1. Fa den sani di ye leli e meke i fii?

 A FOLUKU fu Yehofa lobi den sani di den e leli aini a Wowtu fi en. Ai yeepi u fu taanga u biibi (Rom. 10:17). U kon sabi tu taki a Yehofa sete a Kelesten kemeente enke ‘wan ponsu anga a fondamenti fu a tuu leli’ (1 Tim. 3:15). We poolo taki wi abi ‘den sama di e teke fesi’ aw mindii. Den e tyai den tuu leli fu a Beibel kon a kiin gi u, den e yeepi u tu fu libi enke fa Yehofa wani.​—Hebrewsama 13:17.

2. Enke fa Yakowbesi 5:19 e taki, da saw yeepi u baka di u kon sabi a tuu?

² Winsi faw kon leli sabi den tuu leli fu Beibel anga den sani di a olikanisâsi fu Yehofa e taigi u, tokuso u mu luku bun fu sama á fende u koli (Leisi Yakowbesi 5:19). Bika a wan kodo sani di Saatan wani, a fu u nai fitoow a Beibel moo anga den sani di a olikanisâsi e taigi u.​—Efe. 4:14.

3. Saide meke wa mu gwe fika a tuu biibi? (Efeisesama 6:13, 14)

³ Leisi Efeisesama 6:13, 14. Aini a ten di e kon Saatan o meke popokandaa fu koli sama a hii goontapu, fu den á saka denseefi a Yehofa ondoo moo (Opb 16:13, 14). U sabi tu taki Saatan o du ala san a poi fu koli a foluku fu Yehofa tu (Opb 12:9). Neen meke a pelensipali taki we meke moiti fu kon sabi san a den tuu leli fu Beibel anga san a den falisi leli di sama e paati. U mu  meke moiti fu du san we leli tu (Rom. 6:17; 1 Peit. 1:22). A sani ya pelensipali efu u wani pasa a gaan banowtu.

4. San wo luku aini a artikel ya?

⁴ Aini artikel ya, wo luku tu sani di o yeepi u fu sabi den tuu leli fu Beibel anga faw sa wooko anga den sani di a olikanisâsi fu Yehofa e leli u. Baka dati, wo taki fu dii sani di o yeepi u fu wa gwe fika a tuu biibi.

WANTU MANII DI O YEEPI U FU KON SABI A TUU

5. Fa a lesipeki di we lesipeki Yehofa e yeepi u fu sabi a tuu?

⁵ Lesipeki Yehofa. Te we lesipeki Yehofa wo lobi en anga u hii ati, a sani ya o yeepi u fu wi á du nawan sani di aa lobi. Wo de kabakaba fu leli san bun anga san a bun, bika a dati o yeepi u fu Yehofa piisii anga u (Odo 2:3-6; Heb. 5:14). Noiti u mu feele libisama te daw daai du sani di Yehofa á lobi, bika son yuu den sani di sama e wani u du, a sani di Yehofa á lobi.

6. Fa a feele di den tin Islayeliman be e feele libisama meke den á taki a tuu?

⁶ Efu we feele libisama moo Gadu, a sani ya sa meke u gwe fika a tuu biibi. Meke u luku a toli fu den 12 man di be kibii go luku a kondee di Yehofa be paamisi den Islayelisama. A feele di tin fu den man ya be feele den Kana-an sama be bigi moo a lobi di den be lobi Yehofa. Den taigi den taa Islayelisama taki: ‘U naw poi feti anga a foluku de bika den taanga moo u’ (Num. 13:27-31). Fu luku en a libisama fasi da den Kana-an sama be taanga moo de Islayelisama tuu. Ma ibiiwan fu den Islayelisama di be e si enke den á be o poi wini den feyanti fu den, á be e si enke Yehofa poi yeepi den. Den tin sipiyon be mu poti  pakisei a den sani di Yehofa be wani den Islayelisama du. Efu den be poti pakisei a den sani di Yehofa du gi den aini den ten di pasa, den be o si taki Yehofa taanga moo den Kana-an sama. Yowsuwa anga Kalepu be wani Yehofa piisii anga den, neen meke den taigi a foluku taki: ‘Efu Yehofa e piisii anga u, aw tyai u go na a kondee ya. Aw gi wi a kondee.’​—Num. 14:6-9.

