1. Saide u bun moo meti?

YEHOFA gi libisama wan gaan gudu. Dati na a kosensi. Na a sani ya meke u bun moo meti. Fa u du sabi taki Adan anga Efa be abi wan kosensi? Di den taangayesi Gadu, neen den go kibii gi en. Den kosensi be e fon den.

2. Saide u sa taki u kosensi de enke a sitii fu wan sipi? (Luku a fowtow na a bigin.)

² A kosensi na a fii di de aini u, di e soi u san bun anga san á bun. Wan sama di kosensi nai wooko bun de enke te a sitii fu wan sipi nai wooko bun. Winta anga den balon fu a se sa meke a sipi go a soso peesi. Ma te a sitii fu wan sipi e wooko bun, da a sani ya e yeepi a sama di e tii a sipi fu tyai en go a pe a mu go. A so a de anga u kosensi tu. Efu ai wooko bun, a o tii wi a wan bun fasi.

3. Fa sani o waka efu wi á du sani fu meke u kosensi wooko bun?

³ Efu wi á du sani fu meke u kosensi wooko bun, a ná  o piki u te wi e du wan sani di á bun (1 Timotiyesi 4:1, 2). Efu wi á luku bun a o meke u si sani di ’fowtu enke bun sani’ (Yesaya 5:20). Yesesi be taigi den bakaman fi en taki: „A ten e kon di den sama di o kii yu o denki taki a Gadu den e wooko gi” (Yohanisi 16:2). A so den sama di kii a disipel di den e kai Sitefanesi be e denki (Toli 6:8, 12; 7:54-60). Aini a ten di pasa, a omen keliki du ogii-ati sani anga sama. Den kii sama tu neen den taki a Gadu den du en gi. Ma a ná tuu, bika Beibel e kuutu den sani di den du (Ekisodesi 20:13). A sani ya e soi kiin taki den kosensi á be e wooko bun.

4. San u sa du fu meke u kosensi wooko bun?

⁴ San u sa du fu u kosensi wooko bun? Den leli fu Beibel „bun fu gi sama leli, fu poti sama a pasi, fu soi den fa den mu tyai denseefi, anga fu wasikoi den fu den du sani a wan letifasi” (2 Timotiyesi 3:16). U mu e sutudeli Beibel, teke ten pakisei san u leli, da u wooko anga den sani di u leli. A sani ya o yeepi u fu bigin denki enke fa Yehofa e denki. Den sani ya o yeepi u fu u kosensi wooko bun. Meke u luku fa den leli fu Yehofa sa yeepi u fu u kosensi wooko moo bun.

5, 6. Fa den weiti fu Gadu e yeepi u?

⁵ Efu u wani fende wini fu den weiti fu Gadu, wi á mu leisi den efuso sabi den namo da a kaba. Ma u mu lobi den tu. Boiti dati u mu lesipeki den. Beibel taki: „U mu buuse ogii, da u lobi san bun” (Amos 5:15). San o yeepi u fu du a sani ya? U mu meke moiti fu denki enke fa Yehofa e denki. Pakisei a toli ya. Meke u taki yu á poi siibi bun a neti, neen dataa taigi i taki i mu e nyan bun. A taigi i tu taki i mu e waka sekeseke a sikin. Boiti dati, a soi i wantu taa sani di i mu du. Di i du san a taki i fende wini. I be o lobi a dataa di taigi den sani ya. Ná so noh?

⁶ Na aseefi sani ya Gadu du gi u tu. A gi u wantu weiti di e yeepi u fu wi á du sani di o tyai ogii gi u. Den e yeepi u fu u libi waka bun tu. Beibel e leli u taki wi á mu e lei, wi á mu e fufuu, wi á mu hulu, wi á mu feti efuso bonu. (Leisi Odo 6:16-19; Openbaring 21:8). Te wi e si den wini di wi e fende fu di wi e du san Yehofa taki, wi e moo lobi en. Boiti dati wi e moo lobi den weiti fi en tu.

7. Fa den toli di sikiifi aini Beibel sa yeepi u?

⁷ A á de fu sani miti u fosi fu sabi taki den weiti fu Gadu e tyai wini gi u. U sa leli wan sani fu den fowtu di wantu sama aini a ten di pasa be meke. Den toli ya sikiifi aini Beibel. Odo 1:5 taki: „Wan sama di koni e aliki. Ai wani teke moo leli.” Den leli di Yehofa e gi wi a den moo bun leli di u be sa fende. Pakisei fa a du David ogii, di a taangayesi Yehofa di a didon anga Batseiba (2 Samuweli 12:7-14). Te yu e leisi a pisi ya aini Beibel akisi iseefi taki: ’San David be sa du fu a sani ya á be miti en? Efu a mi a be David, mi  be o didon anga Batseiba, efuso mi be o lon enke Yowsefu?’ (Genesesi 39:11-15) Efu wi e teke ten pakisei den sani di sa miti u te u pasa den weiti fu Yehofa, wi o moo „buuse ogii”.

