A GOONTAPU di wi e libi ya lai booko-ede, neen meke ai taanga gi u fu abi freide. Son leisi wi e lasi a pikinso piisii di wi abi. San Beibel taki u mu du fu abi tuutuu freide? Fa u sa yeepi taawan fu abi tuutuu freide? *

Efu u wani abi tuutuu freide, sani á mu de di e meke u feele. Wi á mu abi booko-ede. U mu abi bun mati tu. Ma a moo pelensipali sani na a de di u mu de mati anga Yehofa. San o yeepi u fu du den sani ya?

Den leli fu Yehofa e tyai wini gi wi ala yuu. Te wi e wooko anga den leli ya, da wi e soi taki wi e fitoow Yehofa. Wi e soi tu taki u wan de en mati (Yelemiya 17:7, 8; Yakowbesi 2:22, 23). Efu u du den sani ya, Yehofa seefi o kon koosube a wi. A o meke u libi aini freide. Yesaya 32:17 taki: „Te leti-du e du en wooko, ala sani e waka bun. Te sani e waka a wan letifasi, ala sama ati e koo. Noiti den o abi booko-ede.” Wi o fende tuutuu freide te wi e du san Yehofa taki anga u hii ati.​—Yesaya 48:18, 19.

Yehofa gi u wan kado di o yeepi u fu abi tuutuu freide di o tan fu teego. A kado ya na a santa yeye fi en.​—Toli 9:31.

Apostel Pawlesi be taki freide a wan fu den ’manii di a santa yeye e meke sama abi’ (Galasiyasama 5:22, 23). Na a santa yeye fu Gadu e meke sama abi tuutuu freide, neen meke efu u wani abi a manii ya u mu meke a santa yeye tii wi. Fa u sa du a sani ya?

 A fosi sani, u mu e leisi a Wowtu fu Gadu ala yuu (Psalm 1:2, 3). U mu e sidon pakisei den sani di u leisi, da a santa yeye o yeepi u fu fusutan fa Yehofa e si son sani. Wi o kon sabi saide Yehofa e piisii anga saide a manii ya pelensipali gi en. Efu wi e du den sani di u leli aini Beibel, wi o moo piisii.​—Odo 3:1, 2.

Du fu tu sani, u mu begi Gadu fu a gi wi en santa yeye (Lukasi 11:13). Yehofa paamisi den sama di e suku yeepi neen taki: „A freide fu Gadu di libisama á poi fusutan o kibii wi ati anga u fusutan anga yeepi fu Yesesi Kelestesi” (Filipisama 4:6, 7). Wi á mu gwe fika Yehofa. U mu e fitoow a santa yeye fi en, da a o yeepi u fu abi tuutuu freide.​—Romesama 15:13.

Beibel yeepi omen sama fu kengi a fasi fa den be e libi. Den sama ya toon Yehofa mati, den kosensi kiin, den e libi aini freide anga taawan tu. San yeepi den fu du den sani ya?

Fosi son baala anga sisa kon a waaleiti den be abi takuu ati boon. Den be e du ogii anga taawan. Ma den meke moiti fu kengi den manii. Nownow den e pasensi anga taawan. Den e libi bun anga taawan tu * (Luku a maiki a ondoo.) (Odo 29:22). Meke u luku fa wan baala den e kai David anga wan sisa den e kai Rachel kengi den manii.

Fosi David kon a waaleiti a be lobi kuutu taawan fu ala pikinpikin sani. A be e taki goofu anga en osufamii tu. Ma a be fusutan taki a mu kengi en manii. San yeepi en fu kengi? David taki: „Mi bigin wooko anga den leli fu Beibel. A sani de yeepi mi anga mi osufamii fu lesipeki useefi.”

Rachel be e denki enke fa den sama na a pisi pe a kiya be e denki. A taki: „Te anga  now mi e meke moiti fu mi ati á boon gaw, bika den sama di kiya mi ati be e boon gaw.” San yeepi Rachel? A taki: „Mi be e begi Yehofa. Mi be e biibi taki a o yeepi mi.”

