1, 2. (a) San Yesesi begi en Dda a lasiti leisi di a begi anga den apostel fi en? (b) Saide Yesesi be e booko en ede anga a libi di den bakaman fi en be mu libi na a wan?

A LASITI leisi di Yesesi nyan anga den disipel fi en, a be e booko en ede anga a libi di den be mu libi na a wan. Di a be e begi anga den, a taki a wani den libi na a wan, leti enke fa en anga en Dda e libi na a wan. (Leisi Yohanisi 17:20, 21.) Efu den bakaman fu Yesesi be o libi na a wan, sama be o si kiin taki a Yehofa be sende Yesesi kon a goontapu. Te sama be o si taki den lobi denseefi den be o sabi taki den a bakaman fu Yesesi. A lobi be o meke den moo libi na a wan tu.​—Yohanisi 13:34, 35.

² A neti de, a omen leisi Yesesi taki fu a libi di den bakaman fi en be mu libi na a wan, bika a be e si taki den á be e kaba libi na a wan. Den be e sitee anga denseefi „on du fu den na a moo gaanwan”, enke fa den be du wantu leisi kaba (Lukasi 22:24-27; Malikisi 9:33, 34). Wan fu den leisi, Yakowbesi anga Yohanisi be akisi Yesesi fu a gi den a moo bun peesi aini a Kownukondee a hemel. Den be  wani sidon leti a Yesesi se.​—Malikisi 10:35-40.

3. San a wantu fu den sani di be sa tapu den bakaman fu Yesesi fu libi na a wan? San wi o luku aini a artikel ya?

³ A wani di den bakaman fu Yesesi be wani makiti efuso gaandi, a ná a wan enkii sani di be e tapu den fu libi na a wan. Den sama fu a ten fu Yesesi be e paati bee, neen meke den á be poi libi na a wan. Den bakaman fu Yesesi be mu meke moiti fu den á buuse taa nasi moo. Aini a artikel ya wi o luku den akisi ya: San Yesesi be e du te sama be kuutu en sosokaali? Fa a yeepi den bakaman fi en fu den lobi ala sama? Fa a yeepi den fu libi na a wan? Fa den sani di Yesesi leli wi e yeepi u fu libi na a wan anga taawan?

4. Fa sama be e kuutu Yesesi sosokaali?

⁴ Yesesi sabi san a wani taki te sama e kuutu taawan sosokaali. Di Filipesi taigi Nataniyeli taki a fende a Mesiyas, Nataniyeli akisi en taki: „Bunbun sani de a Nasaleti?” (Yohanisi 1:46). Kande Nataniyeli be sabi taki a Betelehem a Mesiyas be o meke enke fa Mika 5:2 be taki. Ma kande a be e si enke Nasaleti á be doo peesi fu de a foto fu a Mesiyas. Wantu bigiman fu Yudeya seefi be e wisiwasi Yesesi fu di en a be Galileya sama (Yohanisi 7:52). Boiti dati a omen sama fu Yudeya, á be e si den sama fu Galileya fu bunbun sama. Son wan fu den Dyu be e soso Yesesi. Den be e taigi en taki en a Samaliyasama (Yohanisi 8:48). Den Samaliyasama a ná be Dyu. A biibi fu den anga a biibi fu den Dyu á be de aseefi tu. Den sama fu Yudeya anga den Galileya sama á be e lesipeki Samaliyasama. Den á be e wani mumui anga den.​—Yohanisi 4:9.

5. Fa sama be soi taki den e buuse den bakaman fu Yesesi?

⁵ Den fesiman fu a Dyu biibi á be e lesipeki den bakaman fu Yesesi. Den Faliseiman be e bali „heelu” gi den (Yohanisi 7:47-49). Den Faliseiman be e si den sama di á be go a den keliki sikoo fu den Dyu, anga den sama di á be e libi enke fa den gwenti fu den e soi enke wisiwasiman (Toli 4:13). Den sama fu a ten de be e kuutu Yesesi anga den bakaman fi en te den be luku a biibi fu den, a posisi di den be abi anga a peesi pe den be kiya. Den bakaman fu Yesesi seefi be e paati bee. Efu den be wani libi na a wan, den be mu kengi a fasi fa den be e denki.

