (1 Kolon. 11:1, 2). David be e fitoow Yehofa ala yuu te a be e go a feti (Ps. 28:7; leisi Psalm 138:3). A omen taa sama de ete di Sadok be sa waka a den baka​—man enke Yoyada anga en manpikin Benaya anga den 22 taa edeman di be e holibaka gi David (1 Kolon. 11:22-25; 12:26-28). Ala den man ya be e du ala san den poi fu holibaka gi David. Den be e si en enke den kownu tuutuu.

7. (a) Sowtu ondoofenitoli aini a ten ya e yeepi u fu abi deki-ati? (b) San a toli fu baala Nsilu e leli u te u luku a felon?

⁷ Te u teke ten pakisei fa taawan du ala  san den poi fu holibaka gi Yehofa anga a Kownukondee fi en, da a sani ya e gi u taanga-sikin fu du aseefi tu. Di Yesesi enke u Kownu be de a goontapu ya, a soi u kiin taki a nai holibaka gi politiki (Mat. 4:8-11; Yohanisi 6:14, 15). A be e fitoow Yehofa ala yuu. A omen yonkuuwan aini a ten ya e soi taki den e tan a Yehofa se fu di den nai mumui aini politiki efuso du ala sowtu sani di Yehofa á lobi. I sa luku den ondoofenitoli fu den a jw.org. a

HOLIBAKA GI DEN BAALA

8. On ten owluman sa abi deki-ati fanowdu fu holibaka gi den baala anga sisa?

⁸ Den sama di e dini Yehofa e yeepi makandaa (2 Kor. 8:4). Ma son leisi wi abi deki-ati fanowdu fu man du a sani ya. Efu kande oloku de a wan peesi, da den owluman abi deki-ati fanowdu fu go gi den baala anga sisa taanga-sikin efuso holibaka gi den. Den mu solugu taki den fende ala den sani di den abi fanowdu a pisiten de. Fu di den lobi den baala anga sisa meke den e du ala san den poi fu yeepi den, winsi den seefi sa lasi den libi (Yohanisi 15:12, 13). Disi a wan fasi fa den e soi taki den abi deki-ati enke Sadok.

9. Enke fa 2 Samuweli 15:27-29 e soi, da san David taigi Sadok fu du? (Luku a fowtow.)

⁹ Ogii be de fu miti David. En manpikin Absalom be de namonamo fu kii en fu a be sa toon kownu (2 Sam. 15:12, 13). Neen meke David be abi fu lowe komoto a Yelusalem wantenwanten! Te fu kaba a taigi den man fi en taki: ‘U opo meke u gwe nownow! Bika te Absalom o kon ya, u naw poi lowe moo’ (2 Sam. 15:14). Di den e gwe, David kon fusutan taki wan sama o abi fu fika ape fu kon taigi en bakaten san Absalom be abi a pakisei fu du.  A so meke a sende Sadok anga wantu taa pilisite fu go aini a foto enke sipiyon (Leisi 2 Samuweli 15:27-29). Den be mu du sani anga koni fu ogii á miti den, bika den be sa lasi den libi​—denki san wan man enke Absalom be sa du anga den​—a man ya be e denki enseefi namo, a be ogii. A san a wani a be e du​—Pakisei san a be sa du anga Sadok anga den taa pilisite efu a be kon sabi taki den fika enke sipiyon aini a foto fu di den be wani kibii David!

10. Fa Sadok anga den man di be de anga en kibii David fu ogii á miti en?

¹⁰ David be akisi Sadok anga wan fu den mati fi en di den e kai Husai fu yeepi en anga wan sani (2 Sam. 15:32-37). Husai be mu du enke aw holibaka gi Absalom, da a be mu soi en faa mu go feti anga David. Baka di den taki a sani ya, neen Husai go a Absalom. Te fu kaba Absalom biibi ala den sani di Husai taigi en fu a du. A so David kon fende ten fu seeka fu go feti anga den. Baka dati, Husai go taigi Sadok anga Abiyatar taki Absalom aliki en. A taigi den ala san pasa (2 Sam. 17:8-16). Bakaten den tu man ya tyai a bosikopu go gi David (2 Sam. 17:17). Fu di Yehofa be holibaka gi Sadok anga den taa pilisite meke den be poi yeepi David fu ogii á miti en.​—2 Sam. 17:21, 22.

