1. San Pawlesi be taigi den salufu Kelesten fu fositen?

PAWLESI be taki: „Ná libi enke den sama fu a goontapu moo” (Rom. 12:2). A den fosi Kelesten Pawlesi be taigi a sani ya. Saide Pawlesi be taigi salufu Kelesten a sani ya?​—Rom. 1:7.

2-3. Fa Saatan e puubei fu meke u gwe fika Yehofa? San o yeepi u fu fika den takuu gwenti di wi abi?

² A denki fu a goontapu fu Saatan be poli a fasi fa son Kelesten be e denki, neen meke Pawlesi be wasikoi den (Efe. 4:17-19). Aseefi sani di be miti den Kelesten ya sa pasa anga u tu. Fu di Saatan sabi taki a yuu fi en koosube meke ai suku ala fasi fu koli u fu gwe fika Yehofa. Wan fu den sani di ai koboloiki fu koli u, na a fii fu kon abi balinen. Efu Saatan si taki u wani abi balinen, a sa koboloiki a sani ya fu koli u. A sa koboloiki a sikoo di u go, efuso a fasi fa u kiya fu meke u denki enke fa ai denki.

³ U poi kengi den falisi denki fu u di wi abi omen ten kaba? (2 Kor. 10:4) Pawlesi taki: „Den sani di wi e puu a pasi a den falisi denki fu sama anga ala sowtu kofaliki denki fu sama di nai kai anga den sani di Gadu leli u.  Wi e wini ala den denki ya, da wi e meke den toon katiboman. Wi e meke den aliki Kelestesi” (2 Kor. 10:5). A sani ya e soi taki efu u meke Yehofa yeepi u, wi o man kengi a fasi fa wi e denki. Leti enke fa deesi sa yeepi u fu betee te u siki, a so Beibel sa yeepi u fu fika den takuu gwenti di a goontapu fu Saatan meke wi abi.

4. San omen fu u be mu du di u kon sabi a waaleiti?

⁴ Pakisei den sani di i be mu kengi di i kon sabi a waaleiti. A omen fu u be abi fu fika son sani di u be e du di Yehofa á lobi (1 Kor. 6:9-11). Ai bigi gi u taki Yehofa yeepi u fu kengi a fasi fa u be e libi.

5. San a den tu sani di Romesama 12:2 taki u mu du?

⁵ Fosi u dopu u fika omen sani di Yehofa á lobi, ma toku noiti u mu denki taki sani á de moo di u mu kengi. U mu e meke moiti ala yuu fu wi á du sani di sa meke u go du denseefi sondu baka. Fa u sa du a sani ya? Pawlesi be taki: „Ná libi enke den sama fu a goontapu moo. Ma u mu kengi a fasi fa wi e denki, da u libi seefi o kengi” (Rom. 12:2). A tekisi ya e soi taki u mu du tu sani. A fosiwan: Wi á mu „libi enke den sama fu a goontapu moo”. Du fu tu: U mu „kengi a fasi fa wi e denki, da u libi seefi o kengi”.

6. San den sani di Yesesi taki a Mateyesi 12:43-45 e leli u?

⁶ A kengi di Pawlesi be taki u mu kengi, ná abi fu du anga den sani di wi e du namo, ma a abi fu du anga u hii libi. (Luku a faki „ I kengi tuutuu efuso yu e du enke i kengi?”) U mu kengi a fasi fa wi e denki, a fasi fa wi e fii anga a fasi fa wi e tyai useefi. Neen meke u  mu akisi useefi taki: ’A kengi di mi e kengi fu toon wan Kelesten doo mi ati tuutuu efuso a sama ain sani mi e du?’ Den sani di Yesesi taki a Mateyesi 12:43-45, e soi u kiin san u mu du. (Leisi en.) Den sani di Yesesi taki ya e leli u wan pelensipali sani: Wi á mu puu den denki di Yehofa á lobi namo da a kaba, ma u mu meke moiti fu denki enke en tu.