6. Sowtu ondoofenitoli e soi taki efu wi á luku bun useefi sa bigin buuse taawan?

⁶ Aini a ten ya, sama e kuutu taawan sosokaali tu. Kande a sani ya miti i wan leisi kaba. A kan tu taki iseefi kuutu taawan sosokaali. Wan pionili sisa aini Australiya taki: „Moo mi be e si fa den bakaa be e libi ogii anga wantu sama  den e kai Aboriginal, moo mi be e buuse bakaa. Te anga now den e libi ogii anga den.” Di wantu bakaa, á libi bun anga a sisa ya neen a moo buuse bakaa. Wan baala fu Kanada taki: „Mi be e si enke den sama di e taki Faansi bun moo den taa sama.” A baala taki na a sani ya meke a á be lobi sama di e taki Ingiisi.

7. Fa Yesesi be e libi anga taawan?

⁷ Leti enke fa a be taanga gi wan sama di be e buuse taawan fu kengi aini a ten fu Yesesi, a so a taanga aini a ten ya. Ma fa Yesesi be e tyai enseefi? Noiti a kuutu taawan. A á be e paati bee tu. A be e peleiki gi guduman, pootiman, Faliseiman, Samaliyasama, sama di be e piki lantimoni anga sama di be du gaan sondu. Boiti dati, Yesesi leli den bakaman fi en anga a fasi fa a be e tyai enseefi taki noiti den mu kuutu taawan sosokaali. A leli den tu taki den á mu e paati bee.

8. San e yeepi u fu libi na a wan?

⁸ Yesesi leli u wan pelensipali sani di o yeepi u fu libi na a wan. A be taigi den bakaman fi en taki: „Ala wi a baala.” (Leisi Mateyesi 23:8, 9.) Ala wi a baala bika a Adan a u dda (Toli 17:26). Yesesi taki den bakaman fi en a baala anga sisa bika den e si Yehofa enke den Dda (Mateyesi 12:50). Gadu meke u kon aini a osufamii fi en. Lobi anga biibi e yeepi u fu libi na a wan. Neen meke den apostel be e kai den taa Kelesten baala anga sisa aini den biifi di den be e sikiifi gi den kemeente.​—Romesama 1:13; 1 Peitilisi 2:17; 1 Yohanisi 3:13. *​—Luku a maiki a ondoo.

9, 10. (a) Saide den Dyu á be mu si enke den bun moo taawan? (b) Fa Yesesi soi taki a á bun te sama e si enke a nasi fi en bun moo den taa nasi? (Luku a fowtow na a bigin.)

⁹ Baka di Yesesi taigi den bakaman fi en taki den mu si denseefi enke baala anga sisa, a taigi den taki den mu abi sakafasi. (Leisi Mateyesi 23:11, 12.) Leti enke fa u be si kaba, son leisi heimembee be e meke den apostel e sitee anga denseefi. Aini a ten fu Yesesi, sama be lobi a lo efuso nasi fu den pasa peesi. A omen Dyu be e si enke den be bun moo taawan, fu di den a be bakapikin fu Abalaham. Ma Yohanisi a dopuman taigi den taki: „Gadu poi teke den siton ya, da a meke pikin gi Abalaham.”​—Lukasi 3:8

¹⁰ Yesesi be soi taki a á bun te sama e si enke a nasi fi en bun moo den taa nasi. Di wan fu den leliman fu a Dyu Weiti akisi en taki: „Sama a den taa sama di mi mu lobi?” Yesesi gi en wan toli fu soi en taki a á bun te sama e si enke a nasi fi en bun moo den taa nasi. A taigi en taki fufuuman be fon wan Dyu te beina a dede, neen den gwe fika en a sikin pasi. Wantu Dyu waka pasa ma den á yeepi en. Ma di wan man fu Samaliya si a man, tyali kisi en neen a yeepi en. Baka di Yesesi gi a toli ya, a taigi a leliman fu a Dyu Weiti taki a mu de enke a Samaliyaman (Lukasi 10:25-37).  Yesesi be soi anga a toli ya taki Samaliyasama sa leli den Dyu san a wani taki fu lobi taawan.

