1, 2. Fa Yehofa e toosutu u te tesi miti u? San a paamisi u aini en Wowtu?

WAN yonkuu baala di á toow ete be e pakisei san sikiifi aini 1 Korentesama 7:28. A tekisi de taki den sama di toow ’o miti banowtu aini den libi’. A yonkuu baala ya go a wan moo gaandi baala di toow kaba, neen a akisi en taki: San na a banowtu ya? San o yeepi mi anga a banowtu ya di mi o toow? Fosi a gaandi baala piki a yonkuu baala, a taigi en fu a pakisei san apostel Pawlesi be taigi den Kelesten fu Korente. Pawlesi be taigi den taki: Yehofa a „Gadu di e toosutu sama, e toosutu u te u de aini banowtu”.—2 Korentesama 1:3, 4.

² U sabi taki u Dda Yehofa lobi u. Ai toosutu u te tesi miti u. Yu e membee fa Yehofa yeepi i efuso tii yu anga en Wowtu aini a ten di pasa? U sa biibi taki Yehofa wani sani waka bun anga u, leti enke fa a be wani sani  waka bun anga den sama di be e dini en a fositen.—Leisi Yelemiya 29:11, 12.

3. Sowtu akisi wi o luku aini a artikel ya?

³ Gaanse leisi te u sabi saide tesi e miti u, ai moo makiliki gi u fu holidoo. San a wantu sani di sa meke wi abi banowtu aini u toowlibi efuso wi osufamii? Sowtu toli fu Beibel efuso fu a ten ya sa yeepi u fu fende a toosutu di wi abi fanowdu? Di wi o sabi a piki, a o yeepi u fu holidoo te den sowtu tesi ya miti u.

4, 5. San a wantu banowtu di man anga uman sa abi aini a osufamii?

⁴ Di Yehofa meke a fosi uman, a tyai en go gi a man. A so den toon man anga uman. Baka dati Yehofa taki: „Neen ede meke wan man o gwe fika en mma anga en dda. A o tan anga en uman, da den o toon wan sikin” (Genesesi 2:24). U sabi taki ala sama abi sondu (Romesama 3:23). Neen meke te wan man anga wan uman toow, den mu holi a pakisei taki den o abi polobelema. Fosi wan umanpikin toow, a be e wooko anga san en mma anga dda taki. Ma te a toow, neen man e toon a edeman fu a osufamii (1 Korentesama 11:3). Kande biginbigin ai taanga gi a man fu tii en uman. Kande ai taanga gi a uman tu fu wooko anga san en man taki. Kande a uman wani wooko anga san den gaansama fu en e soi en ete. Boiti dati kande den anga den main efuso pai nai go na a wan se. Ala den sani ya na tesi gi a osufamii.

⁵ Pakisei tu fa a man efuso a uman e fii te den sabi taki den o meke wan pikin. Winsi den e poolo, tokuso den e booko den ede pikinso. Kande den e akisi denseefi efu ala sani o waka bun anga a pikin aini a bee. Kande den e akisi denseefi tu efu a pikin o gusontu. Den sabi taki den o abi moo moni fanowdu fu solugu a pikin. Boiti dati den sabi taki den o abi fu du son sani taa fasi te a pikin meke. Kande a mma o koboloiki gaanse fi en ten fu solugu a beibi. A sani de sa meke a man anga a uman á poti pakisei a denseefi moo enke fa den be gwenti. Den faantiwowtu fu a dda o kon moo ipi tu. A mu solugu taki en uman anga en pikin fende san den abi fanowdu.

6-8. Fa wan man anga wan uman e fii te den á poi meke pikin?

⁶ Wan taa tesi di sa miti sama di toow, a te den á poi meke pikin. Efu a uman á poi meke pikin, ai kusumi (Odo 13:12). Aini Beibel ten umansama be e si a meke fu pikin enke wan sani di be de taanga fanowdu. Neen meke Lakeli, a uman fu Yakopu, be e kusumi di a á be poi meke pikin enke en sisa (Genesesi 30:1, 2). Aini son kondee sama e si a toow di wan uman mu toow anga a meke di a mu meke pikin fu gaan sani. Den lobi akisi den zendeling saide den  nai meke pikin. Winsi den zendeling meke moiti fu taigi den saide, toku den e taigi den taki: „Kee, wi o begi gi i.”

