SUTUDI-ARTIKEL 26
Yeepi taawan fu holidoo te den abi booko-ede
„Ala u mu abi aseefi denki. U mu soi taki wi e fii gi taawan. U mu lobi den baala fu u. U mu de kabakaba fu soi tyali-ati gi taawan. U mu abi sakafasi.”—1 PEIT. 3:8.
SINGI 107 Yehofa soi u san a lobi
SAN WI O LELI *
1. Fa u sa waka a u Dda Yehofa baka?
YEHOFA lobi wi anga en hii ati (Yoh. 3:16). Efu u wani waka a Yehofa baka, „u mu soi taki wi e fii gi taawan. U mu lobi den baala fu u. U mu de kabakaba fu soi tyali-ati gi taawan”, „moomoo den sama di wi anga den de na aseefi biibi” (1 Peit. 3:8; Gal. 6:10). Te den baala anga sisa fu wi abi polobelema, u mu du san u poi fu yeepi den.
2. San wi o luku aini a artikel ya?
2 Solanga wan sama e meke moiti fu dini Yehofa anga en hii ati, tesi o miti en (Malik. 10:29, 30). Moo a kaba e koosube, moo tesi o miti u. Fa u sa holibaka gi useefi te tesi e miti u? Meke u luku san u sa leli fu Lot, Yopu anga Naomi. Wi o luku tu sowtu tesi e miti u baala anga sisa aini a ten ya, anga fa u sa yeepi den fu holidoo.
I MU ABI PASENSI
3. Enke fa 2 Peitilisi 2:7, 8 e soi, da sowtu don sani Lot du? San miti en di a du a sani ya?
3 A ná wan koni sani Lot du di a go tan aini Sodom, bika den sama fu a foto ya be e libi wan molusu libi. (Leisi 2 Peitilisi 2:7, 8.) Sodom a be wan gudu foto, ma sani á waka bun anga Lot di a go tan aini a foto ya (Gen. 13:8-13; 14:12). A gei enke en uman be kon lobi a foto efuso son sama di be e tan aini a foto te neen a taangayesi Yehofa. Di Yehofa boon Sodom anga den taa foto di be de koosube fu Sodom, a dede. Pakisei den tu umanpikin fu Lot. Den man di den anga den be abi mofu fu toow, dede aini Sodom. Lot lasi en osu anga den gudu fi en, ma san moo hati, na a uman fi en di dede (Gen. 19:12-14, 17, 26). Yehofa be abi boo anga Lot di den sani ya be e miti en? Eeye.
Yehofa sende engel fu go puu Lot anga en osufamii aini Sodom (Luku paragraaf 4)
4. Fa Yehofa soi taki a be abi boo anga Lot? (Luku a fowtow a fesise fu A Wakititolen.)
4 Winsi fa Lot go tan aini Sodom, toku Yehofa soi tyali-ati gi en. A sende engel fu go kibii Lot anga en osufamii. Ma di den engel taigi den taki den mu komoto aini a foto gawgaw, Lot be e „daaidaai”. Den engel be abi fu kisi Lot anga en osufamii a den ana, tyai puu aini a foto (Gen. 19:15, 16). Den engel taigi en taki den mu lon go a den mongo. Ma Lot á be wani du san Yehofa taki. Neen meke a akisi en efu a sa go a wan foto di be de koosube (Gen. 19:17-20). Yehofa pasensi anga Lot. A meke a go na a foto di be de koosube. Bakaten Lot kon feele fu tan aini a foto, neen a foloisi go tan a denseefi mongo di Yehofa be sende en fu a go (Gen. 19:30). Ná pikin boo Yehofa be abi anga Lot! Fa u sa waka a Yehofa baka?
5-6. Fa u sa waka a Gadu baka, te wi e du san sikiifi a 1 Tesalonikasama 5:14?
5 Leti enke Lot, kande wan baala efuso sisa teke wan bosoloiti di tyai takuu bakapisi gi en. Efu a sani ya pasa, san yu o du? Kande yu o wani taigi en taki a san a paandi ai koti. A tuu taki a san wan sama paandi ai koti (Gal. 6:7). Ma a be o moo bun fu yeepi en enke fa Yehofa be yeepi Lot. Fa u sa du a sani ya?
