1-2. (a) Sowtu wasikoi Yesesi be gi den apostel fi en? (b) Saide meke den bakaman fu Yesesi be gwe fika en? (Luku a fowtow.)

 ‘A ATI wani, ma a sikin swaki.’ a (Mat. 26:41b). Yesesi be wani soi anga den wowtu ya taki ai fusutan taki wi abi sondu. Ma a sani di a taigi u de enke wan wasikoi tu. A be wani soi taki a ná ala yuu wo taanga sai fu du san bun. Bika aseefi neti de, den bakaman fi en be paamisi en taki noiti den o gwe fika en (Mat. 26:35). A tuu taki a wan bun sani den be wani du, ma den á be sabi taki den be sa sondu te tesi be o miti den.​—Mat. 26:41a.

² A tyali taki den bakaman fu Yesesi á du san den be paamisi en. Di den be kon fu kisi en, ala den lon gwe fika en fu di den be e feele. Fu di den á be de na ain​—meke den gwe fika Yesesi.​—Mat. 26:56.

3. (a) Saide wa mu e biibi useefi tumisi efu u wani tan a Yehofa se? (b) San wo luku aini a artikel ya?

³ Wa mu denki taki na ala yuu wo taanga sai fu du san bun. A tuu taki wa wani du sani di Yehofa á lobi. Ma fu di wi abi sondu meke te fuu denki u sa du sani di á bun (Rom. 5:12; 7:21-23). Ma efu u wani tan a Yehofa anga Yesesi se, wi abi fu waka a Yesesi baka fu wa du sani di o meke u sondu bakaten. A artikel ya o yeepi u fu du a sani ya. A fosi sani di wo luku a gi sowtu sani u mu de  na ain. Baka dati wo luku faw sa de na ain fu wa du ogii. Anga faw sa de na ain ala yuu.

​GI SOWTU SANI U MU DE NA AIN?

4-5. Saide u mu luku bun fu u nai du pikinpikin sondu?

⁴ Den pikinpikin sondu di wan sama e du sa meke en anga Yehofa á de mati moo. Den sa meke u go du moo gaan ogii tu.

⁵ Ala u abi swakifasi. Neen meke son yuu wo gwe e kisi a fii fu denki sani efuso du sani di á bun. Kande son wan fuu e feti fu wa denki enke den sama fu a goontapu ya efuso fu wai pasi gi hululibi. A kan tu taki omen fuu e feti fu tapu anga a gwenti fu pee anga u sen peesi efuso luku sekisi felon. Kande u mu e meke moiti fu wi ati nai boon gaw moo. So wan fuu e feele fu du san bun fu di we denki san taa sama o pakisei fuu. Yakowbesi be taki ‘Tesi e miti wan sama fu di den fii fi en e koli en.’​—Yak. 1:14.

6. Saide wa mu koli useefi?

⁶ On ten a sa taanga gi u fu du san bun? Efu we du enke u nai si den swaki fasi fuu, a sani ya sa meke u du sani di á bun, a sa meke u sondu (1 Yohanisi 1:8). Pawlesi be taki seefi den wan di moo taanga sa booko kini gi tesi efu den á luku bun (Gal. 6:1). Noiti u mu koli useefi, ala yuu u mu meke moiti fu sabi san a den swakifasi fuu.​—2 Kor. 13:5.

7. San mu de a moo pelensipali sani gi u? Gi wan ageisitoli.

⁷ U mu du wan sani ete, baka te u kon sabi den swaki fasi fuu. U mu du ala san u poi fu den fii fuu á fende u koli. Pakisei a sani ya: Aini Beibel ten den moo swaki pisi fu wan foto a be a gaan doo fu den. Neen meke den be e meke den doo ya fu sama á be poi booko den makiliki. Den be e poti wakitiman a den doo ya tu. A letiso a de anga wi aini a ten ya tu. Ala yuu u mu poti pakisei a den peesi pe u swaki.​—1 Kor. 9:27.

FA U SA DE NA AIN?

8-9. Fa a yonkuman di Odo kapitel 7 e taki fi en be sa wai pasi gi wan gaan sondu? (Odo 7:8, 9, 13, 14, 21)

⁸ Faw sa du sani anga koni fu wa sondu? Meke u luku san u sa leli fu a  yonkuman di Odo kapitel 7 e taki fi en. A yonkuman ya be siibi anga wan uman di be e libi wan hulu libi. Vers 22 e taigi u taki a yonkuman ya be bigin waka na a uman ya baka ‘wanboowanboo’. Ma den taa vers a fesi e soi taki a omen sani a yonkuman ya be du fosi a du a gaan sondu.