7. Faw sa soi taki we lesipeki Yehofa ala yuu? (Luku a fowtow.)

⁷ Wan fasi faw sa soi taki we lesipeki Yehofa a te we meke moiti fu du san a lobi ala yuu (Ps. 16:8). Te ye leisi son toli aini Beibel, a bun fu akisi iseefi taki: ‘San mi be o du efu a mi a sani ya be miti? Kande i sa sidon pakisei di den tin Islayeliman be bigin taki den naw poi wini den Kana-an sama. Sai be o du efii be de ape? I be o feele san den man ya taki? Efuso i be o soi taki ye fitoow Yehofa dai meke moiti du sani enke fa a wani? A omen fu den Islayelisama á be wani biibi taki Yowsuwa anga Kalepu e taki a tuu. Neen meke a tyali taki den á go aini a Paamisi Kondee.​—Num. 14:10, 22, 23.

8. Sowtu manii u mu meke moiti fu kon abi? Saide u mu meke a moiti ya?

⁸ Sakafasi. Yehofa e meke den sama di abi sakafasi kon sabi den tuu leli fi en (Mat. 11:25). Na a manii ya e yeepi u fu wooko anga den sani di we leli (Toli 8:30, 31). Ma tokuso u mu luku bun fuu nai fii useefi. Efu we fii useefi, wo bigin si enke den sani di we du efuso taki, na aseefi enke san Beibel e leli u. Wo go e si enke a fasi fa we denki na aseefi enke san a olikanisâsi e taigi u tu.

9. Faw sa tan soi sakafasi?

⁹ Efu we holi a pakisei taki Yehofa bigi moo wi, da a sani ya o yeepi u fu u tan abi sakafasi (Ps. 8:3, 4). U sa akisi Yehofa fu a yeepi u fu abi moo sakafasi anga fu de kabakaba fu teke den leli di taawan e gi u. Yehofa e yeepi u fu u si taki den sani di a abi a pakisei fu du pelensipali moo den sani di u wani. Ai koboloiki a olikanisâsi anga a wowtu fi en fu du a sani ya. Te ye leisi Beibel i sa luku sowtu sani e soi taki Yehofa lobi te sama abi sakafasi anga fa ai buuse den sama abi heimembee. A de fanowdu taki we tan meke moiti fu abi sakafasi tu, moomoo te u fende wan gaandi aini a olikanisâsi.

FAW SA TAN DU SANI ENKE FA A TUU BIIBI E SOI?

10. Sama Yehofa e koboloiki fu gi a foluku fi en leli?

¹⁰ Tan fitoow den leli di a olikanisâsi fu Yehofa e gi u. Yehofa be e koboloiki Mosesi anga Yowsuwa na a ten fu den Islayelisama fu gi a foluku fi en leli (Yow. 1:16, 17). A omen belesi den Islayelisama be e fende te den be e si den man ya enke sama di Yehofa be poti fu tii den. Ma baka omen ondoo yali a Kelesten kemeente be sete. A ten de, a den 12 apostel be e soi den kemeente san den be mu du (Toli 8:14, 15). Bakaten, neen taa owluman aini Yelusalem di á be de apostel be kon aini a kulu ya tu. Fu di den be e wooko anga den sani di den man ya be e taki, meke a biibi fu den kemeente be e kon moo taanga. Dei fu dei moo sama be e toon Yesesi bakaman (Toli 16:4, 5). A omen wini we fende te we wooko anga den sani di a olikanisâsi fu  Yehofa e leli u. Ma fa Yehofa be o fii efu wa be o aliki den baala di a poti fu teke fesi? Fu man piki a akisi ya, da meke u go luku san be pasa anga den Islayelisama di den be de a pasi e go na a Paamisi Kondee.

11. San be pasa anga den Islayelisama di den á be aliki Mosesi enke a sama di Yehofa be poti fu teke fesi? (Luku a fowtow.)

¹¹ Di den Islayelisama be de a pasi e go na a Paamisi Kondee, wantu man di be abi hei posisi á be wani aliki Mosesi enke a sama di Yehofa be poti fu tii den. Den taki: ‘A hii foluku santa [a ná Mosesi wawan] Yehofa de anga den’ (Num. 16:1-3). Awinsi fa a be tuu taki ‘a hii foluku be santa’ tokuso a Mosesi Yehofa be gi a faantiwowtu fu tii den (Num. 16:28). Fu di den be e kuutu Mosesi meke a Yehofa den be e kuutu, bika neen be poti Mosesi fu teke fesi. Den á be e poti pakisei a san Yehofa wani, ma den be e poti pakisei a san denseefi wani, bika den be wani moo makiti anga hei posisi. Te fu kaba Yehofa kii ala den heiheiman di á be wani saka denseefi a Mosesi ondoo anga den omen dunsu sama di be e holibaka gi den (Num. 16:30-35, 41, 49). U sa biibi tu taki aini a ten ya, Yehofa á lobi en te sama nai lesipeki den wan di e teke fesi aini a olikanisâsi fi en.