6 Yehofa á sende den engel fu go wasikoi Lot namo da a kaba, ma a meke den yeepi en tu fu a á dede di a poli Sodom. Useefi mu wasikoi wan baala efuso sisa efu u si ai du wan sani di sa tyai takuu bakapisi gi en. Ma kande u mu yeepi en tu. Winsi ai daaidaai fu wooko anga san u soi en aini Beibel, u mu pasensi anga en. Meke moiti fu waka a den tu engel baka. U mu du ala san u poi fu yeepi a baala efuso sisa, wi á mu fika en. Wi á mu gi en taanga-sikin namo da a kaba (1 Yoh. 3:18). U mu langa wan ana gi en. U mu soi en fa a sa wooko anga den sani di u taigi en.—Leisi 1 Tesalonikasama 5:14.
7. Fa u sa waka a Yehofa baka te u luku fa a be e si Lot?
7 Yehofa be sa poti pakisei a den fowtu di Lot be meke, ma toku a á du a sani de. Bakaten a meke apostel Peitilisi sikiifi taki Lot a be wan man di be e libi a wan letifasi. Ai bigi gi u taki Yehofa e gi u paadon te u meke wan fowtu (Ps. 130:3). Fa u sa waka a Yehofa baka te u luku fa a be e si Lot? Efu wi e poti pakisei a den bun sani di u baala anga sisa e du, a sani ya o yeepi u fu pasensi anga den. A sani ya o meke a moo makiliki gi den fu wooko anga san u soi den.
I MU E FII GI TAAWAN
8. San wi o du efu wi e fii gi taawan?
8 Yopu dati be e du sani anga koni, ma toku a omen sani miti en. A lasi ala den gudu fi en, sama á be e lesipeki en moo, boiti dati a be kon siki. San moo ogii, na a dede di ala den pikin fi en dede. Dii mati fi en be e taigi en taki a wan sani a musu du meke den ogii ya miti en. Saide
den mati fu Yopu di be go fu toosutu en á be soi taki den e booko den ede anga en? Den á be meke moiti fu fusutan san be e miti Yopu. Neen meke den kuutu en sosokaali. San o yeepi u fu wi á meke aseefi fowtu? U mu holi a pakisei taki a Yehofa wawan sabi san e miti wan sama tuutuu. Teke ten aliki san a sama e taki. Yu á mu aliki namo, ma meke moiti fu fusutan fa ai fii tu. A so namo wi o man soi u baala efuso sisa taki wi e booko wi ede anga en.9. San u ná o du efu wi e fii gi taawan? Saide u ná o du a sani de?
9 Efu wi e fii gi wan sama, u ná o taigi taawan san e miti en, efu u sabi taki a sani de o hati en. Wan sama di e tyai taki nai yeepi a kemeente fu libi na a wan (Odo 20:19; Rom. 14:19). Sowan sama nai denki fosi a taki, neen meke ai taki sani di e hati taawan (Odo 12:18; Efe. 4:31, 32). A moo bun fu poti pakisei a den bun manii fu a sama, da u luku fa u sa yeepi en anga den booko-ede fi en.
Aliki anga pasensi te wan baala efuso sisa e „taki sani sondee fu denki”, da i toosutu en na a moo bun yuu (Luku paragraaf 10-11) *
10. San a sani di sikiifi a Yopu 6:2, 3 e leli u?
10 Leisi Yopu 6:2, 3. Son leisi Yopu be e „taki sani sondee fu denki”. Bakaten a be hati en taki a taki son sani (Yopu 42:6). Leti enke Yopu, a so wan sama aini a ten ya sa taki sani sondee fu denki te den booko-ede fi en e moo en. San u mu du te a sani ya pasa? Wi á mu kuutu a sama, ma u mu soi en taki wi e booko wi ede anga en. Holi a pakisei taki di Yehofa be meke u, a á be meke u fu abi den booko-ede di wi abi aini a ten ya. Neen meke wi e fusutan saide wan sama di e dini Yehofa anga en hii ati sa taki sani sondee fu denki te den booko-ede fi en e moo en. Winsi a taki sani fu Yehofa di á bun, wi ati á mu boon neen. Wi á mu kuutu en tu te a taigi u wan sani di hati u.—Odo 19:11.