8, 9. (a) San u kosensi e yeepi u fu du? (b) Sowtu wini u sa fende fu den leli fu Yehofa?

⁸ Noiti u wani du wan sani di Yehofa á lobi. Ma fa u mu tyai useefi te Beibel nai taki finifini fu wan sani di u wani du? Fa wi o man sabi san Gadu wani u du? Efu wi e koboloiki Beibel fu meke u kosensi wooko moo bun, wi o man du sani anga koni.

⁹ A di Yehofa lobi u, meke a gi u leli di e yeepi u fu u kosensi wooko bun. Yehofa taki: „Mi a Yehofa, a mi ai Gadu. A mi na a sama di e leli i san i mu du fu sani waka i bun” (Yesaya 48:17, 18). U mu e sidon pakisei den leli fu Beibel. U mu e meke den doo wi ati tu, da u kosensi o wooko moo bun. Na a sani ya o yeepi u fu du sani di Yehofa lobi.

10. Fa den leli fu Beibel e yeepi u fu du sani anga koni? Fa Yesesi yeepi den bakaman fi en fu du sani anga koni?

¹⁰ Den leli fu Yehofa e yeepi u fu du sani anga koni. Efu u sabi den leli fu Yehofa, wi o fusutan fa Yehofa e  denki anga saide a gi u son weiti. Yesesi be koboloiki den leli fu Yehofa fu soi den bakaman fi en taki den sani di den e pakisei anga den sani di den e du abi bakapisi. A be leli den taki boon ati sa meke den du ogii anga taawan. A be soi den tu taki efu den e denki sani di á fiti, a sani ya sa meke den didon anga wan sama di den anga en á toow (Mateyesi 5:21, 22, 27, 28). Efu wi e meke den leli fu Yehofa tii wi, u kosensi o wooko moo bun. Wi o man du sani tu di e gi Yehofa gaandi.​—1 Korentesama 10:31.

11. Na ala Kelesten kosensi e wooko aseefi fasi?

¹¹ Wi enke Kelesten e wooko anga san Beibel taki, fu meke u kosensi wooko moo bun. Ma toku a ná ala yuu wi e du sani na aseefi fasi. Pakisei a diingi di son wan fu wi e diingi sopi. Beibel á taki wi á mu diingi sopi, ma a taki wi á mu diingi duungu (Odo 20:1; 1 Timotiyesi 3:8). Ma a sani ya wani taki solanga wan Kelesten á duungu, a ná abi fu booko en ede? Nono. Winsi en kosensi e gi en pasi fu diingi sopi, a mu holi taawan a pakisei.

12. Fa den sani di sikiifi a Romesama 14:21 sa yeepi u fu lesipeki a kosensi fu taawan?

¹² Pawlesi be taki u mu lesipeki a kosensi fu taawan. A be taki: „A moo bun fu wi á nyan meti, diingi win efuso du wan taa sani di o meke u baala dyakata” (Romesama 14:21). Neen meke winsi Beibel nai tapu u fu diingi sopi, tokuso u ná o diingi efu u sabi taki a sani ya o meke wan Kotoigi kosensi fooseli en. Kande wan baala di be de sopiman fosi a kon a waaleiti, á wani diingi nawan doopu sopi moo. Wi á wani du wan sani di o meke a kai go neen haw olo baka (1 Korentesama 6:9, 10). Efu sowan baala kon a yu osu, yu o de neen baka namonamo taki a mu diingi sopi efu a á wani? Noiti wi o du a sani de!

13. Fa Timotiyesi soi taki a be e lesipeki a kosensi fu den sama di a be e paati a bun nyunsu gi?

¹³ Di Timotiyesi be yonkuu a be de kabakaba fu besnei winsi a sani ya be o meke a fii pen. A be sabi taki den Dyu di a be o peleiki gi be e si besnei enke wan sani di de taanga fanowdu. Leti enke Pawlesi, Timotiyesi á be wani fooseli a kosensi fu taawan (Toli 16:3; 1 Korentesama 9:19-23). I de kabakaba fu du son sani fu man yeepi taawan enke Timotiyesi?

14, 15. (a) San o yeepi u fu toon gaansama aini a biibi? (b) Fa wi o libi anga taawan efu wi e fusutan a waaleiti?

