1. San a wan fu den sani di e meke u piisii?

WI E piisii taki den sama di e dini Gadu de enke wan faya di sama e si. A yali di pasa, a foluku fu Yehofa sutudeli Beibel anga moo enke tin miliyun sama. Boiti dati miliyunmiliyun sama kon na a Membeefesa fu a fosi leisi. Ala den sama ya kon sabi a gaan sani di Gadu du fu fii wi fu sondu anga dede.​—1 Yohanisi 4:9.

2, 3. (a) San á poi tapu u fu de enke faya di ala sama e si? (b) San wi o luku aini a artikel ya?

² Den Kotoigi fu Yehofa a hii goontapu e taki omen tongo. Ma toku a sani ya nai tapu u fu wi á gafa Yehofa enke wan gaan famii (Openbaring 7:9). Winsi sowtu tongo wi e taki efuso pe wi e tan, ala u sa de ’enke wan faya di ala sama e si’.​—Filipisama 2:15.

³ A peleikiwooko, a libi di wi e libi na a wan, anga a de di u de na ain, e gi Yehofa gaandi. Fa u sa meke a faya fu u de  kiin gi ala sama fu si te wi e du den sani ya?​—Leisi Mateyesi 5:14-16.

4, 5. (a) Boiti a peleiki di wi e peleiki, fa u sa soi taki u de enke wan faya di ala sama e si? (b) Sowtu wini wi e fende te wi abi switifasi? (Luku a fowtow na a bigin.)

⁴ A peleiki di wi e peleiki anga a yeepi di wi e yeepi sama fu toon Yesesi bakaman, a wan fu den moo pelensipali fasi fa wi e soi taki u de enke wan faya di ala sama e si (Mateyesi 28:19, 20). Aini a yali 1925 wan artikel be de aini a Ingiisi Wakititolen. Den be e kai a artikel ya „Faya di e kiin peesi aini duungu”. A artikel ya be taki wan sama á poi dini Yehofa aini den lasiti dei efu a nai meke sama si a „faya fi en”. A taki tu taki: „Efu wan sama wani taawan si a faya fi en a mu e paati a bun nyunsu. A mu e libi enke wan sama di á de a dunguu” (A Ingiisi Wakititolen fu 1 yuni 1925). Boiti a peleiki di wi e peleiki, a fasi fa wi e tyai useefi sa meke sama gafa Yehofa tu. A omen sama e si u te wi e peleiki. U mu e booko lafu gi den. U mu e gi den odi tu, da den o gafa u. Den o gafa a Gadu di wi e dini tu.

⁵ Yesesi be taigi den bakaman fi en taki: „Te u go a wan osu, u mu gi den sama fu a osu odi” (Mateyesi 10:12). Sama be gwenti meke sama di den á sabi kon aini den osu, aini den foto pe Yesesi be e peleiki. Nownow sama e feele fu du a sani ya a omen peesi. A omen sama e feele te den si wan sama di den á sabi a den doomofu. Taawan ati e boon. Ma efu wi abi switifasi, den o wani taki anga u. Efu yu e booko lafu te yu e peleiki anga a pikin wagi a wan peesi pe omen sama e pasa, den sama ná o feele fu kon teke buku. Kande son wan fu den o wani taki anga i tu.

6. San yeepi wan gaandi baala anga sisa fu du a peleikiwooko?

⁶ Wan gaandi baala anga sisa fu Ingiisikondee á poi peleiki osu fu osu enke fa den be gwenti, bika den á gusontu so moo. Ma den e sete buku a wan tafaa a den doomofu. Den e tan koosube fu wan sikoo, neen meke den e poti buku di den mma anga den dda fu den pikin sa lobi. Wantu mma anga dda teke pisi 1 anga 2 fu a buku di den e kai Wat jonge mensen vragen​—Praktische antwoorden (Sani di yonkuu sama e akisi​—Piki di e yeepi den). Den teke taa buku tu. Wan pionili sisa lobi holibaka gi a gaandi baala anga sisa ya. Den mma anga den dda fu den pikin si taki a sisa ya abi switifasi. Den si tu taki a gaandi baala anga sisa wani yeepi taawan tuutuu. Wan fu den sama di be teke buku bigin sutudeli Beibel.

7. Fa i sa yeepi sama di kon tan aini i kondee?

⁷ Den yali di pasa, a omen sama lowe komoto a den kondee go tan a wan taa kondee. Fa i sa yeepi den sama ya fu sabi Yehofa? A fosi sani, i sa leli fa i sa  gi den odi aini den tongo. Du fu tu, i sa koboloiki a JW Language app fu leli fa i mu taki anga den, da den o wani aliki i. Boiti dati, i sa soi den felon efuso den buku fu u di de a jw.org aini den mamabee tongo.​—Deitolonomi 10:19.

