AINI a yali 1970 ondoosukuman be fende wan gaandi bukulolo a wan peesi den e kai Ein Gedi di de a Islayeli koosube fu a Dede Se. Beina a hii bukulolo ya be boon. Den be fende a bukulolo ya di den be e suku sani aini wan gaandi snoga. A gei a snoga ya be boon di sama be poli a kampu na a pisiten fu a yali 500 te anga a yali 550. Di den fende a bukulolo ya, den á be poi opo en fu leisi. Efu den be puubei fu opo en a be sa lulu. Winsi fa den á be poi opo a bukulolo ya, tokuso koniman koboloiki wan sowtu masini (3-D scanner) anga wan nyun computer programma fu leisi a bukulolo sondee fu opo en.

San den si di den leisi en? Den kon si taki a bukulolo ya a wan pisi fu Beibel. A pisi fu a bukulolo di bun ete abi wantu vers fu a bigin pisi fu a Beibel buku Lefitikesi. Den vers ya abi a nen fu Gadu aini di be sikiifi anga den fo Hebrew letter YHWH. A gei a bukulolo ya, a be fu a pisiten fu a yali 50 te anga a yali 400. Efu a so, da baka den Dede Se Lolo (Qumran), neen na a moo gaandi bukulolo fu den Hebrew buku fu Beibel di sama fende. Wan sikiifiman den e kai Gil Zohar sikiifi aini wan kolanti (The Jerusalem Post) taki fosi den be fende fasi fu leisi a Ein Gedi bukulolo, den be fende taa bukulolo tu. Wantu fu den bukulolo ya a den Dede Se Lolo anga a Aleppo Codex. Den Dede Se Lolo (di be sikiifi wan pisiten fu a yali 300 Fosi Kelestesi te anga a ten fu a yali 100 Baka Kelestesi) be sikiifi wan sani fu 1000 yali fosi a Aleppo Codex (di be sikiifi wan sani fu a yali 930 Baka Kelestesi). Ma a Ein Gedi bukulolo na a wan enkii bukulolo di sama fende, di be sikiifi baka den Dede Se Lolo anga di be sikiifi fosi a Aleppo bukulolo. Koniman taki den sani di sikiifi aini a Ein Gedi bukulolo e soi taki den sama di be e meke kopi fu den fosi feifi buku fu Beibel aini den dunsu yali di pasa, be meke wantu fowtu, ma toku a bosikopu aini den buku ya á kengi.