1. Saide u mu poti pakisei a den sani di Yesesi be taki?

DI YESESI be taki san a den maiki di o soi taki wi e libi aini den lasiti dei, a be taki: „U mu luku bun taki den . . . booko-ede fu a libi á meke wi ati kon ibi” (Luk. 21:34). U mu poti pakisei na a sani di Yesesi taki aini a tekisi ya, bika aini a ten ya, a denseefi polobelema di e miti ala sama e miti u.

2. Sowtu tesi e miti baala anga sisa?

² Son leisi a omen sani e miti u baka makandaa. A sani ya sa gi u booko-ede. Luku a toli fu wan baala di den e kai John. * A baala ya abi wan siki di e meke a lan saafisaafi. A baala ya anga en uman be toow 19 yali di a uman gwe fika en. A sani ya meke a baala fii booko-saka tuutuu. Baka dati den tu umanpikin fi en gwe fika Yehofa. Taa sowtu tesi be miti wan toowpaa den e kai Bob anga Linda. Den tu man lasi den wooko, baka dati den lasi den osu. Boiti dati, dataa taigi den taki Linda abi wan siki neen ati di sa kii en. A be abi alamatiki tu. A siki ya e meke den sukuufu fi en hati en.

3. San Filipisama 4:6, 7 e leli u fu Yehofa?

³ U sa biibi taki u Dda Yehofa di de a hemel, sabi fa wi e fii te wi abi booko-ede. A wani yeepi wi anga den polobelema fu u. (Leisi Filipisama 4:6, 7.) A omen toli u sa fende aini Beibel di e soi sowtu tesi be e miti den sama di be e dini Gadu a fositen. Den toli ya e soi u tu fa  Yehofa yeepi den fu holidoo te den sani ya be e miti den. Meke u luku wantu fu den toli ya.

4. Sowtu tesi be miti Eliya di a be e du en wooko enke polofeiti? Fa a pasa den tesi ya?

⁴ A pisiten di Eliya be e du en wooko enke polofeiti, a á be makiliki. A wan ogii kownu den be e kai Akab be e tii Islayeli a ten de. A kownu ya be toow anga wan ogii-ati uman den be e kai Iseibel di be e dini Baa-al. Akab anga en uman be e gi sama taanga-sikin fu dini Baa-al. Den kii omen polofeiti fu Yehofa. Ma den á be fende Eliya kii. Boiti dati, Eliya be man tan a libi di wan gaan deeten kon aini a kondee fu di a be e fitoow Yehofa (1 Kow. 17:2-4, 14-16). Eliya be e fitoow Yehofa tu di en anga den polofeiti fu Baa-al be miti. A be gi den Islayelisama taanga-sikin fu dini Yehofa (1 Kow. 18:21-24, 36-38). Eliya be si omen leisi fa Yehofa be yeepi en di a be e du en wooko enke polofeiti aini a taanga ten de.

5-6. Enke fa 1 Kownu 19:1-4 e soi, da fa Eliya be e fii? Fa Yehofa soi en taki a lobi en?

⁵ Leisi 1 Kownu 19:1-4. Bakaten Eliya feele di Iseibel sweli taki a o kii en. Neen meke a lowe go a Berseiba. A booko-saka te neen a begi Gadu fu a „dede”. Saide a be e fii so? Eliya be abi sondu ’leti enke wi’ (Yak. 5:17). Kande a  be weli fu ala den sani di be e miti en. Kande Eliya be e fii enke a fu soso a be e meke moiti fu yeepi a foluku fu dini Yehofa, fu di den Islayelisama be e dini Baa-al ete. A be denki taki neen wawan be e dini Yehofa (1 Kow. 18:3, 4, 13; 19:10, 14). Kande wi e foondoo taki a polofeiti ya di biibi be taanga be e fii so. Ma Yehofa be e fusutan saide Eliya be e fii so.

⁶ Yehofa ati á boon a Eliya di a taigi en fa ai fii, ma a gi en taanga-sikin (1 Kow. 19:5-7). Bakaten Yehofa yeepi Eliya a wan switifasi fu kengi a fasi fa a be e denki. A du wantu wonduu tu, fu gi en deki-ati. Yehofa taigi en tu taki ete 7000 sama be de aini Islayeli di á be e dini Baa-al (1 Kow. 19:11-18). Yehofa soi Eliya anga den sani ya taki a lobi en.