⁷ Wan sisa aini Ingiisikondee be wani pikin. Di a fusutan taki a ná o poi meke pikin, a du en ogii te. Baka dati en anga en man teke wan pikin a lanti e kiya. Ma son leisi ai kusumi ete. A taki: „Mi be sabi taki te i teke wan pikin kiya anga te i meke wan pikin a ná aseefi.”

⁸ Beibel taki te wan uman meke pikin „da a sani de o kibii en” (1 Timotiyesi 2:15). Ma a ná fu di wan uman meke pikin da a o fende teego libi. San a tekisi ya wani taki? Wan uman e koboloiki omen ten fu solugu en pikin anga fu seeka en osu. A sani ya sa yeepi en fu a á gongosa, efuso mumui anga taa sama libi (1 Timotiyesi 5:13). Ma winsi a á du den sani ya, toku a o abi polobelema aini en toowlibi.

9. Sowtu taa tesi sa miti den sama di toow?

⁹ Wan fu den tesi di sa miti sama aini a osufamii, a te wan fu den toowpaa dede. Anga ala fa son sama be denki a sani ya ná o miti den, toku a omen fu den a sani ya miti kaba. Kelesten e biibi taki Yehofa o meke dedesama kon a libi baka, na a sani de e toosutu den (Yohanisi 5:28, 29). U Dda Yehofa paamisi omen sani aini Beibel di e toosutu u te tesi miti u. Wi o luku fa son sama di be e dini Yehofa fende a toosutu ya. Wi o si fa a sani ya yeepi den tu.

10. Fa Hana be fende toosutu? (Luku a fowtow na a bigin.)

¹⁰ Pakisei san pasa anga Hana. En man Elkana be lobi en. Ma Hana á be poi meke pikin. A taa uman fu Elkana di den e kai Penina be meke omen pikin. (Leisi 1 Samuweli 1:4-7.) Boiti dati Penina be e soso Hana omen yali fu di a á be poi meke pikin. A sani ya be e hati Hana tuutuu. Ma san be toosutu Hana? A begi Yehofa fu a yeepi en. A go na a osu pe sama be e dini Yehofa tu fu begi wan hii pisiten. A begi Yehofa fu a gi en wan manpikin. Hana be e biibi taki Yehofa be o yeepi en. Baka di a begi, a fii bun. Sama be poi si neen „fesi taki a nai kusumi” moo (1 Samuweli 1:12, 17, 18). A be sabi taki Yehofa be o gi en wan manpikin efuso toosutu en wan taa fasi.

11. Fa begi e toosutu u?

¹¹ Fu di wi a sondu sama anga fu di wi e libi aini a goontapu fu Saatan, meke tesi o go e miti u  (1 Yohanisi 5:19). Ma a sani di o yeepi u, a te wi o begi Yehofa, „a Gadu di e toosutu sama”. Na a sani ya Hana du. A taigi Yehofa fa a be e fii. A begi en fu a yeepi en tu. Efu wi abi polobelema efuso nowtu, wi á mu taigi Yehofa da a kaba, ma u mu begi en tu fu a yeepi u. Boiti dati u mu taigi en fa wi e fii.—Filipisama 4:6, 7.

12. San yeepi Ana fu á a lasi en piisii di tesi miti en?

¹² Kande wi e kusumi fu di wi á poi meke pikin efuso fu di wan sama di u lobi dede. Efu den sowtu sani de miti i, holi a pakisei taki i poi fende toosutu. Pakisei Ana di be de aini a ten fu Yesesi. Di a toow seibin yali neen en man dede. A gei a á be meke pikin. Ma san yeepi en? „Ala yuu a be e de aini a tempel.” Di a be abi 84 yali seefi, a be e go aini a tempel go begi Yehofa (Lukasi 2:37). Na a sani de toosutu en. A yeepi en fu a á lasi en piisii winsi tesi be e miti en.

13. Fa wan bun mati sa toosutu u te u famii e meke wi e fii booko-saka?

¹³ Den mati di wi abi aini a kemeente sa toosutu u tu (Odo 18:24). A feifi yali Paula be abi di en mma á be e dini Yehofa moo. A sani ya meke Paula be e kusumi. A á be makiliki gi en. Ma wan pionili sisa di den e kai Ann be toosutu Paula. A be soi en taki ai booko en ede anga en. Paula taki: „Winsi mi anga Ann a ná famii, tokuso mi be lobi a fasi fa a be e booko en ede anga mi. A sani de yeepi mi fu mi á gwe fika Yehofa. Bakaten, Paula mma kon dini Yehofa baka. Ná pikin piisii Paula piisii. Ann seefi e piisii di a yeepi Paula fu a á gwe fika Yehofa.