11. Faw sa soi deki-ati enke Sadok te u mu yeepi u baala anga sisa?

¹¹ A tuu taki we libi aini wan taanga ten nownow. Ma saw yeepi u fu abi deki-ati enke Sadok te u mu yeepi u baala anga sisa? (1) Wooko anga san a olikanisâsi e taigi i. U mu du ala saw poi fu aliki den baala di e teke fesi na a pisi pe we tan te wan ogii e pasa. U mu du sani pilisisi enke fa a beikantoo e soi u (Heb. 13:17). Den owluman mu sabi san a den sani di lanti seeka te wan gaan ogii pasa. Ma den  mu sabi tu fa a olikanisâsi wani den du sani a den pisiten de (1 Kor. 14:33, 40). (2) Soi deki-ati, da u du sani anga koni (Odo 22:3). U mu du sani anga koni, wa mu du sani fanyafanya. (3) Fitoow Yehofa. U mu holi a pakisei taki Yehofa wani sani waka bun anga u. Aa wani ogii miti u anga den baala anga sisa. A poi yeepi u fu ogii á miti u.

12-13. Sai leli fu a ondoofenitoli fu Viktor anga Vitali? (Luku a fowtow.)

¹² Luku a toli fu 2 owluman di be du ala san den poi fu tyai nyanyan anga wataa go gi den baala anga sisa a ten di a feti be e simpan a Ukraini. Viktor taki: ‘U be e suku nyanyan na ala se’. ‘Ná pikin sutu den be e sutu na a pisi pe u be de. Te fu kaba, wan baala di be abi wan wenkii gi u wantu nyanyan sani. Den sani di a gi u yeepi den baala anga sisa wan hii pisiten. Di we lai den sani a wagi, wan bom sutu 20 meter koosube fu pe u be de. A dei de mi begi Yehofa fu a gi mi deki-ati fu mi be sa tan yeepi den baala anga sisa.’

¹³ Vitali taki: ‘U be abi deki-ati fanowdu fu be man yeepi den baala anga sisa’. Di mi go anda a fosi leisi a 12 yuu langa a teke. Mi be e begi Yehofa a hii dei.’ Vitali be abi deki-ati, ma tokuso a be e du sani anga koni. Ai taki: ‘Mi begi Yehofa fu a gi mi koni, mi akisi en fu a yeepi mi fu abi sakafasi. A soso den pasi pe lanti be taigi u mi be e rij. Mi biibi kon moo taanga di mi si fa den baala anga sisa be e wooko makandaa. Den be e yeepi u lai sani a wagi. Den be e puu den sani di be e kai e tapu a pasi son yuu tu. Ná pikin solugu den solugu mi anga Viktor. Den be gi u siibi peesi tu.’

NÁ GWE FIKA YEHOFA

14. San sa pasa te wan sama di u lobi gwe fika Yehofa?

¹⁴ Wan fu den moo gaan tesi di sa miti u, a te wan famii fuu efuso wan mati fuu gwe fika Yehofa (Ps. 78:40; Odo 24:10). O moo yu anga a sama gwenti, o moo a sa taanga gi i fu pasa a tesi ya. Efu a sani ya e miti i, a bun fu holi a pakisei taki David anga Sadok be miti a seefi sani ya tu.