8, 9. (a) Sowtu wini wi e fende fu a mindiiwiki komakandaa? (b) Fa mma anga dda sa yeepi den pikin fu gi bun piki a den komakandaa?

⁸ Yehofa gi wi ala san wi abi fanowdu, fu man yeepi den sama di wi e peleiki gi. Den sani di wi e leli na A libi fu wi anga a peleikiwooko komakandaa, e yeepi u fu sabi san u mu du te u go a sama du fu tu leisi anga te wi e sutudeli Beibel anga den.

⁹ Te sama kon a fosi leisi a komakandaa den e foondoo te den yee fa den yonkuuwan e gi piki. I sa leli i pikin fu gi piki sondee fu e leisi en aini a paragraaf. Wantu sama kon a waaleiti di den yee fa yonkuuwan be e taki kiin san den e biibi.​—1 Korentesama 14:25.

10. Fa a Osufamii Anbegi e yeepi osufamii fu libi na a wan?

¹⁰ Te wi e du ala san u man fu yeepi wi osufamii fu libi na a wan efuso fu du sani makandii, da wi e gi Yehofa gaandi. Efu yu a wan mma efuso wan dda, seeka sani fu holi a Osufamii Anbegi. A omen osufamii e luku a JW Broadcasting makandii. Baka dati den e taki san den leli. Holi a pakisei taki a ná aseefi fasi fa yu  e yeepi pikinnengee, i mu yeepi gaangaan pikin. Du ala san i man fu yeepi ala sama fu yu osufamii fu fende wini fu a Osufamii Anbegi.​—Psalm 148:12, 13.

11-13. Fa u sa yeepi a kemeente fu libi na a wan?

¹¹ Winsi i yonkuu, toku i sa yeepi ala sama aini a kemeente fu si taki yu abi den fanowdu. Wan fasi fa i sa du a sani ya, a fu meke mati anga den gaandi baala anga sisa. Akisi den san yeepi den fu dini Yehofa den yali di pasa. Den o leli i sani di yu abi taanga fanowdu. A sani ya o gi yu anga den taanga-sikin. A ná abi u gaandi efuso yonkuu, ala u sa meke den sama di kon a fosi leisi a komakandaa fii bun. I sa gi den odi, booko lafu gi den, yeepi den fende wan sidon peesi, da i tyai den go taki anga taa sama. Meke den fii bun te den kon a den komakandaa fu u.

¹² Te yu e holi a peleikiwooko komakandaa, i sa yeepi den gaandiwan fu den de enke wan faya di de kiin gi ala sama fu si. A peesi di yu o gi den fu wooko mu fiti den. Meke yonkuuwan wooko makandaa anga den. Gaandi baala anga sisa e fii booko-saka te den si taki a gusontu fu den nai gi den pasi fu du den sani di den be gwenti du. Ma i sa gi den taanga-sikin te yu e soi den taki yu e fusutan fa den e fii. Efu yu e soi switifasi gi den gaandi baala anga sisa, winsi omen yali den abi efuso winsi on langa den de a waaleiti, a sani de o yeepi den fu tan du a peleikiwooko anga den hii ati.​—Lefitikesi 19:32.

¹³ Den Islayelisama be e piisii te den be e dini Yehofa makandii. A psalm sikiifiman taki: „Luku fa a bun anga fa a switi te baala e libi na a wan!” (Leisi Psalm 133:1, 2.) A be taki a fasi fa den e libi na a wan, be de enke a oli di den be e salufu sama. A oli ya be bun gi a sikin. A be e sumee switi tu. Useefi sa meke u baala anga sisa fii bun te wi e libi bun anga den, anga te wi e soi switifasi gi den. A sani ya e yeepi a kemeente fu libi na a wan. I si enke i sa leli sabi den baala anga sisa fu a kemeente pe i de moo bun?​—2 Korentesama 6:11-13.

14. Fa i sa de enke wan faya di ala sama e si na a biiti pe yu e tan?

¹⁴ Winsi pe i de, i mu de enke wan faya di ala sama e si. Efu yu e soi switifasi gi taawan, den biiti sama fu yu o wani sabi moo fu Yehofa. Akisi iseefi taki: ’Fa den biitisama fu mi e si mi? Mi osu kiin? Mi seeka ala sani taa poti a pe den mu de? A fasi fa mi dyali de, e meke a biiti pe mi de kon moo moin?’ Akisi taa Kotoigi fa a bun fasi fa den e tyai denseefi yeepi den famii, den biitisama, den sama a wookope efuso den pikin a sikoo.​—Efeisesama 5:9.