11. Fa owluman sa waka a Elihu baka te den e poti taawan a pasi?
11 Son leisi a de fanowdu fu poti wan sama di lai booko-ede a pasi (Gal. 6:1). Fa den owluman sa du a sani ya? Den mu waka a Elihu baka. A fasi fa Elihu aliki Yopu be soi taki a be e booko en ede anga en tuutuu (Yopu 33:6, 7). A baka di Elihu fusutan bun fa Yopu e denki fosi a be sabi fa a mu yeepi en. Owluman di e waka a Elihu baka e aliki bun te taawan e taki. Den e meke moiti tu fu fusutan san e miti den. Te den e du sani na a fasi ya, den o man doo a ati fu a sama di den e yeepi.
TAKI SANI DI E GI TAAWAN TAANGA-SIKIN
12. Fa Naomi be e fii di en man anga den boi fi en dede?
12 Naomi be lobi Yehofa anga en hii ati. Ma baka di en man anga den tu boi fi en dede, a á be wani den kai en Naomi moo. A be wani den kai en „Mara”. A nen ya wani taki „Bita” (Rut 1:3, 5, 20, 21). Winsi fa den sani ya miti Naomi, toku a main fi en di den e kai Rut á gwe fika en. A ná yeepi namo Rut be e yeepi Naomi anga san a be abi fanowdu, ma a be e gi en taanga-sikin tu. Rut soi Naomi anga den sani di a taigi en taki a lobi en. Den sani ya be e soi Naomi tu taki a sa fitoow Rut.—Rut 1:16, 17.
13. Saide wan sama abi toosutu fanowdu te en toowpaa dede?
13 Te wan toowpaa fu wan baala efuso sisa dede, u mu holibaka gi en. Wan toowpaa de enke tu bon di paandi koosube fu denseefi. Baka wantu yali den lutu fu den bon ya e beei miti. Efi i be o hali wan fu den bon ya puu, a taawan be o swaki. A so a de tu te wan fu den toowpaa dede. A taawan e kusumi wan hii pisiten. Luku a toli fu Paula *. A sisa ya man be dede wanboowanboo. A taki: „Mi hii libi be buuya. Mi be e fii swaki. A moo bun mati fu mi á be de a mi se moo. Na ala toli mi be e gi anga mi man. Te mi be e piisii, a be e piisii anga mi. Te sani be e moo mi, a be e holibaka gi mi. Ala yuu a be e aliki mi te mi be wani taki puu koko a mi ati. Mi be e fii enke den koti mi paati a mindii.”
Fa u sa holibaka gi wan baala efuso sisa te en toowpaa dede? (Luku paragraaf 14-15) *
14-15. Fa u sa gi wan sama taanga-sikin te en toowpaa dede?
14 Fa u sa toosutu wan sama te en toowpaa dede? A fosi sani di i mu du, a taki i mu taki anga en, winsi yu á sabi san i mu taki. Paula taki: „Mi e fusutan taki te wan sama dede, i nai sabi san i mu taigi den sama fi en. Yu e si enke yu o taki wan sani di o hati den. Ma pe fi i de pii, a moo bun fu taki wan sani.” Wan sama di de anga buduufu na ati nai si enke a omen kofaliki sani i mu taki fu toosutu en. Paula taki: „A be e bigi gi mi te den mati fu mi be taigi mi taki: ’Mi e kee pina anga i ye.’”
15 William uman dede wantu yali kaba. A taki: „Ai bigi gi mi te taawan e taki fu den bun sani di a uman fu mi be e du. Ai meke mi fii taki a be wan bun uman, sama be lobi en. A sani ya e toosutu mi tuutuu. Den sani di den e taki e gi mi
taanga-sikin, bika mi be lobi mi uman.” Bianca di man dede kaba taki: „Ai bigi gi mi te taawan e begi anga mi anga te den e leisi wan efuso tu tekisi gi mi. Mi e fii bun te den e gi toli fu mi man anga te den e aliki mi te mi e gi den toli.”16. (a) San u sa du gi taawan te wan sama fu den dede? (b) Enke fa Yakowbesi 1:27 e soi, da sowtu faantiwowtu wi abi?
