Nicolas anga Celine be miti wan taa tesi. Den be kisi wan biifi fu a beikantoo fu Faansi kondee fu foloisi go a wan taa kemeente. Den taki: ‘Na a bigin u be poolo te, ma bakaten u bigin pakisei den mati fuu. Wi anga den baala anga sisa fu a nyun kemeente á be toon mati ete’. a Tei luku den toli ya, fai sa tan du sani anga piisii winsi i foloisi go a wan taa kemeente? Fa taawan sa yeepi i? Fai sa gi taawan taanga-sikin aini a nyun kemeente? Fa taawan sa gii taanga-sikin?

FO SANI DI O YEEPI I TEI GO A WAN TAA KEMEENTE

1. I mu fitoow Yehofa (Ps. 37:5). Kazumi di e tan aini Japan taki fu di en man be fende wan wooko, meke den be mu foloisi gwe fika a kemeente di den be de 20 yali. Fa a ‘meke Yehofa soi en fa a mu libi’? A taki: ‘Mi be e taigi Yehofa kiin fa mi e fii, bika mi be e feele. Mi be e fii enke a mi wawan de. Mi be e booko mi ede tu. Ala yuu te mi be e fii so, Yehofa be e gi mi a kaakiti di mi be abi fanowdu.’

Fai sa meke moiti fu moo fitoow Yehofa? Leti enke fa wan sii abi wataa fanowdu fu goo, a so u mu meke moiti fu taanga u biibi. Enke fa Nicolas be taki, da a teke di a be e teke ten pakisei toli fu sama enke Abraham, Yesesi anga Pawlesi be gi en taanga-sikin fu du ala san a poi fu libi enke fa Gadu wani. A be e biibi tu taki Yehofa be o holibaka gi en. Efu ye meke moiti fu sutudeli a Wowtu fu Gadu ala dei, a sani ya o yeepi i fu du sani anga koni te sani kengi aini i libi. Aw yeepi i tu fu gi taawan taanga-sikin aini a nyun kemeente.

 2. Ná maiki a nyun kemeente anga a gaandiwan (Pel 7:10). Di Jules be foloisi fu Benin go na Ameekan kondee, da a fasi fa den sama de be e du sani be de taa fasi enke fa a be gwenti. A taki: ‘Ala yuu te mi be miti wan sama, mi be e fii enke mi mu taigi en sama a mi’. Ma fu di aa be gwenti a sani ya, meke aa be wani paa anga a kemeente. Ma baka di a be kon leli sabi den baala anga sisa moo bun, a be kon si sani taa fasi. A taki: ‘Mi be kon fustan taki a naabi toobi winsi pe fu goontapu u de, ala libisama na aseefi. Ma den e du efuso taki sani taa fasi. A naabi toobi sowtu lo efuso nasi u komoto a moo pelensipali sani, a taki ala u na aseefi.” Neen meke wa mu maiki a nyun kemeente di u de anga a gaandiwan. Mi be kon fustan taki mi be sa leli sani fu den baala anga sisa di mi miti na a taa kemeente. A mi be mu mu meke moiti fu si wan bun sani aini den baala anga sisa fu mi. Neen meke mi be e meke moiti fu mi á maiki a gaandi kemeente anga a nyun wan. Mi be e meke moiti tu fu mi á luku san mi be fika a baka, ma mi be e meke moiti fu leli sabi den baala anga sisa moo bun. Anne-Lise taki ‘Mi foloisi fu di mi be wani leli nyun sani. Mia foloisi fu di mi be e pakisei taki mi o fende ala den sani di mi be abi baka.’

Owluman seefi mu meke moiti fu den nai maiki a nyun kemeente anga a gaandiwan. A ná fu di den baala e du sani taa fasi aini a nyun kemeente dii go, da dati wani taki den nai du sani bun. Neen meke a bun fii sabi fa den baala e du sani na a pisi pei foloisi go, fosi i taigi den san den mu du (Pel 3:1, 7b). Pe fii ye fooseli den baala fu denki efuso du sani enke yu, a be o moo bun fu tyai iseefi bun. A sani ya o yeepi taawan fu waka a yu baka.​—2 Kor. 1:24.

3. Du sani makandaa anga den baala anga sisa (Fil 1:27). Winsi omen wooko yu abi fu du te i foloisi tokuso a bun fu meke moiti fu go a komakandaa wanten na a kownukondee zaal fu a nyun kemeente pei foloisi go. Efu i nai go a den komakandaa, da fa den baala anga sisa o poi gii taanga-sikin? Lucenda di foloisi anga den tu umanpikin fi en go aini wan gaan foto aini Zuid-Afiikan taki: Den mati fu mi be gi mi taanga-sikin fu meke mati anga den baala anga sisa aini a kemeente, fu go peleikiwooko makandaa anga den anga fu gi piki a komakandaa. U be taigi den baala tu taki den be sa holi a peleikiwooko komakandaa a wi osu.

