1-2. San Beibel e taigi u fu son Kownu fu Islayeli?

 A BEIBEL e taki fu moo enke 40 man di be e tii enke Kownu fu Islayeli. a Ai taki finifini fu omen fu den sani di den man ya du. Pakisei a sani ya: A omen fu den bun kownu du omen sani di Yehofa á lobi. Yehofa be taki fu Kownu David taki: ‘Mi futuboi David . . . aliki mi anga en hii ati. A be e du sani enke fa mi wani ala yuu’ (1 Kow. 14:8). Ma tokuso David be teke sama uman, neen bakaten a meke den kii a man fu a uman ya aini wan feti.​—2 Sam. 11:4, 14, 15.

² A beibel e taki tu fu wantu bun sani di son kownu du, winsi fa den á be e libi a wan leti-fasi. Denki a toli fu Rehabeyam. Yehofa be e si a man ya enke wan sama di e ‘du ogii’ (2 Kolon. 12:14). Ma tokuso a aliki Yehofa, di a taigi en taki aa mu go feti anga a tin lo kownukondee fu Islayeli. A be meke omen fu den foto kon taanga tu, bika a sani ya be o yeepi den te feyanti be o kon feti anga den.​—1 Kow. 12:21-24; 2 Kolon. 11:5-12.

3. Sowtu pelensipali akisi e opo kon? San wo luku aini a artikel ya?

³ Akisi iseefi a sani ya: A omen fu den kownu fu Islayeli be du bun sani, taawan be du omen ogii. Ma san Yehofa be e luku fu be man taki wan kownu e dini en anga en hii ati? A piki fu a akisi ya o yeepi u fu sabi san u mu du fu Yehofa piisii anga u. Wo taki fu dii sani di Yehofa be e  poti pakisei te a be e luku den kownu fu Islayeli. A fosiwan: Na a ati fu den. Du fu tu, den be mu soi taki den fowtu di den meke e hati den anga du fu dii, den be mu dini Yehofa enke fa a wani.

LOBI YEHOFA ANGA I HII ATI

4. San be kengi a den kownu di be e libi enke fa Yehofa wani anga den wan di á be e libi enke fa a wani?

⁴ Den kownu di be e libi enke fa Yehofa wani, be e dini en anga den hii ati. b Kownu Yowsafat a be wan bun Kownu di be e ‘dini Yehofa anga en hii ati’ (2 Kolon. 22:9). A Beibel e taki fu Yosiya taki: ‘Nawan kownu be de fosi Yosiya, di be meke so fuu moiti fu dini Yehofa baka a wan bun fasi.’ (2 Kow. 23:25). Ma fa fu Salomo di be du omen ogii sani bakaten? We a sani ya pasa fu di ‘aa be e dini en Gadu Yehofa anga en hii ati moo.’ (1 Kow. 11:4). Abiyam, a wan taa kownu di á be e libi enke fa Gadu wani. Enseefi ‘á be e dini Yehofa anga en hii ati.’​—1 Kow. 15:3.

5. San a wani taki fu dini Yehofa anga i hii ati?

⁵ Wan sama di e dini Yehofa anga en hii ati, nai dini en fu di a sabi taki a mu du a sani de. Ma ai dini Yehofa fu di a lobi en anga fu di ai lesipeki en.

6. Saw yeepi u fu dini Gadu anga u hii ati? (Odo 4:23; Mateyesi 5:29, 30)

⁶ Wan sani di o yeepi u fu waka a den bun kownu baka anga fu dini Gadu anga u hii ati, a te we meke moiti fu wai pasi gi sani di sa poli u. Efu den sani di we du fu piisii á bun, u naw poti ala u pakisei a Yehofa moo. U mu luku bun sama we teke enke mati, bika wa wani bigin si moni anga gudu enke den moo pelensipali sani. Efu u si taki wan sani de di sa meke u naw lobi Yehofa enke fosi moo, wa mu daaidaai fu puu a sani de a pasi.​—Leisi Odo 4:23; Mateyesi 5:29, 30.

7. Saide u mu luku bun anga den sani di sa poli wi anga Yehofa?

⁷ U mu du ala saw man fu wi ati á de a tu se. Efu wa luku bun, u sa denki taki fu di we dini Yehofa fayafaya da ala sani bun kaba. Ma denki a toli ya: Meke u taki i de a osu wan bun dei, neen i sibi yu osu te a kiin. Ma baka dii kiin yu osu tei kaba, neen wan gaan winta bigin e wai. I si enke a be o de wan koni sani fu fika ala den fensee anga den doo opo-opo fu santi wai kon aini a osu fii? Nono! We na aseefi fasi a de tu anga a de di wi anga Yehofa a mati. Awinsi we du ala saw poi fu kon moo koosube neen, tokuso u mu tapu pasi gi den sani di sa poli wi anga en.​—Efe 2:2

DEN SOI TAKI DEN SONDU FU DEN E HATI DEN

8-9. Fa Kownu David anga Kownu Heskiya be e tyai denseefi te taawan be e poti den a pasi? (Luku a fowtow a fesise.)