¹⁴ Baka di u leli den „fosi sani fu Kelestesi kaba”, ala u mu meke moiti fu „toon gaansama aini a biibi” (Hebrewsama 6:1). A ná te u de omen  yali a waaleiti, da dati wani taki wi a gaansama aini a biibi. U mu meke moiti efu u wani u biibi taanga. U mu meke moiti fu teke moo leli fu Beibel. U mu meke moiti fu fusutan den leli fu Beibel moo bun tu. Neen meke u mu e leisi Beibel ala dei (Psalm 1:1-3). Efu wi e leisi Beibel ala dei, wi o fusutan den leli fu Yehofa moo bun.

¹⁵ San na a moo gaan weiti di wan Kelesten mu holi? A moo gaan weiti na a lobi di u mu lobi taawan. Yesesi be taigi den bakaman fi en taki: „A so ala sama o sabi taki wi a mi bakaman, te u lobi useefi” (Yohanisi 13:35). Beibel e kai lobi „a moo gaan weiti” efuso ’a sani di e meke a weiti kon tuu’ (Yakowbesi 2:8; Romesama 13:10). A sani ya nai foondoo wi, bika Beibel taki „Gadu a lobi” (1 Yohanisi 4:8). Gadu nai si lobi enke wan fii namo, da a kaba. A du omen sani di e soi taki a lobi u. Apostel Yohanisi taki: „Na a fasi ya Gadu soi taki a lobi u di a sende a wan kodo Manpikin fi en kon a goontapu, fu a sa yeepi u fu fende a libi” (1 Yohanisi 4:9). Te wi e soi Yehofa, Yesesi, u baala anga taa sama taki u lobi den, wi e soi taki wi e fusutan a waaleiti bun.​—Mateyesi 22:37-39.

16. Saide te wi e go a fesi, wi e moo lobi den leli fu Beibel?

¹⁶ Moo wi e go a fesi a waaleiti, moo wi e lobi den leli fu Yehofa. Gaanse leisi a wan sani namo wan weiti e teli gi, ma den leli fu Beibel e teli gi omen sani. Kande wan yonkuuwan nai kaba  fusutan saide a á mu mati anga sama di nai tyai denseefi bun. Neen meke en mma anga en dda abi fu poti weiti gi en fu meke sani á miti en (1 Korentesama 15:33). Ma te a pikin e kon moo bigi, ai leli fa a mu wooko anga den leli fu Beibel. Den leli ya o yeepi en fu paa anga sama di e tyai denseefi bun (Leisi 1 Korentesama 13:11; 14:20.) Moo wi e sidon pakisei den leli fu Beibel, moo u kosensi o wooko bun. A sani ya o yeepi u fu du san Gadu wani ala yuu.

17. Saide u sa taki wi abi ala den sani di de fanowdu fu man du sani anga koni?

¹⁷ Wi abi ala den sani di de fanowdu fu yeepi u fu du san Yehofa lobi. Beibel taki den leli fu Yehofa e yeepi u fu ’sabi fa fu du sani. Den e yeepi u fu de seekaseeka fu du ala sowtu bun wooko’ (2 Timotiyesi 3:16, 17). Den leli fu Beibel e yeepi u fu sabi fa Yehofa e denki. Ma u mu meke moiti fu man fende den leli ya (Efeisesama 5:17). Den sani di o yeepi u fu fende den leli ya na a buku di den e kai Ondrosuku Bijbel moro fini​—Gi Yehovah Kotoigi, a Saanantongo Watchtower Library di de a DVD, a Waktitoren Library a Internet anga a JW Library app. Den sani ya o yeepi u fu fende wini te wi e ondoosuku Beibel anga te wi e holi a osufamii anbegi.

18. Fa sani o waka efu wi e wooko anga den leli fu Yehofa?

¹⁸ Efu wi e wooko anga den leli fu Yehofa u libi o waka bun. Psalm 119:97-100 taki: „Ná pikin lobi mi lobi a weiti fi i. Hii dei mi e pakisei en. Den weiti fi i meke mi koni moo mi feyanti. Bika mi e poti pakisei a den ala yuu. Mi e fusutan sani bun moo den leliman fu mi, bika mi e poti pakisei a den weiti fi i. A fasi fa mi e tyai miseefi e soi taki mi sabi sani moo den gaansama, bika mi e aliki den sani di yu e taigi mi.” Efu wi e teke ten pakisei den leli fu Yehofa, wi o moo du sani anga koni. Efu wi e meke Beibel yeepi u fu u kosensi wooko bun, wi o „toon gaansama di abi aseefi biibi di Kelestesi be abi”.​—Efeisesama 4:13.