16 Leti enke fa Rut tan holibaka gi Naomi, a so useefi mu holibaka gi taawan te den toowpaa dede. Paula taki: „Di mi man dede, a omen sama holibaka gi mi. Ma baka wan pisiten, den be bigin du den sani di den be gwenti baka. Ma a dede fu mi man, kengi mi hii libi. A wan gaan yeepi te taawan e fusutan taki yu abi toosutu fanowdu omen mun efuso yali baka te wan sama fi i dede.” A tuu taki ala sama de taa fasi. Son sama nai teke langa fu kisi denseefi te wan sama fu den dede. Ma taawan dati solanga ai du wan sani di en anga en toowpaa be gwenti du, ai fii enke a taade ya a sama fi en dede. A ná ala sama e tyali na aseefi fasi. A wan gaandi Yehofa gi u fu toosutu taawan te den toowpaa dede. A sani ya a wan faantiwowtu tu.—Leisi Yakowbesi 1:27.
17. Saide wan sama abi toosutu fanowdu te en toowpaa gwe fika en?
17 Wan taa sani di hati tuutuu, a te wan sama toowpaa gwe fika en. Joyce man fika en go teke wan taa uman. A taki: „A booko di u booko toow hati mi moo enke a dede di mi man be sa dede. Efu a be dede fu di
wan ongooku miti en efuso fu di a siki, da mi be o fusutan taki a ná anga en wani. Ma a fu seefi mi man gwe fika mi. A sani ya e du mi ogii te.”18. Fa u sa yeepi wan sama te en toowpaa gwe fika en?
18 Te wi e du pikinpikin sani gi wan baala efuso sisa te en toowpaa gwe fika en, wi e soi en taki u lobi en. Den abi bun mati fanowdu (Odo 17:17). Fa u sa de enke wan bun mati gi den? U sa kai den kon nyan wan pikin sani a wi osu. U sa wooko anga den aini a peleikiwooko efuso go koi anga den. U sa kai den wanwan leisi te wi e holi a Osufamii Anbegi. Efi yu e du a sani ya, yu o meke Yehofa piisii, bika a de „koosube fu den sama di booko-saka”, ’ai kibii den uman di ná abi man moo’.—Ps. 34:18; 68:5.
19. Te i luku san sikiifi a 1 Peitilisi 3:8, da san i de kabakaba fu du?
19 Dyonson moo, a Kownukondee fu Gadu o tii goontapu, da u „ná o membee” nawan sani di e gi u booko-ede moo. Wi e angii fu a ten di ’u ná o membee den fositen sani moo. Den sani de ná o kon a u pakisei moo tu’ (Yes. 65:16, 17). Ma fu nownow, meke u du san u poi fu holibaka gi useefi anga den sani di wi e du. Meke u gi useefi taanga-sikin tu anga den sani di wi e taki.—Leisi 1 Peitilisi 3:8.
SINGI 111 Den sani di e meke wi e poolo
^ paragraaf 5 Lot, Yopu, anga Naomi be e dini Yehofa anga den hii ati, ma toku a omen sani be e miti den di be e gi den booko-ede. Aini a artikel ya, wi o luku san u sa leli fu den sama ya. Wi o luku tu saide a de taanga fanowdu fu abi pasensi anga fu taki switi anga den baala anga sisa fu u te den abi booko-ede.
^ paragraaf 13 Son wan fu den nen aini a artikel ya kengi.
^ paragraaf 57 SAN WI E SI A DEN FOWTOW: Wan baala ati boon te neen ai „taki sani sondee fu denki”, wan owluman e aliki en anga pasensi. Bakaten di a baala ati koo, neen a owluman taki switi anga en.
^ paragraaf 59 SAN WI E SI A DEN FOWTOW: Wan yonkuu toowpaa de makandaa anga wan baala di uman dede. Den e luku wantu fowtow fu a uman.