12. Faw sa soi taki we tan fitoow den leli di we kisi fu a olikanisâsi fu Yehofa?

¹² U poi soi taki we fitoow den leli fu a olikanisâsi. Te den baala kon fusutan wan leli fu Beibel moo bun efuso a fasi fa u mu du a peleikiwooko, den nai daaidaai fu taigi u fu du sani taa fasi (Odo 4:18). A di den wani Yehofa piisii meke den e du sani na a fasi ya. Den e du ala san den poi fu holi denseefi  a den weiti fu Yehofa efuso den bun leli di e soi fa a foluku fi en mu tyai denseefi.

13. (a) San a den bun leli di Gadu e gi u? (b) Saw mu du anga den leli ya?

¹³ ‘Holi den bun leli di Gadu gi i taanga’ (2 Tim. 1:13). Den wowtu ‘den bun leli di Gadu e gi u’ wani taki den leli di wi enke Kelesten e fende aini Beibel (Yohanisi 17:17). Den leli ya e yeepi u fu biibi ala den taa sani di a olikanisâsi e taigi u. A omen belesi wo fende, efu u wooko anga den leli ya.

14. Saide meke son Kelesten daai baka gi a tuu?

¹⁴ San sa pasa anga u efu u nai biibi den bun leli di Gadu e gi u moo? Meke u luku wan toli. Na a ten fu den fosi Kelesten omen fu den be e paati lei toli taki a dei fu Yehofa koosube. Kande a wan fu den biifi di apostel Pawlesi be sikiifi meke den be taki a sani ya. Ma sondee fu den go ondoosuku a toli, neen den Kelesten a Tesalonika bigin biibi san den yee. Den be bigin paati a toli ya tu. Efu den be teke ten pakisei den sani di Pawlesi be leli den, sama á be o fende den koli (2 Tes. 2:1-5). Pawlesi be taigi den baala anga sisa fi en taki den á be mu e biibi ala san den e yee. Fu di Pawlesi á be wani a sani ya miti den moo, meke di a sikiifi a du fu tu biifi gi den Tesalonikasama neen a taigi den taki: ‘Mi Pawlesi e sende odi giw, na a fasi ya mi e sikiifi, leti enke faw si aini ala den taa biifi.’​—2 Tes. 3:17.

15. Gi wan toli di e soi saw yeepi u fu sama á fende u koli. (Luku a fowtow.)

¹⁵ San u sa leli fu den sani di Pawlesi be taigi den Tesalonikasama? Te u yee wan sani di nai kai anga den leli fu Beibel efuso u yee wan sani di sa meke u feele, u mu meke moiti fu du sani anga koni. A fosi ten, den feyanti fu u aini Soviyet Unie be paati wan biifi di be gei enke a den baala fu a edekantoo a be komoto. A biifi ya be gi sowan fu den baala anga  sisa taanga-sikin fu komoto aini a olikanisâsi. A fasi fa a biifi ya be sikiifi be gei enke na a edekantoo a komoto tuu. Ma den á be poi koli den baala anga sisa di e dini Yehofa anga den hii ati. Den be fusutan taki den sani di sikiifi aini a biifi á be e kai anga den sani di den be leli. Aini a ten ya, sama di komoto na a tuu biibi e koboloiki sani enke internet son yuu fu koli taawan. Pe fuu meke sama koli u gawgaw anga den sani de, u mu meke ala moiti fu luku efu den sani di we yee efuso leisi e kai anga den sani di we leli.​—2 Tes. 2:2; 1 Yohanisi 4:1.

16. Enke fa Romesama 16:17,18 e soi, da san u mu du efu wan sama gwe fika a tuu biibi?

¹⁶ Meke moiti fu paa anga den wan di nai gwe fika Yehofa. Yehofa wani u dini en makandaa anga den baala anga sisa fu u. A sani ya o yeepi u fu wa gwe fika a tuu biibi. Iniiwan sama di e taki lei fu a olikanisâsi e tyai paati fasi kon aini a kemeente. Efu we paa anga den sama ya, useefi sa bigin biibi sani di ná tuu. Neen meke Yehofa á wani u paa anga den. A sani sa meke u gwe fika Yehofa tu.​—Leisi Romesama 16:17, 18.

17. Sowtu wini we fende te u kon sabi a tuu anga te u nai gwe fika en?

¹⁷ Te u nai gwe fika a tuu biibi a sani ya o yeepi u fu tan koosube a Yehofa, aw yeepi u fu taanga u biibi tu (Efe. 4:15, 16). Aw yeepi u fu Saatan á fende u koli anga den falisi leli fi en, aw yeepi u tu fu pasa a gaan banowtu libilibi. Neen meke u mu holi den bun leli di Gadu giw taanga. Efu u du a sani de, a ‘Gadu fu freide o de anga u.’​—Fili 4:8, 9.