11. Saide den bakaman fu Yesesi mu lobi ala sama? Fa Yesesi yeepi den fu fusutan taki den mu lobi ala sama?

¹¹ Fosi Yesesi go a hemel, a taigi den bakaman fi en taki den mu paati a bun nyunsu a „Yudeya anga Samaliya te doo den moo faawe peesi a goontapu” (Toli 1:8). Efu den bakaman fu Yesesi be wani du a wooko ya, den á be mu e fii denseefi. Den be mu lobi ala sama. Yesesi be lobi taki fu den bun sani fu den taa kondee sama. A sani ya be e seeka den bakaman fi en fu peleiki gi sama fu ala nasi. Di Yesesi be si fa wan suudati edeman fu wan taa kondee biibi be taanga, a gafa en (Mateyesi 8:5-10). Di Yesesi be de a Nasaleti, a foto pe a kiya, a be taki fu wantu taa kondee sama di Yehofa be yeepi. A be taki fu a uman fu Sarfat di man be dede, anga Naaman a man fu Siriya di be abi kokobe (Lukasi 4:25-27). Yesesi be peleiki gi wan Samaliya uman tu. Boiti dati, di a si taki den sama fu Samaliya be wani yee a bosikopu fi en, a tan tu dei aini wan fu den foto fu den.​—Yohanisi 4:21-24, 40.

12, 13. (a) Fa den apostel fu Yesesi fii di den si taki a be e peleiki gi wan Samaliya uman? (Luku a fowtow na a bigin.) (b) San e soi taki Yakowbesi anga Yohanisi á be kaba fusutan san Yesesi be leli den?

¹² A á be makiliki gi den apostel fu lobi ala sama. Den be foondoo di den si taki Yesesi be e leli wan Samaliya uman (Yohanisi 4:9, 27). Saide? Kande a fu di den fesiman fu a Dyu biibi á be e taki anga umanpikin a publiki, moomoo wan Samaliya uman di be abi polinen. Di den apostel fu Yesesi kai en fu a go nyan a á be wani go, bika a taki di a be e taki anga uman ya be moo pelensipali gi en. Gadu be wani Yesesi paati a bun nyunsu. Yesesi á be abi toobi fu paati a nyunsu ya gi wan Samaliya uman, bika a be e si a wooko ya enke nyanyan.​—Yohanisi 4:31-34.

¹³ Yakowbesi anga Yohanisi á be kaba fusutan taki den á mu paati bee. Di Yesesi anga den disipel fi en be de a Samaliya, den be e suku wan peesi fu siibi. Ma den Samaliyasama á be wani den siibi ape. A sani de meke Yakowbesi anga Yohanisi ati boon te neen den akisi Yesesi efu a wani den sende faya komoto a hemel boon a hii foto. Ma Yesesi puu kaasi gi den (Lukasi 9:51-56). Kande Yohanisi anga Yakowbesi ati á be o boon so efu a den sama fu Galileya be du a sani ya anga den, bika denseefi a be Galileya sama. Kande a fu di den á be lobi Samaliyasama meke den ati be boon a den, te den be wani den dede. Ma bakaten di Yohanisi peleiki gi den Samaliyasama, a omen fu den aliki en. Kande sen be e kisi en te a be pakisei san a be wani du anga den.​—Toli 8:14, 25.

14. Fa den baala koti a kuutu fu a paati di a nyanyan á be e paati anga leti?

¹⁴ Baka a Pinksterfesa di be holi aini a yali 33, son Kelesten be e paati bee aini a kemeente. Di den baala be e paati nyanyan gi den uman di man dede, den á be e gi den uman di be e taki Giikitongo (Toli 6:1). Kande a fu di den be e taki wan taa tongo meke den á be e gi den.  Ma den apostel á daaidaai, den seeka a toli ya wanten. Den poti seibin baala di be fiti fu paati a nyanyan. Ala den baala ya be abi Giiki nen. Kande a di den baala be wani toosutu den sisa di e taki Giikitongo meke den be du a sani ya.

15. Fa Peitilisi leli taki a mu lobi ala sama? (Luku a fowtow na a bigin.)

¹⁵ Aini a yali 36, den bakaman fu Yesesi bigin paati a bun nyunsu gi ala nasi. Fosi a ten de, anga Dyu apostel Peitilisi be e moo mumui. Ma Gadu meke a fusutan kiin taki den bakaman fu Yesesi mu lobi ala sama. Baka dati Peitilisi peleiki gi wan Rome suudati di den e kai Koneiliyesi. (Leisi Toli 10:28, 34, 35.) Bakaten Peitilisi be e nyan makandii anga Kelesten di á be de Dyu. Wantu yali baka dati, di a be de aini a foto Antiyokiya, a á be nyan anga den moo (Galasiyasama 2:11-14). Ma di Pawlesi kaasi en, a aliki. Fa u du sabi taki Peitilisi aliki Pawlesi? Di Peitilisi sikiifi a fosi biifi fi en gi den Dyu Kelesten anga den wan di á be de Dyu a Pikin Asiya, a be soi den taki a de fanowdu fu lobi ala den baala anga sisa.​—1 Peitilisi 1:1; 2:17.