Te we ‘wooko makandaa’ anga u baala anga sisa aini a peleikiwooko, da a sani ya o yeepi u fu taanga u biibi. Anne-Lise di u be taki fi en kaba taki den owluman be gi en taanga-sikin fu wooko anga ala den baala anga sisa aini a nyun Kemeente. San be de a bakapisi? A taki: ‘Di mi du a sani ya mi be e fii tuutuu taki mi de a mi baala anga sisa mindii’. Te ye yeepi kiin a kownukondee zaal, ye soi i baala anga sisa taki i wani de makandaa anga den aini a nyun kemeente. O moo ye mosoo anga den baala anga sisa o moo yo fii taki den a yu famii.

 4. Meke mati aini a nyun kemeente (2 Kor. 6:11-13). Efu sama e si taki yu e booko yu ede anga den, den o wani toon i mati. Neen meke a bun fi ye kon fuuku a den komakandaa, da yo fende moo ten fu taki anga i baala anga sisa. Baka a komakandaa i sa tan moo langa fu taki anga den tu. Meke moiti fu sabi den nen. Te i nai feegete den nen fu den anga te ye taki switi anga den, aw moo makiliki gi den fu taki anga i. Den o wani leli sabi i moo bun, a so yu anga den o toon bun mati.

A be o moo bun fu meke den nyun mati fii sabi fai de tuutuu, yu á mu du enke wan taa sama . U sa waka a Lucinda baka. A taki: ‘Wi anga den toon bun mati nownow fu di u kai den kon a wi osu.’

‘BALI WADAA GI TAAWAN’

Omen sama e feele te den kon fosi leisi a komakandaa, sen e kisi den. Ma saw u sa du te wan sama kon a fosi leisi na a kemeente? Apostel Pawlesi be taki: ‘U mu bali wadaa gi taawan leti enke fa Kelestesi be bali wadaa gi u’ (Rom. 15:7). Owluman sa waka a Kelestesi baka te den e meke den nyun sama fii taki a osu den de. (Luku a faki ‘ Saw yeepi i fu sani waka bun na a nyun kemeente?’). Ala sama aini a kemeente, pikinnengee seefi sa toon mati anga den nyun sama di kon.

Te ye kai sama kon a yu osu a wan fasi fa ye bali wadaa gi den tu. Wan sisa be tyai wan taa sisa di be foloisi kon na a pisi pe ai tan fu soi en pe a mu teke wagi fu go a wan taa peesi. A sani ya be yeepi a taa sisa fu fii taki a de a osu.

WAN OKASI FU GOO

Te wan makonkon e kon gaandi, ai moo kengi buba, a sani ya e yeepi en fu a poi fee bun. A so a de tu tei go a wan taa kemeente. Leti enke fa a makonkon e kengi buba fu poi fee bun, a so i mu du ala san i man fu du moo gi Yehofa. Nicolas anga Céline taki tei foloisi go a wan taa kemeente, a okasi e opo gi i fu leli omen sani. Den taki: ‘Fu di u be e meke moiti fu du sani enke den sama  na a pisi pe u foloisi go, meke a sani ya be yeepi u fu du sani moo bun’. Jean-Charles be taki fa en osufamii be fende wini fu a sani ya. A taki: ‘Di u foloisi go na a taa kemeente den pikin fu u be e du sani taa fasi. Den be toon moo bun mati fu Yehofa tu. Baka wantu mun, a umanpikin fu u be poti en nen na a sikoo fu holi lezing a den mindiiwiki komakandaa. A boi fu u be toon wan peleikiman di á dopu ete.’

Sai sa du winsi i naabi a okasi fu foloisi go a wan taa peesi pe moo yeepi de fanowdu? I sa luku den sani di kai aini a artikel ya. Den sani ya o yeepi i fu fii bun aini a kemeente di i de. Meke moiti fu fitoow Yehofa, wooko anga taawan aini a peleikiwooko, meke moiti tu fu toon mati anga taawan efuso toon moo bun mati anga den wan di i sabi kaba. Meke moiti fu yeepi den nyun wan di kon aini a kemeente efuso den wan di abi yeepi fanowdu. Te ye soi lobi gi taawan da a sani ya o yeepi i fu kon moo koosube a Yehofa (Yohanisi 13:35). I sa biibi taki ‘Gadu lobi den sowtu ofaandi ya’​—Heb. 13:16.

Winsi fa aa makiliki tei foloisi go a wan nyun kemeente, tokuso a omen baala anga sisa du a sani ya. A sani ya yeepi den fu go a fesi a waaleiti. Iseefi sa fende wini tu tei du a sani ya. Anne-Lise taki: ‘Di mi go a wan taa kemeente a sani ya yeepi mi fu kon fusutan san a wani taki fu opo yu ati gi taawan’. Kazumi e biibi now taki: ‘efi i foloisi go a wan taa kemeente Yehofa o holibaka gi i’. Jules taki: ‘Den mati di mi abi soi mi taki den lobi mi tuutuu. Mi e fii bun te mi de a mi baala anga sisa mindii. Now mi kon lobi den baala anga sisa fu a kemeente ya. Efu a kon taki mi mu gwe fika a kemeente, aw taanga gi mi.’