15. Saide u mu de na ain ala yuu?

¹⁵ Efu u wani de enke faya di ala sama e si, wi á mu feegete aini sowtu ten wi e  libi. A omen leisi Yesesi taigi den bakaman fi en taki: „U mu de na ain” (Mateyesi 24:42; 25:13; 26:41). Efu wi e si enke a gaan banowtu ná o doo ete, u ná o koboloiki ala okasi fu yeepi sama fu kon sabi Yehofa (Mateyesi 24:21). A faya fu u ná o de kiin gi sama fu si. Efu wi á luku bun te fu kaba a sa dede.

16, 17. San o yeepi i fu de na ain ala yuu?

¹⁶ U mu moo de na ain aini a ten ya. A goontapu e kon moo ogii. Ma u sabi taki a kaba o kon na a yuu di Yehofa poti. A ná o kon lati (Mateyesi 24:42-44). Ma a kaba á doo ete, neen meke u mu wakiti anga pasensi, da u pakisei den sani fu a ten di de a u fesi. Leisi Beibel ala dei. Wi á mu weli fu begi Yehofa tu (1 Peitilisi 4:7). Meke moiti fu waka a den baala anga sisa baka, di e dini Yehofa omen yali kaba. Leisi den ondoofenitoli fu den. Wan fu den ondoofenitoli ya sikiifi aini a Saanantongo Wakititolen fu 15 april 2012, bladzijde 18-21. Den e kai a ondoofenitoli ya „Seibitenti yari kaba mi grabu wan Dyu hori na en krosi”.

 ¹⁷ Tan du san i man fu dini Yehofa. Du bun gi taawan. Meke ten fu de makandaa anga den baala anga sisa. A sani de o meke i piisii. Yu o go e si enke a ten e pasa gaw (Efeisesama 5:16). A omen sani a foluku fu Yehofa du aini den wan ondoo yali di pasa. Ma aini a ten ya, wi e du moo sani. Noiti u be denki taki a so a wooko fu Yehofa be o go a fesi enke fa ai go a fesi nownow. U de enke wan faya di ala sama e si.

18, 19. Fa den owluman sa yeepi u fu du ala san u man gi Yehofa? Gi wan ondoofenitoli.

¹⁸ Winsi wi e meke omen fowtu, toku Yehofa e gi wi a okasi fu dini en. A di a wani yeepi u meke a poti „mannengee na a kemeente di sabi du son sani”. Den mannengee ya a den owluman. (Leisi Efeisesama 4:8, 11, 12.) Neen meke te den owluman kon luku i, meke moiti fu fende wini fu a koni fu den. Meke moiti fu wooko anga san den soi i tu.

¹⁹ Di sani á be e go bun aini a toowlibi fu wan baala anga wan sisa fu Ingiisikondee, neen den akisi tu owluman fu yeepi den. A sisa be e si enke a baala á be e teke fesi aini a osufamii fu dini Yehofa. A man be e si enke a á poi gi leli. Boiti dati enseefi taki a á be e seeka sani fu holi a Osufamii Anbegi. Den owluman yeepi den fu pakisei Yesesi. Den gi a baala taanga-sikin fu yeepi en osufamii enke fa Yesesi be e yeepi den disipel fi en. Den gi a sisa taanga-sikin fu pasensi anga a man fi en. Den soi den tu san den be sa du te den e holi a Osufamii Anbegi anga den tu pikin fu den (Efeisesama 5:21-29). A baala meke moiti fu toon wan moo bun osufamii edeman. Den owluman gi en taanga-sikin fu a á gi abaa. Den gi en taanga-sikin tu fu a meke a yeye fu Yehofa yeepi en. Den owluman soi a osufamii ya taki den lobi den. Den taki switi anga den tu. Neen meke den be poi yeepi den.

20. Fa sani o waka te wi e meke a faya fu u de kiin gi ala sama fu si?

²⁰ „Den sama di e lesipeki Yehofa anga den sama di e du san a taki o de koloku” (Psalm 128:1). Efu yu e meke sama si a faya fi i, yu o go e piisii ala yuu. Neen meke i mu yeepi taawan fu sabi Gadu. Du ala san i man fu yeepi yu osufamii anga a kemeente fu de na ain. Yeepi den fu libi na a wan tu. Te sama o si den bun sani di yu e du, den o wani gafa u Dda Yehofa.​—Mateyesi 5:16.