16. Fa sama be sabi den fosi Kelesten?

¹⁶ Te den apostel fu Yesesi be e pakisei fa a be e tyai enseefi, den be e si taki den mu „lobi ala sama” (Yohanisi 12:32; 1 Timotiyesi 4:10). Winsi fa a teke ten, toku den kengi a fasi fa den be e si taawan. Aini a ten fu den apostel sama be sabi den fosi Kelesten enke sama di lobi denseefi. Na a pisiten fu a yali 200, a sikiifiman Tertullianus sikiifi san sama be e taki fu den Kelesten. A taki: „Den lobi denseefi. Boiti dati den de kabakaba fu dede gi denseefi.” Fu di den Kelesten be kon abi den manii fu Gadu, meke den leli fu si ala sama aseefi fasi. Den leli tu fu si sama enke fa Gadu e si den.​—Kolosesama 3:10, 11.

17. Fa u sa meke moiti fu lobi sama fu taa nasi anga u hii ati? Gi wantu ondoofenitoli.

 ¹⁷ Kande useefi abi ten fanowdu fu lobi sama fu taa nasi anga u hii ati. Wan sisa a Faansikondee taki fa a sani ya be taanga gi en. A taki: „Yehofa meke mi sabi san lobi wani taki. A leli mi san a wani taki fu paati sani anga taawan. A leli mi tu taki mi mu lobi ala sama. Te anga now mi e meke moiti fu mi á paati bee. Ma a ná ala yuu a makiliki. Neen meke mi e begi Yehofa naamo fu a yeepi mi.” Wan sisa fu Sipanyookondee taki te anga now ai taanga gi en fu a á kuutu wan kulu sama. A sisa ya taki: „Gaanse leisi mi e soi den taki mi lobi den. Ma toku mi sabi taki mi mu e meke moiti ete fu mi á kuutu den. Mi e gi Yehofa daa taki a meke mi de aini wan famii di e libi na a wan.” Ala u mu ondoosuku useefi fu si fa wi e si sama fu taa nasi. Kande useefi mu meke moiti fu u lobi ala sama.

18, 19. (a) Saide wi á mu libi wan fasi anga sama fu taa nasi? (b) Fa u sa soi taawan taki u lobi den?

¹⁸ A bun fu holi a pakisei taki ala u be de faawe fu Gadu (Efeisesama 2:12). Ma a di Yehofa lobi u meke a hali u kon neen (Hoseya 11:4; Yohanisi 6:44). Yesesi lobi u tu. A gi wi a okasi fu kon aini a osufamii fu Gadu. (Leisi Romesama 15:7.) Winsi fa wi abi sondu, tokuso Yehofa anga Yesesi gi wi a okasi fu toon den mati. Neen meke useefi á mu libi wan fasi anga taawan

¹⁹ Moo a kaba fu a ogii goontapu ya e koosube, moo sama o buuse taawan. Den ná o libi na a wan tu (Galasiyasama 5:19-21; 2 Timotiyesi 3:13). Ma enke a foluku fu Yehofa, u wani soi taki wi abi „a koni di e komoto a tapu”. Na a koni ya e yeepi u fu wi á paati bee. Ai yeepi u fu libi na a wan tu (Yakowbesi 3:17, 18). U lobi meke mati anga sama fu taa kondee. Ai switi gi u fu du son sani enke den. U sa leli a tongo fu den tu. Efu wi e du a sani ya, ’a freide fu wi o de enke wan liba. A letidu fu wi o de enke den balon fu a se’.​—Yesaya 48:17, 18.

20. Fa sani e waka te u lobi taawan?

²⁰ Di a sisa fu Australiya sutudeli Beibel, saafisaafi a kon lobi sama fu taa nasi. Fu di a kon lobi den, meke a bigin denki taa fasi. A baala fu Kanada di e taki Faansi taki a kon fusutan taki gaanse leisi a te wan sama á sabi wan taawan, da ai buuse en. A kon fusutan tu taki „a ná fu di wan sama meke a wan kondee da ai abi son manii”. A baala ya toow anga wan sisa di e taki Ingiisi. Den toli ya e soi kiin taki a lobi e yeepi u fu wi á buuse taawan moo. Lobi e meke u libi na a wan.​—Kolosesama 3:14.