Boiti David anga Rachel, a omen sama de ete di e libi bun anga taawan fu di den e wooko anga den leli fu Beibel. Den be e biibi taki a santa yeye fu Gadu poi yeepi den. Winsi u de aini wan goontapu pe sama ati e boon gaw, tokuso u poi piisii. A sani ya e meke a moo makiliki gi u fu libi bun anga u famii anga den baala anga sisa aini a kemeente. Ma Yehofa taki u mu „libi bun anga ala sama” (Romesama 12:18). U poi du a sani ya tuutuu? Saide u mu meke moiti fu libi bun anga taawan?

Wi e paati a bosikopu fu Gadu Kownukondee. A bosikopu ya e soi sama taki den o libi aini freide aini a ten di e kon (Yesaya 9:6, 7; Mateyesi 24:14). Den sama di lobi a bosikopu ya e aliki. Neen meke te den e si den sani di e pasa a goontapu, den ati nai boon moo. Den nai lasi howpu tu. Den sabi taki sani o go moo bun, neen meke denseefi e meke moiti fu „libi bun anga taawan”.​—Psalm 34:14.

Ma a ná ala sama lobi a bosikopu di wi e paati. A bakaten fosi son sama e lobi en (Yohanisi 3:19). Ma winsi san sama e du, Gadu gi wi en santa yeye. Ai yeepi u fu wi á ligei anga taawan te wi e peleiki. A so wi e soi taki wi e lesipeki den. Wi e du san Yesesi be taki di a be taigi den bakaman fi en taki: „Winsi sowtu foto efu kampu u go, suku sama di fiti fu yee a bosikopu, da u tan ape te enke u gwe. Te u go a wan osu, u mu gi den sama fu a osu odi. Efu den kai u kon a osu, da u mu belesi den. Ma efu den á kai u kon a osu, da a wi o fende a belesi” (Mateyesi 10:11-13). Te u du a sani ya, da winsi san sama e taki efuso san den e du, wi ati ná o boon gaw. Kande wi o fende a okasi wan taa leisi fu yeepi den sama ya fu di u tyai useefi bun.

Wi e soi tu taki u lobi freide te wi e soi lanti taki wi e lesipeki den, winsi den wani tapu a wooko fu u. Lanti á be wani den Kotoigi meke Kownukondee zaal aini wan kondee na Afiikan. Den baala fu u be sabi taki den be mu taki a wan lesipeki fasi di den be o go a lanti fu seeka a toli ya. Den sende wan baala di be de enke zendeling aini a kondee fu go taki anga wan bigiman a London, a Ingiisikondee. A be go soi en fa a wooko di Yehofa Kotoigi e du, e yeepi sama fu libi bun anga denseefi.

A baala taki: „Di mi doo, neen mi si na a fasi fa a seketasi be wei taki en a fu wan lo di mi be sabi. Mi be leli taki a tongo fu a lo de. Neen meke mi gi en odi aini en tongo. A dyombo di a yee mi taki anga en aini en tongo. A akisi mi san mi kon du, neen mi taigi en taki mi kon fu miti a bigiman. A telefon a bigiman neen a kon miti mi. Di a doo neen a gi mi odi aini a tongo di den sama ape e taki. Baka dati a aliki mi di mi soi en moo fu a wooko fu Yehofa Kotoigi.”

Di a man aliki a baala te a kaba, a be fusutan moo bun sowtu wooko wi e du. A á be e denki ogii fu Kotoigi moo. Baka wan pisiten, neen lanti gi den Kotoigi pasi fu meke Kownukondee zaal. Ná pikin piisii den baala anga sisa piisii! A toli ya e soi taki wi o man libi bun anga taawan te wi e lesipeki den.

Aini a ten ya, a foluku fu Yehofa de aini wan olikanisâsi pe sama e libi bun anga denseefi. Efu u meke moiti fu abi freide, a sani ya o yeepi a foluku fu Yehofa fu moo libi na a wan. Boiti dati, Yehofa o piisii anga u. Te u de aini a nyun goontapu, a o meke u libi aini freide fu teego.​—2 Peitilisi 3:13, 14.