⁸ Kownu David be meke wan gaan fowtu enke faw be leisi aini a fosi paragraaf. Ma di Natan go taigi en fa Yehofa be fii, a soi taki a sani di a du be hati en. (2 Sam. 12:13). Den sani di a taki aini Psalm 51 e soi taki tyali be kisi en fu san a du. A ná du a be e du enke tyali be e kisi en fu di aa be wani den sitaafu en.​—Ps. 51:3, 4, 17, den wowtu na a bigin.

⁹ Kownu Heskiya seefi be du sani di Yehofa á lobi. Beibel e taki: ‘A be kon abi heimembee. Neen meke Gadu ati boon neen anga den sama fu Yuda anga  Yelusalem’ (2 Kolon. 32:25). Ma saide meke Heskiya be sa bigin fii enseefi? We kande a fu di a be kon gudu, kande fu di a be wini den Asiriya sama efuso di Yehofa be meke a kon betee baka di a be siki fu dede. A kan tu taki a heimembee meke a be soi den Babilonsama den gudu fi en, neen meke polofeiti Yesaya be taigi en taki Yehofa ati be boon neen (2 Kow. 20:12-18). Ma leti enke David, Heskiya be soi taki den fowtu di a meke be e hati en (2 Kolon. 32:26). Bakaten aini den lasti kapitel di e taki fu a kownu ya, we leisi taki Yehofa be si en enke wan kownu ‘di be e du san bun.’​—2 Kow. 18:3.

10. San Kownu Amasiya du di den poti en a pasi?

¹⁰ Kownu Amasiya be du bun sani, ‘ma ná anga en hii ati’ (2 Kolon. 25:2). Baka di Yehofa yeepi en wini den Edom sama, neen Amasiya go dini den Gadu fu den. c Di a polofeiti fu Yehofa go taigi en taki a ná wan bun sani a du, neen a bali en fu a tapu en mofu.​—2 Kolon. 25:14-16.

11. Enke fa 2 Korentesama 7:9, 11 e soi, da saw mu du efu u wani Yehofa gi u paadon? (Luku a fowtow.)

¹¹ Den toli ya e leli u taki, u mu soi taki den fowtu di u meke e hati tuutuu. Wa mu meke den seefi fowtu moo tu. Awinsi a wan pikin sani pasa neen den baala poti wi a pasi, noiti wa mu si enke den owluman efuso Yehofa á lobi u. Bika aini a ten di pasa Yehofa be e puu kaasi gi den bun kownu tu te den be meke wan fowtu (Heb. 12:6). Te den e poti wi a pasi (1) u mu soi sakafasi, (2) u mu meke moiti fu kengi (3) u mu du ala saw poi fu dini Yehofa go doo. Efu u soi taki a fowtu di u meke e hati tuutuu, Yehofa o gi u paadon.​—Leisi 2 Korentesama 7:9, 11.

DEN BE E DINI YEHOFA ENKE FA A WANI

12. San be de taa fasi a den kownu di be e libi enke fa Yehofa wani?

¹² Den kownu di Yehofa be e si enke bun kownu, be e du ala san den man fu dini en enke fa a wani. Den be e gi a foluku fu Gadu taanga-sikin fu du aseefi sani tu. A tuu taki den be e meke fowtu. Ma san moin a taki na a dini di den be mu dini Yehofa be de a moo pelensipali sani gi den. Den be e poli ala den taa falisi gadu aini den kondee. d

13. Saide Yehofa á be e si Akab enke wan bun kownu?

¹³ Ma fa fu den kownu di Yehofa á be e si enke bun kownu? We a ná soso ogii den man ya be e du. Pakisei Kownu Akab. Ná pikin tyali kisi en di a yee taki den kii Naabot fu a goon fi en ede (1 Kow. 21:27-29). A omen foto a man ya meke. A be wini omen feti gi Islayeli tu (1 Kow. 20:21, 29; 22:39). Ma a man ya be du wan sani di Yehofa á be lobi seefiseefi. Fu di a be e aliki en uman, meke a go dini falisi gadu. Aa be hati en taki a du a sani ya.​—1 Kow. 21:25, 26.

14. (a) Saide Yehofa á be e si Rehabeyam enke wan bun kownu? (b) Sowtu manii den kownu di á be bun be abi?

¹⁴ Wan taa kownu di á be libi enke fa Yehofa wani a Rehabeyam​—A omen bun  sani a man ya du di a be e tii enke kownu. Ma baka di a kisi moo makiti, neen a daai baka gi den Weiti fu Yehofa. A be go dini falisi gadu (2 Kolon. 12:1). A wan hii pisiten a be e dini Yehofa, ma na aseefi ten a be e dini falisi gadu tu (1 Kow. 14:21-24). Boiti Rehabeyam anga Akab, a omen taa kownu daai baka gi a tuu biibi. Den man ya be go dini falisi gadu. Ma na a taa se den be e gi taa sama taanga-sikin fu du aseefi sani ya tu. Gi Yehofa, efu wan kownu á be e dini en enke fa a wani, da so wan sama a ná be wan bun kownu.