7. San o yeepi u fu kengi u manii anga a fasi fa wi e denki?

⁷ U poi kengi a fasi fa u de tuutuu? A Wowtu fu Gadu taki: „U mu e meke moiti fu denki taa fasi. U mu kengi u manii, fu u sa de enke fa Gadu wani, dati wani taki bun-ati sama di e du san Gadu taki ala yuu” (Efe. 4:23, 24). Den wowtu ya e soi taki u poi kengi tuutuu, ma a sani ya á makiliki. A ná tapu namo u mu tapu anga den sani di u be gwenti du, ma „u mu kengi u manii” tu. A sani ya wani taki u mu kengi a fasi fa wi e fii anga a fasi fa wi e tyai useefi. U mu e meke moiti naamo fu man du a sani ya.

8-9. Fa a ondoofenitoli fu wan baala e soi taki a de taanga fanowdu fu kengi dipi aini wi ati?

⁸ Meke u luku a toli fu wan baala di ati be e boon gaw fosi a kon a waaleiti. Te a be diingi duungu, a be lobi feti anga sama. Ma bakaten a kengi, neen a dopu. Di den sama fu a pisi pe a be e tan si fa a kengi, den foondoo. A á langa baka di a dopu, neen wan tesi di a á be denki miti en. Wan neti wan duunguman kon te neen osu kon suku toobi anga en. Biginbigin a baala holi enseefi. Ma di a man kosi Yehofa, neen a baala ati boon te neen a lasi enseefi. A fon a man te a fon. Fa a du lasi enseefi so? Den sani di a be leli aini Beibel be yeepi en fu a tapu anga a feti di a be gwenti feti, ma dipi aini en ati a á be kengi ete.

⁹ Ma a baala ya á gi abaa (Odo 24:16). Fu di a tan wooko anga den sani di den owluman soi en, meke a be e kengi saafisaafi. Bakaten enseefi toon wan owluman. Wan neti di a be de a komakandaa aseefi tesi di be miti en omen yali pasa, miti en baka. Wan duunguman be de fu fon wan fu den owluman. San a baala du? A taki switi anga a duunguman. A á ligei anga en. A yeepi en fu doo osu tu. Fa a du kon taki a baala be man du a sani ya? A fu di be kengi a fasi fa a be de dipi aini en ati. A be kon abi sakafasi. A be abi switifasi tu. A Yehofa yeepi en fu kengi.

10. San u mu du efu u wani kengi a fasi fa wi e denki?

¹⁰ A á makiliki fu kengi a fasi fa wi e denki anga a fasi fa wi e fii. Efu u wani du a sani ya, kande a omen yali langa u mu „meke moiti” (2 Peit. 1:5). Winsi u de a waaleiti omen yali langa, efu u nai meke moiti u ná o poi kengi. Wi o luku wantu sani di o yeepi u fu kengi a fasi fa wi e denki anga a fasi fa wi e fii.

11. Fa begi e yeepi u fu kengi a fasi fa wi e denki?

¹¹ A fosi sani di u mu du a begi. U mu begi Yehofa enke fa a psalm sikiifiman be begi en taki: „Meke mi kon abi  wan kiin-ati. Yeepi mi fu kengi a fasi fa mi e denki, fu mi sa taampu gingin” (Ps. 51:10). U mu fusutan taki u mu kengi a fasi fa wi e denki, da u begi Yehofa fu a yeepi u. Saide u sa biibi taki Yehofa o yeepi u fu kengi? A sani di Yehofa be paamisi den taangayesi Islayelisama aini a ten fu Eseikiyeli e gi u taanga-sikin. A be taki: „Mi o meke den toon wan. Mi o meke den kon abi wan nyun denki. Mi o puu a ati fu den di taanga enke siton, da mi o gi den wan ati di safu [wan ati di e aliki Gadu]” (Eseik. 11:19). Yehofa be de kabakaba fu yeepi den Islayelisama fu kengi, a de kabakaba fu yeepi u tu.

12-13. (a) Enke fa Psalm 119:59 e soi, da san u mu teke ten pakisei? (b) San u mu akisi useefi?

¹² Wan taa sani di o yeepi u, na a teke di wi o go e teke ten pakisei den sani di wi e leisi aini Beibel. U mu e leisi Beibel ala dei, da u luku sowtu manii efuso fasi fu denki u mu kengi. (Leisi Psalm 119:59; Heb. 4:12; Yak. 1:25). U mu meke moiti fu sabi efu u lobi a fasi fa den sama fu a goontapu e denki. Wi á mu koli useefi. Efu u si taki u mu kengi a fasi fa wi e denki, wi á mu daaidaai fu kengi.

