Dwengi-iseefi—A wan fu den manii di u mu abi efu u wani Yehofa lobi u
‘Di wan sisa pikin fu mi piki mi gaan mofu mi kisi en neen neki, neen mi yoko en fu kii.’—Paul.
‘Te mi be de a osu mi ati be e boon fu ala pikin lawlaw sani. Te mi ati be boon, mi be e naki sutuu anga tafaa booko. Mi be e booko den pee sani fu den pikin, anga iniiwan taa sani di mi ana be kisi.’—Marco.
Kande te wi ati boon u nai ligei enke den tu man ya, ma toku ai taanga gi ala sama fu dwengi-denseefi son yuu. A moo gaan sani di meke ai taanga gi u fu dwengi-useefi a fu di wi abi sondu leti enke a fosi man Adan (Rom. 5:12). Son sama ati e boon gaw, leti enke Paul anga Marco. Ai taanga gi taawan fu den á pakisei sani di á bun. Son leisi den e pakisei sani di e meke den feele, efuso sani di e meke den fii booko-saka. Son sama e hulu, diingi sopi pasa peesi, efuso somoko takuu tabaka fu di den á poi dwengi-denseefi.
Te sama á poi dwengi-denseefi, den e poli den libi. Ma efu u meke moiti fu dwengi-useefi, a sani ya ná abi fu miti u. Wi o luku dii sani di o yeepi u fu du a sani ya: (1) San a wani taki fu dwengi-iseefi? (2) Saide a pelensipali fu abi a manii ya? (3) Fa u sa kon abi a manii ya, di ‘a yeye e meke sama abi’? (Gal. 5:22, 23) Baka dati wi o luku san u mu du te ai taanga gi u fu dwengi-useefi.
SAN A WANI TAKI FU DWENGI-ISEEFI?
Wan sama di poi dwengi-enseefi nai du ala san a fii, ma ai holi enseefi fu a á taki efuso du sani di Gadu á lobi.
Yesesi be poi dwengi-enseefi tuutuu
Yesesi be soi u san a wani taki fu dwengi-useefi. Beibel taki: ‘Te sama be e kosi en, a á be e kosi baka. Te den be e pina en, a á be e paamisi den fu du ogii anga den baka, ma a fika ala sani aini Gadu ana, bika a sabi taki neen e kuutu sani a wan letifasi’ (1 Peit. 2:23). Di den be sipikii Yesesi a wan ponsu, a be soi taki a poi dwengi-enseefi di sama be e soso en (Mat. 27:39-44). Boiti dati, a soi taki a be poi dwengi-enseefi tu di den keliki fesiman be e poti akisi gi en fu meke a taki sani di be sa tyai ogii gi en (Mat. 22:15-22). U sa waka a Yesesi baka te u luku san a du di den Dyu be wani fiingi siton naki en. Pe fu a du ogii anga den baka, a ‘go kibii, neen a komoto aini a tempel’.—Yoh. 8:57-59.
I si enke u poi waka a Yesesi baka? Eeye u poi. Apostel Peitilisi be sikiifi taki: ‘Kelestesi be nyan pina gi u, a soi wi fa u sa waka soifili neen baka’ (1 Peit. 2:21). Winsi fa wi abi sondu, tokuso u sa meke moiti fu waka soifili a Yesesi baka. Saide u mu meke moiti fu du a sani ya?
SAIDE A PELENSIPALI FU DWENGI-USEEFI?
Efu u wani Yehofa lobi u, u mu man dwengi-useefi. Winsi on langa wi e dini Yehofa kaba, efu wi á poi dwengi-useefi, a sani ya sa meke u taki, efuso du sani di o meke wi anga Yehofa poli.
Meke u luku a toli fu Mosesi. Beibel taki ‘fu ala libisama a goontapu, a Mosesi a be a moo safu-ati wan’ (Num. 12:3). A omen yali langa Mosesi be e pasensi anga den Islayelisama te den be e kuutu, ma wan dei a lasi enseefi. Mosesi ati boon di den bigin kuutu baka taki den ná abi wataa. A ligei anga a foluku a leisi ya. A taigi den taki: ‘Den sama ya wi abi taangayesi. Wi aliki san mi e taki. U wani u puu wataa aini a siton ya gi wi fu u diingi?’—Num. 20:2-11.
Mosesi lasi enseefi. Di Yehofa puu wataa aini a siton gi den fu den diingi, a á gi Yehofa gaandi (Ps. 106:32, 33). Neen meke Yehofa á gi en pasi fu go aini a Paamisi Kondee (Num. 20:12). Bakaten a musu hati Mosesi taki a lasi enseefi di en ati boon.—Deit. 3:23-27.
