WI E biibi taki Yehofa e tii a foluku fi en aini den ‘lasiti dei’ ya (2 Tim. 3:1). Ma ala u mu aliki Yehofa. A leti enke di den Islayelisama be de aini a sabana. Den be mu e aliki den tutu di den be e yee.

Yehofa be sende Mosesi fu a meke tu solufu tutu fu ‘kai a foluku fu kon makandaa. Anga den tutu ya a be mu e piki a foluku on yuu den be mu foloisi’ (Num. 10:2). Den pilisite be mu boo den tutu ya a omen fasi fu soi a foluku san den mu du (Num. 10:3-8). A omen fasi Gadu e leli a foluku fi en aini a ten ya. Wi o luku dii fasi fa ai leli u. U sa si den leli ya enke den tutu di den Islayelisama be e yee.

Te Yehofa be wani a foluku kon makandaa na a doomofu fu a tabernakel, di be de na a se pe a san e opo, da den pilisite be e boo den tutu a wan pasi (Num. 10:3). Ala den lo di be sete tenti lontu a tabernakel be e yee den tutu. Aini wantu miti namo den lo di be de koosube fu a tabernakel be e doo ape. Den taa lo di be de faawe be abi moo ten fanowdu fu doo na a tabernakel. Den be mu meke moo moiti tu. Winsi pe den be de, Yehofa be wani ala sama kon a wan fu yee san a be abi fu taigi den.

U nai kon makandaa a wan tabernakel aini a ten ya. Ma Yehofa e kai a foluku fi en fu kon makandaa ete. Wi e go a den konkelesi anga den taa gaan komakandaa di a olikanisâsi seeka gi u. Ná pikin moin sani wi e leli a den komakandaa ya. Na a hii goontapu a foluku fu Yehofa e leli denseefi sani. Den sama di e go a den komakandaa ya e piisii fu de makandaa anga den baala anga sisa. Son wan fu den a te a faawe den e komoto kon a komakandaa. Ma den sabi taki den e fende wini te den kon a den komakandaa.

Den sama di e tan faawe e fende wini fu den komakandaa? Eeye, denseefi e fende wini fu den komakandaa fu di den e wooko anga den nyun sani di den baala e koboloiki fu leli u. Wan baala di e holi peesi gi a edekantoo be go luku wan beikantoo aini Benin. A beikantoo ya be seeka sani fu den baala anga sisa di e tan a Arlit luku den lezing a tv. Aini a Sahara-sabana fu Niger a foto ya de. A tutenti a wan baala anga sisa, anga wantu taa sama be kon aliki den lezing ya. Winsi fa den be e tan faawe toku den be fii enke den be de makandaa anga den taa 44.131 baala anga  sisa di be de na a gaan komakandaa. Wan baala sikiifi taki: ‘Mi wani gi u daa anga mi hii ati taki u meke u si a tv fa sani waka a dei de. A sani ya e soi taki u lobi u tuutuu.’

Te den pilisite fu Islayeli be boo wan tutu namo ‘da a den man fu Islayeli wawan, di de enke edeman fu den dunsu sama’ be mu kon makandaa (Num. 10:4). Te den be kon makandaa da Mosesi be e leli den. A sani ya be o yeepi den fu du a wooko fu den moo bun. Efi yu a be wan fu den edeman ya, yu á be o meke ala moiti fu go na a tabernakel te den be kai i noh?

Den owluman aini a ten ya, a ná ‘edeman’. Den nai pee basi gi den sikapu fu Gadu tu (1 Peit. 5:1-3). Ma den e meke moiti fu solugu den sikapu fu Gadu bun. Neen meke den e de kabakaba fu go a den sikoo di a olikanisâsi e seeka gi den. Wan fu den sikoo ya na a Kownukondee Diniwooko-sikoo. A den sowtu sikoo ya den owluman e leli fa den sa luku a kemeente fu Gadu moo bun. Winsi yu á go a wan fu den sikoo ya, toku yu e fende wini te den baala di go a den sikoo ya e wooko anga san den leli.

Son yuu den pilisite be e boo a tutu a omen sowtu fasi baka makandaa. A sani ya e soi taki Yehofa be wani den foloisi komoto a pe den be de (Num. 10:5, 6). Te den be e foloisi a kampu, ala sama be e wooko taanga fu sani á be waka buuyabuuya. Kande son leisi a ná ala sama be o wani foloisi komoto a pe den be de. Saide?

Kande den be weli fu foloisi ala yuu. Kande den be e fii so tu fu di den á be e sabi a fesi on ten den be mu foloisi. ‘Son yuu a neti te enke mamanten namo a woluku be e de a wan peesi.’ Ma son leisi ‘a woluku be e tan tu dei, wan mun, efuso moo langa’ na a wan peesi (Num. 9:21, 22). Omen leisi den Islayelisama be mu foloisi? Wi á sabi pilisisi, ma kapitel 33 fu a Beibel buku Numeri e taki fu 40 peesi pe den Islayelisama be meke kampu.

Son leisi taawan be e fende wan peesi pe koo be de. Den be e poolo te den be fende den sowtu peesi ya aini a ‘gaan sabana di be e meke sama feele’ (Deit. 1:19). Den be e si enke te den be o foloisi baka, den á be o fende wan bun peesi moo.

Te den pilisite be boo a tutu di be e soi taki den be mu foloisi, da na ala den lo be e yee a tutu. Ma a ná ala sama be poi gwe na a wan yuu. Kande a be e taanga gi son sama fu wakiti a yuu di a lo fu den be mu foloisi. Te den pilisite be boo a tutu a fosi leisi, da a den lo di be de na a se pe a san e opo be mu bigin foloisi. Dati a be a lo fu Yuda, Isaskar anga Seibulon (Num. 2:3-7; 10:5, 6). Te den lo ya be gwe, den pilisite be e boo a tutu ete wan leisi. Da den dii lo di be e tan na a se pe a san e saka be mu foloisi. Den pilisite be e du a sani ya te enke a hii kampu be foloisi.

Kande ai taanga gi i son leisi fu fusutan saide den baala kengi son sani aini a olikanisâsi. Kande yu e fii enke den e kengi sani tumisi. Efuso kande i be lobi a fasi fa sani be de fosi. Kande a teke langa fosi i teke gwenti. Ma te wi e du sani enke fa den baala soi u, da Yehofa e piisii. Bakaten useefi o si den wini fu den sani di den kengi.

Aini a ten fu Mosesi, Yehofa tyai miliyunmiliyun man, uman anga pikin pasa aini a gaan sabana. Sondee Yehofa den á be o tan a libi. Yehofa e leli u san u mu du fu pasa a taanga ten ya. Ai yeepi u fu tan koosube neen. Ai yeepi u fu taanga u biibi. Neen meke u mu du ala san u man fu du san Yehofa taki leti enke fa den Islayelisama be e aliki a tutu.