¹³ I mu akisi iseefi taki: ’Mi e dyalusu anga taawan aini mi ati?’ (1 Peit. 2:1) ’Mi e fii enke mi bun moo taawan fu di mi go a hei sikoo efuso fu di mi abi moni moo den?’ (Odo 16:5) ’Mi e fii miseefi fu di mi abi son sani di taawan ná abi? Mi e fii enke mi bun moo sama fu taa nasi?’ (Yak. 2:2-4) ’Mi lobi den sani fu a goontapu fu Saatan?’ (1 Yoh. 2:15-17) ’Mi lobi felon efuso game di e soi fa sama e du ogii anga taawan? Mi lobi luku, leisi efuso aliki sani di e soi fa sama e libi wan hululibi?’ (Ps. 97:10; 101:3; Am. 5:15) Den akisi ya o yeepi i fu sabi sowtu fasi fu denki i mu kengi. Efu u kengi den fasi fu denki ya, wi o meke Yehofa, u Dda a hemel piisii.​—Ps. 19:14.

14. Saide a de taanga fanowdu fu paa anga sama di lobi Yehofa?

¹⁴ A de taanga fanowdu fu paa anga sama di lobi Yehofa. Wi e teke den manii fu den sama di wi anga den e paa sondee u sabi (Odo 13:20). Gaanse leisi den sama di wi e miti te u de a wooko efuso sikoo nai yeepi u fu denki enke fa Yehofa e denki. Ma te u de a komakandaa u sa fende mati di lobi Yehofa. Den sama ya sa gi u taanga-sikin „fu soi lobi anga fu du bun wooko”.​—Heb. 10:24, 25.

15-16. Fa Saatan e puubei fu kengi a fasi fa wi e denki?

¹⁵ Wi á mu feegete taki Saatan e du ala san a man fu poli a fasi fa wi e denki. Ai paati omen sowtu falisi denki di nai kai anga san sikiifi aini a Wowtu fu Gadu.

¹⁶ Te anga now Saatan e kisi sama anga aseefi akisi di a be poti gi Efa aini Eden. „A tuu taki Gadu taigi u taki . . . ?” (Gen. 3:1) A denseefi sowtu sani ya den sama fu a goontapu ya e akisi son leisi: ’A tuu taki Gadu á wani man anga man efuso uman anga uman toow anga denseefi? A tuu taki Gadu á wani u fii bedaki anga fuuyali? A tuu taki Gadu á wani  u teke buulu? A tuu taki Gadu á wani i taki anga i famii moo te den puu en na a kemeente?’

17. San u mu du efu wi á sabi saide wi e biibi son sani di wi e leli? Enke fa Kolosesama 2:6, 7 e soi, da sowtu wini wi o fende te u du a sani ya?

¹⁷ U mu meke moiti fu taanga u biibi. Efu wi á sabi saide wi e biibi den sani di wi e leli, wi o bigin akisi useefi efu den sani ya a tuu. A sani ya sa swaki u biibi. San u mu du fu a sani ya a pasa anga u? Beibel taki u mu kengi a fasi fa wi e denki, da wi o sabi san na „a pasi fu Gadu di bun, di e meke a piisii, di ná abi nawan fowtu” (Rom. 12:2). Efu wi e sutudeli ala yuu wi o sabi saide wi e biibi den leli fu Beibel. Wi o biibi anga u hii ati taki den leli fu Yehofa e tyai wini gi u. Leti enke fa den lutu fu wan bon e meke a fasi gingin a doti, a so useefi o „taampu gingin” aini a tuu biibi.​—Leisi Kolosesama 2:6, 7.

18. San o yeepi u fu fika den takuu gwenti di a goontapu fu Saatan e meke sama abi?

¹⁸ Ala wi abi a faantiwowtu fu taanga a biibi fu u, sama á poi du en gi u. Neen meke a pelensipali fu kengi a fasi fa wi e denki fu u sa denki enke Gadu. Begi ala yuu fu Yehofa yeepi yu anga en santa yeye. Teke ten pakisei den sani di yu e leisi aini Beibel, da i luku sowtu manii i mu fika. Paa anga sama di o yeepi i fu denki enke fa Yehofa e denki. Te yu e du den sani ya, yu o man fika den takuu gwenti di a goontapu fu Saatan e meke sama abi, di „nai kai anga den sani di Gadu leli u”.​—2 Kor. 10:5.