14. Sowtu wini wi e fende te wi e toosutu taawan?

¹⁴ Efu wi e koboloiki u ten fu du bun gi taawan, u ná o abi  ten fu pakisei den polobelema fu u. A omen sisa di toow, anga sisa di á toow sabi taki te den e paati a bun nyunsu fu a Kownukondee, den e wooko makandaa anga Yehofa. Boiti dati den e du wan wooko di Yehofa lobi. A sani ya e meke den fii bun. Ala u sa paati a bun nyunsu gi taawan fu soi taki wi e booko wi ede anga den. Te wi e du bun gi u baala anga sisa, wi anga den e toon bun mati (Filipisama 2:4). Na aseefi sani de apostel Pawlesi be du. A be e booko en ede anga taawan „enke fa wan mma e solugu en pikin di de a bobi fu di a lobi en”. Pawlesi be toosutu den. Boiti dati a be gi den taanga-sikin „leti enke fa wan dda e gi en  pikin taanga-sikin.”—Leisi 1 Tesalonikasama 2:7, 11, 12.

15. Sama abi a faantiwowtu fu leli den pikin sabi Yehofa?

¹⁵ Fa u sa toosutu osufamii aini a kemeente? Son sama di á kon langa a waaleiti, e akisi baala anga sisa fu yeepi den te den e sutudeli anga den pikin fu den. Son leisi den e akisi den fu sutudeli anga den pikin fu den tu. Beibel taki a mma anga dda Yehofa gi a faantiwowtu fu leli den pikin (Odo 23:22; Efeisesama 6:1-4). Winsi taawan e yeepi den, tokuso a de taanga fanowdu fu mma anga dda seefi leli den pikin fu den. Den mu e taki anga den pikin fu den ala yuu.

16. San u mu holi a pakisei te wi e yeepi pikinnengee?

¹⁶ Efu wan mma anga dda akisi u fu sutudeli Beibel anga den pikin, u mu holi a pakisei taki a ná wi abi a faantiwowtu fu a dda efuso a mma. Son leisi wi e sutudeli anga wan pikin di mma efuso dda á de a waaleiti. Efu wi e sutudeli Beibel anga wan sama pikin, a be o bun fu sutudeli anga en te en gaansama efuso taa Kelesten de koosube. A be o bun fu sutudeli anga en a wan peesi pe taa sama e si u. Anga dati sama ná o pakisei sani di á de fanowdu. Kande bakaten a mma efuso a dda seefi o poi sutudeli anga en pikin.

17. Fa pikin sa toosutu taawan aini a osufamii?

¹⁷ Yonkuuwan di lobi Yehofa sa toosutu efuso taanga den taawan aini a osufamii. Fa den sa du a sani ya? A te den e lesipeki den gaansama anga te den e yeepi den a sani. Te den pikin e libi enke fa Yehofa wani den e gi a hii osufamii taanga-sikin tu. Lamek be e dini Yehofa fosi a Fuudu. A be taki fi en manpikin Nowa taki: „A wan ya o meke u fende toosutu, bika wi e wooko taanga. Wi e pina, bika Yehofa fuuku a doti.” A sani di Lamek taki pasa baka a Fuudu, di Yehofa puu a fuuku di a be fuuku goontapu (Genesesi 5:29; 8:21). Aini a ten ya den pikin di nai gwe fika Yehofa e toosutu den osufamii. Den poi yeepi den taawan aini a osufamii fu holidoo te tesi e miti den.

18. San o yeepi u fu holidoo te tesi miti u?

¹⁸ A foluku fu Yehofa e fende toosutu te den begi en, te den e teke ten pakisei den toli fu Beibel, anga te den abi baala anga sisa enke mati. (Leisi Psalm 145:18, 19.) U sabi taki Yehofa de kabakaba fu toosutu u ala yuu. U sa biibi taki a o yeepi u fu holidoo winsi sowtu tesi miti u.