YEHOFA GADU wani den sama di e dini en libi bun anga denseefi. Te den e du a sani ya, da den baala anga sisa aini a kemeente o libi na a wan. Te sama si fa wi e libi bun anga useefi, den e wani kon dini Yehofa tu.

Wan dataa a Madagaskali di be si fa den Yehofa Kotoigi e libi bun anga denseefi, be taki: ’Efu mi o go a keliki, na a wan ya mi o go.’ A man ya be e dini ogii yeye fosi. Ma a tapu anga a dini di a be e dini ogii yeye, neen a bigin du sani taa fasi aini en osufamii. Baka dati, a bigin dini Yehofa, a Gadu di e meke sama libi na a wan.

Leti enke a man ya, a so omen dunsu sama e kon dini Yehofa ala yali, da den e fende a bun libi di den be e suku senten. Ma Beibel sikiifi taki efu „wi e dyalusu hebi anga useefi, efu wi e meke toobi ala yuu” aini a kemeente, den baala anga sisa ná o libi na a wan. Sani ná o waka bun tu (Yakowbesi 3:14-16). Ma Beibel e soi u fa u sa losi den polobelema ya. Ai soi u tu fa u sa toon bun mati anga u baala anga sisa. Meke u luku fa den sani di Beibel taki yeepi wantu sama.

„Mi anga wan baala be e wooko na a wan wookope. Ma a be taanga gi mi fu libi switi anga en. Wan leisi tu sama si fa u be e kwali.”—CHRIS.

„Mi be lobi wooko anga wan sisa aini a peleikiwooko. Ma wanboowanboo a sisa ya á be wani wooko anga mi moo. Baka dati a puu taki anga mi. Mi á sabi saide.”—JANET.

„Wan leisi mi anga tu sama be e taki a telefon. Di wan fu den gi siibun, mi denki a be saka. Neen mi bigin kuutu en. Ma a be yee ala san mi taki, bika a á be saka a telefon.”—MICHAEL.

„Tu pionili aini u kemeente be abi toobi. Wan fu den be taigi a taawan hati sani. A kwali di den be e kwali be e fooseli taawan.”—GARY.

Kande a gei enke den sani ya a ná gaan polobelema. Ma den sama di den sani ya miti e fii en wan hii pisiten. A sa meke sama puu taki anga taawan aini a kemeente tu. Ma koloku den baala anga sisa ya du san Beibel taki, neen meke den be e libi bun anga denseefi baka. Fa Beibel yeepi den?

„Wi ati á mu boon a useefi te u de a pasi” (Genesesi 45:24). A Yowsefu be taigi den baala fi en a sani ya di den be e daai go a den dda. Te wan sama nai holi enseefi, anga te en ati e boon gaw, a sa meke a polobelema kon moo  bigi. A sani ya sa meke taa sama ati boon tu. Chris be fusutan taki son leisi a be e taanga gi en fu abi sakafasi. A be e taanga gi en fu du sani enke fa Beibel taki tu. A be wani du sani taa fasi, neen meke a begi a baala di en anga en be kwali fu gi en paadon. Baka dati Chris meke moiti fu holi enseefi. Di a baala si a taanga moiti di Chris be e meke, a meke moiti tu. Nownow den tu man e libi bun anga denseefi. Den e dini Yehofa makandaa tu.

„Te sama nai taki kiin anga denseefi, ala sani e buuya” (Odo 15:22). Di Janet mati puu taki anga en, neen Janet du san a tekisi ya taki. A go taki anga a sisa. A akisi en efu a du sani anga en. Na a bigin a be taanga gi den tu man fu taki a taki. Ma di den taki fusutan denseefi, den be fii moo bun. A sisa kon si taki á na san a be denki pasa. A fusutan taki Janet á du nawan sani anga en. A begi paadon, neen den toon mati baka. Now den e dini Yehofa makandaa.

