Kownu Salomo, a dda fu Rehabeyam, tii Islayeli 40 yali langa (1 Kownu 11:42). Ma di Salomo dede, neen Rehabeyam komoto a Yelusalem go te a Sikem fu toon kownu (2 Koloniki 10:1). A feele a be e feele fu toon kownu? Ala sama be sabi taki a ná pikin koni en dda Salomo be koni. Rehabeyam be o abi fu soi taki a koni sai fu losi wan gaan polobelema.

Den Islayelisama be e fii enke den e tyotyo. Neen meke den sende sama go taigi Rehabeyam san den be wani a du gi den. Den taigi en taki: „I dda be gi u wan ibi lai fu tyai, neen meke u kon begi i fu yu á meke u wooko taanga enke fa u be e wooko gi i dda. Gi u wan moo feke lai, da wi o dini i.”​—2 Koloniki 10:3, 4.

A sani ya á be makiliki gi Rehabeyam. Efu a be du san a foluku wani, kande en anga en famii anga den sama di be e tan aini kownu osu, á be o fende son sani moo di den be gwenti fende. Ma efu a á be du san a foluku wani, den á be o saka denseefi neen ondoo moo. San Rehabeyam du? A go taki a toli ya anga den gaanwan di be e yeepi en dda, neen den taigi en fu du san a foluku taki. Ma baka dati Rehabeyam go taki a toli anga den supee fi en, neen a wooko anga san den soi en. A taigi a foluku taki: „Mi o meke a lai fu u kon moo ibi. Ná pikin ibi mi o meke a ibi. Nda be e fon wi anga wipi, ma mi o fon wi anga maka.”​—2 Koloniki 10:6-14.

San a toli ya e leli u? Aini a ten ya wi abi omen gaandiwan aini a olikanisâsi di e dini Yehofa omen yali kaba. Ala den baala anga sisa ya poi yeepi u fu du sani di o tyai wini gi u. Te wi e aliki den wi e soi taki u koni.​—Yopu 12:12.

Rehabeyam tyai ala den suudati fi en kon a wan fu go feti anga den lo di á be wani saka denseefi neen ondoo. Ma Yehofa sende a polofeiti Semaya fu taigi den taki: „Wi á mu go feti anga u  baala. Den na bakapikin fu Islayeli tu. U go a osu baka. Bika a mi wani sani waka so.”​—1 Kownu 12:21-24.  *​—Luku a maiki a ondoo.

A be makiliki gi Rehabeyam fu du san Yehofa taki? Fa den Islayelisama be o si a nyun kownu fu den? A be taigi den taki a be o ’fon den anga maka’. Ma now a á be o du nawan sani anga den lo di á be wani saka denseefi (luku 2 Koloniki 13:7 tu.) Winsi san sama be e denki, a kownu anga den suudati fi en „aliki Yehofa. Den daai go a osu, leti enke fa Yehofa taki”.

San wi e leli fu a toli ya? Winsi taawan e soso u, solanga wi e du san Yehofa taki, wi e soi taki u koni. Yehofa e belesi den sama di e aliki en ala yuu.​—Deitolonomi 28:2.

Rehabeyam fende wini di a aliki Yehofa? Rehabeyam be e tii a lo fu Yuda anga Benyamin ete. A be meke wantu nyun foto tu. Boiti dati, a be meke son wan fu den foto di be de kaba „kon taanga” (2 Koloniki 11:5-12). Ma a moo pelensipali sani, a di a holi den weiti fu Yehofa wan pisiten. A tin lo kownukondee be bigin dini falisi gadu, neen meke a omen sama be e kon a Yelusalem fu holibaka gi Rehabeyam anga a tuu biibi (2 Koloniki 11:16, 17). A sani ya e soi taki di Rehabeyam aliki Yehofa, a kownukondee fi en kon moo taanga.