15. Saide Sadok be abi deki-ati fanowdu fu aa gwe fika Yehofa? (1 Kownu 1:5-8)

¹⁵ Sadok á gwe fika Yehofa di en bun mati Abiyatar be daai baka gi Yehofa. A sani ya pasa a den lasti yali di David be e tii enke Kownu. Di David be de a siki bedi, a boi fi en Adoniya be e puubei fu toon kownu winsi fa a Salomo Yehofa be taki o fende a gaandi ya (1 Kolon. 22:9, 10). Abiyatar be holibaka gi Adoniya (Leisi 1 Kownu 1:5-8). Fu di Abiyatar du a sani ya, meke a ná David wawan a be daai baka gi. Ma a be daai baka gi Yehofa tu. Pakisei fa Sadok be fii di a sani ya pasa, bika a omen yali langa en anga Abiyatar be e wooko makandaa enke pilisite (2 Sam. 8:17). Den be mu solugu a ‘Ark fu a tuu Gadu’ makandaa (2 Sam. 15:29. Ala den tu man be e holibaka gi David di a be e tii enke kownu​—a omen taa sani den be e du ete.​—2 Sam. 19:11-14.

16. San yeepi Sadok fu aa gwe fika Yehofa?

¹⁶ Winsi fa Abiyatar be gwe fika Yehofa fu di a naw holibaka gi David, tokuso Sadok be tan a Yehofa se. David be sabi taki a be sa fitoow Sadok, Natan anga Benaya ala yuu, moomoo a pisiten di a kon a kiin san Adoniya be wani du. David be gi den man ya a wooko fu poti Salomo enke kownu (1 Kow. 1:32-34). Fu di  Sadok be e mosoo anga sama di be e dini Yehofa fayafaya​—enke Natan anga Kownu David meke en biibi be taanga (1 Kow. 1:38, 39). Bakaten di Salomo toon kownu, neen ‘a poti Sadok enke pilisite na Abiyatar peesi.’​—1 Kow. 2:35.

17. Faw sa waka a Sadok baka efu wan famii efuso mati fuu gwe fika Yehofa?

¹⁷ Fai sa waka a Sadok baka? Efu wan famii efuso mati fii gwe fika Yehofa, du ala sai poi fu soi taki ye tan a Yehofa se (Yow 24:15). Yehofa o gii a kaakiti fi en fu du san bun. I mu e begi en ala yuu, dai meke moiti fu paa anga den baala anga sisa. Yehofa e teke en fu bigi taki i nai gwe fika en. Aw belesi i tu.​—2 Sam. 22:26.

18. Sai leli fu a ondoofenitoli fu Marco anga Sidse?

¹⁸ Marco anga Sidse be abi tu gaan meisyo di á be e dini Yehofa moo. Marco taki: ‘Fanafu a dei di i meke a pikin, ná pikin lobi ye lobi en. Ye du ala sai poi fu maka á kaabu en. Neen meke te den á wani dini Yehofa moo, ná pikin hati ai hati yu enke mma efuso dda’. Ai taki go doo taki: ‘Ma Yehofa be e yeepi u fu holidoo. Te mi be e fii booko-saka, da mi uman be de ape gi mi. Te mi uman be e fii booko-saka, da mi be e holibaka gi en’. Sidse e taki: ‘Noiti u be o poi holidoo efu Yehofa á be gi wi a kaakiti fi en. Son yuu mi be e fii enke a mi du meke den umanpikin fuu á de a waaleiti moo, neen meke mi begi Yehofa neen mi taigi en fa mi e fii. Aa teke langa baka di mi begi, neen wan sisa di mia be si omen yali langa kon luku mi. Di a kon luku mi, a holi mi a mi sikoo neen a taigi mi taki: ‘Sidse, a nai meke den pikin fii nai dini Yehofa moo! Fu di Yehofa e yeepi mi, meke mi poi dini en anga piisii te anga now.’

19. Sai de kabakaba fu du?

¹⁹ Yehofa wani ala den sama di e dini en soi deki-ati enke Sadok (2 Tim. 1:7). Aa wani u fitoow useefi, ma a wani u fitoow en. Neen meke efu wan sani e miti i nownow di e meke ye fii enke yu abi deki-ati fanowdu, begi Yehofa fu a yeepi i. Efi i du a sani ya, i sa biibi taki aw yeepi i fu abi deki-ati enke Sadok!​—1 Peit. 5:10.