⁹ San a yonkuu man ya du fosi a du a gaan sondu? A fosi sani di a du, a taki di neti be e koosube a go ‘waka koosube fu a pasi pe a hulu-uman be e tan’. Te fu kaba a go na a se fu a osu fu a uman ya (Leisi Odo 7:8, 9). Baka di a si a uman ya, aa daai baka. A waka go doo neen a meke a uman bosi en. A be e aliki den switi wowtu di a uman ya be e taigi en fu di a be wani a si en enke bunbun sama (Leisi Odo 7:13, 14, 21). Efu a yonkuman ya be meke moiti wai pasi gi den sani di be sa tyai ogii gi en, noiti a be o sondu. Ogii á be o miti en bakaten tu.

10. Fa wan sama aini a ten ya sa meke aseefi fowtu di a yonkuman be meke?

¹⁰ A sani di Salomo sikiifi e soi san kan pasa anga ibiiwan sama di e dini Yehofa. A kan taki u du wan gaan sondu da bakaten we pakisei taki ‘a te fum denki neen sani miti mi’. Ma tei teke ten pakisei san pasa tuutuu efuso faa sani waka, da ye kon si taki a di ya du sani anga koni neen sani miti i. A kan taki i be e paa anga sama di nai tyai denseefi bun. Kande i be e aliki poku efuso luku sani di á bun. A kan taki i wawan be lobi de a wan peesi efuso e taki anga sama a internet ala yuu. Neen meke te fu kaba i nai begi Yehofa moo, i nai leisi i Beibel moo, i nai go a den komakandaa efuso peleiki moo. We a leti enke a yonkuman di u be taki fi en. Son yuu a omen sani e pasa fosi wan sama du wan gaan sondu.

11. San o yeepi u fu wa sondu?

¹¹ San a sani ya e leli u? A toli ya e leli u taki u mu koti pasi gi den sani di sa meke u sondu. Na a sani ya Salomo taki di a sikiifi a toli fu a yonkuman anga a hulu-uman. A be taki fu a uman ya taki: ‘Yu á mu go a pe ai go’ (Odo 7:25). A taki tu taki ‘Ná go koosube fu pe ai tan’ (Odo 5:3, 8). A sani di o yeepi u fu wa sondu, a te we meke moiti fu wa go koosube fu den sani di sa meke u taanga-yesi Yehofa. b. Son yuu enke Kelesten kande u wani du wan sani di Beibel nai kuutu, ma tokuso u mu luku bun fu a sani ya á meke u sondu bakaten.​—Mat. 5:29, 30.

12. Sowtu kuudei Yopu be meke? Fa a sani ya be yeepi en fu aa sondu? (Yopu 31:1)

¹² U mu de kabakaba fu du sani anga koni efu wa wani du sani di o meke u sondu bakaten. Na a sani ya Yopu be du. A be ‘meke wan kuudei anga en ai’ taki noiti aw luku wan taa uman anga a fii fu didon anga en (Leisi Yopu 31:1.) A sani de be o yeepi en fu aa waka gi en uman. Useefi sa du ala san u man fu wai pasi gi sani di sa meke u sondu.

13. Saide wa mu e pakisei sani di á bun? (Luku a fowtow.)

¹³ U mu du ala saw poi fuu nai pakisei  sani di á bun (Ek. 20:17). Son sama e taki a ná wan fowtu sani fu denki sani di á bun, solanga i nai go du en namo. Ma a denki de a ná wan bun denki, bika na a sani di wan sama e pakisei naamo, neen aw go du te fu kaba. Efu we pakisei sani di á bun, aw taanga gi u fu du san bun. A tuu taki wanwan leisi son denki o go e kon di á fiti wan Kelesten. Ma te a sani ya pasa, wa mu daaidaai. U mu meke moiti pakisei sani di bun. Te u du a sani ya we yeepi useefi fu wa go du wan gaan sondu bakaten.​—Fili 4:8; Kol. 3:2; Yak. 1:13-15.

14. Saw yeepi u fa wa go du sani di á bun?

¹⁴ Wan taa sani di o yeepi u fu wa go du sani di á bun, a te we biibi taki a soso wini wo fende te we holi useefi a den weiti fu Yehofa. Son yuu aw taanga fu denki enke Yehofa efuso libi enke fa a wani. Ma efu u meke moiti wo piisii tuutuu.

15. Fa a meke di wo meke moiti fu du san bun ala yuu o yeepi u fu wa sondu?

¹⁵ U mu du ala saw poi fu lobi san bun. ‘Efu we buuse ogii, da u lobi san bun’ a sani de o yeepi fu wa du sani di o meke u sondu (Amos 5:15). Aw yeepi u tu fu taampu gingin winsi a wanboowanboo u kisi a fii fu du wan sani di Yehofa á lobi.