7. San wi e leli te u luku a fasi fa Yehofa yeepi Eliya?

⁷ Sani e miti i di e meke i fii booko-saka? Ai gi u taanga-sikin fu sabi taki Yehofa be e fusutan fa Eliya be e fii. A sani ya e soi kiin taki Yehofa e fusutan wi tu te wi abi booko-ede. A sabi san u poi du anga san wi á poi du. A sabi fa wi e fii anga san wi e denki (Ps. 103:14; 139:3, 4). Efu wi e fitoow Yehofa leti enke Eliya, Yehofa o yeepi wi anga den polobelema fu u di e gi u booko-ede.​—Ps. 55:22.

8. Fa Yehofa o yeepi u te wi abi booko-ede?

⁸ Te u lai booko-ede, son leisi wi e fii enke noiti sani o kengi. Wan sani di o yeepi u, a te wi e holi a pakisei taki Yehofa o yeepi wi anga den booko-ede fu u. Fa a o yeepi u? A wani u taigi en fa wi e fii. A paamisi u taki a o aliki te wi e begi en (Ps. 5:3; 1 Peit. 5:7). Begi Yehofa te yu abi booko-ede. A ná o taki anga yu enke fa a be taki anga Eliya, ma a o taki anga yu anga en Wowtu Beibel anga en olikanisâsi. Den sani di yu e leisi aini Beibel sa toosutu i. Den o gi i howpu. Den baala anga sisa fi i sa gi i taanga-sikin tu.​—Rom. 15:4; Heb. 10:24, 25.

9. Fa wan mati di wi e fitoow sa yeepi u?

⁹ Yehofa sende Eliya fu a gi Elisa wantu fu den wooko di a be e du. A so Eliya be fende wan bun mati di be e yeepi en te a be e fii booko-saka. Te useefi e taigi wan mati fu u fa wi e fii, a sa yeepi u fu fii lekiti pikinso (2 Kow. 2:2; Odo 17:17). Efi yu e fii enke i ná abi sama di i sa taigi fa yu e fii, i sa begi Yehofa fu a yeepi i fu fende baala efuso sisa di sa gi i taanga-sikin.

10. Sowtu taanga-sikin a toli fu Eliya e gi u? San wi e leli fu a sani di Yehofa paamisi a Yesaya 40:28, 29?

¹⁰ Yehofa be yeepi Eliya anga den booko-ede fi en, neen meke a be man dini en anga en hii ati omen yali langa. A toli fu Eliya e gi u taanga-sikin. Kande den booko-ede fu wi e meke u fii booko-saka son leisi. Ma efu wi e fitoow Yehofa, a o gi wi a kaakiti di wi abi fanowdu fu dini en winsi wi abi polobelema.​—Leisi Yesaya 40:28, 29.

11-13. Sowtu booko-ede dii sama di be e dini Gadu a fositen be abi?

¹¹ Wantu taa sama aini Beibel be e fii booko-saka tu. Hana be e fii booko-saka fu di sen be e kisi en taki a á be poi meke pikin. San be e meke a moo fii booko-saka, na a soso di en meti Penina  be e soso en (1 Sam. 1:2, 6). Hana be e kusumi te, nyan seefi a á be e poi nyan. A soso kee a be e kee.​—1 Sam. 1:7, 10.

¹² Son leisi Kownu David be e fii booko-saka tu. Pakisei den somen sani di miti en. En kosensi be e fon en te a be pakisei den fowtu di a meke (Ps. 40:12). En boi Absalom di a be lobi be e suku fu kii en. A sani ya tyai dede gi Absalom bakaten (2 Sam. 15:13, 14; 18:33). Wan bun mati fu David konkuu en tu (2 Sam. 16:23–17:2; Ps. 55:12-14). A omen fu den psalm di David sikiifi e soi taki a be e fii booko-saka. Ma den e soi tu taki a be e fitoow Yehofa anga en hii ati.​—Ps. 38:5-10; 94:17-19.