San a toli ya e leli u? Winsi on langa u de a waaleiti, wi á mu e taki goofu anga taawan, winsi den du wan sani di hati u. Te den meke wan fowtu wi á mu e taki goofu anga den tu (Efe. 4:32; Kol. 3:12). A tuu taki te wi e kon moo gaandi, ai moo taanga gi u fu abi boo anga taawan. Ma wi á wani a sani di be miti Mosesi miti u. Wi á wani wi anga Yehofa poli fu di wi á poi dwengi-useefi. Ma san o yeepi u fu kon abi a manii ya?
SAN U MU DU FU MAN DWENGI-USEEFI?
Begi Gadu fu a gi yu en santa yeye. Saide u mu begi Gadu fu a sani ya? Bika a dwengi di wan sama poi dwengi enseefi a wan fu den manii di a yeye fu Gadu e meke sama abi. Yehofa e gi den sama di e begi en a yeye fi en (Luk. 11:13). A santa yeye fu Yehofa o yeepi u fu man dwengi-useefi (Filip. 4:13). A yeye fu Gadu o yeepi u tu fu abi taa moin manii enke lobi. Lobi e yeepi u fu man dwengi-useefi.—1 Kor. 13:5.
Wai pasi gi iniiwan sani di sa meke a taanga gi i fu dwengi-iseefi
Wi á mu e luku efuso aliki sani di sa meke a taanga gi u fu dwengi-useefi. Wi á mu aliki poku efuso luku felon pe sama e du sani di Yehofa á lobi (Efe. 5:3, 4). U mu meke moiti fu wai pasi gi iniiwan sani di sa meke a moo taanga gi u fu dwengi-useefi (Odo 22:3; 1 Kor. 6:12). Kande ai taanga gi wan sama fu dwengi den sekisi fii fi en. A be o moo bun fu sowan sama á leisi buku efuso luku felon di e taki fu lobi toli.
Kande a á makiliki fu du a sani ya. Ma efu u meke moiti, Yehofa o gi wi a kaakiti fu man dwengi-useefi (2 Peit. 1:5-8). A o yeepi u fu wi á denki, taki, efuso du sani di á bun. A toli fu Paul anga Marco di u be taki fu den kaba, e soi taki a sani ya a tuu. Nownow den tu man ya poi dwengi-denseefi. Luku a toli fu wan baala di ati be e boon gaw te a be e lei wagi. Son yuu en ati be e boon te da a be e ligei anga taa sama di e lei wagi. San yeepi a baala ya? A taki: ‘Mi be e begi ala dei. Mi sutudeli den buku fu a olikanisâsi di e taki fu a dwengi di wan sama mu dwengi enseefi. Mi leli Beibeltekisi a ede di e taki fu a toli ya tu. Winsi fa a omen yali kaba mi e meke a moiti ya, tokuso ala mamanten mi abi fu membee miseefi baka taki mi mu dwengi miseefi te mi de a sitaati. Te mi mu go a wan peesi, mi e komoto moo fuuku tu. A sani ya e yeepi mi fu mi ati á boon te taa sama nai lei enke fa mi wani.’
SAN U MU DU TE WI Á POI DWENGI-USEEFI?
Ala wi e lasi useefi son leisi. Te a sani ya pasa, kande sen e kisi u fu begi Yehofa fu taigi en fa wi e fii. Ma a den yuu de wi abi Yehofa moo taanga fanowdu. Neen meke wi á mu daaidaai fu begi Yehofa. Akisi en fu a gi i paadon. Begi en fu a yeepi i, da i meke moiti fi yu á du aseefi sani baka (Ps. 51:9-11). Te yu e begi Yehofa anga i hii ati, i sa biibi taki a o aliki a begi fi i (Ps. 102:17). Apostel Yohanisi be taki a buulu fu a Manpikin fu Gadu ‘e kiin ala den sondu fu u’ (1 Yoh. 1:7; 2:1; Ps. 86:5). Ná feegete taki Yehofa e taigi den sama di e dini en taki den mu e gi taawan paadon ala yuu. Efu Yehofa wani libisama gi taawan paadon, da u sa biibi taki enseefi o gi u paadon tu.—Mat. 18:21, 22; Kol. 3:13.
Yehofa ati be boon a Mosesi di a lasi enseefi aini a sabana, ma a be gi en paadon. Beibel taki u mu waka a Mosesi baka, bika en a be wan man di be e dini Yehofa anga en hii ati (Deit. 34:10; Heb. 11:24-28). Winsi fa Yehofa á be meke Mosesi go aini a Paamisi Kondee, tokuso a o weki en baka. Mosesi seefi abi a howpu fu libi fu teego aini wan paladeisi a goontapu. Efu wi e meke moiti fu dwengi-useefi, useefi o abi a howpu fu libi fu teego aini wan paladeisi a goontapu.—1 Kor. 9:25.