Di sani bigin waka bun gi a kownukondee fu Rehabeyam a du wan foondoo sani. A daai baka gi Yehofa, neen a bigin dini falisi gadu. Saide? En mma a be Amonsama. Neen be gi Rehabeyam taanga-sikin fu go dini falisi gadu? (1 Kownu 14:21) Wi á sabi. Ma u sabi taki di a go dini falisi gadu, a foluku waka neen baka. Neen meke Yehofa meke Kownu Sisak fu Egepte wini omen foto fu Yuda. Rehabeyam be meke den foto ya kon taanga, tokuso Kownu Sisak be wini den.​—1 Kownu 14:22-24; 2 Koloniki 12:1-4.

Sani be kon moo ogii di Sisak anga den suudati fi en doo a Yelusalem fu feti anga den. A Rehabeyam be e tii Yelusalem. Di a sani ya pasa Gadu sende polofeiti Semaya go taigi Rehabeyam anga den gaanman fi en taki: „A di u gwe fika mi, meke miseefi gwe u. Mi o meke Sisak wini u.” San Rehabeyam du di Yehofa taigi en a sani ya? A du san a be mu du. Beibel taki: „Den gaanman fu Islayeli anga a kownu saka denseefi neen den taki: ’Yehofa e du sani a wan letifasi.’” Neen meke Yehofa yeepi Rehabeyam. A so meke Sisak á fende Yelusalem poli.​—2 Koloniki 12:5-7, 12.

Baka dati, Rehabeyam tii Yuda go doo. Fosi a dede, a gi den manpikin fi en omen kado. Kande a di a á be wani den feti anga den baala Abiya, di be o toon kownu, meke a gi den kado (2 Koloniki 11:21-23). A sani ya e soi taki di Rehabeyam kon moo gaandi, a be e du sani anga koni moo enke di a be yonkuu.

Winsi Rehabeyam be du wantu bun sani, toku Beibel taki: „A be e du ogii.” Saide Beibel taki so? A fu di „a á be e dini Yehofa anga en hii ati”. Neen meke Yehofa á be lobi en.​—2 Koloniki 12:14.

San a toli fu Rehabeyam e leli u? Ai leli u taki son yuu Rehabeyam be e du san Yehofa taki. A be e du wantu bun sani tu gi a foluku fu Yehofa. Ma toku en anga Yehofa a ná be mati. A á be soi anga en libi taki a be wani dini Yehofa tuutuu. Neen meke a be daai baka gi Yehofa, neen a bigin dini falisi gadu. Kande yu e akisi iseefi taki: ’A di a be e hati Rehabeyam taki a du wan sani di Yehofa á lobi, meke a be e aliki Yehofa wan pisiten? Efuso a di taawan taigi en san a mu du, neen a du san den taki?’ (2 Koloniki 11:3, 4; 12:6) Bakaten a bigin du sani di á be bun. A libi fi en anga Kownu David, en gaandda, be kengi. David be meke fowtu so na tuu, ma toku a soi anga en hii ati taki den sani di a du hati en. En hii libi a soi taki a lobi  Yehofa anga a tuu biibi.​—1 Kownu 14:8; Psalm 51:1, 17; 63:1.

A omen sani u sa leli fu a toli fu Rehabeyam. U mu solugu wi osufamii. U mu e du bun gi taawan tu. Ma efu u wani Yehofa lobi u, u mu libi enke fa a wani. Boiti dati wi anga en mu de mati.

Efu u wani du den sani ya, u mu lobi Yehofa anga u hii ati. Moo i poti udu gi wan faya, moo a faya e bigi. Na a sani ya u mu du tu, efu wi á wani a lobi di u lobi Yehofa koo. U mu e sutudeli en Wowtu, da u teke ten pakisei san u leli. U mu e begi ala yuu tu (Psalm 1:2; Romesama 12:12). A lobi di u lobi Yehofa o yeepi u fu du sani enke fa a wani ala yuu. Efu u lobi Yehofa tuutuu, a o hati u te u du wan sani di a á lobi. Wi o begi en fu a gi u paadon tu. Den sani ya o yeepi u fu a sani di miti Rehabeyam á miti u. A o yeepi u tu fu wi á gwe fika a tuu biibi.​—Yudasi 20, 21.