15. Saide a pelensipali taki we dini Yehofa enke fa a wani?

¹⁵ A be pelensipali gi Yehofa taki den kownu be e dini en enke fa a wani, bika a den be abi a faantiwowtu fu yeepi a foluku fu dini en anga den hii ati (Hos. 4:1, 2). Wan taa sani tu, a taki den kownu a be fu Yehofa. Den Islayelisama a be a foluku fi en. Neen meke Beibel e taki te den be go dini taa gadu ‘a waka den be e waka gi Yehofa’ (Yel. 3:8, 9). Te wan sama waka gi en toowpaa, a wan gaan ogii ai du anga a taawan. Bika a wan sani di e hati en tuutuu. Na aseefi fasi a de anga wi di e dini Yehofa tu. Ná pikin hati ai hati Yehofa te u daai baka gi en daw go dini falisi gadu. e​—Deit. 4:23, 24.

16. On ten wan sama e libi a wan leti fasi gi Yehofa?

¹⁶ Wan sani di u leli te anga now, a taki noiti u mu go dini falisi gadu. U mu meke moiti ala yuu fu tan a Yehofa se, da u dini  en enke fa a wani. A polofeiti Maleyaki be taki wo poi sabi sama a wan bun sama. A be taki: ‘Wo si kiin sama e libi a wan letifasi anga sama e du ogii. Wo si kiin tu sama e dini Gadu anga sama nai dini en’ (Male. 3:18). Neen meke wa mu meke nawan sani tapu u fu dini Yehofa​—wa mu meke den sondu fii fuu efuso den fowtu di useefi e meke tapu u tu​—a wan gaan sondu de ape, efu u nai dini Yehofa moo.

17. Saide u mu luku bun anga sama wo toow?

¹⁷ Den sani di Maleyaki be taki, poi yeepi i fu fende wan bun toowpaa efi ye denki fu toow aini a ten di e kon. A tuu taki son yuu wan sama sa abi omen bun manii. Ma efu a nai dini Yehofa, i si enke Yehofa e si en enke wan sama di e libi a wan letifasi? (2 Kor. 6:14). Efii toow anga so wan sama, aw poi yeepi i fu dini Yehofa anga i hii ati? Ná feegete a sani ya: Kande a omen bun manii den taa kondee uman fu Kownu Salomo be abi. Ma fu di den á be e dini a tuu Gadu, meke te fu kaba den tyai Salomo go dini den falisi gadu fu den tu.​—1 Kow. 11:1, 4.

18. San mma anga dda sa leli den pikin fu den?

¹⁸ Mma anga dda sa poti pakisei a den toli fu den kownu di de aini Beibel fu yeepi den pikin fu lobi Yehofa tuutuu. Meke den fusutan taki, a be pelensipali gi Yehofa taki den kownu be e dini en anga den hii ati. Den be mu yeepi taa sama tu fu dini a tuu Gadu. A dati be e meke a si den enke wan bun kownu. Mma anga dda, den pikin fii mu poi si ala yuu taki yu e si Yehofa enke a moo pelensipali sama aini i libi​—tan sutudeli Beibel, go a den komakandaa, peleiki fayafaya tu ​—a den sani ya o yeepi i fu tan a Yehofa se (Mat. 6:33). Efu mma anga dda e du den sani ya, den pikin fu den o si Yehofa enke wan tuutuu sama. Den o meke moiti fu toon en mati tu. Den naw dini Yehofa soso fu di den e si taa sama e dini en. Bika dati be sa meke den gwe fika en bakaten.

19. Sowtu howpu de gi den sama di nai dini Yehofa moo? (Luku a faki di den e kai ‘ Daai kon baka a Yehofa!’)

¹⁹ Howpu de ete gi wan sama di nai dini Yehofa moo. Bika a sa soi taki a sani di a du e hati en, da a daai kon dini Yehofa baka. Ma efu a wani du a sani ya tuutuu, a mu soi sakafasi da a meke den owluman yeepi en (Yak. 5:14). A moo bun sani di a sama sa du, a fu meke moiti fu Yehofa piisii anga en baka!

20. Fa Yehofa o si u efu we meke moiti fu waka a den bun kownu baka?

²⁰ A toli fu den kownu fu Islayeli e leli u taki, efu u wani de enke den bunwan, daw mu du ala saw poi fu dini Yehofa anga u hii ati. U mu si en enke a moo pelensipali sama aini u libi tu. U mu leli wan sani fu den fowtu di u meke. U mu soi taki den fowtu di u meke e hati u, daw meke en bun baka anga Gadu. Yehofa wani u dini en wawan, a wani u dini en enke fa a wani. Efu ye du ala sai poi fu tan a Yehofa se winsi sai pasa, aw si yu enke wan sama di e libi a wan letifasi.