16. Fa a poti di wo poti pakisei a yeye sani o yeepi u fa wa sondu? (Luku a fowtow.)

¹⁶ Efu u wani lobi san bun, u mu meke moiti fu poti pakisei a den moo pelensipali sani. Te u de aini a peleikiwooko efuso a den komakandaa, u nai kisi a fii fu du sani di á bun a den pisi yuu de. Bika a den sani ya e yeepi u fu wi anga Yehofa toon moo bun mati (Mat. 28:19, 20; Heb. 10:24, 25). Te we leisi Beibel anga te we pakisei san u leisi, we kon lobi san bun. Wo buuse ogii (Yow. 1:8; Ps. 1:2, 3; 119:97, 101). Yesesi be taigi den bakaman fi en taki: ‘U mu de  na ain, da we begi naamo fu wa sondu te tesi miti u.’ (Mat. 26:41). Efu we begi Yehofa ala yuu, da dati e soi taki u wani a yeepi u. Wo du sani di o meke a piisii tu.​—Yak. 4:8.

DE NA AIN ALA YUU

17. Sowtu swakifasi be de enke wan tesi gi Peitilisi?

¹⁷ A omen fu den swakifasi fuu u poi wini. Ma son yuu a wan hii pisiten son wan fu den e fooseli u. A bunbun moiti wi abi fu meke fu wa sondu. Pakisei a toli fu Apostel Peitilisi: Fu di a be e feele libisama meke a be taki dii leisi taki aa sabi Yesesi (Mat. 26:69-75). Ma bakaten a gei enke Peitilisi be wini a swakifasi fi en, bika a be soi deki-ati di a be mu piki den heiheiman na a Gaan kuutu-osu fu den Dyu. A dei de aa be e feele moo (Toli 5:27-29). Ma tokuso wantu yali baka dati aa be wani nyan makandaa moo anga den taa nasi sama, bika ‘a be e feele san den Dyu di be besnei be o taki’ (Gal. 2:11, 12). A swakifasi fu Peitilisi be kon baka. A gei enke aa be wini en ete.

18. San sa pasa anga son swakifasi di wi abi?

¹⁸ Son yuu na aseefi sani di u taki fi en dyonson de e miti u tu. Leti enke Peitilisi we si enke u naabi wan swakifasi moo, ma baka wan pisiten we si a manii ya baka. Wan baala e taki: ‘A tin yali kaba di mi nai luku sekisi felon moo. Mi e biibi taki mi naabi a swakifasi ya moo tu. Ma tokuso a fii ya sa opo kon wanwan leisi efu mia luku bun’. A baala ya fusutan taki aa mu gi abaa, ma taki a mu meke taanga moiti fu man wini a takuu gwenti ya. Neen meke ala yuu baka ai du sani anga koni. En uman anga den owluman fu a kemeente de enke wan gaan yeepi gi en tu.

19. Saw mu du efu te anga now wi abi wan swakifasi di we feti anga en?

¹⁹ Saw yeepi u fa wa sondu, efu wi abi wan swakifasi di te anga now we feti anga en? A sani di o yeepi u, a te we du san Yesesi taigi u. A be taki: ‘De na ain’  A winsi we fii enke u taanga son yuu, tokuso u mu luku bun anga sani di sa meke u sondu (1 Kor. 10:12). Tan du den sani di o yeepi i fu tan a Yehofa se. A sani ya e soi tu taki u mu ‘meke ala moiti fu wa sondu’​—2 Peit. 3:14.

DEN WINI DI WO FENDE TEW DE NA AIN

20-21. (a) Sowtu wini wo fende tew de na ain? (b) San Yehofa o du gi u te we du saw poi? (2 Korentesama 4:7)

²⁰ A omen wini we fende, te we du ala san u poi fu de na ain. A tuu taki a sondu e meke wan sama piisii fu wan satu pisiten te ai du wan sani di Yehofa á lobi. Ma efu we du ala san u man fu holi useefi a den weiti fu Yehofa, wo moo piisii (Heb. 11:25; Ps. 19:8). A sani ya e soi taki u poi libi enke fa Yehofa wani (Gen. 1:27). Wo abi wan kiin kosensi bakaten, ma boiti dati wo poi libi fu teego aini a ten di e kon.​—1 Tim. 6:12; 2 Tim. 1:3; Yudasi 20, 21.

²¹ A tuu taki ‘a sikin swaki’ so na tuu, ma dati á wani taki u kaba a soso. Yehofa de kabakaba fu yeepi u. Ai gi wa kaakiti di wi abi fanowdu fu feti anga den swakifasi fuu (Leisi 2 Korentesama 4:7). Dati na a kaakiti di bigi moo san wi enke libisama poi fusutan. Ma fosi dati, useefi mu du ala san u man fu wai pasi gi den tesi di e miti u​—na a faantiwowtu de ibiiwan fu wi abi. U sa biibi taki Yehofa o aliki den begi fuu, efu we begi en fu a gi wi a kaakiti di wi abi fanowdu (1 Kor. 10:13). A poi yeepi u fu taampu gingin te tesi e miti u.