„Efu yu e tyai wan ofaandi go na a altari, neen i membee taki i baala abi wan sani anga i, da i mu fika yu ofaandi na a altari fesi, da i gwe. Meke en bun anga i baala fosi” (Mateyesi 5:23, 24). A Yesesi be taki a sani ya di a be e leli sama na a mongo. Di Michael kuutu a baala a telefon, a á fii bun seefiseefi. A be wani du ala san a poi fu seeka a toli. Neen meke a go na a baala, neen a begi en paadon. Fa sani waka di a du a sani ya? Michael taki: „Mi baala gi mi paadon anga en hii ati.” Den toon mati baka.

„U mu abi boo anga taawan. Gi taawan paadon anga u hii ati tu te wan sama du wan hati sani anga u” (Kolosesama 3:12-14). I sabi den tu pionili di be kwali aini a peleikiwooko ete? Wan owluman taki anga den. A soi den taki a fasi fa den e tyai denseefi e fooseli taawan. Den baala anga sisa aini a kemeente á be e fii bun. A gi den taanga-sikin fu pasensi anga denseefi. Den be mu meke moiti fu libi bun anga denseefi aini a kemeente. Den sisa du san a owluman taki. Nownow den e libi switi anga denseefi. Den e paati a bun nyunsu makandaa.

A sani di sikiifi a Kolosesama 3:12-14 sa yeepi i fu abi sakafasi. A sa yeepi i tu fu gi wan sama di du wan hati sani anga i paadon. Boiti dati a o yeepi i fu yu á pakisei a sani di a sama du anga i moo. Ma san u mu du efu u si taki wi á poi gi a sama paadon? A sani di sikiifi a Mateyesi 18:15 sa yeepi u. Aini a tekisi ya, Yesesi taki san u mu du te wan sama du wan gaan sondu. Ma a sani di a taki e soi u san u mu du tu te wi anga wan baala efuso wan sisa abi sani.  U mu soi sakafasi, da u go taki anga a sama. U mu meke moiti fu seeka a toli.

A omen sani sikiifi aini Beibel di sa yeepi u. Gaanse fu den e soi taki wi abi Gadu santa yeye fanowdu fu man soi „den manii di a yeye e meke sama abi”. Den manii ya na „lobi, piisii, freide, pasensi, switifasi, bunfasi, biibi, safu-ati, dwengi iseefi” (Galasiyasama 5:22, 23). Pakisei a sani ya. Te i poti oli gi wan masini ai daai bun. A leti so wi o poi libi bun anga useefi te wi e meke moiti fu abi den manii fu Yehofa.

A ná ala sama na aseefi. Ibii sama anga en manii. U nai du sani na aseefi fasi. A sani ya e meke a switi fu de mati anga taawan. Ma son leisi a sani ya sa meke u nai fusutan useefi. Wan owluman di abi ondoofeni be soi fa a sani ya sa pasa. A be taki: „Te wan sama e sen, a nai wani de aini sama. Kande a sani ya e gei wan lawlaw sani, ma a sa tyai gaan polobelema.” I si enke sama di ná abi aseefi manii poi libi bun anga denseefi? Meke u luku a toli fu tu apostel. U sabi Peitilisi enke wan sama di be e taki ala sani di kon neen mofu. Ma Yohanisi be e denki bun fosi a taki efuso du wan sani. Peitilisi anga Yohanisi á be abi aseefi manii. Ma den be e dini Yehofa makandaa anga piisii (Toli 8:14; Galasiyasama 2:9). A so a de anga wi aini a ten ya tu. Winsi Kelesten ná abi aseefi manii, tokuso den sa wooko switi anga denseefi.

Ma san i mu du efu wan sama aini a kemeente du efuso taki wan sani di hati i? A bun fu holi a pakisei taki Yesesi dede gi a baala efuso  a sisa tu, leti enke fa a dede gi i. A wani i soi en taki i lobi en (Yohanisi 13:34, 35; Romesama 5:6-8). A á be o bun fu koti pasi gi a sama efuso poli anga en. A moo bun fu akisi iseefi taki: ’A pasa mi baala efuso mi sisa pasa den weiti fu Yehofa? A fu seefi a du a hati sani ya anga mi? A fu di mi anga en a ná aseefi meke mi e denki so? A abi manii di mi be sa wani abi?’