¹³ Wan taa psalm sikiifiman di be e dini Gadu anga en hii ati, be bigin dyalusu anga den ogii sama, di a si fa den e libi switi. Kande a psalm sikiifiman ya a be wan bakapikin fu Asaf, wan Leifisama di be e wooko aini a „gaan santa peesi fu Gadu”. A psalm sikiifiman ya be e booko en ede tumisi, neen meke a á be e tifeedi moo anga san a be abi. A á be si den wini di a be e fende fu a dini di a be dini Yehofa enke wan belesi moo.​—Ps. 73:2-5, 7, 12-14, 16, 17, 21.

14-15. San den toli fu den dii sama aini Beibel e leli u fu a suku di u mu suku yeepi a Yehofa te sani e moo wi?

¹⁴ Den dii sama di kai aini den paragraaf a fesi be e fitoow Yehofa ala yuu. Den be e begi en tu te sani be e moo den. Den be e taigi en kiin fa den e fii. Ala yuu den be e kon makandaa anga a foluku fu Yehofa.​—1 Sam. 1:9, 10; Ps. 55:22; 73:17; 122:1.

¹⁵ Yehofa aliki den begi fu den. Hana á be e kusumi so moo (1 Sam. 1:18). David  taki: „Wan leti-ati sama lai polobelema, ma Yehofa e yeepi en anga ala den polobelema fi en” (Ps. 34:19). Bakaten a psalm sikiifiman taki a be e fii enke Yehofa be ’holi en neen leti ana’. A taki Yehofa soi en fa a mu waka. A singi taki: „A kon di mi e kon moo koosube a Gadu bun gi mi. Na a Moo Hei Masaa Yehofa e kibii mi” (Ps. 73:23, 24, 28). San den toli fu den sama ya e leli u? Son leisi den polobelema fu wi e gi u booko-ede. Efu wi e sidon pakisei fa Yehofa be yeepi taa sama di be e dini en, a sani ya o yeepi u fu holidoo. U mu e begi en ala yuu, da u du san a taigi u.​—Ps. 143:1, 4-8.

16-17. (a) Saide u mu e paa anga a foluku fu Yehofa? (b) Fa u sa fende taanga-sikin te wi abi booko-ede?

¹⁶ A toli fu Hana, David, anga a psalm sikiifiman e leli u taki te wi abi polobelema u mu suku yeepi a Yehofa. U mu e paa anga den baala anga sisa tu (Odo 18:1). Wan sisa den e kai Nancy be e kusumi baka di en man gwe fika en. A taki: „Son dei mi á be e fii fu taki anga nawan sama. Ma te mi á be e taki anga sama, a be e moo du mi ogii.” Nancy fende wini di a meke moiti fu yeepi taawan di be abi  polobelema. A taki: „Te den be e taigi mi den sani di be e miti den, tyali fu den be e kisi mi. A sani ya be e yeepi mi fu mi á poti pakisei a den booko-ede fu mi so moo.”

¹⁷ Te wi e go a komakandaa, wi e fende taanga-sikin. Te u de a komakandaa, wi e gi Yehofa a okasi fu a „toosutu” u (Ps. 86:17). Ai koboloiki en santa yeye, en Wowtu anga a foluku fi en fu gi u taanga-sikin. Te u de a komakandaa wi e fende okasi fu gi useefi „taanga-sikin” (Rom. 1:11, 12). Wan sisa den e kai Sophia taki: „A Yehofa anga den baala anga sisa e yeepi mi fu holidoo. A moo pelensipali sani gi mi a den komakandaa. Te mi e peleiki fayafaya anga te mi e go a den komakandaa ala yuu, a sani ya e yeepi mi fu mi á booko mi ede tumisi.”

18. San Yehofa poi gi u te wi e fii booko-saka?

¹⁸ Te wi e fii booko-saka, u mu holi a pakisei taki a ná a ten di e kon wawan Yehofa o puu den booko-ede fu u, ma ai yeepi u nownow kaba fu holidoo. Ai gi u „kaakiti” fu holidoo te wi e fii enke wi á poi moo.​—Filip. 2:13.

19. San Yehofa paamisi wi a Romesama 8:37-39?

¹⁹ Leisi Romesama 8:37-39. Apostel Pawlesi soi kiin taki nawan sani á poi tapu Gadu fu a lobi u. Fa u sa toosutu baala anga sisa di e fii booko-saka? Aini a taa artikel wi o luku fa u sa soi taki wi e booko wi ede anga taawan leti enke Yehofa. Wi o luku tu fa u sa toosutu u baala anga sisa te den e fii booko-saka.