Kon u taki a sama lobi taki, ma i dati á lobi taki. Kande i sa wooko anga en aini a peleikiwooko fu luku san i sa leli fi en. Efuso kon u taki a lobi gi sama sani moo yu. I si fa ai piisii te ai gi gaandi sama, den sama di siki, efuso den sama di abi yeepi fanowdu sani? I sa leli fu a fasi fa a sama lobi gi taawan sani, da i du aseefi tu? Den sani ya e soi taki winsi yu anga i baala efuso sisa a ná aseefi, i sa poti pakisei a den bun manii fi en. Winsi u ná o de bun mati, wi o lobi useefi. A sani ya o yeepi u fu libi bun anga useefi. A o yeepi u fu libi bun anga taawan aini a kemeente tu.

Aini a ten fu den fosi Kelesten, i be abi tu sisa di den e kai Eyodiya anga Sentike. Den á be abi aseefi manii, ma apostel Pawlesi be gi den taanga-sikin fu „denki go na a wan se te den e wooko gi Masaa” (Filipisama 4:2). Useefi wani dini Yehofa anga u baala anga sisa. U wani libi bun anga den aini a kemeente.

Saide u mu meke moiti wanten te u si taki wi e bigin buuse wan taawan? U mu si den fii ya enke te uwii e goo aini moin boomiki. Efu wi á hali den uwii puu, den o tapu den boomiki. A letiso a de anga takuu fii. Efu wi á puu en aini  wi ati, na a hii kemeente o fii en. Ma efu u lobi Yehofa anga u baala anga sisa, wi o du ala san u man fu libi bun anga taawan aini a kemeente.

Te wi e meke moiti fu libi bun anga taawan, wi o foondoo fu si fa sani o waka. Na a sani de pasa anga wan Kotoigi. A taki: „Mi be e si enke wan fu den sisa be e si mi enke pikinnengee. A sani de be e fooseli mi. Neen meke mi á be e taki bunbun anga en. Mi be e denki taki, ’efu a nai lesipeki mi, miseefi ná o lesipeki en.’”

Ma di a sisa ya go sidon denki a fasi fa ai tyai enseefi, a taki: „Mi bigin si den fowtu di miseefi e meke, neen mi bigin fii fuufeli. Mi si taki mi be mu kengi a fasi fa mi e denki. Mi begi Yehofa, neen mi bai wan pikin kado gi en. Mi sikiifi wan kaita tu fu akisi en paadon fu a fasi fa mi be tyai miseefi. U baasa, neen u fika a taki de. Noiti moo mi anga en kisi toobi.”

Ala sama wani libi bun anga taawan. Den wani taawan libi bun anga den tu. Ma son leisi te wan sama e si enke taawan á lobi en, efuso te ai si enke a bun moo taawan, da ai tyai enseefi a wan fasi di á fiti. A so den sama fu a goontapu ya e tyai denseefi, ma den sama di e dini Yehofa mu libi na a wan. Yehofa be meke Pawlesi sikiifi gi den Kelesten taki den mu ’tyai denseefi a wan fasi di fiti sama di Gadu kai’. A taki u mu du a sani ya „anga sakafasi anga safu-ati. U mu abi pasensi, u mu abi lobi, da wi o man abi boo anga taawan. U mu libi bun anga useefi. U mu du ala san u poi fu libi na a wan, enke fa a santa yeye e yeepi u” (Efeisesama 4:1-3). A moin fu si fa a foluku fu Yehofa e „libi na a wan”. Meke u du ala san u poi fu toobi á de aini a kemeente. Te wi á fusutan useefi, u mu meke moiti fu taki fusutan useefi.